حليت مشكلة الكهرباء

[SYD]

السلام عليكم ورحمة الله وبركاته أعضاء قسم سيات الجميل

كان عندي مشكلة في الكهرباء منذ فترة طويلة وماكنتش عارف ان عندي مشكلة والأغرب اني ماكنتش ملاحظ اي حاجة تدل علي انها مشكلة في الكهرباء

وزي ما انتوا عارفين ان عربياتنا دي ماينفعش فيها اي تهريج في كهربتها ولو في اي خلل - حتي لو بسيط - بردو هيأثر في اي جزء مرتبط بمسبب المشكلة

طب نبدأ بقي - ولا هنفضل نتكلم كتير ؟؟

بداية المشكلة

من حوالي 6 او 7 شهور دخلت المحطة امون بنزين
كان المؤشر عند ال1/4 - ومعني انه عند الربع والتانك عندي 40 - يبقي فاضل للتفويل 30 لتر
دخلت مونت وقولتله حط ب 50 جنيه
شوية ولقيت العامل بيقولي العربية فولت
طب يا سيدي - شاكر جدا ليك
بدور وخارج من المحطة لقيت المؤشر عند ال3/4 - ومعني كدة انه حطلي 20 لتر فقط !!!!!
قولت اكيد المؤشر مهيس او معلق وعايزله كام مطب محترمين عشان يتظبط
وبالفعل نقيت كل مطبات الشارع من المحطة لحد بيتنا ودخلت فيها كلها - ولحد لما روحت والمؤشر عند ال3/4 مش راضي يتحرك من مكانه
وطول السكة عمال اقول للمدام الواد ابن اللذينة سرقني وحطلي 20 لتر بدل 27 وضرب الفرق في جيبه
روحت الولاد البيت والدم ضارب في نافوخي
قولت مابدهاش - وروحت نازل جري ورايحله وداخل علي نفس الطرمبة وعلي نفس العامل
قولتله : ممكن تفولي العربية
قالي : يا استاذ مانت لسة مفولها
قولتله : معلش ! خدني علي قد عقلي
قالي : حاضر
وبالفعل بيضرب المسدس في فاتحة التانك وبيدوس ____
لقيت العربية مفولة والبنزين بيقع من التانك
قولتله وريني كدة !!!!
ومسكت انا المسدس وحاولت افول - لقيت نفسي شايف البنزين من زور التانك والبنزين بيقع من التانك
قالي : انا مش هسرقك يا باشا -
قولتله : طب تعال شوف المؤشر وانت تعذرني
وعشان اطايب خاطره - بوست علي راسه عشان يسامحني اني ظلمته وكانت داخل اتخانق معاه

ومن لحظتها وانا دماغي هتشت ومش عارف التانك ماله
وفضلت استخدم منظفات وغيرت فلتر البنزين مرتين ومفيش فايدة
العربية مش بتفول ابداً
لدرجة شكيت اني اخدت مطب محترم طبقلي التانك وخلاه بيفول بدري

أعراض أخري للمشكلة

لاحظت من فترة ليست بالقصيرة - ان الكلاكس صوته واطي اوي
روحت لواحد حبيبي (اللي انا اساسا شاريه منه) وفضل يرجلش فيه يمين شمال وفي الأخر قالي الكلاكس اتحرق
طبعا انا توقعت ذلك - لأن الكلاكس عندنا مكانه عجيب حبتين (تحت المقص وراكب في القنطرة الأمامية تحت الردياتير) وخصوصا ان وقتها مكنتش مركب لسة الكرتيرات
فقولت اكيد دخلته مياة من الطريق واتحرق بسبب عدم وجود كارتيرات (رغم انه كدة كدة ورا الكارتيرات ووجودها زي عدمها بالنسباله)

_______________________

بقالي فترة بشتكي من ضعف الكشافات عندي وان الأضاءة ضعيفة
واللي زود الأحساس عندي - كان واحد زميلي راكب جمبي وكنا رايحين نتعشي في المهندسين الساعة 2 الفجر وطالعين الدائري - لقيته بيقولي نور النور يابني وانت ماشي

قولتله طب مانا منوره !!!

________________________

كنت مرة قاعد مع اصحابي علي القهوة وركنت العربية في شارع جانبي وسايب النور الصغير منور
انا بحب اعمل كدة علشان لو حد جاي يبقي شايف العربية
ودايما بعمل كدة مش اول مرة
المهم
خلصنا قعدتنا وقولت لأصحابي تعالوا اوصلكم في سكتي
بدور - مش راضية تدور

____________________________

ماشي علي الطريق ولقيت عربية سيات ابيزا راكنة علي الطريق (طريق اكتوبر الواحات) وعطلانة
نزلت اشوف الدنيا فيها ايه ولو اقدر اساعد بحاجة
نزلت وسيبت النور الصغير بردو !! والكاسيت شغالين والأنتظار
مكملتش ربع ساعة - وجيت اركب وادور
بردو مش راضية تدور - وبدل ما اساعد الراجل - قولتله معلش بعد أذنك زقة

__________________________

أخر حاجة -
باخد مطب وهديت اوي فيه - وجيت طالع - العربية بطلت
بدور مش بتدور
شابين حلوين كدة - ربنا يبارك فيهم - ادوني زقة وهووب العربية دارت
لما وقفت بعدها بطلت وبدور مش بتلقط مارش
عرفت ان القوشاط بتاع البطارية اتهز من المطب (مع انه مكنش جامد للدرجة)
دقيت عليه دقتين - العربية دارت وزي الفل

ومن بعدها بقت كل شوية - لما ابطلها واجي ادور تاني تقطع مارش
انزل اديها دقتين علي القوطاش تدور زي الفل

_________________

اكتشاف الحل

نزلت اشتري حاجة وبعد مارجعت بدور مش بتدور
قولت يا أم القوطاش
اديته دقتين مش بتدور
دقتين مش بتدور
خلعته وصنفرت مكانه (صباع البطارية) بردو مش بتدور
ركبته كويس وبديلة دقة - بعزم شوية - لقيته اتكسر

روحت لواحد كهربائي - قريب من مكان الحادث - قالي مابطلعش حد من الورشة
زقها انت وهاتهالي
سيبته وروحت لواحد بتاع بطاريات واطارات
اشتريت منه قوطاش وقولت اركبه انا بنفسي
الحمد لله لسة بصحتي

وفعلا
روحت عند العربية وطلعت العدة المتينة واشتغلت انا فيها
ركبت القوطاش اي كلام لحد لما ابقي اروح لأي كهربائي
وبدور - دارت

روحت للكهربائي اللي مارضيش يخرج حد من ورشته وخليته يركب القوطاش صح
وفعلا قص القوطاش القديم كان الأصلي
وركب الجديد علي نظيف

خلصت المسائل كلها ومشيت من عنده
وانا بلف بضرب كلاكس - حسيت ان صوته بقي اعلي من الأول
توقعت اني هلاقي النور هو كمان بقي احسن - وبالفعل
النور فعلا بقي احسن من الأول 0 علي الأقل بقي باين اني منوره

والمفاجأة الكبري

بفول من يومين العربية - لقيتها بتفول للأخر


شكرا لحسن المتابعة
وتحياتي ليكم جميعا

وان شاء الله نتقابل في تقرير جديد مع مشكلة جديدة

والله المستعان
،
،

[alzelafy]

و لسه ياما هنشوف العجب حاجه مكنتش تخطر على بال اى حد يعنى لو رحت لكهربائى و قلتله على المشاكل دى عمرو ما كان هيقلك قواطيش البطاريه

[S O P H O S]

الحمد الله انها اتحلت
وفعلا الحوار ده كان عندي فالفيات بس بدون اعراض عداد البنزين
ربنا يستر طريقك اخي الكريم ..

[أبو صلاح]

تصدق انا عندي نفس المشكلة دي ومكنتش عارف سببها ومكنتش عايز اوجع دماغي بيها
والعربية قعدت مركونة فترة كبيرة ولما جيت غيرت البطارية وغيرت معاها قطاش بس بتاع البطاريات هو اللي ركبه ممكن يكون هو ده اللي مسبب المشكلة عندي ؟

ان شاء الله لما انزل اجازتي دي اول حاجة افكر اعملها يمكن مؤشر البنزين يتظبط ولما افول يوصل للاخر وميبقاش على 3/4

[Karim Ibiza]

الحمد لله انها جت على قد كده
بس أكيد كلنا اتعلمنا حاجة مهمة جدا.... وهى انك تكبر دماغك شوية لأنك لو مكنتش كبرت دماغك على كل الاعطال دى كان زمانك مغير حاجات كتييييير وبرده العيوب كانت هاتفضل موجودة لأنك اكيد شكيت فى العوامة وشكيت فى البطارية وشكيت فى الانوار
بس فعلا حاجات متخطرش على البال ان ليها علاقة ببعض خصوصا موضوع التانك

[Khaled Online]

شكرا للإفادة المهمة والحمدلله إنها حاجة بسيطة :)

[Ahmed Mubarak]

السلام عليكم

فينك من بدرى كل اللى انت بتحكى فية انا عايشة بقالى فترة ولسه مغير البطارية من اسبوع بسبب ولسه المؤشر عندى على 3/4 وعندى فردة كلاكس فاصلة
ان شاء الله هغير القواطيش واشوف النتيجة

[SYD]

و لسه ياما هنشوف العجب حاجه مكنتش تخطر على بال اى حد يعنى لو رحت لكهربائى و قلتله على المشاكل دى عمرو ما كان هيقلك قواطيش البطاريه

بالفعل دة حصل
بتاع الكماليات كل تفكيره ان الكلاكس هو اللي بايظ

الحمد الله انها اتحلت
وفعلا الحوار ده كان عندي فالفيات بس بدون اعراض عداد البنزين
ربنا يستر طريقك اخي الكريم ..

علشان عندك العوامة مختلفة عن العوامة في الأبيزا
انا كان ليا سابقة قبل كدة مع المؤشر بتاع البنزين
وبردو كان بسبب تهييس في كابلات الضفيرة

شكرا علي الدعوة
وربنا يستر طريقنا جميعا

تصدق انا عندي نفس المشكلة دي ومكنتش عارف سببها ومكنتش عايز اوجع دماغي بيها
والعربية قعدت مركونة فترة كبيرة ولما جيت غيرت البطارية وغيرت معاها قطاش بس بتاع البطاريات هو اللي ركبه ممكن يكون هو ده اللي مسبب المشكلة عندي ؟

ان شاء الله لما انزل اجازتي دي اول حاجة افكر اعملها يمكن مؤشر البنزين يتظبط ولما افول يوصل للاخر وميبقاش على 3/4

ان شاء الله تطلع مشكلة بسيطة
وربنا يرجعك بالسلامة

[SYD]

الحمد لله انها جت على قد كده
بس أكيد كلنا اتعلمنا حاجة مهمة جدا.... وهى انك تكبر دماغك شوية لأنك لو مكنتش كبرت دماغك على كل الاعطال دى كان زمانك مغير حاجات كتييييير وبرده العيوب كانت هاتفضل موجودة لأنك اكيد شكيت فى العوامة وشكيت فى البطارية وشكيت فى الانوار
بس فعلا حاجات متخطرش على البال ان ليها علاقة ببعض خصوصا موضوع التانك

انا دايما بقول كدة
مفيش داعي للتسرع
الواحد لازم يفكر علي مهله - ويحاول بالعقل المجرد يمشي ورا مشكلته ويسأل ويحلل ويجرب وان شاء الله هيوصل للحل الصح

شكرا للإفادة المهمة والحمدلله إنها حاجة بسيطة :)

الحمد لله
الموضوع كله اتكلف 5 جنيه قوطاش و10 جنيه مصنعية

السلام عليكم

فينك من بدرى كل اللى انت بتحكى فية انا عايشة بقالى فترة ولسه مغير البطارية من اسبوع بسبب ولسه المؤشر عندى على 3/4 وعندى فردة كلاكس فاصلة
ان شاء الله هغير القواطيش واشوف النتيجة

اتأكد الأول قبل التغيير
وان شاء الله تطلع منها

تحياتي يا حاج احمد

[ahmedfrancais]

والله انا عندى مفسى المشكلة يابشمهندس سيد ..ومش عارف اعمل اية ..كويس انك قولت تجربتك عشان كلنا نفكر فيها قبل ما نروح لكهربائى يبوظ الدنيا ...شكرا ليك بجد

[SYD]

والله انا عندى مفسى المشكلة يابشمهندس سيد ..ومش عارف اعمل اية ..كويس انك قولت تجربتك عشان كلنا نفكر فيها قبل ما نروح لكهربائى يبوظ الدنيا ...شكرا ليك بجد

ان شاء الله تطلع حاجة بسيطة

[matrix012]

سبحان الله
عارف يا محمد انتا لو كنت روحت عند اى كهربائى كان اشتغل نفسه قبل ما يشتغلك وكان استحاله ييجى على باله موضوع القطاش ده رغم ان من البديهيات انه يشوف مصدر الكهرباء سليم ولا فى مشكله قبل ما يفكر فى تغيير اسلاك او فيش او ...........
بس بغض النظر يا معلم انا عجبانى كمية الموشن الى فى الموضوع ده تحس كده انها اسبيشيال
والحمد لله ان المشكله عندك اتحلت
وربنا يستر طريقى وطريقكم
وكل سنه وانتو طيبين

[SYD]

سبحان الله
عارف يا محمد انتا لو كنت روحت عند اى كهربائى كان اشتغل نفسه قبل ما يشتغلك وكان استحاله ييجى على باله موضوع القطاش ده رغم ان من البديهيات انه يشوف مصدر الكهرباء سليم ولا فى مشكله قبل ما يفكر فى تغيير اسلاك او فيش او ...........
بس بغض النظر يا معلم انا عجبانى كمية الموشن الى فى الموضوع ده تحس كده انها اسبيشيال
والحمد لله ان المشكله عندك اتحلت
وربنا يستر طريقى وطريقكم
وكل سنه وانتو طيبين

والله يا مصطفي ان جيت للحق - انا بقالي فترة بشتكي من الكابل دة وخصوصاً انه كان بيملح بشكل غير عادي - والسبب ان القوشاط مش بيربط كويس
بس لو كهربائي ابن جنيه كان هيعرفها
بس هما بيبصوا علي عيب عيب بدون ربط العيوب ببعض
والواحد مش بيتعلم ببلاش
الحمد لله

وانت بالصحة والسلامة يا حبيبي
واشوفك قريب علي خير ان شاء الله

[mahmoud ghanem]

الف مبروك الاول على المشكلة اللى اتحلت عندك
فعلاً الخبرة دى مش ببلاش ..
مشكلة زى اللى حضرتك شرحتها دى بتأكد ان كلنا اتفتى علينا كتير قبل كدة وغيرنا حجات كتير بدون داعى ضريبة الفتيي :(
ربنا يسترها والحمد الله ان فيه منتدى رائع وناس زى العسل هنا

[SYD]

الف مبروك الاول على المشكلة اللى اتحلت عندك
فعلاً الخبرة دى مش ببلاش ..
مشكلة زى اللى حضرتك شرحتها دى بتأكد ان كلنا اتفتى علينا كتير قبل كدة وغيرنا حجات كتير بدون داعى ضريبة الفتيي :(
ربنا يسترها والحمد الله ان فيه منتدى رائع وناس زى العسل هنا

الله يبارك فيك
مما لا شك فيه - ان اكيد اتعمل علينا شغل السنين
انا حاليا مش بروح للميكانيكي او الكهربائي غير لما اكون عارف انا رايح اعمل ايه
بطلت اطلع اجري علي الصنايعي واخليه هو يشخصلي العطل
انا بروح اقوله انا بشتكي من كذا - غيرلي كذا
والفضل في ذلك بعد الله تعالي - الي هذا المنتدي الجميل وهذا القسم الرائع بكل اعضاءه