ارجو المساعده في ابيزا 2000..2002

[mkhaled1984]

إن شاء الله استقريت علي ابيزا 2000..2002بس محتاج مساعده من خبراء الابيزا انا كونت بقارن بينها و بين فولكس بوينتر 2006 166cc بس إن شاء الله الابيزا احسن و اشيك بس انا خايف من قطع الغيار و يكون الماتور ضعيف 1000cc خصوصا اني من سكان المقطم يعني مطالع كتير و هل العربيه مشاكلها كتير ولا قليله ارجو الافاده و انا نفسي في عربيه مريحه عشان انا معايا فولكس بيتلز القديمه مطلعه عينى و نفسي في عرببيه فول ابشن و مريحه مشاكل قليله تستحمل شوارعنا انا عارف اني طولت اوى بس عايز اطمن منكو وشكراااا

[hossamalsadik]

بخصوص شرائك للعربيه ابيزا 2000-02 حضرتك كنت بعتلى رساله وانا رديت عليك فى هذا الخصوص بستفاضه
بخصوص ال الماتور 1000cc 8v كويس ومافيش مشكله منه فى التكييف طلما حالته كويسه ومش ضعيف اطلاقاً وعن تجربه ألا أذا كنت من هواة الجرى والشد فطبعا كده هتحتاج ماتور اكبر
فولكس بوينتر 2006 مشكلتها الوحيده قلة قطع غيار الصاج الخارجى فقط
بوجه عام لو أخترت عربيه كويسه وبتعملها الصيانه الدوريه بتعتها بانتظام وبتروح لورش الصيانه المحترمه الى فيها فنيين محترمين وفهمين شغلهم وبدقق فى شراء قطع الغيار الاصليه قدر المستطاع عمر ما العربيه هتزعلك

بالتوفيق ان شاء الله

[mkhaled1984]

الف شكر علي رد حضرتك بس لو العربيه متسقط لها ماتور 1400 فيها مشكله ولا عادي

[hossamalsadik]

عادى جدا لان قليل لما يكون فى ماتور 1000cc لسى بحالته ألا اذا
كان معمله تجديد شامل ( عمره كامله ) زى ماتورى كده وده الى محدش بيقبل عليه
والسبب أنك بتتكلف نفس المانور الاستيراد مع وقت اطول فى الشغل طبعا التسقيط مابيخدش غير ساعة زمن والغريبه بنفس تكلفة مصنعية العمره وعجبى
طبعا الماتور المتجدد افضل بكتير لان كل حاجه جديده المهم الصنيعى والخراط حتى لو مسح فقط الى اشتغلوا وكذلك قطع الغيار الاصلية ولو التلاته مش مضمونيين يبقى التسقيط احسن

واى استفسار اسأل

[mkhaled1984]

طيب بالنسبه للعفشه انا سمعت ان مشاكلها كتير و هي فيها فرامل abs و اكيد اي عربيه فيها عيوب او مشاكل ايه مشاكل العربيه ديه بشكل عام

[ehab_mansour]

عفشة العربيات دي بسيطه جدا جدا و لا تحتاج الي صيانة إلا في فترات متباعده شرط تركيب قطع غيار اصلية
المهم انك تشتري عربية نضيفة و سليمة و مش ملعوب فيها كتير هتتبسط جدا منها

[mkhaled1984]

طيب حضرتك تعرف مكانيكى كويس يشوفلي عربيه حاله كويسه عشان انا خايف من المواقع المكانيكى يكون احسن لو مضمون

[hossamalsadik]

المهندس ايهاب جزاه الله خيرا اختصرلك المفيد فى كلمتين بخصوص العفشه والعربيه كده عمتا
بالنسبه للميكانيكى أغلبنا مابيحبش يحدد ميكانيكى بعينه بيقول تجاربه مع الميكانيكى الفلانى
ولى عاوز يرحله يرحله بناء على الثقه فى كلام المتحدث وخبرته وكمان أبعاد الشبهات للاعلان عن حد بعينه
شوف لنك موضوع اماكن ورش الصيانه وتجارب الاعضاء معاها وأختار الاقرب ليك
http://www.nilemotors.net/Nile/365862-a.html