Tweet
السلام عليكم
حاله العربيه
عربيتى ابيزا 94 نازل فيها مكنه 1400 apq ال8 صباب على الفتيس القديم بتاع الكربراتير الموتور نازل بالكنترول بتاعه ونص ضفيره من ناحيه الموتور بس للعلم العربيه اتركنت 4 سنين بحالهم وانا واخدها على حالتها من غير موتور وبدات اصرف عليها
المشاكل اللى تم حلها فى الموتور
كان فى بعض المشاكل فى الموتور ومبرجل جامد وبيخنق لما بدوس بنزين وممهما افضل دايس ميجمعشى سرعات غير لما اسايسها وحل المشاكل على مراحل
1- نضفت البوابه تنضيف جاف وبعدين زيتها بwd40 كل ده وانا فاككها من العربيه
2- غيرت حساس الايرماس اللى راكب فى المانفولد بواحد استيراد وظبط الاسبراتير على النص
الشغل تم يدوى بمساعده من واحد صاحبى فى تركيب الحساس
بعد ما عملت كده العربيه اتظبطت من حيث الميكانيكا والحمد لله مش مزعلانى فى حاجه نيجى بقى للكهربا
المشاكل اللى تم حلها فى الكهربا
مفتاح الكونتكت كان بايظ واخره انه يسوجر الطاره وكان معمول شغل بلدى من بره زراير وكده وكانت الطاره شكلها وحش جدا وكان الحل انى اشتريت قطمه كامله متحركه بالمفتاح بدراعات النور وركبتها وشغلت الايموبلايزر وعملت بيه موضوع منفصل واتحلت كل مشاكل الدواره خالص والطاره بتسوجر وكل الناس بقت مبسوطه
كان الفريم اللى فى النص بايظ كسيته جلد بعد ما جمعت القطع المكسوره جنب بعض بس للاسف زى ما قاللى المهندس ايهاب وهو ان الشمع اللى كنت لازق بيه بدأ يفك وخله السنان مستحملتشى وده لان الفريم ده موقعه فى اضعف حته فى الانتريور وعشان كده بيلبس كل الصدمات
كده انا وضحت حاله الحاجات اللى كانت بايظه وصلحتها نيجى للشغل اللى انا محتار اعمل مين فيهم الاول
المشاكل اللى موجوده تفصيلا
1- شاشه العدادات شغاله ما عدا امبير الكيلومتر - امبير الاربى ام - مؤشر البنزين - الساعه الديجيتال والعربيه دايره فقط لما بتكون مبطله الساعه بتكون شغاله عادى بعرف سرعتى ازاى وانا مسافر عن طريق الجى بى اس باقى الانوار شغاله زيت دينمو نور عالى نور واطى (هاند بريك بتعلق) اشارات
2- الهاند بريك ضعيف لو على مزلقان شديد مبتوقفشى العربيه بس بتنفع فى الركنات العاديه شديتها قبل كده بس مفيش فايده ده غير ان الفرامل ورا ضعيفه شويه بس فى الفرامل الفجائيه الاربع عجلات بيكلبشوا
3- العفشه ورا فى المطبات ناعمه شويه بس لما تزيد الحموله عن 50 كيلو فى الكنبه و40 كيلو فى الشنطه العربيه بتبقى على الارض بدون مبالغه مره ركبت فيها ما لايقل عن 220 كيلو بس مسافه قصيره بتاع 300 متر ونزلت اتفرج على العربيه كانت بدون مبالغه بينها وبين الارض 15 سم
4- المساعدين قدام بيدبدبوا جامد فى المطبات بشكل يضايق اللى راكب جنبى خصوصا ويحس ان فى حاجه هتتخلع تحت رجله وكسره العجل شمال اسهل من يمين وبتخف جامد لما بظبط العجل قدام 35 لكن على 30 بتبقى زفت عربيتى للعلم مافيهاش باور (لسه شارى جوز كوبلن كامل استيراد وحل كل مشاكل الطقطقه)
5- عندى لعبكه اسلاك عند علبه الفيوزات شكلها مستفز اسلاك طالعه مش رايحه لحته واسلاك جايه مش راكبه فى حاجه العربيه فيها فيشه مكان السنتر والانذار اللى كانو راكبين وتقريبا فى طرفين للزجاج الامامى اللى كان كهربا بالنسبه للانوار والاشارات والمساحات والريفرس كله شغال تمام بما فيهم الولاعه ونور الصالون كمان صوابع الابواب مش راكبه فنور الصالون بفتحه يدوى
6- عندى حبه حاجات ناقصه كرتيره يمين الغطا اللى فوق علبه الفيوزات الكاوتشه اللى فى الكبوت من قدام عصايه الفتيس من فوق الفار واكلها بس مش عالمه معايا مشاكل
اجمالى المشاكل فى نقاط
اللى فوق ده كان التفصيل ممكن نجمل كل اللى فوق ده فى نقط صريحه
1- شاشه العدادات فاصل فيها حاجات وشغال حاجات
2- الهاند بريك شغال ضعيف واداء لفرامل مبيبانشى غير لما بدوس جامد(العربيه فيها سيرفو)
3- العربيه بتوطى جدا من ورا مع الحموله العاديه وبتحك فى المطبات
4- جلب المقصات منتهيه والاسكاترا فيها مشكله ممكن يكون سببها ان الكاوتشه الجلد بتاعهتا مهريه
5- لعبكه جامده واسلاك ملهاش لازمه فى الضفيره عند علبه الفيوزات فقط
6- الكماليات اللى ممكن تكون وجودها بس منظر ما عدا الكرتيره طبعا
محتاج نصايح ولو فيها التكلفه تقديريه يبقى حلو قوى يعنى اعمل كذا عند كذا بكذا وخد بالك من كذا
مين الاهم ومين المهم يعنى الترتيب الصحيح عشان مصرفشى على حاجه ويطلع العيب من حاجه تانيه
ايه الحاجات اللى اعملها على مراحل ومفيش حاجه تبوظ التانيه
متواجد بشكل دورى للرد على اى استفسارات
اسف على الاطاله
احمد عبد السلام
Comment