تجربة اول عربيه ابيزا 2000

[Morrgue]

السلام عليكم
انا اول مشاركه ليا فى المنتدى واتمنى استفيد منكم
انا بشترى اول عربيه ليا وزى ما انتوا عارفين مفيش معلومات عن تجارب شخصيه
كله عباره عن معلومات بسمعها وبقراها من على النت ..
المهم علشان مطولش عليكم انا لقيت عربيه ابيزا 2000
موتور 1400 العربيه مع واحد شكله ركيب العربيه من بره شكلها مش بطال
يعنى زى ما بيقولو واقفه مش معوجه رشه بره نضافه ما عدا السقف دواخل فبريكه
الصالون حالته مش بطاله والميكانيكى لما بص على الموتور قال انه جميل مافيهوش حاجه
المهم صاحبها فى اول الكلام قالى هيا عايزه عفشه بس ولما بصيت عليها لقيت لمبة الايرباج
قايده وواحد صاحبى قالى ممكن تكون واخده خبطه من قدام
المهم ان العربيه من وجهة نظرى مطمعانى فيها مطلوب فيها 38000 وانا بتكلم علشان اخلصها على 26000
ارجو انكم متبخلوش عليا برأيكم

[Karim Ibiza]

اهلا بيك فى قسم سيات

يا راااااااجل حرام علييييييك
من 38 لـ 26 ألف!!!!!!!!
أكيد قصدك 36 ألف

عموما مش شرط انها تكون واخدة خبطة عشان اللمبة تنور
اللى بيحصل ان فيه حاجة فى الكونتاكت اسمها فبرة الكونتاكت ودى لما بتبوظ بتتغير وعشان تتغير لازم تفك الدريكسيون ولو اللى بيفك الدريكسيون مش حافظ العربية هيقطع سلكة فى زور الدريكسيون عند الاير باج وده اللى بيخلى اللمبة تفضل منورة

بالتوفيق ان شاء الله وتحت امرك فى اى استفسار

[mahmoud ghanem]

بالتوفيق ان شاء الله

[hossamalsadik]

مبروك مقدما
السعر كويس ولمبة الإيرباج بتنور لو حتى عند ظبط الدركسيون عدلته يعنى واى حاجه فى الدركسيون بتخليها تنور
يعنى مش مشكلة نهائى و مضيقاك وعاووز تطفيها ب 30ج عند اى حد عنده كشف بالكمبيوتر قوله أمسحلى أررور الأيرباج بس كده

وطلما الأساسيات سليمه والماتور صح والصالون كويس و العربيه عجباك توكل على الله

[Morrgue]

شكرا يا جماعه على الترحيب وانا متأكد انى هستفيد منكم كتير
اسف هوا طالب 28000 وانا بنزلها لــ 26000 الغلط عندى :d
ويا ريت استفسار عن سعر العفشه الرياضيه بتاعتها ومنين
وهل 26000 على المواصفات دى سعر كويس
وهل الموتور ال 1400 كويس بالنسبالى ولا هيدايقنى
معلش للاطاله عليكم

[hossamalsadik]

هيا ابيزا موديل 2000 ماتور 1400 cc
والبايع طلب ثمانية وعشرون الف 28)
وكمليتها ايه يعنى فيها تكييف وشغال وكده وانزار وسنتر ... الخ

معلش بتأكد

[المجرى]

موديل 2000
وتكيف وسنتر وايرباج وازاز كهربا
انصحك لوجة الله
اجرى واهرب بنفسك لان السعر نااااااااااازل جدا بدرجة تقلق

[Morrgue]

موديل 2000 وموتور 1400 هوا الى مسقطه مكان الموتور 1000 الى كان فيها لانه كان ضارب مع المالك الى قبله جوان وش سلندر ده كلام من بق المالك الى قبله العربيه عايزه عفشه من بق المالك الحالى والتكييف عايز يتشحن والرخصه منتهيه
طبعا العربيه باور وزجاج كهرباء وسنتر لوك
سبب البيع مشروع شراء عربيه بى ام وعلى فكره انا عارف تاريخ العربيه كله للاسف

[Morrgue]

منتظر الرد يا جماعه كلامكم زود قلقى اكتر مما كنت

[medo18]

ايه السعر ده !!!!!!!!!!!!!!!!!

الموديل ده لو لقيته ب 40 اصلا يبقي حلو لو 38 ماشي لكن 28 ده قليل جداااااااااااااااااااااااااااا

عارف تاريخ العربية و عجباك توكل علي الله

[hossamalsadik]

بص أنا معايا نفس الموديل فعارف اسعرها وهى زى ماقلولك كده
أنتا عارف تاريخ العربيه طيب لو أساسياتها سليمه مافيش مشكله
وحتى لو احتاجت صرف عفشه مثلا 1000 والتكييف كله اصلا بالتركيب أصلى أستيراد 3000 طبعا أنتا مش هتصرف عليه المبلغ ده أنتا هتصلحه فقط قول 1000 تحت الزيادة والنقصان
كده 2000 ج والماتور بتقول عليه أنه تمام أنتا شايف انها محتاجه حاجه تانيه ضفها على السعر

بس لو العربيه ديه اساسيتها سليمه وأأكد تانى اساسيتها سليمه يبقى مفيش مشكله ويبقى سعرها فى الجون
طيب ماتكشف عليها عند حد متخصص فولكس وتشوف حاتها ومحتاجه ايه وتقلنا

[Morrgue]

انا فعلا النهارده نازل رايح بيها لسمكرى وميكانيكى وهشيك عليها لاخر مره ولو خدت منهم الاوكيه هتوكل على الله ادعولى

[hossamalsadik]

بالتوفيق أن شاء الله