رجاء الافاده في ضعف السحب وارتفاع صوت المحرك - ابيزا 2001

[moumen_shafik]

يا اصحاب الخبره ياريت تساعدونى
ايه اخر اعراض انتهاء الدسك والاسطوانه لانى شاكك ان العربيه عايزه تغيرهم لانى مغيرتهمش من سنه و5 شهور
انا حاسس ان العربيه مكتومه
بس العربيه بتسحب كويس جدا جدا جدا
بس بسمع صوت الموتور بيعلى مع الحرق
ومفيش اى اصوات ف النقلات ولا اى حاجه
وخايف انه يعملها معايا فى سفر ولا حاجه
ياريت لو حد يعرف ايه الاعراض النهائيه قبل تغيير طقم الدبرياج عشان اخد بالى لما الاعراض دى تيجى اغيرها قبلها لان الوقت ميسمحش انى اغيرهم دلوقتى
ياريت اصحاب الخبره يفيدونى واسف على الاطاله

ابيزا 2001 1400 2 كامه

[ehab_mansour]

اخي الفاضل
كلامك عكس بعضه الصراحه و حتي العنوان مش متوافق مع الموضوع
اما بخصوص انك مغير طقم الدبرياج لقالك سنه و نصف فده قليل جدا يعني لسه معاك كتير علي ما تفكر تغيره او يظهر فيه مشاكل ... ده الطقم الاوريجينال عندي اتغير بعد 12 سنه و 160 الف كيلومتر

[moumen_shafik]

اخي الفاضل
كلامك عكس بعضه الصراحه و حتي العنوان مش متوافق مع الموضوع
اما بخصوص انك مغير طقم الدبرياج لقالك سنه و نصف فده قليل جدا يعني لسه معاك كتير علي ما تفكر تغيره او يظهر فيه مشاكل ... ده الطقم الاوريجينال عندي اتغير بعد 12 سنه و 160 الف كيلومتر

حاضر بعد كده لما احب اكتب حاجه بالنسبه للدسك والاسطوانه هذكر الموتور مش الفتيس معلش
ثانيا طلاما كلامى مدايقك قوى كده رديت عليه ليه لان مرورك الى انا شايفه ان الغرد منه التريقه يعنى وواضح فعلا ان معلوماتك ضئيله
ثالثا وده الاهم شكرا على الافاده بعمر الفتيس الافتراضى بس برده حضرتك مذكرتش اى اعراض من الى عايز اعرفها
بس على فكره الدسك والاسطوانه من مكونات الفتيس المانيوال ياريت تحدث معلوماتك

[SYD]

حاضر بعد كده لما احب اكتب حاجه بالنسبه للدسك والاسطوانه هذكر الموتور مش الفتيس معلش
ثانيا طلاما كلامى مدايقك قوى كده رديت عليه ليه لان مرورك الى انا شايفه ان الغرد منه التريقه يعنى وواضح فعلا ان معلوماتك ضئيله :u_thin1[1]:
ثالثا وده الاهم شكرا على الافاده بعمر الفتيس الافتراضى بس برده حضرتك مذكرتش اى اعراض من الى عايز اعرفها
بس على فكره الدسك والاسطوانه من مكونات الفتيس المانيوال ياريت تحدث معلوماتك

بعد أذن المهندس ايهاب هرد علي حضرتك وطبعاً هو له حرية الرد عن نفسه فيما بعد لما يشوف ردك

اولا حضرتك يبدو عليك الحداثة في القسم والمنتدي بوجه عام
لما تكون مش عارف المهندس ايهاب ومدي ثقله في قسم سيات تبقي حديث العهد عليه
ولما تكون مش عارف قوانين المنتدي وانك بكدة بتخالفها تبقي حديث العهد عليه

دي اولا علي اسلوبك في الكلام مع المهندس ايهاب

نيجي لثانياً وهو انك فعلا انت اللي مش علي دراية بمكونات المحرك وآلات الجر
الأسطوانة والديسك مش من مكونات لا الفتيس ولا الموتور

بعد كده لما احب اكتب حاجه بالنسبه للدسك والاسطوانه هذكر الموتور مش الفتيس

دة كلامك
الأسطوانة والديسك يعتبروا الدبرياج وبالتالي بالفعل عنوان موضوعك مش مناسب للمحتوي
وهطلب حالاً من الأشراف تغييره

ثالثاً ان المهندس ايهاب رد عليك لما قالك ان كدة بدري اوي علي الطقم وبالتالي معناه انه يستبعد حدوث مشاكل في الطقم

تقبل مروري

تحياتي للجميع

[hossamalsadik]

أستاذ مؤمن المهندس إيهاب غيها مايقصدش حاجه وحشه بالعكس هو بينبهك ان العنوان مش متوافق مع المشكله الى بتحكيها وده هيخلى عدد المشاركات للأعضاء الى حبه تفيدك قليله يعنى ده فى مصلحتك
اقراء الموضوع ده وحضرتك تفهم قصدى

http://www.nilemotors.net/Nile/345200-a.html

موضوع تناقد الكلام المقصود ان حضرتك بتقول ان العربيه بتسحب كويس جدا ومافيش اى مشكله فى النقلات وحاسس ان العربيه مكتومه طيب ازاى فعلا العربيه مكتومه يعنى السحب قليل المفروض
وبخصوص تغيير طقم الدبرياج رد عليك المهندس إيهاب صح بردو وداك المعلومه المظبوطه وانا عن نفسى طقم الدبرياج قاعد فى الماتور 120كم الاروجنال ( فاليو الاسبانى ) دون مشاكل ولسى مكمل زى الفل يعنى سنه ونص ده قليل جدا

ممكن مشكلتك تكون طقم سرفس
راجع على فلتر الهوا وفلتر البنزين والبوجيهات لو محتاجين تغيير نوعية الزيت بتفرق فى صوت الماتور بردو
وكذلك نوعية البوجيهات تتجاب اصليه ويارت بالكود الاصلى المتوافق مع الماتور ان أمكن .

[mohammad isdf]

ياعم مؤمن انت جاى مع اجدع واحد فينا واكثرنا علما وفهما فى المجال .. خير ان شاء الله سوء تفاهم ويعدى

[moumen_shafik]

ياريت يا أستاذ ايهاب تتقبل أسفى انا بس اتضايقت ان حضرتك كلمتنى بطريقه وحشه
ياريت تتقبل اسفى وتعتبرنى اخوك
وشكرا ليك جدا يا أستاذ حسام على الافاده
ومعلش يا أستاذ محمد هى جت كده بس اكيد مكنش قصدى يعنى خير ان شاء الله
وشكرا ليك ي أستاذ سيد على تعريف المهندس ايهاب

[ehab_mansour]

السلام عليكم

استاذ مؤمن انا مش هتكلم في ردك خالص عليا لأن اخواتي فوق مهندس محمد سيد و أستاذ حسام ردوا بما فيه الكفاية لأنهم فعلا اخواتي و اتقابلنا كتير و يعرفوني من سنين و يعرفوني جيدا و يعرفوا قصدي ايه و كثيرا ما اختلفنا و اتعاتبنا و بنختلف في الرأي اوقات و لكن يبقي بيننا كل حب و احترام و اخوه
انا عمري ما هتريق علي حد ولا هدعي العلم انا بتعلم زيي زي اي حد

اما بخصوص موضوعك الاساسي فانا رديت لافادتك و افادة الجميع و ليس علي سبيل التريقه ولا المضايقة و لكن ب نية خدمة البشر لوجه الله عز و جل خاصة اني ما اعرفش مين بيكلمني ولا منين ولا تربطني بيه مصلحه و ربنا يرزقنا جميعا الاخلاص في القول و العمل و اتمني تكون دي اخر كلمات في سوء الفهم ده لأني مبحبش الخوض في المشاكل و الحوارات و بحب تتقفل تماما حتي لو لي حق فانا متنازل عنه

مكونات الات جر السيارة بداية من المحرك حتي العجل :-
1- المحرك
2- حلة الفتيس :- و ده الجزء المجوف الفاضي من داخلة و اللي بيحمي اجزاء طقم الدبرياج كاملا و بأكس خارج من الفتيس للربط و نقل الحركة و بالطقم اللي متركب علي ترس الفلام اللي هو جزء من المحرك
3- الفتيس :- و ده جزء مغلق علي نفسه بداخله مجموعتين تروس مجموعة واصله مع الاكس اللي راكب عليه الطقم و اللي خارج داخل حلة الفتيس لنقل الحركة و مجموعة اخري راكبه علي الاكس اللي بيخرج الحركة للكبالن و بالتالي للعجل
احنا لما بننقل فقط بنغير بين ترس و اخر من المجموعتين علي ان كل ترسين هيعشقوا مع بعض هيدونا نقله او غيار .. اول - تاني - تالث ... و هكذا
و المجموعات دي مثبته داخل الفتيس علي بلي و كل ده عايم في زيت الفتيس

4- الكبالن الداخلية و الخارجية :- و دي جزئين يمين و دول كبالن بأكس طويل و شمال و دول كبالن بأكس قصير و دي بتتثبت علي خرج الفتيس يمين و شمال و بتنقل الحركة للعجل

انا فصلت الكلام ده ليه ؟؟؟؟ عشان حضرتك تعرف ان اي جزء مغلق علي نفسه فهو منفصل عن الاخرين في عمله

احيانا حلة الفتيس اللي جواها الطقم بتكون جزء من جسم الفتيس الخارجي لكن ملهاش علاقة تماما بالفتيس ولا فيه خلط بينهم نهائيا و احيانا بتكون جزء منفصل متربط في الفتيس من ناحية و في جسم المحرك من ناحية اخري و لو لا قدر الله حصلت حوادث... كثيرا بتتكسر الحلة دي و بتتغير لوحدها و يبقي الجزئين المهمين (المحرك + الفتيس ) سالمين دون مشاكل و ده حصل معايا من قبل في اصلاح سيارة اسبرانزا 516 خاصة بأحد اصدقائي بعد حادثه و كسر في الحلة دي و اتغيرت من غير تغيير الفتيس ولا المحرك و الحمد لله لم يصيبهم شيء

الكلام كله حول السيارات المانيوال

و بالتوفيق للجميع

[moumen_shafik]

بص حضرتك والله العظيم انا هنا معتبركم كلكم اخواتى
انا متابع للمنتدى من زمان جدا جدا والله بس مشتركتش الا قريب
وبصراحه هكون زعلان من نفسى وربنا عز وجل هو الى قادر يسامحنى ومن بعده انت لو كنت غلط فى حقك
وياريت حضرتك تتقبل اسفى للمره الثانيه
وشكرا للظروف الى خلتنى اقابل شخصيه محترمه زى حضرتك
شكرا مهندس ايهاب

[ehab_mansour]

بص حضرتك والله العظيم انا هنا معتبركم كلكم اخواتى
انا متابع للمنتدى من زمان جدا جدا والله بس مشتركتش الا قريب
وبصراحه هكون زعلان من نفسى وربنا عز وجل هو الى قادر يسامحنى ومن بعده انت لو كنت غلط فى حقك
وياريت حضرتك تتقبل اسفى للمره الثانيه
وشكرا للظروف الى خلتنى اقابل شخصيه محترمه زى حضرتك
شكرا مهندس ايهاب

يا افندم ربنا يكرمك و انت اخ لنا و لا توجد لدي اي غضاضه تماما و مسامحك من قبل ما تكتب الكلمات دي و ده واضح من ردي فوق و اتمني لا تذكر شيء في الموضوع ده تاني و تحت امرك اي وقت

و بالتوفيق لك و للجميع و اتمني من مهندس محمد سيد يمسح المشاركات دي الخارجه بره نطاق الموضوع و كأن شيئا لم يكن لأننا لم نتعود فيما بيننا الشقاق ابدا ولا الشد و الجذب و لا المضايقات و اتمني اخونا صلاح يرجع يشارك و انا هكلمه (ابو السيد يعرف انا بتكلم في ايه )

[moumen_shafik]

ياريت فعلا وانا حاولت اشيل حتى الردود مش عارف
شكرا وبالتوفيق للجميع

[warfighter2114]

اخلاق الفرسان

[mahmoud ghanem]

حصل خير ... وبعدين المهندس ايهاب هو الخير والبركة فى المنتدى