العربية مش بدور من اول مرة

[mahmoud ghanem]

السلام عليكم
ربنا يكرمكم يا أستاذ سيد انت والاستاذ احمد علي تعاونكم وارائكم ومعلوماتكم القيمه اللي الواحد فعلا بيستفيد منها كثير فى كل الموضوعات
بصراحة المنتدى مش مخلينا عاوزين حاجة ربنا يبارك لكم راحمنا من استغلال الصنايعية
علشان مطولش عليكم هدخل فى الموضوع
معايا ابيزا 98 العربية مش فى كل الاوقات مش بتدور معايا من اول مرة او بمعنى اصح اسمع صوت المرش بس مش بتلقط دوارة .. لازم اقفل الكونت وارجع احاول تانى وبردوا مش فى كل الاحوال بتلقط لازم مرة او اتنين .. بس اكتشفت انى لما اشيل المفتاح وارجع ادور تانى ممكن تشتغل .. وممكن لاء وارجع اجرب تانى تروح شغالة

ولحد دلوقتى مش عارف السبب فى المشكلة دى ولا عارف كمان ايه اللى بيخليها تدور هل لما بقلب المفتاح ولا هى كدة كدة مش هتدور غير بعد 3 او 4 محاولات سواء قلبت المفتاح او لاء ؟؟

وسعات والله كتير بتدور على طول هتجننى :)

مع العلم البطارية جافة واللمبه الخضراء شغالة ..

افيدونى

وتحياتى للجميع

[Dr.Mostafa Anwar]

كان عندي مشكلة مشابهة لمشكلتك واكتشفت ان قواطيش البطارية لم تكن مربوطة جيدا على صوابع البطارية وتم تربيطها وحلت المشكلة تماما ... جرب وشوف يمكن تكون دي المشكلة اللي عندك :)

[windofchange]

وممكن تكون فبرة الكونتاكت عايزة تتغير ودي جزء من اجزاء الايموبلايزر يعني العيب كهربي بس نعمل القواطيش الاول زي ما د مصطفي قال ربطها كويس ونظفها بمزيل صدأ زي wd 40 وسنفرة معاه هي والقواطيش ذات نفسها

[Ahmed Mubarak]

السلام عليكم

جرب ذى الاخوة ماقالولك ولو الدنيا مظبطيتش غير قلب طرمبة البنزين الموضوع دا عندى بقاله اكتر من 3 او 4 شهور وبعد تغيير طرمبة البنزين الدوارة من اول مرة وكلة ذى الفل بفضل الله

[mahmoud ghanem]

انا هجرب موضوع قواطيش البطارية دى وانظفها كويس واربطها وهشوف كدة ويارب تبقى المشكلة فى القواشيط وبس
وهرد عليكم شكراً على الاهتمام

[Karim Ibiza]

بالاضافة لكل اللى فات اكشف كمان على البوجيهات

[sala7]

بالاضافة لكل ما سبق
لو العربية بتلقط مارش فقط لكن مابتدورش الاحتمالات :
- بوجيهات
- اسلاك بوجيهات
- موبينة (ignition coil) .
- خط التغذية من بعد فلتر البنزين لحد المكنة ممكن يكون نوعا ما مسدود
في الماكئن الالمانية ممكن تلاقي العجب و ممكن يطلع العطل في مكان لا تتوقعه ....

[ehab_mansour]

ههههههههه استكمالا لسلسلة الاضافة الي ما سبق
حضرتك لما تيجي تدور العربية اتبع الأتي :-
1- افتح كونتاكت
2- انتظر حوالي 3 الي 5 ثواني حتي تنتهي من مرحلة ال check every thing to start
3- دور العربية و ان شاء الله هتدور من اول مرة

ده طبعا لو كل اللي قالو عليه سليم و زي الفل من بوجيهات الي سلوك بوجيهات الي اسبراتير (و ما ادراك ما الأسبراتير و مشاكله و عدم فهم 99% من الصنايعيه لصيانته و تأثيره علي اداء العربية) الي تغذية بنزين و فلتر نضيف و طرمبه سليمة الي رشاشات سليمة و نضيفه الي فبرة كونتاكت سليمة .... و هكذا

و بالتوفيق ان شاء الله

[mahmoud ghanem]

القواشيط لقتها نظيفة جدا ومربوطة كويس ...
كدة بقى الاحتمالات كتير قوى ها بداء بالسهل هنظف البوجيهات لو محتاجة تنظيف او هغيرها لو محتاجة تتغير وربنا يسهل .. بصراحة اخر حاجة هبصلها هى طرمبة البنزين و الاسبراتير !!

فى حاجة كمان صوت المارش اللى بقلكم عليه هو مش صوت ان العربية عاوزة تقوم ومش بتدور ( هو صوت زى ما تكون العربية دايرة وانت تدور تانى بتسمع صوت كدة كلنا عرفينه بس انا مش عارف اوصفه ) هو دة اللى بسمعة مع وانه المرش

سؤال : انا معايا منظف الرشاشات stp لو فضيته على تفويلة ممكن تنظف خط التغذية من بعد فلتر البنزين لحد المكنة علشان لو فى سدد زى ما الاستاذ sala7 بيقول ؟؟ طبعاً دة بعد ما اتاكد ان البوجيهات سليمة والعيب مش فيها !!!


شكراً لاهتمامكم

[Karim Ibiza]

القواشيط لقتها نظيفة جدا ومربوطة كويس ...
كدة بقى الاحتمالات كتير قوى ها بداء بالسهل هنظف البوجيهات لو محتاجة تنظيف او هغيرها لو محتاجة تتغير وربنا يسهل .. بصراحة اخر حاجة هبصلها هى طرمبة البنزين و الاسبراتير !!

فى حاجة كمان صوت المارش اللى بقلكم عليه هو مش صوت ان العربية عاوزة تقوم ومش بتدور ( هو صوت زى ما تكون العربية دايرة وانت تدور تانى بتسمع صوت كدة كلنا عرفينه بس انا مش عارف اوصفه ) هو دة اللى بسمعة مع وانه المرش

سؤال : انا معايا منظف الرشاشات stp لو فضيته على تفويلة ممكن تنظف خط التغذية من بعد فلتر البنزين لحد المكنة علشان لو فى سدد زى ما الاستاذ sala7 بيقول ؟؟ طبعاً دة بعد ما اتاكد ان البوجيهات سليمة والعيب مش فيها !!!


شكراً لاهتمامكم

كده يبقى المشكلة كلها فى المارش
روح لكهربائى عشان يحله وهتلاقى المشكلة فى ترس مفوت

[mahmoud ghanem]

كده يبقى المشكلة كلها فى المارش
روح لكهربائى عشان يحله وهتلاقى المشكلة فى ترس مفوت

يعنى البوجيهات سليمة ومتعبش نفسى واروح للكهربائى على طول ؟؟؟

والمشكلة دى هتحتاج تغير مارش ولا اية بالظبط ؟؟؟

حاجة كمان اسئلتى كتيرة معلش

لو المارش هيتغير بيتكلف كام ؟؟ انتم عارفين داخلين على العيد والمصاريف كتير قوى الشهر دة يعنى لو مكلف يبقى يتأجل !!!

[SYD]

طبعا الأخوة قالوا كل حاجة وكل الأحتمالات الواردة لتأخير الدوارة
بس انا بستبعد حاجات كتير اوي - لأنك بتقول انها بتلقط من اول مرة واحياناُ من تاني او تالت مرة
بس عموما في شوية صيانات كدة كدة لازم تعملها حتي لو العيب مش منها

1- التأكد من سلامة وصلاحية البوجيهات وأسلاك البوجيهات
2- تنظيف وش الأسبراتير وأقطابه الداخلية الموصلة والشاكوش
3- تنظيف دورة البنزين بالكامل (منظف دورة البنزين stp)
4- التأكد من احكام ربط قواطيش البطارية
5- الكشف علي فبرة الكونتاكت
6- ضبط الأسبراتير والتأكد من تركيبه بشكل صحيح

لو بعد كل ما سبق العربية مازالت بتأخر في الدوارة
هتضطر تكشف علي المارش والموبينة

حاول في الحاجات البسيطة اللي تقدر انت تعملها بنفسك الأول ثم الأشياء الغير مكلفة واحنا هنتابع معاك ان شاء الله

والله المستعان
،
،

[Ahmed_Gallant]

السلام عليكم
لو الصوت اللى حضترك بتسمعه وانت بتحاول تدور هو زى ما بتقول لما تكون العربيه دايره وتدور تانى ده 100% مارش ومشكلته مش كبيره يعنى اى كهربائى يظبطهالك من 20 الى 40 جنيه على حسب وجود او ندره قطعه الغيار المفروض الصوت ده بيكون ششخخخخخخخخخخ او زى ترسين بيحكو فى بعض سؤال مهم بقى لما المارش بيلف الموتور هل بتدور من اول مره ولا ور ور ور ور ومتدورشى ؟ لان هنا تبقى الاحتمالات الاخرى زى بوجيهات وطرمبه بنزين واسبراتير
ولو كان المكنه بتلف بس مبتدورشى هلى بتفضل دايس شويه دوراه تروح لاقطه ولا لازم تقفل وتفتح كونتكت
بالنسبه للمارش لو بايظ لا قدر الله هتشوف المكنه بتاعتك كام سى سى وتشتريه بما لايزيد عن 200 الى 250 جنيه
قبل اى حاجه روح لكهربائى يبص على المارش مش هتخسر حاجه وطمنا يوم الاتنين

[mahmoud ghanem]

السلام عليكم
لو الصوت اللى حضترك بتسمعه وانت بتحاول تدور هو زى ما بتقول لما تكون العربيه دايره وتدور تانى ده 100% مارش ومشكلته مش كبيره يعنى اى كهربائى يظبطهالك من 20 الى 40 جنيه على حسب وجود او ندره قطعه الغيار المفروض الصوت ده بيكون ششخخخخخخخخخخ او زى ترسين بيحكو فى بعض سؤال مهم بقى لما المارش بيلف الموتور هل بتدور من اول مره ولا ور ور ور ور ومتدورشى ؟ لان هنا تبقى الاحتمالات الاخرى زى بوجيهات وطرمبه بنزين واسبراتير
ولو كان المكنه بتلف بس مبتدورشى هلى بتفضل دايس شويه دوراه تروح لاقطه ولا لازم تقفل وتفتح كونتكت
بالنسبه للمارش لو بايظ لا قدر الله هتشوف المكنه بتاعتك كام سى سى وتشتريه بما لايزيد عن 200 الى 250 جنيه
قبل اى حاجه روح لكهربائى يبص على المارش مش هتخسر حاجه وطمنا يوم الاتنين

هو صوت ورررررررر بزنه زى ترسين بيحكو فى بعض او زى صوت حاجة بتلف بس خشنه شوية .. والصوت دة العربية مبتلقطش معاه اى حاجة يعنى استحالة تدور .. لازم اقفل واعيد المحاولة لحد ما تلقط مرة واحدة
والعربية لما بتلقط يعنى الصوت اللى كان بيطلع دة مبسمعوش نهائى يعنى تلقط على طول من غير صوت كانها زى الفل ...

[mahmoud ghanem]

طبعا الأخوة قالوا كل حاجة وكل الأحتمالات الواردة لتأخير الدوارة
بس انا بستبعد حاجات كتير اوي - لأنك بتقول انها بتلقط من اول مرة واحياناُ من تاني او تالت مرة
بس عموما في شوية صيانات كدة كدة لازم تعملها حتي لو العيب مش منها

1- التأكد من سلامة وصلاحية البوجيهات وأسلاك البوجيهات
2- تنظيف وش الأسبراتير وأقطابه الداخلية الموصلة والشاكوش
3- تنظيف دورة البنزين بالكامل (منظف دورة البنزين stp)
4- التأكد من احكام ربط قواطيش البطارية
5- الكشف علي فبرة الكونتاكت
6- ضبط الأسبراتير والتأكد من تركيبه بشكل صحيح

لو بعد كل ما سبق العربية مازالت بتأخر في الدوارة
هتضطر تكشف علي المارش والموبينة

حاول في الحاجات البسيطة اللي تقدر انت تعملها بنفسك الأول ثم الأشياء الغير مكلفة واحنا هنتابع معاك ان شاء الله

والله المستعان
،
،

يعنى يوم الاثنين اروح للميكانيكى مش كهربائى ؟؟؟