كام سؤال عن الابيزا 94-98

[dr_mdawood]

سلام عليكم
الى اخصائيي السيات ابيزا
كنت عايز اسال كام سؤال عشان داخلة دماغي و بافكر جديا اجيب واحدة .
هو ليه معظم اللي معروض للبيع من الاابيزا اما 94 او 98 ؟ فين باقي السنين ؟
و ايه الفرق بينهم ؟
و سعر الكويس فيهم في حدود كام ؟
و ايه اخبار قطع الغيار من حيث ( التوفر - الاسعار - الاعتمادية )

و لكم جزيل الشكر .

[Karim Ibiza]

وعليكم السلام واهلا بيك فى قسم سيات نايل موتورز

الوكيل القديم مكانش مهتم انه ينزل العربية كل سنة وبالتالى كل اللى موجود هتلاقيه 94 او 98 وقليل 99

الفرق بينهم ان الـ 94 كانت بتنزل 1.3 كربراتير و احيانا 1.4 رشاش واحد
أما الـ 98 والـ 99 كانت بتنزل 1.0 انجيكشن واحيانا 1.4 انجيكشن

وده موضوع مفصل عن كل الفروقات بين الموديلين

http://www.nilemotors.net/Nile/354830-a.html

سعر الـ 94 أخر الــ20ـــات الى الـ 33 او 34 حسب الحالة والكماليات
الـ98 من 34 الى 40 حسب الحالة والكماليات

قطع الغيار متوفرة للموديلين سواء جديد او استيراد لاشتراكها مع البولو والجولف فى المواتير واجزاء العفشة واسعارها معقولة بالنسبة لعمرها الافتراضى

[hossamalsadik]

طبعا أ/ كريم جبلك المفيد والمختصر ماشاء الله
الأبيزا عربيه جميله لو بتفكر فيها دور على حاله نضيفه اساسيات
وهناك مدارس واراء فى مسألة شراء العربيه المستعمله
فى ناس بتجيب العربيه اساسيات وتكمل أى حاجه ناقصه وعاوزه صيانه وطبعا بيبقى سعرها منخفض
وده بيضمن أنه ركب الحاجه بنفسه وعارف حالتها
فى ناس عوزه تركب مره واحده فبتختار عربيه جهزه فيها جميع الكماليات وكل شيىء يعمل بكفائه عاليه وده بيتطلب كشف كويس عليها
جميع أجزاء العربيه من صاج لعفشه لقطع غيار الماتور لاجزاء الصالون موجوده إستيراد وجديد ومنتشره وأكتر مكان
الحرافيين وفيصل فى القاهره وطبعا فى الوكاله
قطع الغيار معمره وسعرها معقول جدا مقارنه بعمرها الافتراضى الطويل أنا بتكلم عن القطع الاصليه
المقاسات والابعاد لجميع الموديلات من 94 ل 2002 واحده تقريباً
الصيانه طبعا الافضل يكون متخصص فولكس عشان يكون حافظ العربيه واماكن الصنيعيه ومحلات قطع الغيار ومراكز الخدمه موجوده بالموضوع المثبت

http://www.nilemotors.net/Nile/365862-a.html

اسعار قطع الغيار موجوده برضو بالموضوع المثبت تقدر تتصفحه وتاخد فكره ولاتنسى ان الاصلى معمر جدا

http://www.nilemotors.net/Nile/341028-a.html

ونتا راكب السيات عموماًً لازم تعرف ان أنتا راكب vw بس بعلامه مختلفه وثوب مختلف فقط وبنص الثمن أن جاز التعبير
اى مشكله فيها اتنحفظت هنا لاعضاء القسم والحمد لله وليها 100 حل وحل

بالتوفيق أن شاء الله

[SYD]

وعليكم السلام ورحمة الله وبركاته

في البداية أحب أرحب بيك في قسم سيات نايل موتورز

طبعاً كريم اتكلم مع حضرتك في الأسعار
وفعلا الأبيزا 94 هتلاقيها اخر ال20ـات ولحد 35
أما ال98-99 فهتلاقيها بتبدأ من 32 لحد ال40

للأسف الشديد الوكيل مانزلش اي سيات ابيزا في الفترة بين 95-97 وأكتفي انه نزل الأبيزا 94 علي ثلاث فئات (cl-clx-gl) تختلف في بعض الكماليات بينهم زي الزجاج الكهرباء والفوجات والسنتر والكوبيه واختلافات طفيفة جداً بينهم

ال98-99 نزل منها عربيات كاملة تحمل الرمز sxe ودي كانت تكييف وباور و4 زجاج ومرايات كهربائية وفرش قطيفة وفوجات ومفتاح بالريموت والأنذار

بالنسبة لقطع الغيار وأسعارها تقدر حضرتك تشوف اللينك دة تجارب الأعضاء مع قطع الغيار

قطع الغيار الحمدلله مازالت متوفرة جديد واستيراد بس للأسف الشديد الصيني مغرق السوق زيها زي اي عربية لكن بنعرف الحمدلله نتصرف في قطع غيار نظيفة من تجار معروفين وفي موضوع مثبت بالتجار واماكن الورش ومراكز الصيانة

الأبيزا عربيات اعتمادية جداً من حيث قلة الأعطال وسهولة تشخيصها وسهولة صيانتها وحتي اعطالها الشهيرة معروفة ومعروف علاجها وتكاد تكون عيوب هامشية تستطيع التعامل معها بمنتهي السهولة ولا تؤثر علي كفاءة السيارة ولا تعيبها

أما عن الفروقات بين الأبيزا 94 والأبيزا 98 فموجودة بالتفصيل في الموضوع دة الفرق بين ابيزا 94 وابيزا 98 بالصور والشرح


لو في اي شئ الموضوعات لم تغطيه فانا تحت أمرك في اي استفسار بخصوص الأبيزا

تحياتي وكل عام وانتم بخير

[SYD]

بالنسبة للعيوب الشائعة في الأبيزا 94-98 تقدر حضرتك تتعرف عليهم من خلال الموضوع اللي في الرابط دة

http://www.nilemotors.net/Nile/374068-94-98-a.html#post3875140123

تحياتي

[mohammad isdf]

والله رأيى انك تجيب حاجه كورى او يابانى يكون فيها تكييف وباور وقطع غيارها متوفره وحنينه .. والراى ده ربما يفاجئ كتير من اصحابى فى المنتدى !!

[Karim Ibiza]

والله رأيى انك تجيب حاجه كورى او يابانى يكون فيها تكييف وباور وقطع غيارها متوفره وحنينه .. والراى ده ربما يفاجئ كتير من اصحابى فى المنتدى !!

ليه كده بس يا محمد باشا؟؟ انا متابع مواضيع عربيتك وعارف انها اليومين اللى فاتوا مديالك ضهرها شوية بس مش معنى كده انك تكرهها لأن مفيش عربية مفيهاش مشاكل سواء كانت اوروبى او اسيوى او امريكانى
الكورى أعطاله أقل انا معاك لكن الفرق فى الركوبة والعمر الافتراضى للقطعة والجودة بتاعتها والامان وده مش هتعرفه إلا لو امتلكت عربية كورى وساعتها هتعرف الفرق

بدون استثناء, كل اصدقائنا اللى كان معاهم سيات وباعوها وجابوا كورى ويابانى بيندموا على الخطوة دى لأنهم عرفوا الفرق

[hossamalsadik]

فعلا على زى مقال كريم بيه الكورى قطع غيار رخيصه وصيانه فى كل مكان
لاكن الاعتماديه وبالحسبه هتلاقى ان الجوده فى الصناعه بتوفر اكتر
هتقلى اذاى السوق منتشر فى قطع غيار صينى ومضروبه احياناً وكده هقلك فى جديد اصلى وجوده عاليه ولو غالى شويه فاالإستيراد موجود
ممكن يكون بيقبلنا مشاكل فى ورش الصيانه والصنايعيه ديه المشكله الأكبر الى بنحلها بكتابة تجاربنا وبنقول الافضل فيها
وكمان بنحلها بأن بنكتب تقارير عن تجارب الصيانه مثل جبنا منين قطعة الغيار وسعرها وأنوعها المختلفه وايهم افضل وتركبت أزاى وعند مين من الورش والصنايعيه وبعدين بنقول أنطبعنا النهائى عشان يسهل علينا موضوع الصيانه
طيب الى ما بيقدرش يستوعب ويفهم عملية الصيانه من النحيه الفنيه بيبقى عنده داتا معلومات عن الورش الافضل واماكن قطع الغيار ومتوسط سعرها والتكلفه العامه الى يقدر بيها يقف فى مشكلته ويعرف هيعمل ايه بالظبط

والمشاكل مش هتنتهى فى العربيه بتغيرها الى كورى او صينى مع كامل الاحترام لمالكيها كله معرض للمشاكل

[SYD]

والله رأيى انك تجيب حاجه كورى او يابانى يكون فيها تكييف وباور وقطع غيارها متوفره وحنينه .. والراى ده ربما يفاجئ كتير من اصحابى فى المنتدى !!

كدة يا أ/ محمد
دة كلام بردو ؟؟؟

بص انا امبارح عملت حركة كنت حاطط ايدي علي قلبي وانا بعملها بس ثقتي في أتقان الصناعة الأوروبي شجعني وخلاني اقدم عليها بقلب جامد

كنت بغسل العربية كعادتي كل كام جمعة
بس امبارح بالذات قررت أني اغسل فرش الأبواب لأنه كان معبي تراب وشكله مش عاجبني والفيبر الأسود كان لونه بهتان
المهم
دعكته بالصابون وغرقته مايه
وفتحت الأبواب الأربعة ومسكت الخرطوم وغسلت الأبواب بالخرطوم والقوايم والكرتيرات لدرجة المياة كانت بتدخل عند الدواسات
كل دة ماهمنيش
وكان كل خوفي ان السنتر او الأنذار او أنوار الأبواب تعلق وماتشتغلش تاني
لكن بفضل الله اولاً - ثم بفضل التقفيل الجيد والعزل المتقن للأسلاك والفيش منع اي نقطة ماية تدخل وتعلق اي شئ في المنظومة الكهربائية للأبواب
قيس علي كدة حاجات كتير اوي في عربياتنا معمولة بإتقان اعتقد مش هتلاقيه في الأسيوي عموماً والكوري خصوصاً

انت عارف وقولنا الكلام دة اكتر من مرة في اكتر من موضوع
مشاكل الكهرباء في الأوروبي من أسوء انواع المشاكل والعربية كلها روحها في الكهرباء
وللأسف الشديد انت مشكلتك جاية في الدينمو والتكييف ودي مشاكل رخمة ومش هتتحل غير بأنك تهد وتعملها من اول وجديد علي رواقة
روح لمصطفي في الصحفيين وهو هيظبطلك الدنيا كلها ان شاء الله

مشاركتي مش خروج عن مسار الموضوع الرئيسي لصاحب الموضوع ولكنها تعريف بسيط واستكمال لكلامنا عن اعتمادية السيات ابيزا

تحياتي للجميع

[exelence]

الأخوة الزملاء مفيش حد فى مدينة نصر متخصص فى السيات إبيزا او اى حد من الزملاء ساكن قريب اصل انا رايح بكره ان شاء الله ابص على واحده 94 و انا ابيض تماما" فى العربية و عاوز حد يشوفهالى او حتى يقولى رأى مبدأى كده قبل ما نكشف و نرفع و الكلام ده.

[ViLMoS]

الأخوة الزملاء مفيش حد فى مدينة نصر متخصص فى السيات إبيزا او اى حد من الزملاء ساكن قريب اصل انا رايح بكره ان شاء الله ابص على واحده 94 و انا ابيض تماما" فى العربية و عاوز حد يشوفهالى او حتى يقولى رأى مبدأى كده قبل ما نكشف و نرفع و الكلام ده.

فيه مركز خلف سوق السيارات اسمه الشركة المصرية لفحص وتقييم السيارات تقدر تروحله وهو هيقلب العربية حتة حتة

[exelence]

متشكر جدا" لردك انا رحت بصيت عليها لوحدى

[mohammad isdf]

يا اصحابى متزعلوش منى بس فعلا انا حاسس انى تعبت العربية انا بكرمها ومش مأخر عنها حاجه ودى مشكلتى ان لو فى زنه فى العربية اجرى واصلحها واكتر حاجه تعبانى نفسيا موضوع الوقت والمصاريف، والمشكلة ان كل حاجه ورا بعضها

طقم دبرياج وفتيس وشغل عفشه ويطلع شغل العفشة بايظ واروح اعمله تانى والاقى الدينمو بيموت واجيب واحد ويطلع ادائه مش ممتاز ولكنه جيد وبعديها اعمل حادثه وادفع 700ج وفجأة الاقى السنتر معلق وفيه مشكله واقعد افك الباب وموصلتش لحاجه وفصلته وريحت دماغى، ألاقى القفل بتاع الكبوت مبيقفلش لأن السدر متاكل فالقفل بينزل مع الكبوت ومضطر اعمله عند سمكرى
ده غير الصيانة الدورية زى ظبط الزوايا والترصيص و.. والمشكلة ان الحاجات دى فى عربياتنا مينفعش تتساب

سيبكم منى، انتو لو بسيطو فى القسم بتاعنا هتلاقى ان كتير الموتور بتاعه قفش وناس تانية عايزين شنبر، زى م.محمد سيد مع انه كارم العربية جدا جدا ومش مأخر عنها حاجه، وعندنا شوية مشاكل كتير جدا بتظهر فأجاة ومعانا كلنا

انا دلوقتى مواجهانى مشكلة ان العربية بتبرجل ع السلانسية الار بى ام واطى جدا واحيانا بيبقى كويس ودى ممكن تبقى ظيط كهربا غير موضوع الكبوت ده والله المستعان

انا مش بشتكى قدرى حاشا وكلا، ولكن انا بقول عشان الزميل اللى بيشترى يبقى عارف ان مفيش حد هيبيع عربية مريحاه ومقضيه كل رغباته .. فيبقى واخد حذره ويبقى عارف انه هيدفع فلوس عشان تتظبط معاه

[hossamalsadik]

اخى الكريم محمد بك
أنتا عندك مشكلتين وبينين وهما نفس المشاكل الى ممكن تلاقيها فى اى شيىء من أحتياجات حياتنا مش من العربيات بس
دلوقتى انا عاوز اركب صح والعربيه فيها مشاكل
- يبقى أجهزلها مبلغ محترم معقول كميزانيه ( وربنا يقوينا كلنا )
- اجهز مكان محترم فيه صنيعى محترم عشان الشغل ( الصنيعى يبقى عارف الشغل تمام بجانب نوعية قطع الغيار التوب فين ومنين وبكام تقريبا عشان يريحنى شويه وطبعا زى ماقلت سلفا ً أن أحنا بنساعده بالمعلومات الى متعليمنها )

بعد كده وبعد معمل العربيه ووقفها على ريجليها ابدا فى الصيانه الدوريه بشكل منتظم ( وربك الستار )

كده أخد راحة دماغ وراحه بدنيه من المجهود واستمتع
غير كده الموصلات أحسن
وأى عربيه هشتريها او هى عندى فى الاصل ومن اى ماركه لو ماتبعتش نفس الفكر ده هتعب اكيد

جه على بالى دلوقتى احد الاعضاء القدامى ربنا يرجعه للقسم بالسلامه ( صلاح بك ) رغم انى معرفوش بشكل شخصى غير من القسم كان أرائه تقريبا نفس كده واحياً كانت الناس بتزعل من اسلوبه بس لا يصح غير الصحيح فى نهاية الامر

والمواتير الى كانت بتقفش ديه مكنش السبب عيوب فى المواتير الفولكس اطلاقا ً
السبب اما قطعة غيار اتركبت غلط بدون ضمير لا فى صنعه او صناعتها نفسها زى مثلا موضوع فلتر الزيت بتاعى والحمد لله على كل حال
ماتور م/ محمد مثلا هتلاقيه ماشى كتييير جدا وشيله بدون كلل أو ملل وكتر الف خيره ولو مكنش بيعمله الصيانه او كان ماتور تانى غير مواتير فولكس كان فيص من زمااااااان وللعلم او ده راى شخصى افضل من قاموا بصناعة الحديد أعتقد الالمان فى العصر الحديث مايتضح من تسمية فرقهم الرياضيه واقترانها بلفظ الماكينه الالمانيه أعتراف من العالم بجودة وتميز صناعتهم فى مجال تطويع الحديد وصناعة مواتير منه
طبعا كل دوله او مركه هتلقيها متفوقه فى صناعه معينه مثلا الكوتش بأنواعه اليابان البلاستك فرنسا وهكذا

بالنسبه لمشكلتك فى الماتور روح لحد محترم يظبتلك البرجله ديه وهيا سهله لو الصنيعى ركز فيها
اما بالنسبه للعفشه روح لحد عنده عفشه وقطع غيار فى نفس الوقت او يجى يشترى معاك وتاخد افضل حاجه والسعر لو عالى طبعا بسيط مش هيخسر امام العمر الفتراضى

انا اتكلمت كتير اسف على الاطاله

[mohammad isdf]

تسلم إيديك يا مهندس حسام انا شاكر مشاركتك جدا ربنا يجازيك كل خير