انا عايز رايكم بخصوص لمبات الفوانيس الهالوجين

[egman]

السلام عليكم ورحمة الله وبركاته

انا كنت عايز اغير لمبات الفوانيس عندى الى هالوجين :

يا ترى حد مجربها فى عربيته يا شباب وانا قرات ان انوعها هى التونجسرام والفيليبس دول احسن حاجة طيب يا ترى :

1. الاقيهم بيتباعوا فين ؟
   
   
2. وسعرهم كام ؟
   
   
3. واية الى منهم يركب على فوانيس الايبيزا الـ 94 يعنى كام ريشة انا سمعت ان فى منها h4 ,h7 او بصفه عامة H.xxxx طيب يعنى اية الرمز ده بيرمز لاية واية الى بيتوافق مع فوانيس الايبيزا الــ 94 وافضل وات في اللمبات ده علشان الاضاءة تبقى قوية بتكون كام على كام ؟
   
   
4. نوع الكتاوت الى يركب علشانها اية انا عندى كتاوت مش فاكر نوعها اية كان 30 جنية هل في نوع وماركة كويسة وخاصا لو حبيت اركب اللمبات ده وبكام ومواصفاتها اية ؟

تحياتي للجميع ،،

[SYD]

انا اقصي حدود معلوماتي ان الأبيزا لمباتها h4 وبتنزل 60/55 وات فبريكة
بس نصيحة حاول ماتعلاش عن 90/100 لعدة اسباب
اهمها
علشان ماتدخلش في قصة كتاوت او دراع النور يسيح او يبوظ
وكمان علشان ماتضايقش الناس معاك علي الطريق

تحياتي

[egman]

شكر ليك يا باشا ولاهتمامك بالموضوع ...
معنى انها اتش 4 علشان العالى والواطى لمبه واحده صح كده ولا اية ....
يعنى هو لحد 100/90 مش محتاج كتاوت

طيب الكتاوت ده مش هى علبه مربعه سوده كده وفيهها الترامل ووصلات السلك ؟

طيب اية نوع الكتاوت المحترمة الى ممكن تركب وتستحمل معايا لحد 100/140 ؟

وفين الاقى فيليبس هالوجين او تونجسرام ؟

[SYD]

احنا عندنا كتاوت النور في علبة الفيوزات
ومش عارف الصراحة لو هتغير اللمبات هتغير معاها الكتاوت ولا لاء
انا مش بحب العب في الحاجات اللي مش فاهم فيها ومش بثق في علم الصنايعية فبقول تشتغل ضعيفة احسن ما متشتغلش خالص

تحياتي

[egman]

انا عندى كتاوت خارجى كمان جنب البطاريه .

[mahmoud ghanem]

احنا عندنا كتاوت النور في علبة الفيوزات
ومش عارف الصراحة لو هتغير اللمبات هتغير معاها الكتاوت ولا لاء
انا مش بحب العب في الحاجات اللي مش فاهم فيها ومش بثق في علم الصنايعية فبقول تشتغل ضعيفة احسن ما متشتغلش خالص

تحياتي

+111 نفس الرأى ...
بلاش اللعب فى الاورجينال لو ضعيفة وفابريكة افضل ...
ممكن تزود الاضاءة بفوجات لو عاوز اضاءة اقوى ..

[hossamalsadik]

أنا قصة الأضاءة عندى سبتها للكهربائى عشان بثق فيه بس وجبتله 2 لمبه يابانى مش فاكر النوع بس القدره 90 /100 او 90 /120 على كتاوت الفبريكه
وشاغل بيهم زى الفل .... ومع ذلك بيطلب منى الى جاى أدامى فى الطريق انى اطفى الأضاءه
فلك ان تتخيل لو الأضاءه اشد

[egman]

شكرا جزيلا للجميع وعلى المشاركة الفعالة

[ehab_mansour]

السلام عليكم

نوع اللمبات الاوريجينال عندك كما قال مهندس محمد سيد h4 و طالما عربيتك اساسا فيها كتاوت خارجي يبقي ممكن تركب عليه اللمبات اللي تعجبك بالوات اللي يعجبك فقط هتحتاج كهربائي نضيف يراجع علي وصلات الكتاوت و هل يتحمل ولا لأ ولو مش هيتحمل هيغرهولك بنوع انضف بأمبير أعلي يتحمل اي شيء

بصراحة انا شخصيا مبحبش التغيير عن الاوريجينال لكن انت عندك اساسا فيه تغيير يبقي استغله و لكن رحمة بالناس ياريت متركبش شيء تؤذي بيه الأخرين لأن كتير بكون مسافر و بتضايق و بتعب من انوار العربيات و بدعي عليهم خاصة لما بكون مسافر مسافات طويلة و طرق فردية

هأكد عليك حاجه مهمة لأن فوانيس الابيزا عندك بتبقي مشكلتها الكبري دخول الأتربه جواها و بالتالي العاكس بيتوسخ و مش بيعديك اضاءة جيدة لذلك تاكد ان الفوانيس نظيفة من الداخل و الزجاج محكم الغلق مع جسم الفانوس و الغطاء الخلفي محكم ايضا
اعتقد لو غسلتها كويس و ظبط مستواها و بؤرتها مش هتحتاج تعلي اضاءة او تغير لمبات

و بالتوفيق للجميع

[egman]

هو بالفعل كده يا باشا والله

[egman]

بس الكتاوت يا باشا يا ترى حضرتك تعرف نوع كويس فيها ؟

والامبير بتعها بيكون اعلى حاجة فيها كام امبير ؟