فواصل الدائرى ما يعلم بيها الا ربنا

[matrix012]

امبارح ولجل الحظ كنت فى مشوار لحد 6 اكتوبر وللاسف اخدت الدائرى بعد غياب سنه ونص بفضل انى امشى فى البلد عن انى اطلع الدائرى
وانا رايح كانت الدنيا زحمه طبيعيه كنت حوالى الساعه 10.30 وطبعا عن نزلت اسكندريه وقفت فيها كتير بس ما علينا
وانا راجع بقى كمية عربيات اخدت كام حفره الى موجودين فى نص الطريق ملهمش حل الصراحه وفى قبل نزلت باسوس على الشمال حتة حفره الله اعلم انهى فنان الى عملها
المهم انا ربنا كرمنى ومأخدتش الحفر ديه علشان كنت ماشى على مهلى شويه علشان الطريق مكانش سالك قوى من عربيات النقل الكتير قوى الى كانت ماشيه براحه وساده كل الحارات الكلام ده كان على الساعه 8 تقريبا
مش هيا ديه القضيه المشكله انى شوفت بعنيا فاصل بالطول يعنى حته اتسفلتت على اليمين وحته اترقعت على الشمال وفى فرق بينهم حوالى 50 سنتى الحته ديه كان فى عربيه اسبرانزا قدامى اخدت الحفره الى بالطول ديه وجابت مقص تقريبا ربنا يستر
بعديها بشويه كده ولقيت عربيه تانيه على نفس الخط وبرده واقفه وشكلها اكلت حفره مشابهه للى فاتت
المهم انا قولت امشى بعيد عن الخط العجيب الى الحفر فيه مقصوده مشيت على الشمال وبقيت كل الاحظ ان كل كيلو تقريبا فى حفره او على اعتقادى انها فاصل بس بالطول
بجد بجد انا اقتنعت بكلام واحد صاحبى ان الحكومه لما بتسفلت الشوارع بتعمل حساب ان بتوع العفشه وبتوع قطع الغيار يشتغلو
الحمد لله انا محصلش اى حاجه معايا
بس انا بنصح اخواتى انهم يعملو زى ما انا قررت انى اعمل مقاطعه للدائرى
وربنا يستر طريقى وطريقكم

[emad_2020]

يا عزيزى انتا فى مصر ولو ماشى ولقيت الطريق حرير اعرف انك يا فى حلم يا برا مصر هههههههه

[lidosasa]

بجد بجد انا اقتنعت بكلام واحد صاحبى ان الحكومه لما بتسفلت الشوارع بتعمل حساب ان بتوع العفشه وبتوع قطع الغيار يشتغلو

ومش بعيد المرحلة الجاية الحكومة تتبنى مشروع لآصحاب الورش ( أبنى حفرتك ) وهو ده الدعم الحكومى للمشروعات الصغيرة

[matrix012]

زى ما عرفت ان مصر واخده المركز ال 122 فى جودة الطرق
الف الف مبروك المركز ال 122
انا متهيئلى ان ده اخر السفلته يعنى المركز ال 123 ارض مش متسفلته اصلا والطبيعى بتاعها انها تبقى حفر
استرها معانا يا رب

[matrix012]

ومش بعيد المرحلة الجاية الحكومة تتبنى مشروع لآصحاب الورش ( أبنى حفرتك ) وهو ده الدعم الحكومى للمشروعات الصغيرة

هوا مش فى مصاريف كارته عند كل بوابه على الطرق
مش هيا ديه الى بيتدفع منها علشان الحفر ديه تتعمل
ولا ديه عامله زى الكارته بتاعت الميكروباصات ( إتاوه )

[Ahmed_BYD_F0]

ومش بعيد المرحلة الجاية الحكومة تتبنى مشروع لآصحاب الورش ( أبنى حفرتك ) وهو ده الدعم الحكومى للمشروعات الصغيرة

هاهاهاهاهاها
حلوة ابنى حفرتك دى
والله حضرتك زى العسل

[SYD]

ربنا يستر طريقك يا صديقي
الدائري وجميع طرق ج م ع عايزة تترصف (او تتنسف) من اول وجديد
امال لو شوفت فيصل واكتوبر
وعلي ايه صحيح - مانت المنطقة عندك ربنا يعينك عليها

انا كل 3 او 4 شهور لازم اعيد علي العفشة واغير جلب وبطاحات

تحياتي للجميع
وربنا يستر طريقنا جميعاً

[matrix012]

ربنا يستر طريقك يا صديقي
الدائري وجميع طرق ج م ع عايزة تترصف (او تتنسف) من اول وجديد
امال لو شوفت فيصل واكتوبر
وعلي ايه صحيح - مانت المنطقة عندك ربنا يعينك عليها

انا كل 3 او 4 شهور لازم اعيد علي العفشة واغير جلب وبطاحات

تحياتي للجميع
وربنا يستر طريقنا جميعاً

فى فرق يا صديقى بين طريق دائرى وشارع جانبى او حتى شارع عمومى
انا اسمع ان الدائرى ده المفروض انه سريع وبرده اسمع انه لازم يكون على مستوى معين من الكفائه وعلى ما اعتقد انه لازم يكون فى صيانه
تصدق لو قولتلك ان نسبة لا تقل عن 80% من كشافات النور الى بطول الطريق الدائرى مش منوره
سيبها على الله مصر موجوده بالبركه بتاعت ربنا ويطيبة اهلها ينعى الواحد ميستعجبش من الطرق هيا جات على الطرق
وعلى فكره المنطقه عندى اتسفلتت :p وبعديها على طول الاهالى عملت كام مطب كده لزوم الترويش

[Ahmed_Adham]

فيه بقى حته هضبه على الحاره التانيه من الشمال على بعد 4-5 كيلو من المحور وانت رايح ناحيه المؤسسه اللي يلبسها العجله الشمال قدام تاكل في الكارتيره وش. بقولك هضبه لأنها حته قابه من الطريق لفوق زي شاهد القبر كده. أنا عاملها نقطه في الجي بي اس عندي عشان أعرف لما أقرب منها لأني دايما بحب أمشي تاني حاره شمال وربنا يستر. وعلى فكره بقالها شهور ومفيش حد عنده دم يظبطها.

[أحمد جودة]

عمار يا مصر .......... والله مصر مصر كلها كدة مطبات غريبة الشكل وحفر اغرب واغرب ........... والله فى مرة كنت ماشي بالليل وكانت بلاعة حواليها ماية ومش باينة والدنيا غرقانة ماية ......... وراجل كبير راح نازل بالعربية فى البلاعة بقت العربية زي ماتكون بتشرب من البلاعة والراجل مش عارف ينزل من الماية اللى حوالية ولا عارف يطلع م الحفرة ولا حد ممننا عارف يوصله وكل واحد خايف على عربيتة لتكون فيه حفر تانية وكأننا فى فيلم الطائرة المفقودة اللى نزلت فى بحر الرمال المتحرك .......... عمار يا مممممممم

[mohammad isdf]

دى مهزله يا باشا ربنا يرحمنا

[mohamed hussei]

دة شئ طبيعي عندنا الواحد يمشي بعربية 4*4 علشان الفواصل دية

[ehab_mansour]

ده الطبيعي في شوارع مصر و لكن انا ساكن في اكتوبر و الطرق هناك افضل بكتيييييييييييير من الدائري و كمان الشوارع الجانبية برضه كويسة جدا ده حتي الشارع اللي ساكن فيه اتسفلت جديد من فترة

سؤال :- هو انت لقيت الفواصل الطولية دي فين بالضبط لأني مسبتش طريق في مصر ممشيتش فيه و الفواصل الطولية دي موجوده فقط في المنطقة بين وصلة حازم حسن و بين طلعة محور المريوطية استكمال دائري المحور و قليوب (اقصد طبعا منطقة الدائري اللي قاطعه فوق الصحراوي ) و سببها هو ان المنطقة دي اساسا كانت حارة واحده فقط لكل اتجاه و بعدين من الازدحام اضافوا ليه حارة من ناحية الشمال ككوبري مبني جنب اللي معمول و بعدين اضافوا ليها حارة من اليمين ايضا و حصل كمية تعديلات عجيبه للمنطقة دي و تظبيط للفواصل دي و كل شوية يعملوها و تبوظ تاني و للاسف ده طريقي يوميا من اكتوبر للمعادي و العكس

بخصوص دائري من بعد طلعة المريوطية و دائري المعادي و مرورا بالمحور و حتي قلوب و المرج فالفواصل فيه بشعه جدا و مقرفة جدا جدا و خاصة الكولكيعه اللي الاخ بيقول عليها فوق دي بعد المحور .... هو مافيش اي مسئول او اي حد او مرور شافها ؟؟؟؟؟؟؟؟؟؟؟؟؟

الخلاصة ان السبب الرئيسي هو اننا في مصر بنعمل اي حاجه بدون تخطيط و نرجع نعدل و نعك و حتي المحاور الجديدة زي محور المريوطية فواصلة برضه باظت و بيصلحوا فيها و حتت انخفضت و هكذا !!!!!!!!!!!!! كله عك

[ehab_mansour]

فيه بقى حته هضبه على الحاره التانيه من الشمال على بعد 4-5 كيلو من المحور وانت رايح ناحيه المؤسسه اللي يلبسها العجله الشمال قدام تاكل في الكارتيره وش. بقولك هضبه لأنها حته قابه من الطريق لفوق زي شاهد القبر كده. أنا عاملها نقطه في الجي بي اس عندي عشان أعرف لما أقرب منها لأني دايما بحب أمشي تاني حاره شمال وربنا يستر. وعلى فكره بقالها شهور ومفيش حد عنده دم يظبطها.

دي مش هضبه !!!!! دي مصيبه سودا !!!!!!!!!!!! مش عارف امتا هنلاقي حد لما يشوف طوبه او شيء قاطع الطريق انه يشيله او يصلحه لله
قال صلي الله عليه و سلم "اماطة الأذي عن الطريق صدقه "

ربنا يفرجها علينا

[matrix012]

الى شد انتباهى برده ان فى فواصل حديد متسفلت عليها عامله حته كده تقدر تقول عليها خازوق
ديه من بدرى الصراحه وشوفتها كتير بس الى اعرفه ان الفواصل الحديد معموله علشان التمدد والانكمان بين الصيف والشتا ولما يتسفلت عليها يبقى ده كلام مش منطقى
انا مش طالع دائرى تانى واريح دماغى