الشكمان اتخرم والردياتير اتكسر (سلسلة الأبيزا عربية اعتمادية)

[SYD]

السلام عليكم ورحمة الله وبركاته
ازيكم يا شباب الابيزا

عاملين ايه ؟؟؟
اتمني تكون الفتة والرقاق واللحمة الضاني والريش ماأثرتش علي نشاطكم في القسم

الحمد لله بفضل الله - النهاردة كان اول يوم عمل بالنسبالي
نزلت الصبح زي البني أدمين في طريقي الي الشغل بالسادس من اكتوبر
روحت الشغل وكله تمام التمام
وانا راجع من الشغل ماكنش تمام التمام

روحت الأول مشوار في حتة اسمها محور الكفراوي
وانا راجع - كنت ماشي في البطئ - اتفاجأت بمطب عسل
دوست فرامل وفوق المطب سبتها
بس للأسف سرعتي كانت عالية ولبست المطب لبسة محترمة ببوز العربية

ماخدتش في بالي ومشيت

بس قلبي كالني - قرب محطة كالتكس الحصري

نزلت ببص
لقيت الردياتير بيجيب مياة - الكساحة مفكوكة

بطلت العربية وسيبتها تهدي
وبفتح القربة -
صحراء
مافيهاش ولا نقطة ماية

كان معايا زجاجة 2 لتر في شنطة العربية
فضيتها كلها
واتفاجأ - ان كل الماية الي حطيتها - بتنزل من الناحية التانية زي الحنفية

وقفت واحد بتاع دليفري
بسأله عن حد بتاع ردياتر
طبعا كله قافل عشان العيد
قالي روح المحطة هتلاقي فيها بتوع صيانة

وقد كان

روحت ويا ريتني ما روحت
طبعا انا طوول عمري اعرف انهم مش تمام - ومش بحب اتعامل معاهم - بس المضطر يركب الصعب
روحت - والراجل نزل وبص وقالي الردياتير مكسور
المهم جاب حتة بلاستيك وقالي هاتلي انبوبتين لحام علي البارد (ايبوكسي)
لحمها
الردياتير الحمد لله بقي بينقط مش بيشر زي الأول
طبعا دة مسكن علشان اعرف انزل بيها فيصل

حسابك كام يا عمو ؟؟؟؟
بيقولي بأسف وأشفاق لحالتي : هات 60 جنيه
كام ؟؟؟؟
60 جنيه
ليه ؟؟؟؟؟
دانت حتي عملته وهو راكب ولحمت فقط - ومازال بينقط - اومال لو كان منع كنت هتقولي كام ؟؟؟
ماليش دعوة يا باشا - دي اسعار خدمات المحطة وانا شغال علي ليستة وبلا بلا بلا
طب اقولك هات 50
ليه بردو ؟؟؟؟؟
كتيررررررررررررررررررررررررررررررررررررررررررررررر رررررررررررررررر فحت
اخر كلام هات 40

خلي بالك انه في الأول بيقولي دي اسعار محطة !!!!!!!!
لا وبيقول لزميله ايه ؟؟؟ خلاص بقي يا فلان ماتقولش انك لحمته - قول انه مجرد كوليه واتربط
كوليه ب 40 جنيه
وبعد ما حاسبته - بيقولي وراضي بقي الراجل اللي تعب
الفلوس دي حساب المحطة - اديله حاجة يشرب بيها شاي

حسبي الله ونعم الوكيل
والله مش مسامح في كل مليم دفعته
صحيح هو حللي ازمة وانقذني من موقف حرج واني اقطر العربية والهجس دة كله
بس هو استغل الموقف لأننا في عيد وعارف انه الوحيد اللي فاتح في الصحرا دي
هو يظهر فكرني واخد العربية من مامتي وطالع اعيد بيها مع اصحابي وصحابتي في النادي وهنروح نجيب لبان ناكله ونايتي
مايعرفش اننا يوم 29 في الشهر وجو عيد والحالة "ج" - ومش جيم بس دي Z

طبعا روحت العربية وركنتها لحد ان شاء الله يوم الجمعة لما اشوف هعمل فيها ايه

تحياتي - واسف علي الأطالة

أشوفكم علي خير ان شاء الله في تقرير جديد وصيانة جديدة

والله المستعان
،
،

[waelfarid]

salamat
حمدا لله علي سلامتك والحمدلله ان المكنة ماراحتش بضياع الميه وقدر ولطف

[matrix012]

لا اله الا الله
قدر الله وماشاء فعل وربنا يكفيك شرها يا محمد

[SYD]

الحمد لله رب العالمين
متشكر اوي يا جماعة علي الرد

[ehab_mansour]

خير يا صديقي ولا يهمك و بعدين معملتهاش انت ليه
نفس القصة زمااااااااااااااان حصلت معايا مع نفس العربية و فكيت الرادياتير وطلعته بره لحمته و ظبطته و رجعته تاني مكانه و ده كان في منتصف طريق اسكندرية الصحراوي و رجعت القاهرة و تاني يوم فكيت الرادياتير تاني و نزلت الحرفيين غيرتله الماسورة الفيبر اللي في الجنب بحوالي 100 جنيه او تزيد قليلا ثمن و مصنعيه و رجعت ركبته و كله تمام

بعدها بفترة حصل نفس القصة في الجنب الاخر و برضه وانا راجع من اسكندرية و لكن في اول الهرم و دي مرتها قفلت الدورة و كملت سواقة من غير رادياتير لحد عين شمس امشي شوية و ابطلها شويه و هكذا

ايييييييييه كانت ايام حلوه مع الابيزا الشقية

نصيحة اخوية من اخوك حاول تشتري رادياتير كامل لأن مع اي ظرف اخر هتلاقي نفس القصة هتحصل مع الجنب التاني لأن الفيبر له عمر و بينتهي ولو لقيت الجنب ده غالي لأني ملقيتهوش غير بطلوع الروح يبقي غيره كله زي مقلتلك و بالتوفيق يا صديقي

[SYD]

خير يا صديقي ولا يهمك و بعدين معملتهاش انت ليه
نفس القصة زمااااااااااااااان حصلت معايا مع نفس العربية و فكيت الرادياتير وطلعته بره لحمته و ظبطته و رجعته تاني مكانه و ده كان في منتصف طريق اسكندرية الصحراوي و رجعت القاهرة و تاني يوم فكيت الرادياتير تاني و نزلت الحرفيين غيرتله الماسورة الفيبر اللي في الجنب بحوالي 100 جنيه او تزيد قليلا ثمن و مصنعيه و رجعت ركبته و كله تمام

بعدها بفترة حصل نفس القصة في الجنب الاخر و برضه وانا راجع من اسكندرية و لكن في اول الهرم و دي مرتها قفلت الدورة و كملت سواقة من غير رادياتير لحد عين شمس امشي شوية و ابطلها شويه و هكذا

ايييييييييه كانت ايام حلوه مع الابيزا الشقية

نصيحة اخوية من اخوك حاول تشتري رادياتير كامل لأن مع اي ظرف اخر هتلاقي نفس القصة هتحصل مع الجنب التاني لأن الفيبر له عمر و بينتهي ولو لقيت الجنب ده غالي لأني ملقيتهوش غير بطلوع الروح يبقي غيره كله زي مقلتلك و بالتوفيق يا صديقي

اهلا يا بشمهندس
والله ماعملتهاش انا ليه - لأن الموضوع كان يتطلب اني انام تحت العربية وانا للأسف ماكنش معايا فرشة دي 1
2- الكوريك اللي معايا كوريك فولكس - وانا لا أأمن اني انام تحت العربية ويكون هو اللي رافعها
3- مش معايا ماية ولا الأيبوكسي (غير اني ماكنتش عارف ان الجانب الفيبر هو اللي مكسور - انا فاكر الكسر في الكوعة )

انا افتكرت اني لما اروح المحطة هيطلع الردياتير برة ويلحمه بالألومنيوم والنار وشغل الردياتير - لكن لقيته هيعمله بالأيبوكسي وندمت فعلا اني ما عملتهاش انا بس ارجع تاني لمشكلة الكوريك

انا علي العموم هصلح الجنب بتاعة او العلب كما يطلق عليها والراجل كان قايلي 150 جنيه
لأني بقالي فترة ليست بالقصيرة بشتكي من تسريب مياة والمياة بتنقص يوميا وبزودها يوميا

علي فكرة ال150 شاملين ثمن العلب والمصنعية وتفصيل قاعدة
وانا هصلحه ان شاء الله مؤقتاً وهمشي لأخر الشتا وهجيب طقم التبريد الكبير علي الصيف الجاي وهشغل التكييف وهظبط الدنيا كلها بأذن الله

ان الله مع الصابرين
والدنيا مش هتطير

دة مبدأي - وان شاء الله هظبط العربية واحدة واحدة زي مانت عارف
انا اساسا ماغيرتش الردياتير من ساعة الحادثة - فكتر الف خيره علي كده والحمد لله علي كل حال

والله المستعان
،
،

[mahmoud ghanem]

الحمد الله انك لحقت المكنه وقدر ولطف
وبصراحة موضوع الاستغلال دة اصبح هو الاساس
اى حد بيفتح فى اجازات العيد او على الطرق السريعة بيبقى مستنى زبون بس
الحمد الله انها جت على قد كدة

[Ahmed_Gallant]

قدر الله وما شاء فعل
شكل موضوع الردياتير ودوره الميه واخدله يومين معانا كده الحمد لله على كل شئ
المهم انا شايف ان الردياتير عندك اتخبط فاتكسر يعنى مش سرب لوحده فانا شايف انه يمشيك للصيف بس تلحم الكلام ده كويس بعد ما تغسله وبلاش ال150 وابقى وفرهم للردياتير اللى جى
ولا نراك فى مكره يا صاحبى

[ahmedfrancais]

معلش يا هندسة ... الاستغلال فى الظروف اللى زى دى طبيعى جدااا وانت كمان عملت الصح لانك مش كان فى اختيار تانى قدامك ..المهم خلى بالك من المطبات بجد لانها لازم تلبسك فى اى حاجة ... والحمد لله انها جت بسيطة وربنا يكفيك شر مطبات مصر ويخليك عربيتك ..

[3ateef]

حسبى الله ونعم الوكيل فى كل اللى شغالين فى كل بنزينات كالتكس على مستوى الجمهورية, ربنا ينتقم منهم واحد واحد بداية من اصحاب المحطات لأصغر كلب فيهم.

[SYD]

الحمد لله بفضل الله علي كل حال
انا غيرت الردياتير بواحد جديد

http://www.nilemotors.net/Nile/316513-99.html#post3874608037

وربطت الشكمان من عند الفرن والأفيز بتاع الماسورة

والحمد لله علي كل حال

تحياتي وشكري لكل من قام بالرد