احساس جديد

[Karim Ibiza]

من فترة كان عندى صوت ونة جامدة فى العجلة اللى قدام شمال وبتبتدى تظهر من بعد ال 40 لدرجة انى مكنتش بقدر اسمع صوت الموتور وكان لما حد يكلمنى على الموبايل وانا سايق يقولى انت راكب قطر ولا ايه

المهم رحت النهاردة للميكانيكى وقولتلوا عايز اغير بلية العجلة الشمال قدام و كان عندى 3 جلب مقص بايظين و قاعدتين موتور

الحاجة اللى كنت عامل حسابى على 10 قروش لقيتها ب 20 قرش

بلية العجل لسه واحد صاحبى مغيرها فى بولو 2000 ب 70 لقيتها ب 130 جنيه , فين ياعم الحج اللى ب 70 جنيه قالك دى ايطالى وخلصت ومبقاش بيجيبها انما دى بقه رومانى ماركة SNR (ماشى)

3 جلب مقص الواحدة ب 30 جنيه (ماشى)

قاعدتين موتور كنت سائل عليهم قبل كده وعرفت ان الواحدة ب 70 جنيه لقيتها عنده الواحدة ب 150 جنيه يعنى الاتنين ب 300 جنيه فين ياعم الحج اللى ب 70 جنيه, قالك دى صينى ومش حلوة ومش بجيبها عندى لكن دى ألمانى اصلى ماركة LEMFÖRDER ZF وده شكلها بصراحة حاجة فخيمة


المهم كاعيتلى بتاع 650 جنيه بالمصنعية (100 جنيه) بس بجد حاسس انى راكب عربية تانية, طلعت بعدها على الطريق الدولى عندنا فى اسكندرية جبت 150 ومورت الفتيس وكنت قافل الشباك مكنتش سامع حاجة غير صوت الهوا بره العربية و بقيت ناعمة جدا ودى ميزة العربيات دى برغم ارتفاع اسعار قطع الغيار بس بتتبسط بيهم وبتحس ان فلوسك مراحتش على الارض و تنسى انك تغير الحاجات دى تانى

انا مبسوط

[SYD]

الف مبروك الصيانة
ربنا يارب يباركلك في عربيتك
بس ما تنساش ضبط الزوايا
وعلي فكرة جلب المقصات عندنا الطقم ب70 (االطقم قطعتين)
وقواعد الموتور هو دة سعرها جديد وان كنت اشك انهم الماني
االببلية بس هي اللي غالية

مبروك مررة تانية

[Karim Ibiza]

الف مبروك الصيانة
ربنا يارب يباركلك في عربيتك
بس ما تنساش ضبط الزوايا
وعلي فكرة جلب المقصات عندنا الطقم ب70 (االطقم قطعتين)
وقواعد الموتور هو دة سعرها جديد وان كنت اشك انهم الماني
االببلية بس هي اللي غالية

مبروك مررة تانية

الله يبارك فيك ويكرمك

بالنسبة لضبط الزوايا مش هعملها دلوقتى لأن لسه الجزء التانى من العفشة معملتوش لأنه محتاج حوالى 1500 جنيه بالمصنعية والعفشة كلها عندى محتاجة تغيير بما فيها الطنابير وتيل الفرامل وضبط الزوايا دلوقتى هيكون فلوس على الفاضى

هجيب جنبين (ركبتين) بالكبالن بتاعتها وهجيب اسكاترا باور وخراطيم وخزنة الزيت وهجيب جوز مساعدين خلفى كاملين وقبل كده كنت مغير دنجل بطنابيره, يبقى كده مش فاضل حاجة تانية متغيرتش

الجنبين ب 650 جنيه
جوز مساعدين خلفى كاملين 200 جنيه
اسكاترا باور 250 جنيه
خراطيم 150 جنيه
خزان 75 جنيه

بس أخد نفسى شوية من الكعة اللى انا كاعيتها دى الاول

بالنسبة للجلب المقص بيكون فيه جلبتين صحن بيكونوا شكلهم دائرى وجلبة بلحة ودى شكلها فعلا شبه البلحة, انا كان عندى جلبة بلحة وجلبة صحن بايظين فى المقص الشمال وجلبة صحن فى المقص اليمين وكل واحدة كانت ب 30جنيه يعنى التلاتة 90 جنيه

وشكرا

[Khaled Lanos]

ألف مبروك ياباشا كدا انت ظبطت الأداء

[Karim Ibiza]

ألف مبروك ياباشا كدا انت ظبطت الأداء

الله يبارك فيك

الحمد لله

[mahmoud ghanem]

مبروك يا جميل .. وربنا يباركلك فيها

[Karim Ibiza]

مبروك يا جميل .. وربنا يباركلك فيها

الله يبارك فيك ياباشا وعقبال عندكم ان شاء الله

[hossamalsadik]

مبرووووووك الطلعه الأولى للصيانه وعقبال الطلعه التانيه الى نفسك فيها بأذن الله شد حيلك

[Karim Ibiza]

مبرووووووك الطلعه الأولى للصيانه وعقبال الطلعه التانيه الى نفسك فيها بأذن الله شد حيلك

الله يبارك فيك
كله بميعاده ان شاء الله

[matrix012]

مبروك يا باشا رغم ان الاسعار عاليه شويه بس كبر دماغك المهم انك مبسوط من الاداء
وربنا يستر طريقى وطريقك

[ehab_mansour]

مبروك يا كريم و ربنا يباركلك فيها
ارجو انك تقلنا كنت بتحس بايه قبل التغيير جزئية جزئية و ايه اتغير بعد الصيانة لأن الملاحظات دي بتفيدنا في تحليل مشاكل كتير بتحصل مع اكثرنا و مبيعرفش العيب فين و خاصة العفشة و قواعد الموتور

و جزاك الله خيرا

[mido_antouhh]

مبروك على التغيير
ربنا يباركلك فيها يارب

[Karim Ibiza]

مبروك يا باشا رغم ان الاسعار عاليه شويه بس كبر دماغك المهم انك مبسوط من الاداء
وربنا يستر طريقى وطريقك

الله يبارك فيك
فعلا قاعدة الموتور والبلية غاليين بس للأسف مكنش قدامى اختيارات بس الحمد لله حاجة نضيفة ومش خسارة فيها الفلوس

[Karim Ibiza]

مبروك يا كريم و ربنا يباركلك فيها
ارجو انك تقلنا كنت بتحس بايه قبل التغيير جزئية جزئية و ايه اتغير بعد الصيانة لأن الملاحظات دي بتفيدنا في تحليل مشاكل كتير بتحصل مع اكثرنا و مبيعرفش العيب فين و خاصة العفشة و قواعد الموتور

و جزاك الله خيرا

الله يبارك فيك ياهندسة

أولا: بلية العجلة الشمال:

الأعراض:
انا كان عندى صوت ونة عالية اوى كانت زمان بتبدأ من سرعة 80, لكن مع مرور الايام الونة بدأت تبان فى سرعات اقل لحد ما بقت بتبتدى من سرعة 40 مع رفة ملحوظة فى العجلة الشمال

التشخيص:
فى أول الأمر كنت فاكر ان الكاوتش وحش وعشان كده بيعمل صوت وأن الجنط معووج وعشان كده بيرف, بس لما الصوت بدأ يبان فى السرعات البطيئة والعربية نفسها بقت حركتها الحرة تقيلة قولت ده اكيد بلية عجلة وأتأكدت اكتر لما مرة كانت العجلة فيها خرم وفكيتها عشان ألحمها وأنا بركبها وبعد ما ربطها قولت ألفها واشوف حركتها الحرة لقيتها تقيلة جدا

النتيجة بعد التغيير:
شششششششششش مفيش صوت لحد سرعة 150 ولو كنت جبت اكتر من كده برده مكنتش هسمع صوت, وبقيت بسمع صوت الموتور بعد ماكنت نسيت صوته وكنت ساعات غصب عنى بحرق على النقلة لأنى كنت بنسى انقل لانى مش سامع صوت الموتور
والرفة كمان راحت خالص

ثانيا: جلب المقص:

الأعراض:
اسكندرية اليومين دوول بتشتى وطبيعى ان الشوارع تنشف بس بيفضل حبة مياه على جانب الطريق (على شكل بركة صغيرة)
اللى كان بيحصل معايا انى بكون ماشى على 80 فيما فوق وبكون بتخطى عربية فبضطر انى انزل فى البركة دى بالعجلتين على سبيل المثال العجلتين الشمال والعجلتين اليمين بيكونوا فى الناشف, بلاقى الدريكسيون بقى ملوش لازمة فى ايدى والعربية بتلوح حاجة بسيطة
(نصيحة: لو حصل الموقف ده معاك اياك تدوس فرامل, اديها غيارات عكسى وادعى قول يارب تقف قبل ما ألبس او يارب أوصل لأرض ناشفة عشان ادوس فرامل وأقف قبل ما ألبس..... لكن لو السكة مفتوحة يبقى تشيل رجلك من على دواسة البنزين وتمسك الدريكسيون ب ايديك الاتنين أو دوس بنزين والعب بالدركسيون فى اتجاهات عكس اتجاه حدفة العربية عشان توزنها)

التشخيص:
الطبيعى اننا اول حاجة بنعملها اول ما بنحس ان العربية بتحدف او بتعوم اننا بنروح لبتاع الزوايا, بس قبل ما تضبط زوايا لازم تخليه يكشفلك على العفشة ويقولك فيها ايه محتاج يتغير وتروح تغيره وبعدين تضبط زوايا لانك لو ضبط زوايا من غير ماتكشف يبقى كده فيه احتمال كبير انك بترمى فلوسك على الارض لان عمرها ما هتضبط معاك طالما عندك حاجة بايظة فى العفشة
وفيه بعض بتوع الزوايا معندهومش ضمير بيضبطلك زوايا من غير مايكشفلك على العفشة ولما بتطلع من عنده بتكتشف ان الزوايا لسه مش مضبوطة ولما بترجعله تانى بيقولك العفشة فيها كذا وكذا وتغير وتيجى تضبط تانى بفلوس تانية, ما كان من الأول يابن التيت
المهم, انا رحت لبتاع الزوايا وقولتلوا اكشفلى عشان اجيلك بعد كده اضبط الزوايا, نزل تحتها قاللى الاسكترا عايزة صيانة وعايز جلبة مقص يمين واديتوا 10 جنيه
فعلا الاسكترا وجلب المقصات هما اللى مسؤولين عن تعويم العربية

النتيجة بعد التغيير:
العربية مسكت نفسها شوية بس لسه كمان لما أغير الاسكترا هيبان ثبات وتماسك الأبيزا المعروف

ثالثا: قواعد الموتور:

الاعراض:
ضعف كبير فى عزم العربية Power loss, رجة جامدة بتبان اوى لما بتشيل رجلك او تحطها على دواسة البنزين و بتكون على الغيار الاول والتانى و الار بى ام من 2 الى 3 وبتحس ان عصاية الفتيس هتطلع من مكانها

التشخيص:
عشان تتأكد ان المشكلة فى قواعد الموتور:
1-عششق العربية على الغيار الأول طبعا وهى مش دايرة
2-افتح الكبوت
3-حرك العربية للأمام و الخلف وراقب حركة الموتور
لو لقيت الموتور بيلوق جامد لما بتزق يبقى قواعد الموتور فيها بووش والاحسن تغير القاعدتين الامامية والخلفية مع بعض عشان يبقوا من عمر بعض, لكن قاعدة الفتيس نادرا لما تبوظ وكمان نادرا لو لقيتها جديدة وفى الغالب هتجيبها استيراد

النتيجة بعد التغيير:
عزم العربية بقى اقوى ودوسة البنزين بقيت بتفرق وبقيت بحس بقوة موتورى اكتر من الاول
عصاية الفتيس ثبتت والرجة راحت بشكل كبير لان الموتور بقى ممسوك كويس
بس انا لسه الرجة ما اختفيتش 100% لان الكبالن عندى بايظة ومحتاجة تتغير
ناس ممكن تقوللى ايه دخل الكبالن فى عزم العربية او رجة الموتور؟؟؟
الكبالن معروف انها بتبان لما بتلف الدريكسيون وتطقطق
الطقطقة دى معناها ان بقى فيه بووش بين اجزاء الكوبلن وبعضها, والبوش ده بيعمل نفس اعراض قواعد الموتور
ملحوظة: القواعد لو بايظة اوى تبوظ الكبالن حتى لو كانت جديدة
عشان كده انا غيرت القواعد قبل ما اغير الكبالن لانى لو كنت غيرت الكبالن وسيبت القواعد كانت الكبالن باظت تانى
وعلى فكرة, بعد ماغيرت القواعد صوت طقطقة الكبالن بقى اخف شوية لان البووش قل شوية

فى النهاية اتمنى انى مكونش نسيت حاجة وانا تحت امر اى حد عنده استفسار

واسف على الاطالة

وشكرا

[Karim Ibiza]

مبروك على التغيير
ربنا يباركلك فيها يارب

الله يبارك فيك وعقبال ماتلاقى الموتور اللى انت عايزه