لاهل الخبره في سيات ابيزا ٩٤

[Sharkeyboy]

السلام عليكم
اولا احب اشكر كل الرجاله القائمين علي خدمه الاعضاء وفعلا من افضل المنتديات اللي اشتركت فيها علي مدار سنين
انا الحمد لله اشتريت ابيزا ٩٤ بعد الاكسنت

انا من هواه التغيير والروشنه
انا اخوكم وليد مهندس وساكن فالهرم ومعنديش اي خبره في الابيزا وبينى وبينكو خبرتى ضعيفة فالعربيات عموما لا تتعدي معرفتى في صنع كبايه النسكافيه

انا قرات لناس هنا ماشاء الله عليهم عمالقه واستفدت منهم اول ما اشتريت العربيه وروحت لابراهيم بتاع امبابه
انا عايز اظبط عربيتى من كل النواحى سواء ميكانيكا او كهربا ، كله كله لانى مبحبش امشى بالعربيه متهانه

انا عربيتى ابيزا ٩٤ تكييف وازاز كهربا ومانيوال و٢٠٠٠ سي سي
عايزكو بقي تقولولي علي حد فالهرم يخلصلي كل حاجه فالعربيه عشان ملفش عالميكانيكية كتير

فيه شويه ملاحظات عندي
١- دخنه سودا من الشكمان
٢- صوت صفاره اختلف الكثير من الشعب هل هي بليه دينامو ام خرم شكمان
٣- صوت فى مروحه التكييف مزعج وانا مشغل التكييف
٣- الماتور بيعلي ويوطى علي مزاجه والعربيه واقفه وشغاله . وعالطريق الماتور بيهرتل وانا طالع عالاول . رجه كده خفيفه
٤- سلك دواسه البنزين بيفصل ساعات كده وانا ماشي

ولما افتكر حاجه هقولها علي طول ، اهو نستفيد كلنا من المعلومات دي وانا هصرف مش هستخصر حاجه فيها
وهصور ورقه المصاريف اللي ابراهيم صرفها عليها اول ما جبتها واوريهالكو . يلا منتظر ابداعاتكو بقي وبليز بالراحه ومحدش يحبطنى عشان قلبي ضعيف ؛)

[المنسي]

مبروووووووووووك عليك العربية وربنا يديك خيرها ويكفيك شرها

[SYD]

أهلا بيك يا بشمهندس وليد في سيات نايل موتورز ومبروك عليك وعلينا انضمامك لأسرة سيات نايل موتورز

بص يا باشا اولا انت ماقولتش تفاصيل كافية عن موتورك
زي هو انجيكشن ولا كاربراتير وايه كوده

علي العموم
الميكانيكي اللي معظم القسم بيتعامل معاه هو عصام في اخر الهرم
تفاصيل العنوان والتليفون هتلاقيه في المشاركة دي

http://www.nilemotors.net/Nile/365862-a.html#post3875071827

روحله وقوله انك من طرف م/ محمد سيد وعرفه بنفسك وخليه يكشف عليها
ولو عايز اي استفسار عن اي حاجة قولنا واحنا هنا عنينا ليك

الدخنة السودا لو انت كاربراتير هتبقي ظبط للبيكات ولو انت انجيكشن اغلب الظن هتبقي حساس شكمان
اما عن انتظام المحرك فدة بردو لازم نعرف هي كارب ولا انجيكشن
واخيراً الدواسة امرها سهل ومافيهاش مشكلة ان شاء الله

تحياتي

[Karim Ibiza]

مبروك عليك الابيزا وربنا يباركلك فيها
ياريت بعد ما ترجع من عند عصام تقولنا على الملاحظات عشان نفكر مع بعض

[Sharkeyboy]

هو دا الكلام . يد العون موجوده دايما
مهندس محمد سيد ربنا يكرمك يا كبير وتطبطنا وانا هروحلو واقولكوا عملت ايه

الماتور بتاعى ٢٠٠٠ انجكشن . موضوع الكود دا انا معرفوش .
استاذ كريم
متقلقش يا باشا اكيد كل حركه فالعربيه هقولكوا عليها . دنت هنضرب ضرب

[nesr6060]

كود موتورك غاليا 2e ياريت تصورهولنا

[Sharkeyboy]

انا روحت لعصام امبارح وبص علي صوت الماتور وعلي بوكس كده ادام الماتور وقالي دا عقل الماتور اللي بيظبط الهوا والبنزين وكل حاجه
حط سوسته كده عشان يمسك الفيشه وبقي الصوت مستقر فعلا بس بردو فيه دخنه شويه صغيرين

وقالي للاسف الماتور ملوش فيشه مش هعرف احطه عالكومبيوتر
ان شاء الله النهارده هصور الماتور والعلبه اللي داخل فيها الفيشه دي

وعلي تواصل معاكو خطوه بخطوه

[Karim Ibiza]

انا روحت لعصام امبارح وبص علي صوت الماتور وعلي بوكس كده ادام الماتور وقالي دا عقل الماتور اللي بيظبط الهوا والبنزين وكل حاجه
حط سوسته كده عشان يمسك الفيشه وبقي الصوت مستقر فعلا بس بردو فيه دخنه شويه صغيرين

وقالي للاسف الماتور ملوش فيشه مش هعرف احطه عالكومبيوتر
ان شاء الله النهارده هصور الماتور والعلبه اللي داخل فيها الفيشه دي

وعلي تواصل معاكو خطوه بخطوه

فى انتظار الصورة وهى اللى هتوضح هو كان قصده ايه

[mohammad isdf]

ألف مبروك وان شاء الله تتعامل مع عصام هتستريح وخصوصا انك اول مرة تتعامل فى الابيزا فمحتاج واحد امين مياخدش كل اللى معاك ويلبسك فى الحيط

[Sharkeyboy]

الحمد لله صوت الماتور بقي مستقر بس لسه الشكمان بيطلع دخنه سوده علي بسيط كده

والعربية بتبطل وانا مشغل التكييف وماشي علي الهادي كده او باخد مطب تبطل من غير ما احس حتي .

ان شا ءالله هروح لعصام يوم تاني واشوف القصة دي

انا عايز اغير التابلوه بواحد حديث لاني اللي عندي شكله مش عاجبني خالص . عايز كده تابلوه شديد بعدادات نضيفه .

يا ريت تقولولي ممكن اشتريه منين واركبه فين .