العربية مش بتلقط

[kyrillos]

السلام عليكم
العربية مش بتدور من أول مرة
الاعراض بقى, لما بدور المفتاح بسمع صوت ضعيف جدا كده كأن فى ترس بيلف جوه
بس المارش مش بيلقط, صوت واطى جدا, مش صوت المارش
أستنى دقيقتين كده وادور, تقوم تلقط مارش وتشحر شوية (10 ثوانى) بعد كده تدور
واحيانا لازم انزل افتح الكابوت واهز سلك البطارية تقوم تدور

واسخن وامشى عادى جدا, واروح الشغل واركن, لو حصل بقى انى نزلت بعد 8 او 9 ساعات, بتلقط وتدور عادى, لو سبتها اكتر من كده بقى, برضه ماتلقطش من اول مره تانى, ولازم نفس الحوار ده اعمله تانى

المره دى بقى سبتها 4 ايام مركونة, نزلت ادور, حلفت براس أبوها ماتدورش
البطارية شكلها سليم, جافة وماكملتش سنه والنور شغال والكلاكس وكل حاجة
أنا شاكك ان اوتوماتيك المارش بايظ (من اللى قاريته فى المنتدى)

حاجه تانيه, فى الفتره الاخيره, كان لما يبقى فى سحب كهربا جامد (المروحه شغاله + النور مثلا) وادوس بنزين, يطلع صوت حاد جدا (صريخ), لازم اشيل رجلى من على البنزين, واستنى شويه وادوس تانى عشان الصوت يروح, ايه ده ؟؟
معلش الموضوع طويل, بس انا غلبت, ايه أرائكوا ؟؟

[Karim Ibiza]

لو الصوت كأن المارش مفوت وبيلف على الفاضى يبقى فعلا ده اوتوماتيك المارش

صوت الصريخ ده من سير المجموعة (سير الدينامو) وده عايز يتشد عليه شوية عشان هو كده بيتزحلق على الطنبورة وبيعمل الصوت ده
هتلاقى ناس تقولك حط عليه نقطة زيت او مياه والصوت يروح
فكك منهم دى ناس مش كويسة

[SYD]

اعتقد الصوت اللي بتسمعه دة - حاجة اسمها ترس البندكس

اما عن السير فشوف بلية الشداد

تحياتي

[mem]

شوف سير الدينامو ايه اخباره
واكشف على المارش

[kyrillos]

طب ايه علاقه المارش بأن العربية بارده او سخنه ؟؟
وايه علاقة سير الدينامو بسحب الكهربا الشديد, هل ده معناه ان الدينامو بيلف اسرع لما سحب الكهربا يزيد ؟؟ أنا كنت فاكر ان الدينامو سرعته ثابته

معلش انا بسأل كتير, عشان انا مبرمج واتعودت احلل المشاكل بشكل معين

[SYD]

طب ايه علاقه المارش بأن العربية بارده او سخنه ؟؟
وايه علاقة سير الدينامو بسحب الكهربا الشديد, هل ده معناه ان الدينامو بيلف اسرع لما سحب الكهربا يزيد ؟؟ أنا كنت فاكر ان الدينامو سرعته ثابته

معلش انا بسأل كتير, عشان انا مبرمج واتعودت احلل المشاكل بشكل معين

لو فرضنا انه ترس البندكس - فمالوش علاقة بالسخونية والبرودة
ولكن اللي بيحصل - ان احياناً سنة او اتنين او اكتر من سنون الترس بتتكسر - وبالتالي لو علي الحظ المارش وقف علي اي سنة من دوول - ساعة الدوارة ، الترس بيفوت والمارش مش بيدور
بتضطر حضرتك ساعتها تديها اولاني فـ تاني اولاني فـ تاني كام مرة ورا بعض لحد لما الترس يلف ويقف علي سنون سليمة وساعتها تدور تدور معاك علي طول

اما عن سرعة سير الدينمو - فطبعا متغيرة !!!!
امال سير الدينمو لافف مع ايه ؟؟؟؟ مش مع الكاتينة ؟؟
يعني كل ما عدد لفات المحرك زادت - سرعة او عدد لفات الدينمو زادت

تحياتي يا هندسة

[kyrillos]

تسلم ايدك يا باشا
هاروح للميكانيكى ونشوف الترس ده الاول, لو ماكنش مكسور, هانشوف المارش
وهاشوف برضه سير الدينامو, انا لسه مركبه من شهرين

الــــــــــف شكر, تعبتكوا

[mahmoud ghanem]

انا عايش بترس البندكس دة 6 شهور
العربية لو مش راضيه تدور زى ما المهندس محمد سيد قال اديها اولانى فى تانى مرتين تلاتة وبعدين دور وان شاء الله هتدور معاك

[kyrillos]

النهاردة جربت الحوار ده, اول فى تانى فى اول مافيش
اول فى تانى فى تالت فى رابع, برضه مافيش
بدبرياش ومن غير, اعتقد كده ان الحوار فى المارش نفسه

ربنا يستر

[SYD]

فعلا كدة للأسف يبقي مارش

[kyrillos]

بالفعل طلع المارش, بس الكهربائى غير ترس البندكس ولقينا حاجة كده هو بيسميها البرميل, جواها قطعة مكسورة
وغيرنا الاتنين دول, قالى احسن ما نجيب مارش استيراد, الله اعلم
الترس الجديد, يقال انه ايطالى, عمل 80
والقطعة التانية دى عملت 50
وشدينا سير الدينامو, صوت الصريخ ده راح خالص
الـــــــــــــــــــــــــــــــــف الــــــــــــــف شكر, بجد منتدى محترم جدا جدا وكل الناس هنا محترمين وبيفهموا

[SYD]

الف مبروك حل مشكلتك

اللهم انفعنا بما علمتنا وعلمنا ما ينفعنا

تحياتي