ارجو المساعده من اهل الخبره في ابيزا 2000

[mkhaled1984]

انا عايز عربيه كويسه و لما شوفت الفلوس لقيت اني ممكن اجيب ابيزا 2000 بس ناس كتير اوى خوفتني من قطع الغيار انها غاليه اوى و ان الموتور 1000 سي سي بس بس انا بحب العربيه ديه من و انا صغير بس لقيت برده انى ممكن اجيب فيات بونتو 2000او هونداى اكسنت 2000 او شفروليه سبارك 2008 و الهونداى كل الناس بتشكر فيها و في توفر قطع الغيار و ان اي ميكانيكي يقدر يصلحها وبس انا مش حابب غير الابيزا و بعدها البونتو عشان كده محتاج رأى اصحاب الخبره في الموضوع ياريت حد يفدنى من اصحاب العربيه قطع الغيار غاليه
الموتور 1000 سي سي كويس و السحب مع التكييف ايه الاخبار
العفشه
اي مكانيكي ممكن يشتغل فيها ولا ليها متخصص
و ارجو الرد نظرا لحاجتي النصيحه

[Karim Ibiza]

الطبيعى انك طالما داخل تسأل على الابيزا فى قسم الابيزا يبقى اكيد هتسمع عليها كلام كويس
مفيش عربية مفيهاش عيوب ومفيش غربية كلها مميزات, المهم انك تتقبل العيوب دى ومتكونش هتسببلك مشكلة
طبعا الألمانى لا يقارن الا بالألمانى او بالأوروبى عموما, يعنى مينفعش تقارن ألمانى بكورى

انا هكلمك على الابيزا بس:
عربية اسبانية المنشأ ألمانية الصنع لأنها تبع فولكس جروب يعنى كأنك راكب حاجة بين الجولف والبولو
قطع غيارها الجديدة اغلى من الكورى وارخص من الايطالى ومتوافرة واكثرهم عمرا افتراضى
قطع غيارها الاستيراد ارخص من الكورى والايطالى بس الموديلات بعد ال 99 بتبقى توافرها اقل شوية

بالنسبة للموتور ال 1000 اساسا نادرا لو لقيت دلوقتى ابيزا فيها الموتور ده لأن العربية كده يبقى بقالها 13 سنة شغالة ومفيش موتور ممكن يشتغل العمر ده كله اللا لو كان وصل لمرحلة التوديع ومع ذلك ممكن تلاقى حاجة نادرة بس عموما الموتور ال 1000 بيوصل لسرعة 160 لو حالته نضيفة
معنى كلامى انك هتلاقى 85% من الابيزا متسقطلها 1400 سى سى ودى حاجة كويسة مش وحشة بس اهم حاجة يكون متسقط صح عشان ميتعبكش بعد كده وده بيبان لما تيجى تكشف عليها وتحطها على الجهاز

لازم ميكانيكى فولكس هو اللى يشتغل فيها

وبالتوفيق ان شاء الله

[egman]

تمام يا كيمو الله ينور عليك ، واحب اضيف تعليق لو تسمح يا باشا للاخ السأل .

حاول حضرتك تدور كويس اوى وتكشف كويس اوى عند متخصص فى فولكس مش اى ميكانيكي اوى سمكرى واكتر حاجة تركز فيها قبل الموتور كمان انا لعربية تبقى سليمة ما تكونش ملحومة ولا نصين ولا فيها ربع ولا الكلام ده وبعد كده ابدا دور على الموتور انا بقولك كده لانه فعلا زي ما كريم قالك نادر لما تلاقى الموتور 1000 ده ويكون سليم فانا لو مكانك اجيب عربية سليمة واجيبها ما فيهاش موتور ده لو العربية السليمة ده لقيتها ولقيت موتورها 1000 ويكون شقيان ساعتها هاخدها بسعر كويس جدا وانا اعمل مو تورها على ايدي .

وربنا يكرمك بحالة شاة فيها ويكون موتورها الاصلي ويكون حالته نادرة ......

[SYD]

طبعا الاخوة ردوا علي اسألتك ومخلوش حاجة الواحد يقولها
الله ينور يا عليكم

عايز اقول ان الابيزا لو عربية سليمة كما اوضح egman تستاهل الصرف عليها بالاضافة انها upgradeable يعني قابلة للترقية والتعديل
النهاردة فيها مكنة 1.0 بكرة هسقط فيها 1.4 - قطع غيارها متوفرة لدرجة انها مرمية في كل حتة
لازم الميكانيكي بتاعها - وعلي فكرة اي عربية كدة

ربنا يوفقك
واهم حاجة تبقي العربية سليمة
اي حاجة تانية مقدور عليها

تحياتي

[ehab_mansour]

كلام كله زي الفل و لكن حابب اضيف حاجه
ان فيه عربيات ابيزا 98 و حتي 2002 مازالت بمحركتها ال 1000 سيسي و تعدت ال 300 الف كيلومتر و زي الفل مافيهاش غلطه
انا بعت من سنة و نصف ابيزا 98 1000 سيسي عاملة 300 الف كيلومتر و كلهم فحت و ردم و عايز اقلك ان 150 الف كيلومنهم عاملهم انا و واحد زميلي قبلي في الشغل انا اشتريتها منه و سواقة عصبية و شد و مع ذلك بعتها عاملة 300 الف و موتورها لا بينقص زيت ولا مياة و لا الهواء و بيعمل 300 الي 320 كيلومتر في ال20 لتر بنزين 92 و بمساعدينها الاوريجنال و قبل ما ابيعها مقفل بيها 160كيلومتر في الساعه و هي اساسا اقصي سرعه ليها 145

نصيحتي الاخوية العربيات المستعملة بتتشري حالة يعني اهم شيء الحالة العامة عموما للعربية تكون كويسة سواء ابيزا او بونتو لكن الاكسنت و الحاجات دي انا ركبتها اقسملك بالله معرفش الناس بتدفع فيها الفلوس دي ليه !!!!!!!!!!!!!!!!!!! الله المستعان

[i_Am_Legend]

خليك في اﻻوروبي..الكوري دة كنننب..فكر في ابيزا ..جولف 2..بونتو 2002..او ممكن تفكر في الفا روميو 146 زي عربيتي ..1600 113 حصان

[mkhaled1984]

انا بشكركم كلكم علي النصيحه
بس انا عايز اعرف سعرها المعقول كام لو الموتور 1000 سي سي
و لو 1400 و الموتور الممكن يركب عليها موتور ايه ؟؟؟؟
و لو جبت عربيه و حابب اركب موتور اجيبه منين و بكام
معلش اصلي مليش في العربيات و عايز نصيحه من اهل الخبره

[mkhaled1984]

في عربيه معروضه في الموقع ابيزا 2000 1000 سي سي فول ابشن طالب فيها 34000 ده كلامه يعني اكيد قابل للتفاوض ايه رايكم السعر ده كويس و لا ارجو الرد السريع ...........................

[kyrillos]

اعتقد والله أعلم ان ده رقم قليل على ابيزا 2000
اعتقد انها تبتدى الكلام من 37, بس استنى رأى الاعضاء, مش عايز افتى