تابلوه جديد

[kyrillos]

السلام عليكم
أنا معايا عربية ابيزا 94 1300cc
أنا كان عندى التابلوه الهوايات بتاعته مكسورة والفريم فى النص مكسور والعدادات بايظة
فاقلت أخدها من قاصرها وأشترى تابلوه جديد
وفعلا نزلت الحرفيين ولفين لف الابل ومالقيتش خااالص تابلوه 94 سليم, كله مكسر
المهم جبت واحد بتاع 99 بعداداته كامل وكل حاجة, لقيت الفريم مشروخ فخليت الراجل يفكه من تابلوه تانى وغيرناه الحمد لله وكله تمام
المشكلة بقى, رحت لكهربائى فى الزيتون عندنا وخدتله التابلوه شافه كده قالى ده بتاع بولو مش بتاع ابيزا
مش هايركب
قلتله يا عم أنا سألت كل الناس فى الحرفيين ومنهم كهربائية قالولى هايركب عادى, كل الاختلاف أن عداد ال94 مختلف عن العداد الجديد (ديجيتال)
قاللى لأ ده انا كده لازم أغير علبة الفيوزات وأقص الضفيرة وأقسم من الاول وده غلط مش صح وهاتعب وهاتعبك معايا, الحوار ده هايدخل معاك فى 1000 جنيه مصنعية
أنا طبعا ماتكلمتش, قلتله أجيب تابلوه ب800 جنية واركبه ب1000
وسيبته ومشيت عشان ماضربوش
المهم دلوقتى أنا مش عارف أعمل ايه, أروح عند كهربائى تانى محترم فى الحرفيين اخليه يركب ده ولا أحاول ارجعه واجيب واحد بتاع ابيزا حتى لو مكسر شويه ؟

[SYD]

فتاااااااااااااااااااااااااااااااااااااااااااااااا ااااااااااااااااااااااااااااي
كفاية فتي بقي حراااااااااااااااااااااااااااااااااااااااااااااااا ااااااااااام

بولو ايه وابيزا ايه ؟؟
هي البولو والأبيزا ايه ؟؟ ماهم واحد

اطلع علي رشاد في الحرفيين او مركز كول اير في جسر السويس خلف سوق القنال الدولي

الأتنين بيركبوا علي بعض عادي
ثانيا - التابلوه لونه ايه ؟؟؟ لو رمادي يبقي بتاع بولو وبيركب عادي - ولو اسود يبقي بتاع ابيزا وبردو بيركب عادي
اذا كان احنا الضفيرة عندنا بتاعة بولو اصلاً
وعلبة الفيوزات بتاعة بولو اصلا كل ماهو نالك مختومة بختم سيات لا اكثر ولا اقل
وتقسيمة الضفيرة وعلبة الفيوزات بتاعة بولو
كل اللي يزيد في البولو عن الأبيزا لمبة في علبة العدادات بتاعة مستوي المياة في القربة ولون العدادات اخضر مش برتقالي زي الأبيزا
ومكان مفتاح الأنتظار في اول مفتاح في صف المفاتيح في شمال الفريم في البولو وعندنا في قطمة الدريكسيون في الأبيزا
دة كل الأختلاف بين الأبيزا والبولو

سيبك منه وروح لحد تاني بيفهم

تحياتي

[alzelafy]

يركب عادى جدا جدا انا جايب شاشه عدادات من عربيه بولو بس رجعتها عشان لونها كان اخضر بس كانت شغاله عادى جدا و انا مركبها بنفسى ...... جبت واحدة تانيه بتاعه جولف 3 عدادها 220 وركبت عادى بردو و اشتغلت بس كان لونها اخضر بردو فغيرت لون اللمض وريحت دماغى .... شيلت شريط اللون البرتقالى اللى راكب فى العدادد القديم وركبتو فى الجديد

[kyrillos]

شكرا على الرد بالسرعة دى, أنا كنت متضايق جدا انى ضيعت يوم كامل فى اللف والفصال وفى الاخر جبت حاجة مش هاتركب
مع انه اصلا شبه اللى عندى جدا وهو فعلا رمادى بتاع بولو, بس قلة الخبرة بقى والفتى الكتير
ان شاء الله هاروح يوم الاتنين اركبه وعلى فكرة أنا لما جبته جبت معاه علبة الفيوزات بتاعته وحتة ضفيرة كده مليانه سلوك مع أن الراجل قالى مش هتحتاج كل ده وهاتركب اللى عندك

هاقلكم على التطورات أول بأول ان شاء الله...شكرا

[SYD]

في انتظار تقرير بالتركيب ان شاء الله

[egman]

الله ينور يا رجالة على الردود بقولك يا باشا تعالى نتقابل ونروح نضرب الكهربائي بتاعك ده هههههههههههههه او نحطه تحت العربيه .


يا باشا فى الحرفيين بيعملوا كل حاجة اى كهربائي فى الحرفيين شغال فى الفئة ده من العربيات هيكربكل التابلوه وانت واقف .

بس انت المفروض كنت تضرب الكهربائي او تقوله اى حاجة وحشه تصدق انا دمي اتحرق منه اوى اوى اوى

فى انتظار التقرير بتاع التركيب وسعر المصنعيه وكفاءه التابلوه .

[kyrillos]

السلام عليكم
رحت لكهربائى محترم فى السواح, واحد قريبى معاه عربية باسات 2008 وديما بيشتغل معاه, قالى ده تمام وبيفهم
رحت عنده الاتنين وشاف العربية والتابلوه وفهمته ان دى مافيهاش ار بى ام والعداد فيه و سألته هاينفع ولا لأ (أنا طبعا عارف انه ينفع بس بعمله انترفيو صغير )
المهم طلع فاهك وقالى ينفع وكله تمام, بس بص على الضفيرة كده بتاعت العربية, وفك العداد اللى راكب فى التابلوه القديم, لقينا مراجيح, العداد مش واصل بالفيشة, مطلعين سلوك كده من تحت الارض وفاكين العداد ومدخلين عليه السلوك دى, وكل الضفيرة كبارى وتوصيلات وحاجة عنب
الراجل صعبت عليه نفسه الصراحة
وقالى بص, أنت شايف أهو, أنا هاعمل اللى أقدر عليه, قلتله يعنى العدادات هاتشتغل ولا لأ
قالى هانشوف, قلتله مافيش حاجة اسمها كده, يا تشتغل يا ماينفعش, قالى ربنا يسهل
قلتله ماشى وقعدت معاه ساعة كده وسبته وسبت العربية وروحت
كلمته باليل قالى أنا بحاول بس الضفيرة دى متدمرة وعايزة شغل كتير, قلتله معاك بكرة برضه
النهارده بقى رحت أشوف الدنيا
منظر مرعب, فيلم رعب, كمية سلوك وزبالة وتوصيلات وكبارى جوة علبة الفيوزات
المهم قالى كله شغال ما عادا عداد الكيلو متر (الار بى ام اشتغل ), قلتله ليه, قالى ماكينة الكيلو متر بايظة, هاتهالى وهاشغلهالك, قلتله يوم الخميس بقى
ولقيت عداد البنزين برضة مش شغال ولمبة التنك بتنور وتطفى, قالى العربية مافيهاش بنزين, روح فول وهى تتعدل, روحت فولت وبرضه لسه بايظة, برضه هاخليه يشوفها يوم الخميس
وقالى حساس الزيت بايظ (لمبة الزيت منورة على طول), هايشوفها برضه يوم الخميس
وأخدت بالى بقى من حاجة وأنا راجع, كل شوية اسمع تكتكة كتير فى علبة الفيوزات ومش عارف ايه الهجص ده
المهم هاشوف يوم الخميس ايه الكلام وهاكمل التقرير معاكم

[agaty1st]

فتاااااااااااااااااااااااااااااااااااااااااااااااا ااااااااااااااااااااااااااااي
كفاية فتي بقي حراااااااااااااااااااااااااااااااااااااااااااااااا ااااااااااام

بولو ايه وابيزا ايه ؟؟
هي البولو والأبيزا ايه ؟؟ ماهم واحد

اطلع علي رشاد في الحرفيين او مركز كول اير في جسر السويس خلف سوق القنال الدولي

الأتنين بيركبوا علي بعض عادي
ثانيا - التابلوه لونه ايه ؟؟؟ لو رمادي يبقي بتاع بولو وبيركب عادي - ولو اسود يبقي بتاع ابيزا وبردو بيركب عادي
اذا كان احنا الضفيرة عندنا بتاعة بولو اصلاً
وعلبة الفيوزات بتاعة بولو اصلا كل ماهو نالك مختومة بختم سيات لا اكثر ولا اقل
وتقسيمة الضفيرة وعلبة الفيوزات بتاعة بولو
كل اللي يزيد في البولو عن الأبيزا لمبة في علبة العدادات بتاعة مستوي المياة في القربة ولون العدادات اخضر مش برتقالي زي الأبيزا
ومكان مفتاح الأنتظار في اول مفتاح في صف المفاتيح في شمال الفريم في البولو وعندنا في قطمة الدريكسيون في الأبيزا
دة كل الأختلاف بين الأبيزا والبولو

سيبك منه وروح لحد تاني بيفهم

تحياتي

كلام ليم و شركة سيات ماشاركتش في العربيه دي غير في حاجه واحده بس و هي :
حرف ال s

[SYD]

ربنا يسهل ان شاء الله
وكلها حاجات بسيطة ان شاء الله
حاول قدر المستطاع تشتغل بفيش الفبريكة ان وجدت

في انتظار باقي التقرير بالصور

[amnpop]

متابع باهتمام

[hossamalsadik]

الله يكون فى عونك ..... هيا حجات كتير بس بسيطه عاوزه صبر منك وخبره من الكهربائى
ومتابع

[meido_ibiza]

صباح الفل على رجاله القسم وأولهم البشمهندس محمد سيد يا باشا لو الموضوع عندك واقف على الفيش والضفيره الى تحت التابلوه انا ممكن اعمل معاك ديل هما عندى وبحاله ممتازه بس انا محتاج الفارغه بتاعت التابلوه يعنى التابلوه فاضى طبعا انا بتكلم على التابلوه القديم بتاع حضرتك ولو مش موجود عندك وانت محتاج الضفيره دى اعتبرها عندك وولا يهمك اى حاجه

[kyrillos]

أنا ماعنديش أى مشاكل انك تاخد التابلوه القديم بدون مقابل أصلا, ده لو كان الراجل ماتصرفش فيه لسه
على العموم أنا بعتلك رقمى فى رسالة يا ريت تبعتلى رقمك عشان لو لقيت التابلوه أكلمك تيجى تيشيل

[meido_ibiza]

اوك يا معلم هكلمك ويكون فيه لينك بينا ان شاء الله