علبة دركسيون

[Ayman Fathalla]

السلام عليكم و رحمة الله و بركاته

دلوقتي انا المفروض أغير علبة دركسيون .. و هجبها استيراد من الحرفيين .. المهم انا عايز اعرف لما هروح اجيبها هاخد ايه بالظبط من الراجل !! .. انا الميكانيكي كان قايلي اجيبها كاملة بالبارات و الصامولة .. و انا للأسف مش فاهم حاجة في دول فا ممكن حد يوضحلي ؟؟ .. و كمان لو تعرفوا حد كويس اركبها عنده ولا ممكن اركبها انا لوحدي سهلة ؟؟

[Ayman Fathalla]

العربية ابيزا 98

[mohammad isdf]

عليكم السلام ورحمة الله وبركاته

مين الميكانيكى اللى روحتله ؟

ايه المشكلة اللى مواجهاك بسبب العلبة ؟

هو فكها وتأكد تماماً إن فيها مشكلة ؟

وبعدين نجاوب على الاسئلة لأنى مريت بنفس تجربتك اول ما اشتريت العربية وبردوا ابيزا 94 ودفعت فلوس ع الفاضى ورجعت للعلبة القديمة تانى !!

[moe gawad]

سيدى الفاضل :-
علبة الدريكسيون خصوصاً لازم حد بيفهم فيها ييجى معاك , علشان فيها مشاكل كتير اوى ممكن تواجها فى العلبه ,,,,,,,
انا ممكن اجى مع حضرتك اجيبها معاك لو تحب ,, (وعلى فكره انا مش هاخد فلوس علشان ماتفهمنيش غلط) انا بس والله خايف عليك علشان انا عندى عربيه دلوقتى صاحبها لابس ,,,,
ربنا يسترها

[Ayman Fathalla]

عليكم السلام ورحمة الله وبركاته

مين الميكانيكى اللى روحتله ؟

ايه المشكلة اللى مواجهاك بسبب العلبة ؟

هو فكها وتأكد تماماً إن فيها مشكلة ؟

وبعدين نجاوب على الاسئلة لأنى مريت بنفس تجربتك اول ما اشتريت العربية وبردوا ابيزا 94 ودفعت فلوس ع الفاضى ورجعت للعلبة القديمة تانى !!

الميكانيكية كتير و كلهم اجمعوا انها لازم تتغير و مش هينفع تتصلح .. لأن اقل حاجة اني كل ما بلف الدركسيون بيفضل يطأطأ .. مع العلم انها طأطأة من العلبة مش الكوبلن .. يعني العلبة اتكسرت من الاخر .. و غير كده فيها حاجات تانية كتير .. و الميكانيكي اللي بتعامل معاه واحد اسوه أحمد بولة في عين شمس

[Ayman Fathalla]

سيدى الفاضل :-
علبة الدريكسيون خصوصاً لازم حد بيفهم فيها ييجى معاك , علشان فيها مشاكل كتير اوى ممكن تواجها فى العلبه ,,,,,,,
انا ممكن اجى مع حضرتك اجيبها معاك لو تحب ,, (وعلى فكره انا مش هاخد فلوس علشان ماتفهمنيش غلط) انا بس والله خايف عليك علشان انا عندى عربيه دلوقتى صاحبها لابس ,,,,
ربنا يسترها

ربنا يخليك يا باشا .. لما اجي انزل ان شاء الله لو مفسش حد جي معايا هقولك

[Ahmed_Gallant]

السلام عليكم
انا لما جيت كشفت على العفشه كانت علبه الدركسيون فيها مشاكل وهى انها خفيفه واى مطب من يسمع فى الطاره جامد ولازم كنت اثبتها بايدى طول مانا ماشى والا هتلعب وفكرت اغير العلبه كلها احنا دلوقتى بنتكلم على العاده مش الباور اللى هى الاسكاترا المهم الراجل طلعها وشفت شكلها لقيتها بسيطه جدا جدا زى ماسوره مجوفه جواها عامود مشرشر بيروح يمين وشمال عن طريق عمود صغير افقى عليه وفكرته زى نظام الرافعه كده حركه بسيطه بتدى عزم تحرك حاجه اكبر وبيحول الحركه الدائريه لحركه افقيه المهم العامود اللى جوه اسمه بارات داخليه وقليل جدا لما بتتغير ممكن ساعتها تشترى علبه وهى دى سبب الطقطقه عندك وفى بارات خارجيه ودى اللى بتتربط فى المقص او الشمعدان مش متذكر عشان تنقل الحركه بتاعه الاسكترا للعجل وتكون زى مفصل عشان العلبه ثابته لكن العجله متحركه والبارات دى بتتغير لان فيها جلب ولما بتغيرها بتمنه اصوات كتير ودبدبه تسمعها وانت ماشى وكاسر العجل يبقى انت لو هتشترى جديد هتعمل 900 جنيه كامله بالبارات الخارجيه من عند فتح الباب ولو استيراد مش عارف هتعمل كام بس فى حدود 450 جنيه كامله برضه ولانى مغيرتشى وركبت القديمه معرفشى انهى افضل الجديد ولا الاستيراد بالنسبه لفكها وتركيبها مقرفه قرف السنين ولازم عفشجى نضيف عشان ميقطعشى الكاوتشه اللى هى شبه البوق عشان دى بتحوش الهوا السخن انه يدخل على رجليك وانت سايق يعنى عينك وسط راسك وهو بيحل ولو لقيته بيتغاشم على العلبه قولو لو كده يفكها من جوه من اخر قطمه الدركسيون عند الصلبيه اللى تحت ويسحب العلبه لان الكاوتشه بتبقى مغطيه الصليبه اللى تحت وعشان يوصلها بيقطع الكاوتشه
راجع المشاركه دى عشان تتعرف على قطمه الدركسيون اكتر

http://www.nilemotors.net/Nile/309019-a.html

المهم ان لو علبه الدركسيون اللى عند فتح الباب توبران يبقى اتوكل على الله واشترى لانى جربت منتجات كتير منها وبصراحه بتعيش ولو انت بتتكلم عن العلبه الباور يبقى هتستنى ابص على العربيه الفولكس اللى فيها باور اللى معايا لانى بصراحه محتكتشى بموضوع العلبه فيها وكل خبرتى مع الابيزا اللى بعتها

[Ayman Fathalla]

شكراً جداً ليك يا باشا انا كده فهمت الموضوع احسن شوية .. الف شكر