رحله الى نيابة المرور فى ظل الاضراب الحالي

[egman]

السلام عليكم ورحمه لله وبركاته

انا عايز اقولكم على الكابوس الى تسببوا فيه وكلاء النيابه والقضاه المضربين عن العمل وده على مثال لا يذكر ولا يقارن بارواح الناس المتعلقه بعملهم .

انا روحت المرور زي الشاطر اجدد رخصه العربية الى هتخلص اخر الشهر واان بحب اعملها قبلها بكتيير فروحت للمرور واخدت بيان صرف لوحات علشان اروح النيابه فى مدينة نصر اجيب المخالفات وارجع اكمل الكابوس .

المهم اول ما اخدت الورقة الضابط قالى بعد ما ختمها اتفضل وربنا معاك ، قلتله خير قالى النيابات كلها مضربة وما تروحش مدينة نصر اطلع على الدراسة ، قلت حلو اوى كده وفر عليا وقت .

وصلت لمقر اللعنه وهو مرور الدراسة :

عارفين فيلم الارهاب والكباب بتاع عادل اما فى المجمع شوفتوا الناس كانوا بيتحركوا ازاى ، زيهم والعن .

السلم علشان تطلع النيابة بالدور .

السلم بتاع المبنى اتقسم حارتين حارة نزول وحارة صعود .

طلعت فوق عند شبال المخالفات وتسليم الرخص حقيقى كان هيغمى عليا من المنظر كوم لحم على بعضه .

المهم انا نطيت وقفت قال اية فى حاجة كده ملتوية زي التعبان الانكوندا فى الفيلم بتاع 50 متر الى هو طابور ، الابور ده بقى فى اية مخالفات كل القاهرة الكبري بجانب اية كمان تخيلوا الدراجات البخارية والنقل والاجر والملاكي فى هذا الشباك .

واتركوا لخيالكم العنان فى التفكير فى المنظر انا للاسف موبايلى مش بكاميرا والى كنت صورت المنظر لكن فيه شباب كتير بيصورا علشان يرفعوا المناظر على الانترنت .

ومش عايز اقولكم كمية حسبي والله ونعم الوكيل فى وكلاء النيابة والقاضه ادعى عليهم بيها قد اية مش بالعدد هى حوالى 10 طن دعاوى عليهم بخلاف الشتيمة وكتر خير وكيل النيابه الى هناك هيقد بس لحد الساعه 12 ظهرا نظرا للروف التى تمر بيها البلاد . الى هما اصلا خربوها .

المهم الحمد لله طلعت من الطابور وانا محمول على الاعناق لان ما فيش مكان تمشي عليه فى الارض وطلع عليا مخالفه على الرقم القديمم 326 جنية دفعت 350 والرجال رجعلى 10 جنية بس غالبا مش بيعرف يحسب :) المهم اية بقى ان انا ده رابع مرة ارخص فيها والتلات مرات الى فاتت ما ظهرش فيهم اى مخالفة ولا جنية وطبعا ما فيش تطلمات ولا اى حاجة .

وفى النهاية حصلت على براءة الذمة وروحت بيتنا وتانى يوم روحت المرور وخلصلت الرخصه وطبعا طبعا دفعت ومضطر والموقف غريب جدا لكن كفاية عليكم كده النهاردة علشان ما تحلموش باحلام مزعجه .

انا ما حسيتش بحرقه الناس على ولادها وازوجهم واقاربهم فى المحاكمات ويفضلوا محبوسين علشان فرد مضرب الى لما روحت وشوفت بعينى فى اليوم ده وده حاجة تافه بالنسبة لحاجات تانية كتير ، حسبي الله ونعم الوكيل فيهم ، الواحد ازاى يثق فى قاضي له ميول واتجهات سياسيه على كده بقى لازم المحامي قبل ما يترافع يشوف اتجاهات القاضي السياسيه اية واول ما يدخل الجلسة يمدح فيها علشان يظبطه ، الله يصبر الناس والبلد كلها الى اتضرت بسبب المزعم عنهم انهم قضاه .

طبعا الواحد محروق وفى حاجات كتير جوايا والفاظ منيلة لكن علشان الرقابة ..........

احلام سعيدة

[Land_Cruiser]

انا كنت هناك يوم الاثنين و عشت التجربه اللعينة دى. آلاف البنى ادمين بيزقوا بعض... الميكروفونات مش شغاله و مع ذلك الموظف بينده عن طريقها برضه ومحدش سامع حاجه و الناس كلها بتتكلم فى نفس الوقت. كانت حاجه غير ادميه

[egman]

بالضبط كده الميكرفونات اصلا تقريبا سماعتها كانت فى مكاتب الموظفين انا بقى كنت هناك يوم الاحد قبل حضرتك بيوم وحمد لله على السلامة يا باشا من الكابوس ده :)

[ehab_mansour]

ازيك يا مستر حسين ....... فينك يا صديقي ؟؟؟؟

ياريت متحرمناش من وجودك بيننا

اخوك راح في ايام مكانش فيه اضرابات ولا حاجه و طلع عين اللي خلفوني زي ما انت بتقول كده و ألعن و كنت رايح بدري الدراسة و وقفت طابور لكام دور علي السلم و قافلين الباب لحد ما البهوات ييجو و كانو بيشتغلو بعد الساعه 9 يعني 9 و نصف و بيقفلو 12

حسبي الله و نعم الوكيل ربنا ينتقم منهم و يورينا فيهم يوم اسود عليهم جميعا

و بعدين انت زعلان ليه لو ليك حد وكيل نيابة قريبك ولا حتي عسكري هناك كنت هتروح الساعه 10 و تمشي 10 و خمسه .... ربنا هياخدلنا حقنا ان شاء الله من الظلمة دول

[ehab_mansour]

ازيك يا مستر حسين ....... فينك يا صديقي ؟؟؟؟

ياريت متحرمناش من وجودك بيننا

اخوك راح في ايام مكانش فيه اضرابات ولا حاجه و طلع عين اللي خلفوني زي ما انت بتقول كده و ألعن و كنت رايح بدري الدراسة و وقفت طابور لكام دور علي السلم و قافلين الباب لحد ما البهوات ييجو و كانو بيشتغلو بعد الساعه 9 يعني 9 و نصف و بيقفلو 12

حسبي الله و نعم الوكيل ربنا ينتقم منهم و يورينا فيهم يوم اسود عليهم جميعا

و بعدين انت زعلان ليه لو ليك حد وكيل نيابة قريبك ولا حتي عسكري هناك كنت هتروح الساعه 10 و تمشي 10 و خمسه .... ربنا هياخدلنا حقنا ان شاء الله من الظلمة دول

[egman]

الله يسلمك ويبارك فيك يا باشا ، والله يا ايهاب مش ممكن يعنى انت روحت فى ايام غير الاضراب ينى هو ده الطبيعي بتاع كل يوم هناك

وفعلا كلام حضرتك مظبوط لانى كنت بشوف ناس معاهم فرد امن عسكرى او امين وبيدخل يخلص ويمشي فى ثواني .

بس والله يا ايهاب انا كل الى كان جاى فى بالى وقتها عمال اقول لنفسي امال الناس الى فى المحاكم وليهم مصالح من قواضي وحقوق وغيره يعملوا اية .

حسبي الله ونعم الوكيل .

انت عارف بقى الانيل من كده عندى فى مرور الشروق المرور كان فاضي جدا ما كنش فى غيرى على الشبالك اول ما روحت لوحدى ودفعت التامين ودفعت فى الخزنه وعملت كل حاجة وانا كنت اول واحد فى كل شباك اروحه والحمد لله الى ينكد عليك قى انا لموظف الى على الشباك الى بياخد الورق خد منى الورق وبمنتهى الادب والذوق قالى حضترك اتفضل ارتاح وانا هنادى عليك ، تمام يا باشا .

قعدت قدامه وانا عمال افتكر فى السواد الى شوفته قبلها بيوم علشان المخالفات وانى الحمد لله خلصت وشوية وهاخد الرخصة المهم الناس بتيجي واحد خل بعدى وما فيش ثوانى ينده عليه ويخلص .

قلت يمكن جاى قبلى وكان بيدفع فى الخزنه ولا حاجة وشوية التانى ، وغيره وغيره ساعه يا باشا وانا قملته فى الساعه اكتر اكتر من خمس مرات ويقولى بمنتهى الادب ارتاح وانا هنده عليك وهو قاعد ايده على خده .

انا دمي شايط والوقت بيعدى والخزنه هتقفل وانا كنت رايح ومقرر انى مش هطلع جنيه واحد رشوة وعمال استغفر ربنا وفى الاخر اديته 20 جنية قالى طيب اقعد قبل ما اقعد كان بينادى عليا وروحت دفعت الضريبة وخلصت واخدت الرخصة والواد الى بيقطع الرخص وهو بيدهانى بيقولى :

كل سنه وانت طيب يا باشا ، قلتله بملىء فمي كلمه اعتراضيه وضحكت ومشيت والناس الى واقفه ماتت من الضحك ....................................