زيت بينزل من تحت العربيه

[esmalawy14]

معايا ابيزا 94 1300 كربرتير مشكلتي كل ماركن العربيه في اي مكان الاحظ بقعه زيت تحت العربيه انزل تحت العربيه القيها منشا زيت من تحت انا عارف انه زيت الفتيس بس مش كده غلط قلت اروح البنزينه بتاعه شل الافي اول الهرم عشان يشوفلي زيت الفتيس قالي الالنكيه بتاعه مش موجود اعمل ايه اه ورحت لعم عصام الميكانيكي قبل كده بس قبل ملاحظ الكلام ده وقلتلوا زيت الفيتيس عايزك تبصلي عاليه قالي في البنزينه الحل ايه

[Karim Ibiza]

روح للمحلات اللى بتغير زيت او بنزينة تانية

[esmalawy14]

روح للمحلات اللى بتغير زيت او بنزينة تانية

انا عايز اعرف دي مشكله عويسه وقلقان اروح لاي محل تغيير زيت وميعرفش يحل حاجه بالغلط عايز حد فاهم

[Karim Ibiza]

يبقى خليك مع الميكانيكى أحسن

[Ahmadhamza84]

ياباشا أنت بتهرج ؟!!!
زيت الفتيس بيخر وأنت قشطة !!! الفتيس ممكن يبوظ ياباشا ...
بص ياكبير ...زيت الفتيس لما يخر ممكن تكون المشكلات التالية :
1- الكوبلن بيركب في الفتيس فيه أويل سيل ( أولسيه ) مابينهم أحيانا كثيرة بيبوظ ويخر زيت الفتيس
2- الأويل سيل الجواني بتاع الفتيس بيتغير لما يبوظ وأول ما يتغير بيتزبط وعادة لازم الفتيس كله يتفك
3- طبة الزيت ودي بتبان وشششش
4- وده برضو يخلي زيت الفتيس يخر بس من جوه العربية وهي عطب في عداد السرعة ..عداد السرهة بعدي على الفتيس برضو
زيت الفتيس لو قل التروس تاكل بعض والفتيس كله يتلف ..أوعى تسكت على المشكلة ...وهتحتاج ميكانيكي عقر

[hossamalsadik]

زى مقال الأعضاء المحترمين عالج الموضوع عند ميكانيكى فولكس فى اسرع وقت ممكن

[mahmoud ghanem]

شوف بنزينة تانية عادى جداً .. انا كاشف على زيت الفتيس فى بنزينة شل بردوا بس عندى فى المعادى وكان المفتاح موجود وزى الفل ...

انت بس روح لبنزينة تانية وان شاء الله هتلاقى المفتاح عندة بس فى اسرع وقت

تحياتى

[tareksakr]

المشكلة دي 90% سببها اويل سيل عصاية الغيارات بتاع الفتيس وده تغييره سهل جدا 10 دقايق بس الفكرة ام عصاية الفتيس في اخرها كورة غيارات الكورة دي بتركب علي ااكس اللي بيغير النقلات في الفتيس الاكس ده مع التقاؤه مع الفتيس بيبقي فيه زي زور نحاس الزور ده فيه اويل سيل مع الوقت الاويل سيل بيبوظ وبيحتاج يتغير

[ehab_mansour]

المشكلة دي 90% سببها اويل سيل عصاية الغيارات بتاع الفتيس وده تغييره سهل جدا 10 دقايق بس الفكرة ام عصاية الفتيس في اخرها كورة غيارات الكورة دي بتركب علي ااكس اللي بيغير النقلات في الفتيس الاكس ده مع التقاؤه مع الفتيس بيبقي فيه زي زور نحاس الزور ده فيه اويل سيل مع الوقت الاويل سيل بيبوظ وبيحتاج يتغير

+1
الله ينور عليك يا افندم .... هنا المشكلة فعلا و دي مشكلة مشهورة في فتايس فولكس عموما و الاولسيل ده رخيص و تركيبه سهل جدا

بخصوص الكشف علي زيت الفتيس فالمفتاح المستخدم للموضوع ده هو الانكيه مقاس 17 .. و عموما هو مش هيعرف يشوف المقاس لأن دي فتحة التزويد انت هترح لحد يزودلك علطول و تشوف هتاخد قد ايه
المفتاح و الزيت موجود في محطات كتير عند امارات مصر و شيل و موبيل و تأكد لما تيجي تزود انه زيت 90 الخفيف اوعي تخليه يحطلك زيت 140 عشان هيقرفك و هيبوظ الفتيس

[hossamalsadik]

+1

بخصوص الكشف علي زيت الفتيس

تأكد لما تيجي تزود انه زيت 90 الخفيف اوعي تخليه يحطلك زيت 140 عشان هيقرفك و هيبوظ الفتيس

تقصد ياعمده يزوده زيت فتيس 80/90 ولا الأفضل يزوده 75/90

[ehab_mansour]

تقصد ياعمده يزوده زيت فتيس 80/90 ولا الأفضل يزوده 75/90

النوعين بيقعوا تحت مسمي 90 و لكن اللزوجة و التركيبه مختلفة تماما
اخف الضرر انه يحط 80\90 و لكن طبعا الافضل و الموصي به 75\90