افضل نص لتفريغه في كوردوبا

[the magice]

السلام عليكم ورحمة الله وبركاته
اعضاء القسم الكرام طبعا وحشتوني جدا وكل عام وانتم بخير بمناسبه شهر رمضان اعاده الله عليكم بالخير والبركات
كنت كتبت من فترة موضوع اني انوي بيع سيارتي ولكن الحمدلله لم اوفق في البيع و انا ان شاءالله متفائل من اللي حصل وبقول انه خير لان العربيه عمرها ما قلت معايا في حاجة فقررت اني اغيرلها نص كامل يعني موتور ب فتيس وكنترول وضفيره وتابلوه وطبعا عفشه وده لسببين اولا لتجديد العربيه وثانيا تكون حاجة معموله علي ايدي وعارف كل حاجة فيها ف من حوالي اسبوعين شوفت نص بولو عند ناجر استيراد 1400 سي سي بس مش عارف الموديل ايه ولا نوع الموتور ولما سألت علي سعره قالي 11000 السؤال بقي هل ده متوسط السعر فعلا وحاجه كمان ايه افضل نوع موتور ممكن يركب بدون نعديل طبعا انا قصدي النص بالكامل واسف ع الاطاله .

[Karim Ibiza]

وعليكم السلام ورحمة الله

ياباشا العربيات دى عشرية واصيلة ومش بتسيب صاحبها بسهولة حتى لو هو اللى عايز يسيبها

طالما ناوى تجيب نص يبقى هات نص فيه 1.4 2كامة او 1.6 عشان تحس بالفرق

البولو حاجتها كلها تركب عندك ماعدا البطاحات والاكسات والمقصات والقنطرة وغالبا الاسكترا كمان

حاول تشوف نص جولف 3 او 4 لو الميزانية تسمح او شوف نص ابيزا عشان تستفاد بكل حاجة فيه

واسأل عند كذا حد عشان تتأكد ان الاسعار معقولة

[the magice]

جولف 4 كويس والله انه ينفع بس طبعا هتكون زي البولو اجزاء العفشه اللي قولت عليها مش هتركب مش كده ع العموم هشوف اخبار الاسعار ايه بس في سؤال الفرق في الواحد كامة والاتنين في عدد الصمامات يعني ال8 فالف واحد كامه وال16 اتنين كامه ولا ممكن يبقى في واحد كامه 16 فالف

[Karim Ibiza]

الجولف 4 هتستفاد بحاجتها لأن ابعاد الحوض بتاعها نفس بتاع الابيزا لكن البولو اصغر شوية
الموتور الـ 1.4 16v والكود بتاعه aua مشهور هنا عندنا فى القسم بـ 1.4 2كامة وده 75 حصان

[hossamalsadik]

أنتا محتار ليه ماتجيب نص زى بتاعك أبيزا
ولو كنت هتعدل موديل يبقلى هاته 98-99
ولو عاوز ماتور أعلا هاته gti
هتستفاد بكل حاجه

[SYD]

اعمل زي كريم
هتلاقي تجربته في موضوع مثبت في قسم اهم الموضوعات

[the magice]

كده انا استقريت ان شاءالله على نص ابيزا 2000 عشان اقدر استفيد بكل حاجة واعدل الوش بالمرة
في سؤالين الاول هل في فروق كبيرة في الشكل بين ابيزا 99 و 2000 ولا الاتنين واحد
التاني حد عنده فكرة عن رنج السعر لان ماعتقدش ان ممكن حد يقولي اسعار في التليفون خصوصا اني هدخل فيه النص بتاعي ف لازم يكون وجها لوجه وانا مش هعرف انزل غير بعد العيد ان شاءالله

[windofchange]

من رأيي بعد غلاء البنزين نزل نص ايبيزا او كوردي موديل 2000 ل2002 يكون فيه الموتور ال1000 سي سي ال 75 حصان

[the magice]

بمناسبة غلاء اسعار البنزين كنت عايز اعرف ايه الفرق في استهلاك البنزين بين موتور 1400 2 كامه و 1600 1 كامه و قطع غياره متوفرة ولا لا لاني لاحظت انه قليل لما تلاقي موتور 1400 2 كامه والفرق قد ايه في القدرة بينهم

[the magice]

هو في موتور 1400 2 كامه بيخرج 100 حصان لو في ايه الكود بتاعه وققطع غياره متوفرة ولا لا

[ehab_mansour]

فيه موتور 1400 2 كامه 101 حصان و لكن انصحك متجبهوش رغم انه موتور رهيب و لكن قطع غياره قليله جدا و صيانته مقرفه لأن شبيه بالضبط شكلا و موضوعا للموتور اللي عندي في الكوردوبا 2002 1000 سيسي 16 فالف

خليك في المواتير المشهورة زي ال 1400 16 فالف 75 حصان كما قال الاخوه فوق او 1600 8 فالف 75 حصان ايضا
و للعلم محركات فولكس كلها الفرق بينها و بين بعضها في استهلاك البنزين مش كبير و كلها استهلاكها كويس جدا و افضل محرك في الاستهلاك هو ال1400 16 فالف بعد المحركات ال 1000 سيسي طبعا و دي وقائع محسوبه و مدونه في الكاتالوج عندي لو حابب تعرف ارقامها بالتفصيل قول

ممكن تشتري نص ابيزا افضل 100 مره من انك تشتري نص لأي عربية من مجموعه فولكس لأنك هتستفيد بكل حاجه و كل مافي النص هيركب عندك

ابيزا و كوردوبا من 94 حتي 2002 تركب مكان بعضيها كصاج و محركات و عفشات فقط محتاج مثلا لو اشتريت نص 2002 هتفك وش عربيتك و تربط التاني مكانه علي الشاسيه و معاه فوانيسه و الرفارف و كهرباء الحوض و كل حاجته هتبقي نقلت موديلها و لكن هيتبقي التابلوه و العدادات بضفيرتهم و الابواب برضه تركب مكان بعضها كصاج مع اختلافات في الفرش الداخلي و تثبيتاته و شكله و كهرباء الابواب و لكن كله يتعدل

يعني لو معاك عربية نصين كامله امامي و خلفي 2002 سهل جدا تفضيها علي عربيتك كلها و تقلبها تماما

و بالتوفيق للجميع

[the magice]

بس انا لما سألت علي نص ابيزا ملقيتش 2 كامه قالي لو عايز في موتور بس لكن نص على بعضه الموجود 1 كامه هو ال 2 كامه نزل في الكوردوبا بس منزلش في الابيزا ويا ريت تفاصيل اكتر عن استهلاك البنزين

[ehab_mansour]

من واقع كاتالوج عربيتي

المحرك ال 1000 سيسي 50 حصان استهلاكه باللتر لكل 100 كيلومتر :-
داخل المدينه 8.5 لتر خارج المدينه 5.3 لتر و المتوسط 6.5 لتر

المحرك 1400 سيسي 8 فالف 60 حصان :- 9.0 --- 5.5 --- 6.8

المحرك 1000 سيسي 16 فالف 70 حصان كما في عربيتي :- 8.9الي 9 ---5.5 الي 5.6 ----6.8 الي 6.9 و ده حسب عدد الابواب و الاعلي للاربع ابواب

المحرك 1400 16 فالف 75 حصان 128 نيوتن متر :- 8.6 --- 5.4 ---- 6.5 و ده افضل محركات الموديل ده مناسبه لقوته و استهلاكه

المحرك 1400 16 فالف 100 حصان :- 9.4 ---5.5 ---6.9

المحرك 1600 8 فالف 75 حصان عزم 135 نيوتن متر :- 10.1 ---- 5.7 ---- 7.3

المحرك 1600 تقريبا 8 فالف 100 حصان عزم 145 نيوتن متر :- 11 ---6.1 ---- 7.9

نفس المحرك السابق علي اوتوماتيك :- 11.8 --- 6.6 ---- 8.5

محرك 1800 سيسي 20 فالف :- 10.8 ---- 6.0 ---- 7.8

و بس ده كان اخر محرك بنزين و الباقي ديزل tdi

دي ارقام قياسيه ستاندرد و بتتحقق مع ناس كتير و انا حققتها مع محركين من قبل

و بالتوفيق للجميع

[hossamalsadik]

يعنى انا كده محركى مثالى الحرق الحمد لله
بس سيبك انتا المشاركه ديه جت فى وقتها بعد غلاء البنزين
والصراحه مختصره ومجمعه بدل ماهى منتوره فى القسم
تسلم ايدك

[the magice]

تسلم ايدك يا هندسة وواضح فعلا ان فرق الاستهلاك مش كبير وعموما كويس جدا انا كنت هدور علي ال 1400 اللي بيخرج 101 حصان عان احس بالفرق بس هو يعني الموتور اللي عند حضرتك تاعبك زيادة عن اللزوم في الصيانه وقطع الغيار ولا عادي ممكن التعايش معاه وبالنسبة لقطع الغيار نادرة ولما بلاقيها سعرها غالي ولا في المعقول برضه انا بالنسبة ليا عادي ممكن اتحمل عيب زي ده في مقابل اني اخد اداء قوي واستهلاك مثالي انا اصلا كده كده حاجة العربية عندي شحيحه الي حد ما ف مش هتفرق كتير .