طقم شنبر لابيزا 2002

[seatibiza]

كانت قدامي عربية ابيزا موديل 2002 و عاملة 176000 كم وعاوز يبيعها و قبل مااروح اشوفها قالي ان العربية فابريكة ومفيهاش غلطة بس محتاجة طقم شنبر ...... ممكن اعرف بيعمل كام طقم الشنبر و بجيبه منين ..... والاهم من كدة تغييره ليه تأثير سلبي علي العربية بعد كدة ...

[Mamoud salah H]

لو كان في الخير مكنش رماه الطير

طقم شنبر=نصف عمرة موتور وممكن لما الموتور يتفتح يطلع الموضوع اكبر من طقم شنبر
من رايي بلاش العربية دي الا لو مستعد تاخد الrisk
وتجرب وانت وحظك ويا يطلع طقم شنبر فقط والموضوع يتلم ب 700:1000 جنيه دة غير الوقت والمجهود وقرف الصنايعية وسوء التقفيل بعد الشغل وكل شوية رايح جاي عشان اي عيب ظهر بعد التغيير
ياما يفتح منك وتعمل عمرة كاملة بمبلغ وقدره

لو حضرتك متمسك بالعربية قوله يعمل هو الشنبر علي حسبه ويضيف التكلفة علي سعر العربية واستلمها منه عالمفتاح

[hossamalsadik]

عندى اقتراح خد العربيه عند ميكانيكى فولكس كويس يشوف حالة الماتور محتاج ايه بالظبط
وعمتا العربيه أساسيات و صالون لو سليمه الماتور أمره سهل وطبعا كله من السعر
ليه بقول أمره سهل عشان لو الماتور ضايع بسقط مكنه جديده إستيراد او بجيب وش سلندر فقط او بلوكه فقط إستيراد

[أحمد جودة]

عن تجربة الابيزا بما انها شبابية يبقي قليل لو لقيت حالة كويسة ....... لو العربية دي حالتها كويسة وعجباك توكل على الله ونزل من سعرها شوية وانصحك تسقط موتور استيراد افضل من الفك وعمل نص عمرة والنتيجة مش مضمونة .......... تحياتي

[SYD]

بص حضرتك
طقم الشنبر او اي شغل هتضطر تفتحله الموتور لا يفضل نهائي
والاحسن انك تسقط موتور استيراد
محركات فولكس اللي ببلوكة ألومنيوم مش بتتفتح بالكتير اوي تغير طقم صبابات

الأحسن تنزل من ثمن العربية ٢٠٠٠ وتروح انت تسقط مكنة او شورت بلوك في الرينج دة

تحياتي

[hamada_elzayat]

طبعا كلام استاذ محمد السيد احسن كلام نزل من تمن العربيه تكلفه تسقيط موتور جديد 1400 كمان بس اسأل على تكلفته الاول

[nesr6060]

انا سالت من اسبوعين عن الموتور ال 1400 2 كامه سعره من 4000 ل 4500
وسالت عن الموتور ال 1600 1 كامه سعره عمل بين 3000 ل 3500
انا برده بقالى كلم اسبوع كدا كنت كل ما باخد اجازه انزل الحرفين علشان عاوز اسقط مكنه بس مش عارف اخد اجازه من اسبوعين علشن القلق اللى فى البلد انشاء الله اول ماخد اجازه هنزل تانى وهترج علشان انا بمجرد ماخد اكتر من 3 ايام اجازه متتاليه هسقط المكنه ولونى لسه مرستشى على المكنه اللى هسقطها لغايه دلوقتى 1400 ولا 1600 وفى ناس بتقولى اللى يخليك تسقط 1600 ييبقى اسقط ال 1800 احسن وارخص مش عارف الكلام ده صح ولا غلط الصراحه

[seatibiza]

انا سالت من اسبوعين عن الموتور ال 1400 2 كامه سعره من 4000 ل 4500
وسالت عن الموتور ال 1600 1 كامه سعره عمل بين 3000 ل 3500
انا برده بقالى كلم اسبوع كدا كنت كل ما باخد اجازه انزل الحرفين علشان عاوز اسقط مكنه بس مش عارف اخد اجازه من اسبوعين علشن القلق اللى فى البلد إن شاء الله اول ماخد اجازه هنزل تانى وهترج علشان انا بمجرد ماخد اكتر من 3 ايام اجازه متتاليه هسقط المكنه ولونى لسه مرستشى على المكنه اللى هسقطها لغايه دلوقتى 1400 ولا 1600 وفى ناس بتقولى اللى يخليك تسقط 1600 ييبقى اسقط ال 1800 احسن وارخص مش عارف الكلام ده صح ولا غلط الصراحه

طب ممكن اعرف حضرتك اخترت 1600 علي اساس ايه لأني هحتاج تجربتك جدا ومحتار اسقط 1400 ولا 1600 ولا اركب موتور 1000 كويس عشان اعرف ابيعها بعد كدة

[Flamingo]

بص حضرتك
طقم الشنبر او اي شغل هتضطر تفتحله الموتور لا يفضل نهائي
والاحسن انك تسقط موتور استيراد
محركات فولكس اللي ببلوكة ألومنيوم مش بتتفتح بالكتير اوي تغير طقم صبابات

الأحسن تنزل من ثمن العربية ٢٠٠٠ وتروح انت تسقط مكنة او شورت بلوك في الرينج دة

تحياتي

دة خلاصة الكلام .... رأى من الأخر وعن تجربة .... كان معايا أبيزا 94 وعملتلها طقم شنبر وبصراحة معجبتنيش والتكلفة كانت فى حدود 1200 جنية ... اعتبرتهم مسكن يخلى العربية تمشي سنة ... بس بصراحة ندمت ... لأنى لو سقطت مكنة كان أفضل واوفر وبصراحة الميكانيكى بتاعى قال كدة قبل فتح ألماتور وأنا اللى حبيت أوفر ... والنتيجة عربيتى مش هى اللى متعود عليها ... بعتها وكلى حزن عليها ... والحمد لله جبت 2000 .... بس فعلا المواتير الألمانى لا يجوز فيها أى عمرة أو شنبر .... كبيرها وش سلندر.... تحياتى