اخيرا ربنا كرمنى بابيزا

[nesr6060]

اخيرا بعد معاناه طويله ربنا كرمنى وجبت ابيزا 94 حاله نضيفه جداا بس المشكله ان دى اول عربيه اجيبها وكل ما بمشى بيها بحك بالاكصدام لغايه ما بقى الاكصدام فى خرابيش زهقتنى و من المشاكل اللى قابلتى هى ازاى اجيب الاول وازاى اجيب المارشدير كنت هجنن بسبب ان بتلخبط بنهم بس الحمد الله واحد معاه جولف قعد معايا وفهمنى
الحمد الله بحاول اتكيف مع العربيه بسرعه و بدات اخد عليها ده تانى يوم ليا بيها بس حصل معايا موقف زباله امبارح وانا بلف شارع ان الفانوس الاشاره الشمال الازاز بتاعه اتكسر ومش عارف ده هعمل ايه فيه هشترى فانوس كامل جديد وواحد قالى شوف و اشترى منه الازاز بتاع الفانوس الاشاره دى ياترى ايه رايكم وفعلا ازاى ممكن اشترى الازاز ده

[mahmoud ghanem]

ياباشا الف مبروك وربنا يديك خيرها ويكفيك شرها ... واهلا بيك فى اى وقت
بالنسبة لوش فانوس الاشارة انا معرفش هو بيتباع لوحدة ولا لاء بس اللى اعرفة ان انا غيرت فانوس الاشارة بــ 35 جنيه

[Karim Ibiza]

اهلا بيك عضو جديد فى عائلة سيات

1000 مبروك على العربية وربنا يباركلك فيها ويكفيك شرهاوشر العين

بالنسبة لموضوع الاكصدام والحكات فده طبيعى لأنها عربية جديدة عليك خصوصا كمان انها اول عربية تمتلكها يعنى هتاخد وقت حوالى اسبوع عشان تحفظ ابعادها ودى حاجة حصلت معايا انا شخصيا مع انى بسوق من وانا عندى 10 سنين

وبالنسبة لفانوس الاشارة اشترى واحد جديد بـ20 او 30 جنيه

1000 مبروك مرة تانية وتحت امرك فى اى استفسار

[SYD]

الف مبروك عليك العربية
ربنا يارب يديك خيرها ويكفيك شر العين

اهم حاجة بعد الشراء والأطمئنان علي حالة العربية - السيرفيس
انت عملت فيها ايه - لحد دلوقتي ؟؟؟

وهل عارف المفروض تعمل فيها ايه ؟؟؟

اهل بيك في قسم سيات عضو جديد في الأسرة

ويسعدنا الرد علي استفسارك

والله المستعان
،
،

[ehab_mansour]

مبروك عليك الابيزا و ربنا يباركلك فيها و متقلقش هتبقي محترف قريبا .... كله بيبقي كده في الأول

[nesr6060]

انا لسه معملتش فيها حاجه لغايه دلوقتى
الراجل اللى خدت منه العربيه كان مهتم بيها وقالى هاخدها وامشى بيها وبلاش اطنطط بيها عند الميكانيكيه علشان ميبوظوش حاجه ولما خدت الميكانيكى كشف عليها وانا بشتريها قالى العربيه مشاء الله ممتازه مش محتاجه حاجه بس كان سعرها غالى شويه قولت مش مهم الغالى تمنه فيه
بس اعمل ايه انا اول ما خدتها فانوسين الاشاره اللى جنب الفانوس اللى قدام اتكسروا

وكان عندى صحيح سؤال مهم انا فتحت الدرج الصغير اللى تحت زراير التاكيف لاقيت فيه زرار احمر ده
ممكن لو حد يفدنى ويقولى الزرار ده بتاع ايه ولو حد يفدنى ويقولى هو الولاعه بتاعه العربيه فين فى التابلو علشان اوصل عليها شاحن التليغون والامبىثرى
وشكرااا

[SYD]

انا لسه معملتش فيها حاجه لغايه دلوقتى
الراجل اللى خدت منه العربيه كان مهتم بيها وقالى هاخدها وامشى بيها وبلاش اطنطط بيها عند الميكانيكيه علشان ميبوظوش حاجه ولما خدت الميكانيكى كشف عليها وانا بشتريها قالى العربيه مشاء الله ممتازه مش محتاجه حاجه بس كان سعرها غالى شويه قولت مش مهم الغالى تمنه فيه
بس اعمل ايه انا اول ما خدتها فانوسين الاشاره اللى جنب الفانوس اللى قدام اتكسروا

وكان عندى صحيح سؤال مهم انا فتحت الدرج الصغير اللى تحت زراير التاكيف لاقيت فيه زرار احمر ده
ممكن لو حد يفدنى ويقولى الزرار ده بتاع ايه ولو حد يفدنى ويقولى هو الولاعه بتاعه العربيه فين فى التابلو علشان اوصل عليها شاحن التليغون والامبىثرى
وشكرااا

انا مش عارف تقصد ايه بدرج تحت زراير التكييف
ياريت صور

اما عن الولاعة فهي داخل درج الطفاية - اول لما تفتح الطفاية هتلاقي الولاعة

تحياتي

[Mohamed~Adel]

ألف مبروك يا معلم و ربنا يباركلك فيها ......
يا ريت تفيدنا كان السعر اد ايه علشان اخوك بيدور و عايز يعرف متوسط السعر :d

[S O P H O S]

الف مبروك يا باشا

[esmalawy14]

الف الف مبروك واهلا بيك في المنتدي معانا وان شاء الله هتتبسط معانا جدا ويكفيك شرها وعن الخبطاط ده العادي وميزه العربيه دي انها ابعدها مناسبه فلما هتتعود عليها هتفرق معاك جدا وياريت تفدنا بالسعر وكده يعني واهلا بيك مره تانيه

[hossamalsadik]

مبرووووووك عليك العربيه ربنا يباركلك فيها
اهلا بيك معانا فى عائلة سيات
أهتم بعمل السرفيس بنتظام ، الابيزا عربيه أعتماديه جدا جلف بنص الثمن

[nesr6060]

ا روحت لواحد غلشان يقوولى الولاعه فين
وفقتحنا درج الطفايه بس لاقينا زرار مكان الولاعه لونه احمر لما بدوس غليه والعربيه دايره بسمع صوت المارش ياريت تنصحونى اعمل ايه علشان انا محتاج الولاعه ضرورى علشان اشحن الموبايل وانا ماشى

[nesr6060]

ومعلشى هتعبكم معايا
ياريت لو حد يقولى فين طرمبه الميه بتاعه المساحات علشان المساحات عندى الفتحه بتاعتها مبتطلعشى ميه وعاوزها تطلع ميه مش راضيه

[Karim Ibiza]

ا روحت لواحد غلشان يقوولى الولاعه فين
وفقتحنا درج الطفايه بس لاقينا زرار مكان الولاعه لونه احمر لما بدوس غليه والعربيه دايره بسمع صوت المارش ياريت تنصحونى اعمل ايه علشان انا محتاج الولاعه ضرورى علشان اشحن الموبايل وانا ماشى

ومعلشى هتعبكم معايا
ياريت لو حد يقولى فين طرمبه الميه بتاعه المساحات علشان المساحات عندى الفتحه بتاعتها مبتطلعشى ميه وعاوزها تطلع ميه مش راضيه

موضوع الزرار الاحمر ده شكله افتكاسة من صاحبها الاولانى عشان العربية متتسرقش او فبرة الكونتاكت كانت بايظة فعملها زرار خارجى

قربة المساحات هتلاقيها قبل البطارية على طول ومكتوب عليها 3L

[windofchange]

هات سبراي wd40 مزيل الصدأ ورشه فالبذابيذ بعد كده عند بذابيذ خروج المياه هات سرنجة من الصيدلية ارفع سن ودخلها مكان السن وخرج وطلع لغاية مايطلع التراب اللي سادد الذبوذ (اوعي تتني سن السرنجة جوه البذبوذ لتبوظه),,وقبل كده تتأكد وانت فاتح الكبوت ان خراطيم المياه واصله للبذابيذ والقربة مليانة مياه(متشغلش المساحات وانت فاتح الكبوت غلط هتحك فالكابوت وتجرح واحتمال تتكسر)