يا جماعه المكنيكى هيجننى بخصوص المتور مش مصدق انه 1600

[AmirCode]

السلام عليكم
يا صباح الفل على كل اعضاء نايل موتور

يا جماعه انا عربيتى Ibiza 94 و متسقطلها متور جولف 1600 CC

و مكتوب فى الرخصه الكلام ده
بس مكنيكى صحبى كده من ايام 128 بتاعتى رحتله يعليلى البنزين شويه علشان المشكله الاى قبلتنى بخصوص الكهربا لو فكرين بيقولى ده متور 1300 CC مش 1600

وهو بصراحه جننى وانا مش فاضى اروح الحرفين اشوف الموضوع ده

مع العلم الغيار ال 3 بيجيب معايه تقريبا 100 مستريح و 110 كمان

انا بقى مش فاهم بقى كلمه صح ولا كلمه غلط فا لو حد عنده خبره فى الموضوع ياريت يطمنى
وشكرا لقرئه الموضوع

[nesr6060]

انا عندى موتور 1300 سىسى عاوز اقولك ان ال 100 دى مستحيل اجيبها على التالت مهما حصل ده حتى لو جبت طياره تشدنى مش هتيجى على التالت انا 100 دى بتيجى يا اما اول الخامس يا اما قارص على الرابع علشان كدا مستحيل ده يبقى 1600
وبعدين هو انجيكشن ولا كربراتير اصل ال 1300 سىسى كربراتير وهو اللى نازل مع العربيه
ده على حد علمى وانا مش خبير الصراحه بس بقولك اللى اعرفه
ممكن بقى اسالك كلفك كام تسقيط الموتور ده واستهلاك البنزين معاك ايه اخباره علشان نفسى اسقط مكنه 1600 سىسى يا اما 1400 سىسى 2 كامه وخايف من البنزين

[SYD]

100 علي الثالث مش مقياس نعرف منه سعة المحرك

ممكن تصورلنا الموتور عشان نعرف هو 1600 ولا 1300
وانا قولتلك قبل كدة في الموضوع السابق عايزين صورة للموتور والأسبراتير عندك والدنيا دي كلها

او تشرفنا في المقابلة ونشوفلك القصة دي

http://www.nilemotors.net/Nile/356424-2013.html

تحياتي

[exact]

السرعة مش مقياس... انا في السويفت التالت باجيب بيه 110... ودي سويفت مش موتور فولكس

مثلا مدموغ على وش السلندر من عالجنب عندي g13b وده كده معروف انه 1300 سي سي.. دور على كود الموتور

[nesr6060]

طيب ممكن حد يقولى ازازاى ممكن 1300 سىسى ويجيب 110 على التالت معنى كدا انا لو عندى الحوار ده اجيب 200 مستريح لان عربيتى التوب بتاعها تقريبا 140 لغايه دلوقتى اكتر من كدا ال rpm بيعلى على اللون الاحمر

[ehab_mansour]

كما قال لك الاخوة فوق يا تشوفلنا كود موتورك ايه و ده هتلاقيه محفور علي بلوكة الموتور تحت شجرة المياة او تصورلنا موتورك من اكثر من ناحية عشان نفهم

[AmirCode]

انا هصور المتور يا جماعه و ارفع صورته و يارب يكون 1600 صح علشان المكنيكى ده خلانى ادايق جدا وحاسس انى مش فاهم اى حاجه فى اى حاجه

[windofchange]

وش السلندر عندك (الموتور من فوق) لونه ايه اسود ولا ابيض فضي كده؟

[matrix012]

انا اخر معلوماتى ان فعلا السرعه مش مقياس على ال cc
بس انا برده مستغرب جدا ان السرعه 100 على الغيار التالت
ممكن تقولنا ال
RpM بيكون على كام لما السرعه بتوصل 100 على الغيار التالت ؟؟؟؟؟؟؟؟؟؟؟؟؟؟؟؟
انا السرعه عندى 100 على الغيار الخامس ار بى ام على 3000
واخر ما قرصت على العربيه كانت 165 على الغيار الخامس برده والار بى ام على 5
وعموما انا هستخدم لفظ اخويا محمد سيد فى ان عربياتنا بطه لحد السرعه 60 وده متهيئلى الغيار التالت عندى وعند ناس كتير

[Karim Ibiza]

الموتور الـ 1.0 8v والـ 1.3 8v فعلا مواتير عيانة والابيزا عشان تقدر تبتدى تركبها متقلش عن 1.0 16v او 1.4 8v

انا التالت عندى 120 على 6RPM و أيام الـ1.4 كنت بجيب بيه 100

عموما لصاحب الموضوع ياريت صورة كده حلوة للموتور او لو تعرف تجيب الكود بتاعه من على أعلى الجنب اليمين للبلوكة

[tareksakr]

يا جماعة عادي انا بجيب علي التالت 120 بجولف 2 1300 اللي هو نفس موتور الابيزا بس الماكس علي الخامس 150

[nesr6060]

طيب ازاى على التالت 120 و الخامس 150 ازاى دى انتوا هتجننونى ليه حد يفهمنى
ده انا عمرى ما جبت 100 دى على التالت ولا تيجى مش بعيد الموتور يولع اصلا

[Karim Ibiza]

الموضوع الغيار بيجيب كام ده مش مقياس لقوة الموتور قد ماهو مقياس لنسب تروس الفتيس أو الـGear Ratio
ودى بتختلف من جيل فتيس لأخر

وكما قال الشاعر:
مش مهم بتجيب كام
المهم بتجيبهم فى قد ايه

وعجمى

[SYD]

الموضوع الغيار بيجيب كام ده مش مقياس لقوة الموتور قد ماهو مقياس لنسب تروس الفتيس أو الـgear ratio
ودى بتختلف من جيل فتيس لأخر

وكما قال الشاعر:
مش مهم بتجيب كام
المهم بتجيبهم فى قد ايه

وعجمى

1+ انا كنت داخل اقول كدة بتجيب كام علي انهي غيار - بتعتمد في المقام الأول علي الفتيس ونسب غياراته 0 يعني مفيش علاقة بين انه موتور جولف 2 او لا لأن الجولف 4 غيار والأبيزا 5 غيار وبتعتمد ايضاً علي حالة اسطوانة الدبرياج ولها مقاييس اخري كثيرة جداً تحياتي للجميع

[AmirCode]