تقرير تغيير وش السلندر

[lad]

الف مبرووووك

[Mahmoudelsayed]

الخير فيما اختاره الله ربنا يبارك لك فيها وبالتوفيق

[yyy]

إن شاء الله اكيد ، الميزه كمان انه جنب البيت على طول
الف شكر يا باشا




العفو يا حسام باشا ، على فكره انا كنت بقيت استخدم مياه هيبو من ساعه ماغيرت طرمبة المياه لو تفتكر ، بس تقريباً كان التأكل وصل مرحله متأخره



الف شكر يا باشا


شكراً لمرورك الكريم


الله يبارك فيك ، من شكل الوش الى ركب انه متمسحش ، هو خلعه من مكنه عنده ، يارب يجعله بفايده

مش شرط انة على مكنة يبقى سليم ...بيبقى الوش مشغول وبيركبوة على مكنة علشان يتباع وفى تجار كمان بتعمل كدة

[tareksakr]

مبروك الوش الجديد والميكانيكي شكله كويس هو مكانه فين انا كمان ساكن في جسر السويس

[tiko_ibiza]

الف مبروك يا باشا وربنا بكفيك شرها

[Hazem_Ahmed]

مبروك على الصيانه وربنا يجعلها اخر الاحزان

[smartech]

مبروك الوش الجديد والميكانيكي شكله كويس هو مكانه فين انا كمان ساكن في جسر السويس

هو قريب من مزلقان الاربعين ، اسمه ماجد ، وهما شغالين فى مكن الفولكس
لو تحب ابعتلك رقمه تحت امرك

[Ahmed pico]

استاذ احمد ممكن لو سمحت تبعتلى اسم ومكان الميكانيكى ده ورقمه لو سمحت علشان محتاج اعمل صيانه ضرورى وجزاك الله خيرا وان شاء اخر المصاريف

[S O P H O S]

رائع
الف مبروك

[smartech]

استاذ احمد ممكن لو سمحت تبعتلى اسم ومكان الميكانيكى ده ورقمه لو سمحت علشان محتاج اعمل صيانه ضرورى وجزاك الله خيرا وان شاء اخر المصاريف

استاذ احمد
اسف جداً اتأخرت عليك فى الرد بس للاسف كنت مشغول جداً الفتره الى فاتت
الميكانيكى اسمه ماجد ورقم تليفونه 01093098030
هو قريب جداً من مزلقان الاربعين فى عين شمس ، ممكن تكلمه وتضبط معاه ميعاد

[Ąshrąf 3lmąsry]

السلام عليكم ورحمة الله وبركاته
هتكلم النهارده عن رحلو تغيير وش السلندر لعربيتى الابيزا 94 موتور 1300 كاربراتير ،

اول الحكايه ابتدت معايا لما لاحظت ان العربيه بتسخن بسرعه جداً وبلاقى القربه فضيت ومفيش فيها ميه خالص ولما بحط ميه بتبقى مصديه ، فشكيت ان ممكن يكون فيه تسريب ، رحت لبتاع ريداتير قالى ان مفيش تسريب فى الخراطيم وعمل دورة غسيل ، بس قالى ان القربه بتجيب هوا ، تحس ان المياه بتاعة القربه بتغلى كده ، روح للميكانيكى وخليه يبص عليها ،
انا اول ماشفتها قلبى وقع فى رجلى وقلت يبقى اكيد جابت جوان وش السلندر

تانى يوم اخدتها ورحت لميكانيكى فولكس جنبى فى المنطقه وقلتله على الاعراض ، اكد كلامى فى انه كده جوان وش السلندر
بص على مقياس الزيت لقينا الزيت مطحن بطريقه فظيعه ، مع العلم ان اليوم الى قابليها كنت مشيك على الزيت ومكنش باين ان فيه حاجه مش طبيعيه ، اصلاً الزيت كنت لسه مغيره بزبت فالفولين ومكملش 30 كيلو



المهم
فك غطاء سير الكاتينه والسير نغسه شاله
وابتدى يفك الوش الى فوق الى فيه مكان تزويد الزيت ، وبعد ماشال الوش بانت الطحينة اكتر فى ظهر الوش



فك بعد كده 8 مسامير نجمة الى بيفكوا وش السلندر ، وفك خراطيم المياه الى داخله على الشجرة



وشال وش السيلندر ، وهنا طهرت المفاجأه

الوش من تحت اتضح انه متاكل مش بس الجوان ، والصور هنا توضح اكتر









وده الجوان القديم







وده شكل البلوك من فوق ، طبعأ واضح بقايا المياه الى داخل غرفة الاحتراق على الشميز والسلندر







المهم قالى كده لازم تغير الوش كله لأنك لو حطيت جوان جديد على الوش ده هيرجع الموضوع زى الاول ومش هيقعد وهنلف نفس اللفه تانى
سألته عن الوش قالى ممكن اجيبلك واحد من مكنه قلتله وريهونى ، راح جابه لقيته ماشاء الله كويس

وده شكل الوش الجديد





عقلى قعد يودى ويجيب ، اغير الوش ولا اغير المكنه كلها
بس بينى وبينكم مكنش معايا فلوس انى ادخل فى مكنه جديده خاصه انى علشان اغير مكنه كنت هجيب مكنه 1400 انجيكشن مكان الكاربراتير الى عندى ودى هتعوز شغل كتير وتغيير طرمبة بنزين وتضبيط كهرباء وكنترولر والكلام الى بالكم فيه ده فقلت لا اغير الوش احسن خاصة ان العربيه مكانتش تاعبانى قبل الموضوع ده

واستنى لما يبقى يجيلى فلوس والمكنه تجيب اخرها وساعتها اجيب مكنه بحاجتها وتكييفها وباورها إن شاء الله

فقلتله اتكل على الله وركب الوش الجديد ، قالى طيب هنحتاج زيت وفلتر زيت جديد وجوان وش جديد ، وجوان مانافولد وجوان فرن ، رحت جبتله الحاجه ، وبالمره جبت فلتر بنزين علشان كان بقالى كتير مغيرتوش وكمان غيرت سير الكاتينه وسير الدينامو

بالنسبه للزيت مكنتش عايز اجيب فلفولين تانى علشان كان غالى ، وفى نفس الوقت قلت اجرب حاجه تانيه غير الشل الاصفر ، فسألته قالى هات كاسترول ، ده الزيت المعتمد من سيات ، فعلاً جيبته وهشوف بقى ايه ظروفه واقولكم ايه نظامه إن شاء الله بعد التجربه

ده بقى شكل الوش بعد التركيب



بعد ماركب بقى قفل الوش و ركب خراطيم المياه تانى والاسبراتير والخراطيم ، وضبط توقيت سير الكاتينه وغير فلتر الزيت والبنزين
وحط الزيت الجديد وقفل الدنيا
خليته بالمره ينضفلى قربة المياه لأن شكلها كان قذر جداً ، ومبتبينش المياه الى فيها

بعد ما خلص قالى دور يا باشمهندس ، هنا بقى كانت اللحظه المخيفه بالنسبه لى ، كنت مقلق لحسن بعد كل ده يطلع فيه مشكله ، خاصة انى كنت بسمع ان الوش لو اتلعب فيه العربيه عمرها ما هتتضبط زى الاول

المهم دورت الحمدلله العربيه دارت رحت شيكت على القربه ، الحمدللع لقيت مفيش الفوران الى كان موجود الاول
بس لاحظت حاجه غريبه ، العربيه كان فيها تقطيعه فى صوتها بتبان قوى وانت جوه العربيه او لو كنت قريب من الشكمان
فقلتله على الحكايه دى فقالى لسه هضبطلك الاسبراتير والكاربراتير . وفعلاً ضبط فيهم كده لحد لما الصوت راح الحمدلله

قالى بقى اطلع جرب ، والحمدلله كانت احسن ، بس ممتازه يعنى حاسس ان فيها خنقه بسيطه لما رجعتله قالى احنا مغيرناش البوجيهات ، جرب كده ولو الكتمه دى فضلت هنغير البوجيهات كمان

قلتله طيب على العموم هو جنب البيت عندى وبعدى عليه كل يوم ، فلو الموضوع استمر هرجعله إن شاء الله

الكلام ده كان اول امبارح ، خلصنا بالليل على الساعه 9 ونص كده
امبارح قلت اجرب العربيه بقى ، فكان عندى مشوار للمعادى وانا ساكن فى جسر السويس فأخدت الدائرى بقى وجربت

تقييمى للعربيه :
الحمد لله المياه تمام ومش بتنقص ومبقاش فيها الصداً الى بيظهر ولا فوران ( إن شاء الله بكره احط مياه حمرا او خضرا )
صوت العربيه فرق جدأ خاصة على السرعه العاليه ( ما بعد ال 80 ) لدرجه ان مراتى لاحظت الموضوع ده
تجميع العربيه الحمدلله تمام

نيجى بقى للتكلفه كانت كالاتى :

350 وش سلندر استيراد
100 جوان وش سلندر المانى ، كان فيه حاجه صينى ب 35 بس طبعاً مرضيتش استخسر خاصه انه مش سهل التغيير
45 فلتر زيت
15 فلتر بنزين
20 جوانات فرن ومانافولد
80 سير كاتينه
25 سير دينامو
100 زيت كاسترول

واخيراً 250 جنيه مصنعيه

يارب يجعله بفايده الهم امين

شكراً للمتابعه
اخوكم احمد عبد الرحمن

أنا معايا إيبيزا 94 و برضه الكلام ده نفسه حصل معايا امبارح.. العربية سخنت والمروحة فصلت رغم إني كنت لسة مغير الترموستات.. و ضيف على كدة إن البطارية نامت عشان تقريبا البيه الميكانيكي و هو بيركب الترموستات عمل حاجة غلط خلت العربية تهرب كهرباء.. المهم إني على ماوصلت البيت كانت جابت وش سلندر.. فعاوز لو حد يعرف ميكانيكي و كهربائي محترمين في الهرم و تحديداً في الطالبية يبقى خدمني بجد

[SYD]

شكراً لنقل التجربة

[SARAHSABRY]

لو سمحت ممكن بيانات الميكانيكي ال عملت عنده
انا عندي نفس المشكله ومش عارفه اعمل ايه