سيات 79 عاوز اعدلها اعمل ايه ؟

[Diablo]

abdulkhaleq انا مش زعلان منك بس انا بحاول اقول ماهو كده مصاريف بمصاريف انت محسسنى ان الموتور 1400 ده ميزيدلوش هورس باور خالص امال انا بشوف شباب كتير بتظبط الدوجان بتاعاها ازاى ؟؟؟؟؟ وهو هو نفس الموتور بس 1600 والنبى ياشباب لو حد يفهم ازاى ازود هورس باور لموتور 1400 سى سى كاربراتير ميبخلش علينا

[akmm]

موفق في الشغل للعربيه ................ وعاوزين نشوف النتيجه النهائيه ان شاء الله

[Diablo]

شكرا لك يا اخ akmm ودى صور جديدة للناس الى متابعة

[O.M.S]

ربنا يوفقك يا رب انا بحب الدماغ دي قوي دماغ التظبيط و التعديل وانا ماشي في حوار تظبيط عربيتي بقالي فتره ولسه قدامي شويه كده واخلص

[Diablo]

O.M.S ربنا يوفقك وميوركش القرف والتعب بتاع الصنايعية

ايه ياشباب موقع كبير وطويل وعريض زى ده مفيش حد قادر ينصحنى ازورد الهورس باور ازاى؟؟؟؟
انا عموما بعد تقفيل العربية هبتدى فى تطوير وصناعة فلتر رياض بنفسى وغير كده فيه واحد بتاع شاكمانات شفته بالصدفة فى المطرية هو مشهور اوى هحاول اظبط اكسوزت سيستم وبالنسبة للكربراتير هحاول اشوف 2 باب يركب عندى الى عنده اقترحات ياريت مايبخلش


بالمناسبة انا فوت على اشرفكو امبارح بتاع الجنوط ولا حاجة منهم عجبتنى

[Mohamed ELOoL]

1- فلتر هوا سبور محترم و خليه ياخد هوا بارد
2- تربو كامل
3- بوجيهات و اسلاك فاير
4- حط بنزين 92

بوس ياسيدي انت بتتكلم في ماتور 1400cc استوك من 1979 يعني مش بيطلع الهورس باور الي بيطلعه الدوجان الي انت بتقول عليها ( الموتور ميت )

دة قصد استاذ عبد الخالق

[aw2100]

السلام عليكم ورحمة الله وبركاته

اولا هعرفكم بنفسى اسمى كريم وكنت مشهور اوى بأسم ديابلو فى قسم الموتوسيكلات نظرا الانى بقالى اكتر من 7 سنين بركب موتوسيكلات ريس والحمدلله افهم فيها جامد بعد ماربنا هدانى وبعد الموتوسيكل قلت اشترى عربية بقى وابقى محترم عشان فى نظر الناس اى حد راكب موتوسيكل ده صايع ماعلينا

فادى اول عربية اتعامل معاها فى حياتى هى عربية غربية وكتير منكم او معظمكم ميعرفهاش هى تصنيع شركة سيات موديل 1979 اسمها بوكانيجرا بالأسبانى وترجمتها بالعربى الفم الاسود لانها بتنزل وشها اسود ودى صورها بره


ودى صور عربيتى وهى عند السمكرى



المهم انا اول ما اشتريت العربية دى فككتها حتة حتة وديت الموتور عند الميكانيكى وهى عند الكهربائى وطبعا هركبلها ضفيرة جديدة وكل حاجة جديدة ان شاء الله
هى موتورها الاصلى موتور فيات 124 بقوة 1437 سى سى طبعا موتورها الاصلى اتفرتك وانا ختها بموتور هو هو نفسه بس افراج المهم قلت بدل ماجيب موتور افراج ويطلع نص نص والبس فى الحيط قلت اعمر ده طبعا الميكانيكى لما فك الموتور عشان كان فيه سنة خشونة ومبيجيبش مرشيدير لقى الكرنك اخر خراطة ليه بيقولى ده 060 او مش فاكر ولانى بفهم فى الموتوسيكلات فلما شفت الكرنك عرفت انه معموله مليون عمرة وخرطاة قبل كده طبعا الميكانيكى قالى هجيب كرنك استيراد يكون اول خرطة 010 قلتله لا ونزلت انا جبت واحد جديد اصلى مش هندى ولا تركى وجديد بعد كده جبت بساتم وسبيكة وكامة وهلالات وحاجات كتيرة جديدة ماعدا البى الات الميكانيكى قالى هما كده حلوين ومعرفش قالى هنعمل لحمية فى مكان الصبابات المهم هو وعدنى ان الموتو يقفل امبير (عداد على 180) هو ميكانيكى كله بيشكر فيه بس مشكلته انه دقة قديمة لما بقوله عايز ازود الهورس باور وتربو ومش تربو افتكرنى مجنون بس انا عرفت انه ميكانيكى قديم ملوش فى التعديلات وهكذا برضك السمكرى لما قلتله عايز اعمل شدادات فى الحوض والشنطة ولا فهم ولا كلمة وجبتله صور ووريته وبرضك قعد يقولى ده هيأثر على الحوض وكلام كده وهكذا برضك الكهربائى بقوله عايز اعمل حاجة فى الضفيرة الجديدة بحيث العربية متبقاش ابلاتين عايزها من الحاجات الجديدية دى مش فاكر اسمها برضك قالى هات ضفيرة والكترونى وموتور جديد المهم ياجدعان انا نفسى اظبط العربية دى انا فهمت شوية فى التربو والكلام ده بس عرفت انه بيبهدل الموتور وخطر على المواتير المعمرة وهو حلو مع المواتير الجديدة والانجكشن ومش عارف لازم اسيب العربية دايرة قبل ما اقفلها بربع ساعة وكلام غريب كده

بصو ياشباب بجد محتاج خبرتكم ازاى ازود الهورس بتاع العربية بدون متعب الموتور وتكون حاجات فعلا موجودة فى مصر لانى لما قريت موضوع زيادة الهورس باور كلها كان بيحكى فى فلاتر رياضية وتغيير رشاشات وكلام كده بس دى كربراتير فامعنديش رشاشات فياريت ياجدعان تقلولى اظبط موتورها ازاى وازود الهوس باور بتاعه ازاى علما بانى هخرج بيها كل يوم ومشاوير ومش عايز حاجة تعطلى الموتور وتخلينى اقعد جنبها اعيط وبرضك نفس الكلام فى الكهربا لو الضفيرة فيها تظبيط حد برضك يشرحلى عشان هاعملها ضفيرة جديدة وبالنسبة لعفشتها هى هى نفس عفشة الفيات 127 فياريت لو حد يعرف اجيب منين عفشة رياضية تركب على 127 وهل فعلا هتبهدل الشاسيه وتفتحه علما بانى عايز كمان اعمل شدادات ومش عارف دى تتعمل فين علما بأن البعد بين الركبة والركبة فى الحوض نفس هوه هوه الفيات 127 تقريبا مش فاكر اوى 89 سم او 87 سم وبرضك لو حد يعرف اجيب منين جنوط بشفة زى دى

مش شرط الشكل ولا النوع ولاحتى نفس اللون انا عايز جنوط تكون غطسانة كده لجوه واحسن مقاس اجيبه كام 13 ولا 14 ولا 15 وانهى فيهم الى يريح الشاسيه وهلا فعلا الجنوط دى بتتباع فقط فى بورسعيد ولو فعلا كده اجيبها منين من بورسعيد لانى نزلت هناك عند منطقة اسمها بنك ناصر او حاجة زى كده الى بيقطعو فيها العربيات وملقتش حاجة ونزلت الحرفيين وملقتش حاجة والنبى ياجدعان ساعدونى فى الموضوع ده لانى جاهل بالموضوع ده ومش عايز ابوظ لا شكل ولا اداء العربية بعد كل المصاريف دى

حضرتك بتقول ان موتور العربية بتاع ال124 وده موتور دفع خلفى بيركب بالطول بعامود كردان وكورونه وبرضة بتقول ان العفشة عفشة 127 ودى موتورها بالعرض ومفيش عامود كردان ممكن تفهمنى ازاى عربيتك عفشتها عفشة 127 هو الموتور عندك راكب بالطول ولابالعرض يعنى العربية جر امامى ولادفع خلفى ؟؟؟

[Diablo]

بص ياباشا aw2100 انا هفهمك فيات 124 نزلولها مواتير 1400 كامة واحدة وبتركب بالطول زى الصورة دى



هو نفس الموتور الى عندى بس راكب بالعرض لانى عندى كبالن مش كارونة يعنى ينفع يركب بالطول فى عربيات ويركب فى عربيات تانية بالعرض
Mohamed ELOoL بالنسبة لتسقيط المواتير انا ممكن اسقط اى مواتير عندى فيات (124-128-UNO)
وممكن كمان مواتير لادا القديمة وممكن مواتير لانشيا وممكن مواتير سيات ابيزا بس انا فكرت ليه اجيب موتور افراج ويطلع مخستع قولت اعمر ده عمرة كاملة لانه هو اصلا افراج ومكملش شهرين وكرنكه كان متاكل فانا اصلا خلاص عمرت الموتور وهو مش قديم زى مانتو فاكرين فاضل بقى انى اظبط فلتر ونظام عادم شكمان يعنى عشان اظبطه وكده كده انا لسه معملتش الفتيس ولا الدبرياج فا سؤالى دلوقتى هل فيه طقم دبرياج رياضى هو الفتيس بتاعها 4 غيار غير المرشيدير ولو فيه دبرياج رياضى انزل اجيبه منين ولو فيه فلتر هوا رياضى يركب على الكربراتير اجيبه منين
وبالنسبة للعربية منزلتهاش صور النهاردة لانى ختها من عند السمكرى ووديتها عند بتاع الكوالين عشان تركيب جلود للبيبان والكبوت والشنطة وفتحة السقف وظبط الكوالين كلها واشغل كله على مفتاح واحد (ابواب - كونتاكت - غطا تانك البنزين) كونتاكت جبته ماركة اسمها ميتا المانى الصنع بيركب على الشاهين يدوب صرفت تحت الحساب 400 جندى

[Diablo]

نسيت صحيح اسالك Mohamed ELOoL يعنى ايه بوجيهات واسلاك فاير وده هيفرق معايا اد ايه فى الباور هورس واجيبه منين ؟

[Diablo]

اخر تطورات السيارة ختها من عند بتاع الكوالين ورجعتها للسمكرى عشان يبتدى شغل فيها من يوم الاثنين القادم ان شاء الله ةهخدلكم شوية صور ليها يوم الاثنين

[Diablo]

السلام عليكم وكل عام وانتم بخير
امبارح شوف عربية مركبة الجنوط دى فضلت واقف جنب العربية نص ساعة عشان اسال صاحبها جبهم منين او هما للبيع مجاش صاحبها
فيا شباب لو حد عنده جنط زى ده او دووول او يعرف محل بيبيعهم جديد او مستعمل مش فارقة ياريت يقولى فين

[ahmedesmat1987]

على حسي خبرتى اتلقليله ممكن اقولك تعمل ايه عشان تزود اداء العربيه.......

1.. فلتر هواء اسبور حجم كبير ويكون ماركه محترمه وجاى بالكيت بتاعو كامل بالمواسير

2... طقم اشعال اللكترونى (موبينه + اسبراتير) مكلفين شويه بس اداء كويس

3.. بوجيهات ngk بلاتينيوم بالاسلاك الاسبورت بتاعتها...وخلى بالك كل عربيه وليها بوجيهات معينه وخلوص معين

4..هيدر سبورت (فرن شكمان) ممكن تعملو عموله او تجيبو جاهز بيفرق فى الخرج جامد والهورس باور

5... شكمان كامل 2بوصه تقريبا من الفرن للعلبه الاخيره ولو فى علب فى النص شيلها..

6.. علبه شكمان سبورت (ديفيل) تكون اوريجينال عندك ماركات كتير (hks
- jasmine-k&n)

7... كربيراتير يكون نظيف ويفضل يبقى جديد ويستحسن يكون 2 باب وافضلهم على الاطلاق هو ال(weber) او (solex)

8... بالمرة غير طرمبه البنزين ولو عرفت تركب كهربه تكون كويسه والضغط بتاعها ما يزيدش عن 5 بار وميقلش عن 3 بار يبقى كويش وعندك البوش الالمانى ويالمره هتغير الخراطيم بتاعه البنزين عشان الشغل يبقى على نظافه

9.. اكيد بعد ما تعمل الحاجات دى كلها هتحط نوع زيت نضيف وعندك فالفولين وبعديه شيل وبنزين 92 وفك التنك ونضفه كويس قبل ما تركب الحاجات دى ولو فيه شبكه تصفيه شيلها وحط فيلتر بعد التانك زى اللى فى الموتور

10.. طقم دبرياج سكون محترم انت ومزاجك عايزو اسبور ركب عايزو عادى بس ماركه محترمه بردو ركب وانا عن نفسى بفضل ( ريمسا)


وبكده دى هتكون كل التعديلات اللى متاحه لعربيتك للموتور وهترفع معاك باذن الله فوق مانت متوقع واكتر

لو محتاج باقى التعديلات بالنسبه للعفشه والفرامل ابقى قولى عشان ماكتبش على الفاضى

[Diablo]

شكرا ليك يا اخ ahmedesmat1987 ممكن بس عناوين المحلات الى بتبيع الحاجات دى وانواع الحاجات دى

[i_Am_Legend]

تصدق شكلها جميل جدا.. وهجومي :-d

[Diablo]

i_Am_Legend شكرا لك وشكلك زوقك جامد فى العربياتعشان انت الوحيد الى قلتها هجومى زى العربية الشارك كده
شكرا ليكم ياشباب وانشاء الله هنزلكم صور جديدة للعربية وشكرا لكل الشباب الى ساعدونى هنا او فى الفيس