الحقونى يا رجاله العربيه مبتدورشى مره واحده كدا

[nesr6060]

انا امبارح الصبح نزلت ادور العربيه مدارتشى ولاقيت البطاريه ضعيفه قولت ماشى هروح اشحنها المهم جيت بليل زقيت فيها ورميت مليون مره برده مدارتشى قولت مفيش غير ان لازم اشحنها خدتها وروحت للراجل حطها على الشاحن وقالى نص ساعه وتعالى روحتله خدت البطاريه وركبتها والعربيه دارت والحمد الله كله كان تمام
انهرده الصبح بقى كانت الصدمه لما نزلت ادور العربيه علشان اروح الكليه اول حاجه العربيه خدت وقت طويل قوى علشان تسخن فصلتها وشغلتها تانى المرادى العربيه لاقيتها مش بتسخن دى كانت هتولع منى ومروحه الريداتير مش عاوزه تشتغل روحت فاصل العربيه تبرد وطلعت البس عقبال ما تبرد ولما نزلت ادور العربيه دارت الحمد الله بس مره واحده لاقيت ال اربى بينزل مره واحده وراحت العربيه فصلت منى جيت ادورها تانى مبتلقطشى والبطاربيه المفروض كانت فيها شحن وكانت بتفتح الازاز الكهربا و كل حاجه مره واحده كدا بزق العربيه علشان ادور العربيه تلقط لمده ثانيه الاربى يطلع لغايه 10 وبعدين تفصل اجرب تانى وادوس بنزين نفس الكلام فى الاخر قولت اركنها وامشى برفع الازاز كانت المصيبه البطاربيه فاضيه تماما مش عارفه ترفع الازاز اطريت اشده بايدى واقفل السنتر بايدى ومشيت ولسه راجع دلوقتى
ياترى ايه السبب فى ده كله مع انى عمرى ما اشتكيت من البطاريه ولا الكونتاكت ولا حاجه فى الكهربا ايه اللى حصل فيها وياترى ده عيب كهربا ولا حاجه تانيه ياريت تقولولى الرد بسرعه علشان انا رامى العربيه فى الشاره وراكنها مش مظبوط ياربا ساترها يارب

[nesr6060]

ياريت تردوا بسرعه يا رجاله

[Karim Ibiza]

بالنسبة لموضوع الدوارة ده ليه عدة أسباب
أسباب متعلقة بالبنزين
وأسباب متعلقة بالكهرباء

أحسن حاجة تجيب ميكانيكي وتنجز نفسك لأن بكرة اجازة ومش هتلاقي حد فاتح

لو عايزني أقولك علي حاجات تعملها بنفسك مفيش مشكلة بس هتبقي احتمالات لأن عربيتك جديدة عليك ولسه منعرفش اللي قبلك كان عامل فيها إيه

[nesr6060]

طيب يا باشا قولى اعمل ايه وانا هنزل اعمله انا مش عاوز الف بالعربيه من ميكانيكى يلعبلى فيها لكهربائى وهما ميكونوش عارفين فيها ايه خاصه ان كل واحد هنا جنبى يقولى انه بورم وفاهم كل حاجه وهو اصلا حمار واخره عربيه فيات حلو عليهه فمش عاوز الناس تلعب فى العربيه على الفاضى فياريت لو تقولى اعمل ايه علشان احدد ايه العطل بالظبط مع العلم انا شايف ان البطاريه لما بتبقى مليانه العربيه بتدور بس البطريه بتفضى مش عارف ليه وبتسرب الشحن بسرعه اوى

[nesr6060]

بالنسبة لموضوع الدوارة ده ليه عدة أسباب
أسباب متعلقة بالبنزين
وأسباب متعلقة بالكهرباء

أحسن حاجة تجيب ميكانيكي وتنجز نفسك لأن بكرة اجازة ومش هتلاقي حد فاتح

لو عايزني أقولك علي حاجات تعملها بنفسك مفيش مشكلة بس هتبقي احتمالات لأن عربيتك جديدة عليك ولسه منعرفش اللي قبلك كان عامل فيها إيه

ياريت تقولى اعمل ايه على الاقل اعرف العطل فى ايه واشخصه بدل ما اودى العربيه لحد يلعب فيها وخلاص خاصه ان الميكانيكيه اللى هنا كلهم عاملين فيها بورم وهما الله ينور
وكام عاوز اعرف العطل سببه كهربا ولا ميكانيكا ده اهم حاجه علشان اعرف اوديها لمين

[grandfox]

السلام عليكم
بص يا صديقى لو ليك حد من صحابك معاه عربية وبطاريته زى بتاعتك حاول تاخدها منه وجرب لو العربية دارت يبقى خير وبركة وبرضه ممكن تشوف عند الكهربائى اللى انت شحنت عنده البطارية بس لازم تكون نفس الامبير بتاع بطاريتك ولو ما داريتش يبقى دور على ميكانيكى والله المستعان

[nesr6060]

طيب لو العربيه دارت يبقى العيب عيب دينمو صح لان انا امبارح لما روحتت شحنت العربيه دارت على طول ومن غير اى تعب ولا حاجه

[SYD]

ازيك يا احمد بيه
علي فكرة انا هرد عليك وانا مش عارف انت عربيتك مواصفاتها ايه
علي ما اتذكر انها كانت 98

انا امبارح الصبح نزلت ادور العربيه مدارتشى ولاقيت البطاريه ضعيفه قولت ماشى هروح اشحنها

تمام

المهم جيت بليل زقيت فيها ورميت مليون مره برده مدارتشى قولت مفيش غير ان لازم اشحنها خدتها وروحت للراجل حطها على الشاحن وقالى نص ساعه وتعالى روحتله خدت البطاريه وركبتها والعربيه دارت والحمد الله كله كان تمام

بتزق وترمي ومع ذلك مش بتدور
هنا في كذا أحتمال
1- طرمبة بنزين ضعيفة ومش بتضخ كويس
2- موبينة قاطعة
3- بوجيهات او اسلاك بوجيهات

انهرده الصبح بقى كانت الصدمه لما نزلت ادور العربيه علشان اروح الكليه اول حاجه العربيه خدت وقت طويل قوى علشان تسخن فصلتها وشغلتها تانى

يعني الموتور بارد ؟؟ ولا مؤشر الحرارة مش بيتحرك ؟؟؟؟

المرادى العربيه لاقيتها مش بتسخن دى كانت هتولع منى ومروحه الريداتير مش عاوزه تشتغل روحت فاصل العربيه تبرد وطلعت البس عقبال ما تبرد ولما نزلت ادور العربيه دارت الحمد الله

المروحة مش عايزة تشتغل ليها عدة احتمالات
1- الفيشة بتاعتها
2- الأرضي بتاعها
3- الفيوز بتاعها
4- الثرموستات او فيشته

بس مره واحده لاقيت ال اربى بينزل مره واحده وراحت العربيه فصلت منى جيت ادورها تانى مبتلقطشى والبطاربيه المفروض كانت فيها شحن وكانت بتفتح الازاز الكهربا و كل حاجه مره واحده كدا بزق العربيه علشان ادور العربيه تلقط لمده ثانيه الاربى يطلع لغايه 10 وبعدين تفصل

أغلب الظن، طرمبة بنزين

اجرب تانى وادوس بنزين نفس الكلام فى الاخر قولت اركنها وامشى برفع الازاز كانت المصيبه البطاربيه فاضيه تماما مش عارفه ترفع الازاز اطريت اشده بايدى واقفل السنتر بايدى ومشيت ولسه راجع دلوقتى


اعتقد فضيت من كتر المحاولات في الدوارة

ياترى ايه السبب فى ده كله مع انى عمرى ما اشتكيت من البطاريه ولا الكونتاكت ولا حاجه فى الكهربا ايه اللى حصل فيها وياترى ده عيب كهربا ولا حاجه تانيه ياريت تقولولى الرد بسرعه علشان انا رامى العربيه فى الشاره وراكنها مش مظبوط:_alshmokh22[1]: ياربا ساترها يارب

بص يا باشا
انت عندك دلوقتي احتمالين منهم واحد هو المرجح
1- طرمبة البنزين - ودة الأحتمال الأكبر
2- البوبينة (الموبينة)

اول حاجة اختبر البوبينة - هتفك الأسبراتير كله علي بعضه
هتفك احد سلوك البوجيهات من البوجيه الخاص بيه
هتلف الأسبراتير بأيدك
هتقرب سلك البوجيه من جسم الموتور
لو لقيت السلك المفكوك بيجيب شرر - يبقي البوبينة تمام
الكلام دة لو البطارية قاطعة النفس

لو البطارية سليمة وبتدور معاك
هتفك احد سلوك البوجيهات من البوجيه
هتخلي حد يدور العربية
هتقرب سلك البوجيه من جسم الموتور - لو رمي شرر يبقي البوبينة تمام


____________________



أختبار طرمبة البنزين

هتفك خرطوم تغذية البنزين من المسطرة
هتفتح كونتاكت
لو الخرطوم جاب بنزين يبقي الطرمبة تمام - في الضخ

في اختبار تاني للطرمبة عن طريق خرطوم الراجع
بس دة موال وحوار وهتفك الطنبة والطرمبة وموال اسود
خلي الميكانيكي احسن هو اللي يعمله


والله المستعان
،
،

[SYD]

بص يا احمد
انا دورت علي النت مالقتش صور ليها في الحوض
بس هي حاجة شبه كدة



هتلاقيها راكبة في صدر العربية تحت المساحات

ولو انت مشيت مع السلك اللي خارج من الأسبراتير هتلاقيه في النهاية واصل بالموبينة

بس انت هتعمل بيها ايه ؟؟؟
انت اهم حاجة تختبرها عشان تعرف شغاله ولا لاء
او هات ميكانيكي يختبرهالك تحت البيت ولو طلعت قاطعة هتجيب واحدة استيراد

تحياتي

[nesr6060]

ايوه يا باشا انا نزلت وشوف الحاجات دى
والراجل اللى قدامى قالى البطاريه نايمه ولازم اشحنها 8 ساعات مع العلم انا امبارح وديتها للراجل شحنها بالظبط فى تلت ساعه فلما قولتله كدا قالى ده مشحنهالكشى ولا حاجه علشان كدا فصلت شحن تانى ياترى ده صح ولا غلط يا رجاله البطاريه الجافه المفروض بتشحمن اد ايه لو فاضيه خالص ولو انا مشحنتهاش امبارح ازاى دورت العربيه وليه صلت مره واحده كدا ولون هى دوره العربيه بسهوله جدااا ومن غير اى مشاكل فى الدوره سواء كان امبارح او انهرده لغايه الصبح لما العربيه فصلت مره واحده كدا زى ما يكون شغاله على البطاريه وفصلت اول ما البطاريه فصلت شحن

[SYD]

بص انا مافهمش اوي في قصص شحن البطارية الجافة
ولكن اخر مرة شحنت بطاريتي
الميكانيكي بتاعي خدها مني وبيتها علي اللشحن وتاني يوم روحت خدتها منه

ربنا يوفقك
والله المستعان
،
،

[Karim Ibiza]

يا سيد باشا
الراجل ده طرمبته فى الحوض لأن عربيته 1.3

[nesr6060]

اه صحيح نسيت اقولكوا انا لاقيت مكان فلتر البنزين امبارح لما جبت واحد يوشف العربيه بيفهم فى الميكانيكا بس مش اوى
هو الفلتر عباره عن علبه معدن لونها رمادى مش شفافه يا باشا واللى جواها مش باين علشان هى معدن ومكانها بالظبط ورا الموتور فى الجنب اللى قدام الكرسى اللى جنب كرسى السواق بس اللى عاوز اعرفه الفلتر ده لما اجى اشتريه اجيب فلتر دايو برده ولا اجيب فلتر ايه بالظبط لان انا لما نزلت التوفقيه اسال عن فلتر ابيزا 94 ملاقتهوش ففى اى فلتر تانى يركب عليه ؟؟؟؟
وبخصوص العبطاريه الحل الوحيد اللى قدامى استنى لما صاحبى يجى بعربيته واحط بطريته عندى وهى هتدور انشاء الله بس المشكله ان البطريه بتخلص الشحن بسرعه وبعد كدا هرجع لنفس المشكله و العربيه حتى بترميش فانا هخليه يجيب البطاريه واطلع عند كهربائى عدل بس لسه هشوف

[nesr6060]

بس اللى حيجننى المفروض اللى اعرفه ان العربيه لما تدور البطاريه بتبقى مالهاش لزمه والعربيه بترمى ساتها حمل الكهربا كلوا على الدينمو طيب ليه العربيه لما بتدور البطاريه بتفضى بسرعه ولما بتخلص العربيه بتقف كان العربيه بتاخد الكهربا من البطاريه مش من الدينمو

[ehab_mansour]

السلام عليكم

حضرتك راجع علي كل وصلات الكهرباء في عربيتك لأن كل مواضيعك دي اعتقادي انها كهرباء معلقة
1- تأكد ان كابلات البطارية نضيفة و مكانها نضيف و مربوطة كويس (يعني متحطهاش كده و خلاص لأ اربطها كويس )
2- راجع علي اي سلوك واصلة علي القواطيش بتاعت البطارية لأن اوقات فيه اكتر من سلك بيكون مربوط علي القوطاش من الجنب تأكد انهم كويسين
3- راجع علي وصلة الفرد السالب اللي خارج من البطارية انها تكون مربوطة كويس في جسم العربية اسفل البطارية
4- راجع علي اي اسلاك او فيش او وصلات ارضي في حوض العربية او اسلاك ارضي واصلة في جسم المحرك
اعتقد لما تخلص و تتأكد من كل ده هتتحل مشكلتك ان لم يكن التعليق ده عطلك حاجه تانيه كانت سليمة