الفرق بين ابيزا 94 وابيزا 98 بالصور والشرح

[SYD]

بسم الله الرحمن الرحيم

السلام عليكم ورحمة الله وبركاته

أخواني الأعزاء في قسم سيات نايل موتورز
تحية طيبة
كل وعام وانتم بخير بمناسبة شهر رمضان الكريم اعاده الله علينا وعليكم وعلي جميع المسلمين بالخير واليمن والبركات

النهاردة جايلكم بموضوع عارف انه شاغل ناس كتير جداً وخصوصاً الناس اللي بتشتري ابيزا جديد
موضوع النهاردة ان شاء الله هيتكلم عن كل الفروقات بين الأبيزا 94 والأبيزا 98 من حيث الشكل والأختلافات الجوهرية والمحرك وايه اللي يختلف وينفع يتعدل من 94 -> 98 وايه اللي ما ينفعش وبيفرًق العربية 94 عن ال98

في البداية قبل ما نتكلم عن الفروقات تعالوا بسرعة نعرف شوية معلومات تاريخية عن الأبيزا
- بداية انتاجها كان عام 84 وسميت Ibiza MK1 واتعملها facelift سنة 88
- في سنة 93 نزل الجيل الثاني من السيات ابيزا وابتداء من الجيل دة كانت الأبيزا تحت مظلة شركو فولكسفاجن الألمانية
- اتعملها بردو facelift سنة 97 ودة تم فيه شوية تغييرات من حيث الشكل الخارجي والمحرك
ولمزيد من التفاصيل حول هذا الجيل نظرة عن كثب: كل ما تريد معرفته عن الجيل الثاني من سيات ابيزا
- سنة 2000 اتعملها facelift تاني ودة شمل تغييرات علي نطاق اوسع في الشكل الخارجي وايضاً في مجموعة المحركات ودة ان شاء الله هنتكلم عنه في موضوع منفصل

أولا من حيث الشكل الخارجي

1- أختلاف الواجهة الأمامية

وهذا الأختلاف شمل العلامة في منتصف الشبكة فأصبحت أكبر حجماً بالأضافة لتغيير الشبكة نفسها
وايضاً الأختلاف شمل المصابيح الأمامية والأشارات الجانبية

2- أختلاف الأكصدامات الأمامية

وهذا الأختلاف شمل الأكصدامات والكساحة والفوج لايت

3- أختلاف مؤخرة السيارة

وهذا الأختلاف شمل الأتي
- الأكصدامات الخلفية
- موديل 98 تم تزويده بستوب لايت 3rd Stop Light في اعلي منتصف باب الشنطة
- موديل 98 تم اعادة تلوين النصف العلوي من المصابيح الخلفية لتصبح بلون اسود للأشارات الجانبية ولمبة الرجوع للخلف

4- أختلاف مكان هوائي استقبال الردايو (إيريال الراديو)

- موديل 94 بإيريال مثبت في الرفرف الشمال الأمامي
- موديل 98 بإيريال في منتصف سقف السيارة من الخلف

5- أختلاف الأشارات الجانبية (الغمازات) للرفارف الأمامية

- موديل 94 بغمازات مربعة الشكل
- موديل 98 بغمازات بيضاوية الشكل

ثانياً من حيث الشكل الداخلي

1- أختلاف فرش الأبواب

شمل هذا الأختلاف تغيير لمقبض الأبواب وأوكرة فتح الأبواب

2- أختلاف مكان زرار الأنوار الخاصة بنور الصالون مع فتح وغلق الأبواب

- موديل 94 ازرار الأنوار في اسفل الكارتيرة الرفرف الخلفي فوق العتب
- موديل 98 ازرار الأنوار في اعلي الكارتيرة الرفرف الخلفي

3- أختلافات طفيفة في التابلوه

شمل هذا الأختلاف مكان الطفاية والولاعة
- موديل 98 يوجد بها مفتاح للتحكم في ارتفاع وانخفاض شعاع المصابيح الأمامية كهربائياً علي ثلاثة مستويات
- موديل 98 يوجد بها درج لتخزين 6 شرائط كاسيت

4- أختلاف لوحة العدادات

- موديل 94 عداد الكيلومتر والرحلة Trip عداد انالوج - واما تجهز بساعة او تجهز بعداد لفات المحرك RPM
- موديل 98 عداد الكيلومتر والرحلة Trip والساعة عداد ديجيتال - ومزودة بعداد لفات المحرك RPM

5- أختلاف فرش السقف

- موديل 94 مزودة بمصباح واحد فقط في فرش السقف (فرش جلد) يعمل مع فتح الأبواب او يدوياً
- موديل 98 مزودة بمصباحين في فرش السقف (فرش فيبر) أحدهما يعمل مع الأبواب والأخر منفصل يعمل يدوياً (مصباح القراءة)

6- أختلاف مسند الرأس

- موديل 94 مسند رأس مفرغ
- موديل 98 مسند رأس مبطن

ثالثاً من حيث المحركات والتجهيزات

- موديل 94 زودت بفئتين من المحركات
1- محرك 1.3 كاربراتير
2- محرك 1.4 هاف انجيكشن SPI

- موديل 98 زودت بفئتين من المحركات
1- محرك 1.0 انجيكشن كامل MPI
2- محرك 1.4 انجيكشن كامل MPI

- موديل 94 زودت ب
2 زجاج أمامي كهربائي - جنوط 14 - باور استيرنج - فوج لايت امامي وخلفي - RPM وساعة ديجيتال - مرايات كهربائية - 4 مساند رأس - 5 أحزمة أمان ثلاثة مستويات - مساحات زجاج امامية وخلفية مزودة برشاش مياة - تجهيز لكاسيت ب 6 سماعات في الأبواب الأمامية والتابلوه والرف الخلفي

- موديل 98 زودت بالعديد من الكماليات
باور - تكييف - 4 زجاج كهربائي مع زر غلق للزجاج الخلفي - مرايات كهربائية - مفتاح مشفر بالريموت وعند الفتح يضئ مصباح الصالون - أضاءة في شنطة السيارة - مرايات بلون الهيكل - تأخير غلق نور الصالون بعد غلق الأبواب - عدادات ديجيتال (ساعة وكيلومتر) - فرش ابواب مخملي من نفس فرش الصالون - فرش صالون مخملي × قطيفة - فوج لايت امامي وخلفي - 4 مساند رأس - 5 حزام أمان ثلاثة مستويات - مساحات زجاج امامية وخلفية مزودة برشاش مياة - تجهيز لكاسيت ب 6 سماعات في الأبواب الأمامية والتابلوه والرف الخلفي - تغيير مستوي الأضاءة الأمامية كهربائياً

التمييز بين الموديلين والتعديل من شكل 94 إلي 98

جميع ما سبق يمكنك تعديله من موديل 94 إلي موديل 98 والتعديلات تشمل ما يلي:
1- الواجهة الأمامية وهذا يتطلب تغيير الصدر الأمامي والفوانيس والشبكة والرفارف والأكصدامات
2- الأكصدام الخلفي وباب الشنطة
3- فرش الأبواب
4- تغيير المحرك
5- التابلوه ولوحة العدادت
6- تغيير الكراسي بما يتناسب مع فرش الأبواب

للتمييز بين الموديلين - وهذا لصعوبة تغييره ويعتبر الفرق الجوهري بين الموديلين
1- ايريال الراديو
2- مكان ازرار الأبواب الخلفية لنور الصالون

صور الأختلافات بين الموديلين


الشكل الأمامي

IBIZA 94


IBIZA 98


لاحظ اختلاف الفوانيس الأمامية + الشبكة (بما فيها علامة سيات) + الأكصدامات (بما فيها من فوج لايت + الكساحة)


الشكل الخلفي

IBIZA 94




IBIZA 98


لاحظ أختلاف الأكصدامات + الإيريال + فانوس الأستوب


الشكل الجانبي

IBIZA 94



IBIZA 98

لاحظ شكل الغمازات (مربعة في 94 - بيضاوية في 98)
أيضاً لاحظ أختلاف شكل مسند الرأس (مفرغ في 94 - مبطن في 98)


الشكل الداخلي

IBIZA 94








IBIZA 98


لاحظ الأختلافات
في شكل الطفاية والولاعة
في لوحة العدادات
في مقبض واوكرة الأبواب
في فرش الصالون
في درج الشرايط
في مفتاح تغيير مستوي الأضاءة

قد تجد بعض الأختلافات الطفيفة في الصور وبين السيارات الموجودة في مصر لأختلاف التجهيزات مثل الair bags مما قد يؤدي لأختلاف في التابلوه وطارة الدريكسيون كما يوجد اختلاف في شكل الفوانيس الخلفية لموديلات 94 بناء علي فئة السيارات الموجودة في الصور

الصور تم تحميلها من عدة مواقع من علي الأنترنت وقمت بتعديلها

اتمني ان يجد الموضوع القبول لديكم وان اكون وفقت في شرح الأختلافات وتوضيحها بشكل مبسط
وما توفيقي إلا بالله عليه توكلت وإليه أنيب
أن أصبت فبتوفيق من الله وان أخطأت فمن نفسي ومن الشيطان

تحياتي للجميع
وانتظروني في موضوع جديد ان شاء الله

والله المستعان
،
،

[Karim Ibiza]

يا مزاجه يا مزاجه

[فتح الباب]

لقد حصلت على جميع الاجابات مقابل الاسئله التى كنت اسئلها
متشكر ليك جدا

[hossamalsadik]

ده موضوع مرجع وليس موضوع عادى
ديما تحفنا بمواضيعك ياهندسه
جزاك الله خيرا

[egman]

تسلم ايدك ي ابو محمود الله ينور موضوع غاية فى الاهمية .

بس هتجنن على التابلوة الى فى الصورة بتاع 94 شكله وهو زيرو وسليم تحفه جدا جدا

[warfighter2114]

موضوع جميل

[Ahmed pico]

يا مستر سيد يا جامد الله يتور ياكبير وواحشنا جامد

[Mody_Benz]

حلوو يا حلوو تسلم ايدك يا استاذ سيد على التقرير الجميل ده

[ser3a_0]

توضيح عالمي
من ملك السيات

[engineer_Amr]

موضوع ممتاز ومقارنة إحترافية روعة بجد
تسلم ايدك :)

[mahmoud ghanem]

كــــبــــــــيــــــــــر

[mohammad isdf]

ممتاز والله جزاك الله خيرااااااااااا
تسلم الأيااااااااادى

[mohamedatia]

باشا لو سمحت هل فى اختلاف فى الكونتاكت بين ابيزا 94 و موديل 98
لانى لسه شارة ابيزا 94 بس الكونتاك عادى بمفتاح عادى ممكن اجيب كونتاكت ابيزا 98 بمفتاح مشفر يركب عادى