الحمد الله .. اخيراً عملت سرفيس العربية الابيزا

[mahmoud ghanem]

السلام عليكم

الحمد الله النهاردة عملت سرفيس العربية ( سير الكاتينة + سير الدينمو ) وتغير كاوتشة كوبلين وحلت مشكلة تسريب الزيت

البداية كان فى مشكلة تسريب زيت بسيط من طبه الزيت + زيت على الماتور من الجمب ناحية مجموعة السيور .. وكان عصام الميكانيكى من 3 اسابيع شافها وقالى لما يجى معاد تغيير الزيت هات معاك جركن زيت وفلتر زيت وتعالى ونحل المشكلة وكان معايا المهندس محمد سيد وساعتها غيرنا فلتر البنزين

المهم ..
اشترين 2 كاوتشة كوبلين بـــ 25 جنيه الواحدة + جركن زيت شل الاحمر بــ 75 جنيه + فلتر زيت علامات بــ 35 جنيه المانى وبصراحة سعره تحفة من التوفيق اللى فى المعادى والراجل دة بصراحة عنده ضمير واسعاره فوق الممتازة

توكلت على الله ورحت لعصام غير كاوتشة الكوبلين وغير طبه الزيت لانها هى اللى كانت بتسرب وقرط على تربيط الكارتيرة وغير الفلتر وبص على جوان وش التكيهات قالى دة عاوز يتغير علشان متحمص وناشف رحت جبته من عند الشيخ علاء فى فيصل بــ 50 جنيه نوع كدة مش فاكر اسمه وكان عندة توب ران بــ 75 جنيه ... غالى انا عارف !!!!

وغير اويل سيل الكامة من عنده وكان عندى وش التكيهات بيمسك بـ 3 مسامير كدة كان المسمار اللى على اليمين مقطوم عصام الله يباركله غير الجزء دة والحمد الله من عنده ..

وغير سير الكاتينة بنوع اسمه دايكو بــ 70 جنيه وسير الدينمو بــ 20 جنيه مش عارف نوعة ايه بصراحة

ونظفت البوابه بنفسى وهو شغال .. وفى الاخر ظبط الكهرباء بصراحة الحمد الله العربية مبقتش ترعش زى الاول ( ظهرت مشكلة الرعشة على الغيار الاول بعد تركيب طقم التبريد الكامل وشحن التكييف )
ودة كان الموضوع http://www.nilemotors.net/Nile/345790-98.html

وقفل العربية وقالى هات 2 زجاجة نفط وراح غاسل الماتور بالهواء والنفط ..

ناقص كدة عندى البوجيهات ودى بقى ان شاء الله هتبقى لايــف فى المقابلة

تحياتى للجميع واشفكم على خير ان شاء الله يوم الجمعة فى المقابلة

[SYD]

الف مبروك يا حودة
ربنا يباركلك في العربية
بس مش احنا كنا متفقين هنروح سوا الجمعة الجاية
لو كنت كلمتني - انا كنت في الشارع اللي جمب شارع عصام - كنت جيتلك

كنت عايز اقابلك عشان نروح سوا نوصي علي البوجيهات

تحياتي

[SYD]

ما تنساش تكتب كل الحاجات اللي اشتريتها في http://www.nilemotors.net/Nile/341028-a.html
وياريت كل حاجة في مشاركة لوحدها

تحياتي

[Karim Ibiza]

مبروك يا حوده
بس عندي كام سؤال:
ليه بتحط شيل الأحمر؟
هو ايه النفط ده وبكام ومنين؟
جبت بوجيهات ايه؟
هو ليه لازم نشحم أيدينا في كل مقابلة؟

حبيبي يا حوده

[hossamalsadik]

مبروووك يا أ/ محمود سرفيس العربية متهيألى حسب كلامك كده فأت اوى
بس باين عليك مبسوط من عصام ده هوا مكانه فين وهوا متخصص ولا شغال فى كله
تقصد بالنفض = زجاجة النفض المعدنى الى ب2او3 جنيه
وفين محل التوفيق الى فى المعادى ده
اصلى الواحد بيحب يعرف الأماكن المحترمه ديه وهوا عنده حجات الأبيزا زى مثلا فتح الباب كده

تحياتى

[mahmoud ghanem]

الف مبروك يا حودة
ربنا يباركلك في العربية
بس مش احنا كنا متفقين هنروح سوا الجمعة الجاية
لو كنت كلمتني - انا كنت في الشارع اللي جمب شارع عصام - كنت جيتلك

كنت عايز اقابلك عشان نروح سوا نوصي علي البوجيهات

تحياتي

حبيب قلبى يا بشمهندس انا اقدر بردوا اروح من غير ما اكلمك .. فعلاً انا كنت ناوى اروح الجمعة اللى جاية بس طلعتلى سفرية من تحت الارض قلت مابدهاش اروح لعصام علشان اسافر والعربية فايقة ..

واتصلت بيك قبل ماروح علشان اظبط معاك على الساعة 1:30 ظ تقريباً بس انت مردتش قلت يمكن مشغول او نايم ولما هتشوف رقمى هتكلمنى .. وبعد كدة الواحد طبعاً زى ما انت عارف ايدة كلها بقت شحم والذى منه .
بس هاجى معاك بردوا يا صديقى لو عاوز بعد المقابلة ماشى اى يوم تانى ماشى

كدة فى كانز بيبسى عليك انا مش طماااع

[mahmoud ghanem]

مبروك يا حوده
بس عندي كام سؤال:
ليه بتحط شيل الأحمر؟
هو ايه النفط ده وبكام ومنين؟
جبت بوجيهات ايه؟
هو ليه لازم نشحم أيدينا في كل مقابلة؟

حبيبي يا حوده

الله يبارك فيك
انا حطيت شل الاحمر منها نظافة للماتور ( هينزل بدرى ) و علشان لو فى تسريب والمشكلة متحلتش يبقى مخسرتش كتير وكدة كدة هينزل على مسافة قريبة

زجاجة النفط دى من عند اى مواان هى بــ 2.5 جنيه هى بديل الجاز بس انظف ورحتها اخف وبطير بسرعة

البوجيهات ان شاء الله NGK انا لسه مجبتهاش ودى مسئولية المهندس محمد سيد علشان اللى فى السوق 90 % مضروبيين

هههههههههه تشحيم الايد دة من علامات الجودة

[mahmoud ghanem]

مبروووك يا أ/ محمود سرفيس العربية متهيألى حسب كلامك كده فأت اوى
بس باين عليك مبسوط من عصام ده هوا مكانه فين وهوا متخصص ولا شغال فى كله
تقصد بالنفض = زجاجة النفض المعدنى الى ب2او3 جنيه
وفين محل التوفيق الى فى المعادى ده
اصلى الواحد بيحب يعرف الأماكن المحترمه ديه وهوا عنده حجات الأبيزا زى مثلا فتح الباب كده

تحياتى

الله يبارك فيك يا صديقى وشكراً على مرورك

الحمد الله العربية فعلاً اختلفت حاسس كانها بتدعيلى

الحمد الله عصام صنيعى محترم مش بتاع اشتغلات وفتحه ونصبه ودة معرفة محمد سيد وهو تخصص فولكس وسيات بس وبصراحة مصنعيته معقولة
هو مكانه فى شارع الاشوال - الهرم

الله ينور عليك هى بالظبط من عند الموااان بــ 2.5 جنيه

محل التوفيق دة بقى فى شارع احمد ذكى بالمعادى
تخصص فولكس وسيات الميزه اللى فيه انه بيبيع بسعر ما اشترى جمله حتى لو الحاجة غليت بره ..
راجل محترم والمحل زى محلات زمااان بتاعت التمويين و شغال فى حاجة الميكانيكا بس + قطع الغيار اللى شغالة فى البيع فوانيس مش عارف اية كدة يعنى
... لو عاوز رقمه ابعتهولك على الخاص تبقى تسأل على اللى انت عاوزه قبل ما تروح له
او لو عاوز حاجة كلمنى اجبهالك منه انا ساكن ف المعادى وابقى اقبلك فى اى مكان ادهالك

[SYD]

يا باشا انا للأسف تليفوني باظ وكل النمر كانت متسجلة عليه
وحالياً ماشي بتليفون تاني ماعلهوش اي حاجة فأي حاجة

خير ان شاء الله
ونبقي نروح مرة تانية

تحياتي يا صديقي

[ehab_mansour]

مبروك يا حوده و الحمد لله ان المشكلة اتحلت

[hossamalsadik]

متشكر محمود باشا
خلاص أبعتلى الأرقام مع وصفه للعنوان كده من أتجاه كورنيش النيل عشان انا ساكن بالقصر العينى ويارب يكون اقرب من غيره

[mahmoud ghanem]

يا باشا انا للأسف تليفوني باظ وكل النمر كانت متسجلة عليه
وحالياً ماشي بتليفون تاني ماعلهوش اي حاجة فأي حاجة

خير ان شاء الله
ونبقي نروح مرة تانية

تحياتي يا صديقي

الحمد الله على كل شئ ... فداك يا صديقى

وسماح المرة دى

انا معاك شوف انت هتروح امتى !!

[mahmoud ghanem]

مبروك يا حوده و الحمد لله ان المشكلة اتحلت

ربنا يبارك فيك يا بشمهندس ايهاب و شكراً على زوقك واهتمامك

ان شاء الله تكون بالف خير وصحه .. و ماتحرمناش منك .

[mahmoud ghanem]

متشكر محمود باشا
خلاص أبعتلى الأرقام مع وصفه للعنوان كده من أتجاه كورنيش النيل عشان انا ساكن بالقصر العينى ويارب يكون اقرب من غيره

انا بعتلك الارقام الارضى والموبيل فى رسالة خاصة

الوصف سهلة ان شاء الله .. هتدخل المعادى من الداخلة التانية اللى عند جراند كافية طوالى هتلاقى مسجد الفاروق على اليمين كمل طوالى واطلع الكوبرى اللى بيعدى من فوق المترو .. بعد نزلة الكوبرى بــ 250 متر فى داخلة شمال اللى بتدخلك على ميدان سوارس وشارع 9 تمام .. هتمشى فى الشارع دة هتلاقى ميدان سوارس على شمالك ونادى المعادى على يمينك كمل على طول ... سيب اول تقاطع وكمل بــ 300 متر فى يوترن اعمل يوترن واركن على طول ... هو امام اليوترن على طول ..

وكلمنى وانا ابقى اجى معاك مفيش مشكلة انا تليفونى على صفحتى

وليه فرع تانى فى الملك الصالح موجود فى الكارت بتاعة بس انا معرفش عنه حاجة
عنوانة زى ما هو مكتوب : 1 ش نسيم جرجاوى - الملك الصالح

تحياتى

[mahmoud ghanem]