ابيزا 2000 ولا جولف3 ولا بولو 2001 ولا جوليت؟

[Pradiator]

السلام عليكم ورحمة الله وبركاته
محتاج استشارتكم فى شراء سيارة ومحتار ما بين
1- ابيزا 2000
2- جولف 3
3- بولو 2001
4- دايو جوليت
محتاج عربية جراية تسارع وسرعة لحوالى 160 او 170 وتتحمل قرص وقطع غيار موجودة
ايه رايكم؟

[Karim Ibiza]

مبدأيا ابعد عن الجوليت, مش عشان هى وحشة لكن عشان انت عايز تجرى, يعنى عايز عزم وفى نفس الوقت ثبات وده يخلى الجوليت أخر عربية فى المقارنة بالنسبة للعربيات التانية اللى انت كاتبها

أبعد برده عن البولو وده لأن اختيارات تسقيط المواتير فيها مش كتير وأخرك فيها موتور 1600 + كمان انها اصغر من الابيزا والجولف سواء من برة او من جوة او من الحوض

كده يبقى قدامك ابيزا 2000 وجولف 3
الاتنين نفس الحوض وبيركبلهم نفس المواتير لغاية الـ vr6 لكن صالون الجولف اوسع شوية
انا عن نفسى أفضل الجولف 3
لكن حالة العربية وسعرها هما اللى هيحددوا انت هتشترى ايه

[hossamalsadik]

كريم باشا جبلك المفيد أمامك الجولف 3 او الابيزا 2000
لان خيارات التسقيط والتعديل كتيير جدا الجوليت والبولو مش هتديك الى أنتا عاوزه
والأتنين شكلهم حلو يمكن صالون الابيزا بيعجبنى أكتر

[Pradiator]

شكرا ليكوا يا رجالة
انا ميال للجولف اكتر من حيث القوة والابيزا شكل وربنا يكرم بحاجة نضيفة ان شاء الله