المكنة فوتت :( :(

[Mody_Benz]

السلام عليكم ورحمة الله وبركاته

اذيكم يا رجالة عاملين اية يارب تكونوا بخير وفى الف صحة وحال يارب
اسف طبعا على عدم تواجدى بالمنتدى كتير نتيجة لظروف شغلى وتوضيب شقة الزوجية ( خاطب ولسه بقول يا هادى )

دلوقتى يا جماعة المكنة بتاعتى فوتت وجابت دخان ابيض وبحس فى المرايه وانا بدوس بنزين ان فى واحد بيشوى بطاطا على الشكمان( الحمدلله على كل حاجة )
وغير ان لما الاربى م بيزيد بتسمع صوت تخبيط مكتوم وطبعا روحت للزعيم ورضا بتاع الفولكس فى الحرفيين وكذا واحد بتوع فولكس وابيزا
واجمعوا ان المكنة يا تتعمر يا تجيبلها مكنة استيراد او شورت بلوك على حسب انتا ادوات التغزية عندك سليمة ولا لأ
وحاجة تجيب الضغط والله ولا كأنها العربية اللى بترش دخان عشان الناموس والمكنة 1800 سى سى abs ومدرجة فى الرخصة 1400 والعربية سيات كوردوبا 1997

دلوقتى اصحابى قالولى عمرها والمكنة متعمرتش قبل كدة واعملها وهترجع حتى زى الاول شوية
بدل متجيب وتتبهدل فى مكنة استيراد متعرفش هى اتعمرت ولا اتلعب فيها ولا اية نظامها ويضحك عليك فيها

دلوقتى يا جماعة انا محتاج نصيحتكوا اللى هتقولى اعمل اية وامشى ازاى بظبط
المكنة دلوقتى فعلا خلاص كدة بخ جابت اخرها

ولما نزلت الحرفيين عند كذا واحد اسعار المكنة اللى عندى الشورت بلوك من 2000 الى 2500 جنية
ومكنة كاملة + ضفيرة + كنترول 3500 الى 4000 جنية

وانا مش عارف اجيب نفس المكنة ولا اجيب 1600 انجكشن بس هضطر هحتاج اغير قطمة بقه عشان الايموبلايزر والكونتاكت وشغلانه تانية كدة اكيد حضراتكوا عارفينها

ومصاريف تسقيط المكنة عند كذا واحد تقارب من 500 الى 800 جنية

لو حضراتكوا عارفيين رضا بتاع الفولكس اللى فى الحرفيين قالى 600 وهوا راجل صنايعى محترم اوى وامين وشغله محترم بشهادة ناس اعرفها
وشغال تسقيط ليل ونهار فالموضوع بالنسبالة مش تجربة هوا فاهم هيعمل اية

لو الزعيم اللى فى صقر قريش قالى سيبها لحد متقرر ونبقى نتكلم فى الفلوس بس طبعا مجربتهوش قبل كدة ومعرفش نظام شغله اية بس مش هيزيد على ما اعتقد عن الرنج ده

وفى واحد عندنا فى صقر قريش بردة فى المعادى اسمه عمرو الجبراوى مركز صيانة محترم جدا واتعاملت معاه كتير وبيقف عنده من اودى q5 و باسات واوكتافيا وجيتا لحد جولف 1 و2 و4 بس سعره حراق شوية


فانا مش عارف اعمل اية ياريت خبارئنا يدلونى اعمل اية وامشى ازاى عشان انا برده مش بفهم اوى فى تسقيط المكن ديه وخايف يضحك عليا


واسف جدا على الاطالة على حضراتكوا

لكم كل التقدير والاحترام


اخوكوا محمد عبقرينو

[Karim Ibiza]

قدر الله وماشاء فعل

العمرة تكلفتها هتكون زى الشورت بلوك والنتيجة هتكون حسب الصنايعى والخراط والبضاعة
وبما ان الصنايعية معظمهم كفتجية ومعندهمش ضمير والمعظم البضاعة اللى فى السوق مضروبة يبقى الافضل انك تجيب موتور استيراد من واحد مضمون وعلى التجربة

المشكلة الوحيدة اللى هتواجهك هى انك متقدرش تضمن انك تثبت الموتور 1400 بس فى الغالب ان شاء الله هتعدى لأن معظم مواتير الفولكس مش بيتكتب عليه السعة بتاعتها ولا على ورق الافراج, لكن بنعرف السعة من كود الموتور وطبعا مهندس الفحص مش هيكون حافظ اكواد
انا موتورى مكتوب على وشه 1.6 والمهندس كتبه 1000

لو قدرت تجيب نفس موتورك يبقى احسن عشان متحسش بفرق فى القوة خصوصا مع التكييف
مش هتحتاج طبعا تغير القاطمة لأنك اصلا مش هتغير الكونترول وحتى لو غيرته يبقى هيتكود عادى بدون تغيير ايموبلايزر او قاطمة او شريحة

الموتور الانجيكشن عشان تجيبه يبقى اعمل حسابك هتجيبه بكل حاجته ومعاه الفتيس بتاعه وطرمبة كهرباء فى التنك لأن كل ده مختلف عن اللى عندك

انا رأيى انك تجيب شورت بلوك طالما باقى الحاجات عندك سليمة
وحاول تدخل القديم فى الجديد وتدفع الفرق

مصنعية تسقيط الشورت بلوك مينفعش تزيد بأى حال من الاحوال عن 500 جنيه

[matrix012]

انا مع الاستيراد لعدم كفاءه الصنيعيه وكله بيفتى وخلاص

[SYD]

قدر الله وما شاء فعل
والله لو هتتكلم عن ينفع ومش ينفع - المكن الكبير (1600 وانت طالع بينفع يتعمر عادي مفيش مشكلة) بس زي ما كريم ومصطفي قالوا - المشكلة في الصنايعي اللي هيشتغل !!!
وكمان البضاعة اللي هتتجاب
انت بتجيب دخنة بيضا يبقي في قصص هتتعمل عندك فلازم صنايعي تمام يعملها مش اي كلام فأي حتة

ولو جبت شورت بلوك هيبقي تقريباً نفس التكلفة والميزة شيل وركب
بس هتحتاج تثبت في الرخصة

لو انت واثق من الصنايعي اللي هيعمل العمرة - توكل علي الله والموتور ان شاء الله يرجع زي الأول واحسن
لكن لو لسة هتجرب - فبلاش لأن التكلفة هتبقي الضعف (ثمن العمرة + ثثمن شورت بلوك)

تحياتي

[hossamalsadik]

1- ممكن تعمل العمره عادى بس ده بيتطلب ( صنيعى كويس + قطع غيار أصليه ) ولو مش متوفر ده اصرف نظر
2- شورت بلوك شيل وركب وانتهت
3- ماتور إستيراد بلوزمه

ده الترتيب الى تاخد بيه ومرتب حسب التكلفه تصاعديا

[sala7]

انا مع الاراء اللي بتقول (تسقط مكنة)

(احسب تكاليف التصليح الماكينة الخربانه) و (احسب تكاليف شراء ماكينة جديدة و مصاريف تسقيط) و طبعا تشوف المناسب ليك لان مفيش حد فينا يعرف ظروفك

اضافة رفيعه بقا .... الى ان العمرة بتخلي الماكينة قدرتها 50% فقط مهما جبت لها قطع حتى ولو كانت اصليه . ده غير انها بتتعامل معاملة خاصة جدا بعد العمرة .. ( كلام سليم 100%)

و طبعا انا رأيي زي ما قلتلك و ده طلاما تستشير اخوانك

[Hopa777]

الحمد لله على كل شىء.....واكيد فادت حاجة تانية...ماتزعلش
وان شايف ان الاراء كلها مجمعة على انك تجيب استيراد
ومن راى هو ده الصح طالما كده كده هتصرف ....بس ع الاقل
لو استيراد هتبقى مستريح نفسيا ..بدل تصليح القديم وتبقى راكب عربيتك قلقان
وان شاء الله ربنا يوفقك الى ما فيه الخير................

[saddam]

صديقي المواطن عن تجارب في عشرات العربيات قولا واحدا ومن غير تفكير تعمر المكنة بتاعتك بس بشرط وحييييييييييييييد تسأل على ميكانيكي فاهم فيها ومعمر مكن كتير وبيحترم نفسه ودمتم للنضال

ملحوظة أنا لما بجيب مكنة إستيراد مبركبهاش على طول أفتحها وأراجع عليها كلها وأعمل لها شبه عمرة وبعدين أركب عشان مفتحهاش تاني بعد سنة

[Mody_Benz]

شكرا ليكوا يا جماعة على ارائكوا القيمة

انا محتاج اعرف بعد اذنكوا لو هجيب مكنة استيراد معظم بتوع الاستيراد يقولى بديك ضمان لمدة شهر
لو حصل فيها حاجة ترجعلى تانى هل شهر كفاية ان المكنة لو فيها حاجة تظهر
ولا ممكن تقعد بالشهور وفجاة الاقيها فوتت تانى زى اللى عندى

ولانى سالت ودعبست كتير قالولى المكنة لو اتعمرت مش هترجع تانى زى الاول
وخايف احط فلوس فى حاجة والاقيها بعد شوية زى الاول تانى

وان شاء الله انا استقريت بعد رايكوا وراى بعض اصحابى انى لو هعمر هتتكلف من 1800 الى 2000 بالاضافة لتكاليف المصنعية
ولو شورت بلوك من 2000 الى 2500 بالاضافة لتكاليف المصنعية
ولو هجيب مكنة استيراد من 3000 الى 4000 متضمنة تكاليف المصنعية

وان شاء الله انا قررت لاتجاه تسقيط مكنة استيراد كاملة بالفتيس وادوات التغزية والكنترول والضفيرة
وهاعملها بأذن الله عند مركز الزعيم اللى عندنا فى صقر قريش
وهوا هينزل معايا نختار المكنة ونركبها بس لسه مستقرناش على المصنعية كام

وان شاء الله هنتفق على كل حاجة وهتابع مع حضراتكوا اول بأول وربنا يعمل اللى فيه الخير


لكم كل الاحترام والتقدير

شكرا

[hossamalsadik]

طلما قررت خلاص طبعا مكنه جديده أكيد اريح وحسب معلوماتى ان الزعيم كويس وان شاء الله تكون مبسوط
بس انتا هتجيب المكنه زى بتعتك ولا كام cc وطبعا لما تخلص تعملنا تقرير
وربنا يارب يوفقك وعلى فكره انا لو مكنتى حصلها حاجه هرميها وجيب جديد وده مش عشان العمره مش مضمونه نهائى ولكن لراحة البال لأن شيل وركب ديه مبتخدش وقت ومش خساره لما ادفع فى مكنه 3 او 4 الف كانت شيلانى كذا سنه .لاكن الواحد فى رده على اخواته الأعضاء لازم يجب كل الحلول زى معملت معاك فى مشركتى السابقه كده عشان ظروف كل واحد بتختلف فهمنى

بالتوفق ان شاء الله

[hossamalsadik]

بالنسبه للشهر الضمان على المكنه
فى الأول والأخر لازم تعرف ان ديه ارزاق
بس أحنا بنعمل الى علينا يعنى بناخد بالأسباب
يعنى ميكانيكى شاطر وامين ونتوكل على الله ( ومتهيئلى من خلال كتير من الى اتعمله مع الزعيم شكره فيه
ونتا فى خلال الشهر ده هتختبر الماتور فى جميع الظروف تلقائى مره فى الزحمه مره بتشد وكده وأكيد هيبان لو فيه حاجه
بالنسبالى مثلا أن مجرد مابسمع صوت الماتور وبتدى امشى بيه بعرف الماتور ده تمام ولا لأ ونا مش ميكانيكى بس بالخبره

بالتوفيق ان شاء الله

[ehab_mansour]

بالتوفيق يا صديقي
اعتقد افضل حل اللي انت قررت عليه و انا لو مكانك و ان شاء الله هعمله لكن امتا مش عارف ... بعد الماكينة اللي عندي لو شيلتها هسقط محرك جديد 1600 8 فالف اوتوماتيك مفكوك من نص كامل و هفضية في عربيتي و هفك البدالات و عصاية الفتيس بجزء الصالون و العدادات و كل حاجه و احطها عندي ... و بس

عارف ان كتير مش بيحب يسقط اوتو مكان مانيوال لكن انا ناويها ان شاء الله و هفضالها اسبوع اقوم فيه بالقصة دي ان شاء الله لما ييجي وقته

[Mody_Benz]

شكرا ليك يا استاذ ايهاب واستاذ حسام وباقى الاعضاء على الكلام القيم ده واللى فادنى كتير سواء دلوقتى او قبل كدة

وان شاء الله باذن الله هاعمل العربية على اخر الشهر ان شاء الله قبل العيد فى كلا الاحال ربنا يسهل

وان شاء الله اى جديد او اى حاجة جدت فى الموضوع هتابع مع حضراتكوا

واكيد فى تقرير مفصل لتسقيط المكنة ده بالكامل هعمله باذن الله زى مبعمل اى حاجة فى العربية عندى سواء قبل كدة لما سمكرتها ودهنتها

وربنا يعمل اللى فيه الخير

وشكرا ليكوا مرة تانية

لكم كل الاحترام والتقدير