سير كاتينه - ابيزا 2006

[kyrillos]

السلام عليكم
أنا متأسف بقالى كتير جدا مش بدخل المنتدى, بس تقريبا كنت معظم الوقت بره مصر
الحمد لله من وقت ما جيبت الابيزا 2006, وغيرتلها معظم القطع الاستهلاكيه (تيل, طنابير, فلاتر....) وماشيه 100 100. حقيقى عربية جميلة ومريحة وناعمة.
الحاجة الوحيدة اللى ماغيرتهاش هى الكاتينة وسير الدينامو والمجموعة
وزيت الفتيس (اوتوماتيك)

ندخل بقى على الفتى, واحد معاه ابيزا 2009 قالى ان احنا ماعندناش سير وعندنا جنزير, فكتنى منه

سألت على السير فى دمشق لقيته بحوالى 375 جنيه, ماعرفش ايه مصدره, وطقم بلى الكاتينه ب 1050
العربية ماشية 80 الف, مش عارف لازم أغير البلى ولا لأ
انا كنت قريت قبل كده فى المنتدى هنا, ان التوكيل بيغير الكاتيته ب 1500, لو الكلام ده مظبوط, أعتقد الواحد يغير فى التوكيل أحسن, تقريبا نفس السعر يعنى, اقتراحتكم؟!!

بالنسبة للفتيس, سألت عند ميكانيكى كبير فى مصر الجديدة, قالى لو غيرت زيت الفتيس, هايطلع صوت ويصفر, بلاش تغير زيت الفبريكة, مش عارف كلامه صح ولا لأ, اى اقتراحات ؟؟

والله الموفق

[ehab_mansour]

السلام عليكم

اخي الفاضل الكاتينة في عدد الكيلومتر ده ليها احتمالين : الاول انها تكون اتغيرت قريبا من المالك السابق (و دي لازم تتاكد منها ) و هنا مش هتغيرها دلوقتي اساسا و الثاني انها تكون متغيرتش من الفبريكة و في الحالة دي يبقي لازم تتغير حالا و في اقرب فرصه

نصيحتي المفروض تتغير الكاتينة كاملة بالشدادات بسير المجموعه بشداده عند متخصص او التوكيل لأن ضبط الحاجات دي بالشعره صعب و مش سهل و محتاج حد فاهم قوي (بيشتغل بالمسطرة و القلم )
بالنسبالي بغير الكاتينة و مش بغير الشدادات غير لما احس فيها بصوت او خشونه لأنها غالية اكتر من السيور و لكن بقلك غيرها عشان تريح دماغك مره واحده

نصيحتي تشتري الكيت كاملة بكل مشتملاتها و تغيرها

بالنسبة لزيت الفتيس لازم تغيره هو كمان لان زيت فتيسك بيتغير كصيانة دورية و ضرورية و بدونها بتحصل مشاكل علي المستوي البعيد في الفتيس و اللي قال كده المصنع و لكن المهم تغيره بالاصلي او ما شابهه من زيوت موثوق فيها بنفس الدرجة و الكواليتي و اللزوجة و الكمية

و بالتوفيق لك و للجميع و اتمني تسأل في التوكيل الجديد و تروحله يعملك كل ده لأنها صيانات حساسه و مش هتتحمل العك و اللعب و الفهلوه

[kyrillos]

متشكر جدا جدا يا بشمهندس على ردك, حقيقى أنت انسان محترم وفاهم
ان شاء الله هاكلم التوكيل استفسر عن الكاتينة والزيت ولو الأسعار فعلا قريبه من بره, هاتوكل على الله وأروح التوكيل وهتابع مع المنتدى ان شاء الله

[matrix012]

كلام المهندس ايهاب مفيش بعده كلام
علشان اتلسع من سير الكاتينه قبل كده وعارف اهمية خامة السير وسنة الصنع والمتخصص الى بيركب على الشعره
خلى بالك
والله المستعان

[ehab_mansour]

كلام المهندس ايهاب مفيش بعده كلام
علشان اتلسع من سير الكاتينه قبل كده وعارف اهمية خامة السير وسنة الصنع والمتخصص الى بيركب على الشعره
خلى بالك
والله المستعان

فينك يا صديقي العزيز ؟؟؟
شفت اخر موضوعاتي فيما يخص قصة الكاتينة للمرة التانية !!! اكنها ملزماني كده علطول

ربنا المستعان

[hossamalsadik]

شفت اخر موضوعاتي فيما يخص قصة الكاتينة للمرة التانية !!! اكنها ملزماني كده علطول

ربنا المستعان

الكاتينه وراك وراك
طيب عملها بحنيه خليه ترضى عليك ياهندسه
معلش هيا صدفه مش أكتر وربنا يحفظلك عربيتك وطريقك

[ehab_mansour]

الكاتينه وراك وراك
طيب عملها بحنيه خليه ترضى عليك ياهندسه
معلش هيا صدفه مش أكتر وربنا يحفظلك عربيتك وطريقك

ربنا المستعان .... الحمد لله

[kyrillos]

السلام عليكم, الحمد لله فضيت وروحت عملت العربية على طول
واحد صديقى معاه بولو 2004, مانيوال, اللى هى بالظبط اخت عربيتى بس أنا 2 كام اوتوماتيك, وبيروح ورشة فى غمرة ورشحلى انى اروع عندهم
ليه ماروحتش التوكيل, ببساطه انى سألت على الكاتينه هناك قالولى 1800, بدون التركيب, اللى هو يعنى دى عربية ب 60 الف موديل 2006, مش ب 140 ألف موديل 2013, أكيد مش هادفع الهجص ده

المهم, فكينا الكاتينة بمعاناه, حوار كبير قوى, لدرجة انك لازم تفك قاعدة الماتور الشمال, وهنا المفاجأة, الكاتينة اللى راكبه, هى الأصليه الفبريكه (الستاندارد اللى فولكس بتركبه Contitech), صاحب العربية اللى قابلى ماشى على سير كاتينه 80 الف, والسير ممسوح ومشقق وحاجة صعبة
طبعا البلى كله خشن وبيطلع صوت, سير المجموعة بس هو الى متغير, راكب سير ايطالى

المهم روحت التوفيقية, عند محل مشهور ولقيت تانى مفاجأة, سعر طقم الكاتينة ارخص ب 400 جنية عن نفس المحل اللى فى دمشق, وفى الأغلب هم مش تبع بعض بس نفس التسمية
ولما لقيت كده, سألت على اسعار حاجات تانية لقيت فرق السعر بال100 وال 200 جنية, حسبنا الله

المهم جبت السير ب 200 والبلى ب 800 وسير المجموعة ب 80, كله توبران مكتوب عليه صنع فى ألمانيا على العلبة, بس السيور نفسها من جوه مكتوب UK, اعتقد انه اوروبى والسلام
غيرنا السير, ودورنا العربية بس للأسف مبرجلة شوية وتحسها واطية وبطلت لوحدها بعد دقيقة, قلتلة فك كابلات البطارية على أساسٌ Reset, فكها 10 ثوانى كده ودورنا تانى, ظبطت شوية يعنى بس برضه مبرجلة, المهم قالى دى محتاجه تروح تظبط كهربا على الجهاز يعلى السلانسية, هى فعلا من قبل كده كانت واطية شوية, بس كانت زى الألف, بتدور من اول مرة, لو بطلتها وهى سخنة ودورت تانى تاخد وقت شوية بس بتدور
المهم مشينا بيها شوية اتحسنت شوية, بس بتغيب وتبطل, تقريبا لما المروحة بتشتغل, قالى الكومبيوتر هيظبط نفسه لما تمشى عليها شوية, ولو ماظبطش هاتهالى ونروح للجهاز, قلتله ماشى يوم الاتنين اروح بيها الشغل ونشوف
بعدين قلتله زيت الفتيس بقى, فتح الطبه من تحت نزل شوية زيت كده قد كباية لونه بنى محروق, يا باشا ده الفتيس بياخد 5 لتر, فين ام الزيت ؟؟ دورنا العربية مافيش حاجة بتنزل, جالى ذبحة صدرية كده , انا ماشى على العربية 300 كيلو فى اسبوع ومافيهاش زيت فتيس, حمدت ربنا وشكرته
زودنا زيت الفتيس خدت 3 لتر, وشلت لتر, طبعا ده مش اصح حاجة تتعمل, بس كان الليل جه وبقالى 10 ساعات فى الشارع
روحت على العربية, انعم كتير وبتسحب اجمل بكتير بس لما جيت اقف فى اشارة عملتها معايا وبطلت, دورتها مش راضية, لازم اسندلها سنة بنزين وطفيت النور والكاسيت عشان ماتبطلش, المهم فضلت مسايسها لحد ماوصلت البيت
اللى بفكر فيه حاليا انى انزل اعمل برمجة للايدل, افصل الكابل واوصله واعلى الكهربا سنه سنه, كان فى مقال هنا فى المنتدى عن الحوار ده, ولو ماظبطتش هاروح اكشف كومبيوتر واشوف بقى
أسف جدا على الاطاله, اى اقتراحات ؟؟

[hossamalsadik]

معلش هوأنا وصلنى احساس بس ماعلينا منه دلوقتى
ممكن التبطيل ده يكون بسبب ان سير الكاتينه مش مظبوط بدقه فى تركيبه
موضوع ان حد يعاليلك السلانسية من euc أستحاله وأن العربيه حساستها والكمبيوتر هيظبطو لما تمشى بيها ده كلام لامؤخده ( كلام غير صحيح )
والحمد لله انك غيرت سير الكاتينه كنت دخلت فى حوار جامد لو كان قطع منك قدر ولطف

[ehab_mansour]

السلام عليكم

كما قال اخونا حسام و هزيد عليه :-
هل حضرتك و انت رايحله بالعربية كانت بتبطل برده ولا دايرة مضبوط و مافيش مشكلة نهائي غير الصيانات الدورية اللي هتعملها ؟؟؟؟
لو الاجابه انها كانت مضبوطه يبقي حضرتك فورا ترجعله و تقله ان كاتينة العربية مش مضبوطه و سبق و قلتلك من قبل ان ضبط كاتينة سيارات فولكس صعب و مش سهل خاصة المحركات ال 2 كامه علي العموم مستني حصرتك تقلي كود موتورك ايه بالضبط و انا هجيبلك صور لضبط سير الكاتينة عندك ان امكن ذلك لو صعب ممكن نتقابل و انا اقلك يتظبط ازاي و تروحله يضبطهولك

بخصوص زيت الفتيس انا شايف ان اللي عملته غلط لأن كان المفروض تفضيها تماما من الزيت و تغيره خالص متخلطش بين قديم و جديد

معلومه اخيره مافيش عربيات لفولكس بعد 2002 فيها اي ضبط للسلانسيه او للكهرباء او غيره يدوي او بالكمبيوتر ... اخرك في القصة دي انك تعملها basic setting بعد فصل البطارية و ده بيساعد علي انتظام السلانسيه مع التشغيل و التكييف و حتي لو معملتش ليها ده بالكمبيوتر هي هتظبط من نفسها بعد شوية لكن موضوع التبطيل و الدوارة من اول لقطه ملهوش علاقة غير بالكاتينة اللي انت غيرتها

[SYD]

مع كامل احترامي لكل كلام الصنايعية اللي اشتغلوا
بس دة كلام فارغ
العربية خالفة تقسيمة ولازم تتظبط مرة تانية
طالما بتبطل يبقي التوقيت Timing مش مظبوط (توقيت دخول الهوا وفتح الصباب وخروج العادم والحريق ونزول البستم وكمان علي عمودين كامة 16 صمام) لازم يكون مظبوط علي الشعرة بالمسطرة والورقة والقلم زي ما قال م/ايهاب
ولفظ مسطرة دة مش مجاز - دة بجد

تحياتي

[SYD]

حبيبي يا هندسة
ماشوفتش ردك وانا بكتب
فعلا كمان زيت الفتيس دة غلط غلط غلط
اوﻻ اعرف اللزوحة الصح من الكتالوج وتجيب زيه بالظبط من اي ماركة او من موزع معتمد قطع غيار فولكس وتجيب الزيت الاصلي

تحياتي

[ehab_mansour]

اتفضل يا افندم ... موضوع عن كيفية ضبط كاتينة عربيتك

http://www.nilemotors.net/Nile/421030-1400-16-2-a.html

و بالتوفيق لك و للجميع

[Hazem_Ahmed]

موفــــــــــق إنشاء الله

[kyrillos]

شكرا لكل الرجاله اللى ردت, فعلا كلامكم مقنع ومنطقى, وكلمت الاستاذ الدكتور الميكانيكى ومش مقتنع, ومصمم انها عايزه ظبط كهربا
وشكر خاص للباشمهندس ايهاب, انت فعلا انسان محترم وأكاديمي
الفكره دلوقتى أنا, هاطبع التقرير بتاع المهندس ايهاب وهاروح للميكانيكى وهاخليه يشتغل غصب عن عينه من التقرير ده, وهاراجع عليه وكله هيبان بالتجربة, كل ميكانيكى عامل انه دكتور وكل المهندسين المتعلمين عيال طريه مش فاهمة حاجة
المشكلة انى مضطر امشى عليها كده 5 أيام, عشان اروحله يوم السبت الجاى, هل فى خطر كده للماتور ؟؟

بالنسبة للزيت, الوقت كان اتأخر قوى وانا كنت فعلا جبت اخرى, والمانيوال عندى بيقول كل 30 الف يتزود الزيت مش بيتغير, اللى بيتغتير خالص هو ال دى اس جى 7 نقلات, انا 4 نقلات عادى
أعتقد عشان كان كل الزيت ينزل, كان لازم نبطل العربية نص ساعة مثلا, وبعدين نملا زيت من فوق
والزيت اللى نزل فعلا كان لونه وحش وخفيف, عامة مش القصة دلوقتى, الأهم الكاتينه
شكرا تانى على اهتمامكم, وتابعوا معايا الله يخليكم