مقبل على شراء سيات توليدو 2014

[m_mostafa4]

السلام عليكم يا احلى منتدى

انا جيت هنا اخد رأيكم فى شراء سيات توليدو 2014 بس خايف من قصة قطع الغيار و عدم أنتشار العربية او بمعنى اصح انا ما بشوفهاش اساسا فى شوارع القاهرة و خصوصا بقى انى راكب دلوقتى فيرنا اللى بتلاقيها فى الشارع اكتر من عمدان النور و قطع غيارها موجودة فى كل حتة حتى عند البقالين ... يا ريت لو حد فيكم يقدر ينصحنى و يا سلام لو كان حد من الأساتذة سبعاوى او كريم منير

[ibizaman]

عربيه ومحترمه جداااااااااا
وقطع غيارها هيه هيه رابيد وموديلات كتير ف فولكس
والفوانيس وحجات البادي اكيد موجوده ف التوكيل زي باقي الموديلات الجديده

[m_mostafa4]

شكرا يا باشا على أهتمامك و هيه فعلا عربية محترمة و كفاية انها المانى و من عائلة فولكس فاجن

[SYD]

العربية لا غبار عليها
مكنة وفتيس مش جداد علينا ومتجربين لألاف الكيلومترات
اي عربية موديل السنة يمكن تلاقي قطع غيارها قليلة شوية في التوكيل وبالكتير هتلاقيه بيجيب قطع غيار الصيانات زي الفلاتر والتيل وخلافه وبعد سنة بالكتير بتلاقي كل حاجة في التوكيل وبرة التوكيل
كلامي علي موديل السنة بوجه عام سواء سيات او غيرها

تحياتي وربنا يوفقك

[m_mostafa4]

شكرا ليكم يا جماعة انا رحت شوفت العربية مرتين مرة فى اوتو ميشو و مرة فى التوكيل و حاجز تست دريف ليها بس لسه هيرودوا عليا عشان تحديد الميعاد و فعلا العربية ممتازة

[ibizaman]

متبخلش علينا بقي باي تفاصيل
ومبروك مقدما ان شاء الله

[m_mostafa4]

أكيد ان شاء الله لو فيه جديد هبلغكم على طووووووول

[m_mostafa4]

أكيد ان شاء الله لو فيه جديد هبلغكم على طووووووول

[ehab_mansour]

السلام عليكم

يا افندم انت بتقول فيرنا ؟؟؟؟ مع احترامي ليها و لملاكها و لكن لا وجه مقارنه و لا حتي مع موديلات سيات القديمة لني ركبت الاتنين
ميزة التوليدو انها نازلة بمحرك و فتيس شغالين في الشارع بقالهم خمس سنوات او اكثر في عربيات فولكس فسهل جدا تلاقي كل قطع غيار الصيانات العادية و ما شابه ذلك

مشكلتك هتكون مع الصاج و دي لا قدر الله لو حصلت في الحوادث بتكون مشكلة في اي عربية جديدة او قديمة الماني او اوروبي او حتي المغربي
فلا تقلق ان شاء الله
انا جنبي في اكتوبر سيات توليدو في الشارع بتاعي

[m_mostafa4]

شكرا يا باشمهندس ايهاب على أهتمامك .. و انا متأكد انها اكيد تفوق الفيرنا و لا يوجد وجه مقارنة بس انا كان قصدى انى لما بحتاج قطعة غيار للفيرنا بلاقيها فى كل حتة و بسهولة فهل هذا سينطبق على التوليدو و لا هتعذب عشان الاقى قطع غيارها و برضه هل لما اجى ابيعها بعد خمس سنين هخسر فيها كتير و لا هتكون الخسارة المنطقية

[hossamalsadik]

كل عربيه وليها نسها والاروبى والالمانى والسيات خاصة ليها نسها الى هيشتروها بالسعر الى انتا عرضه
وعملية البيع والشراء ديه ارزاق
لاكن لو دورنا على منطق يحكمنا فى الموضوع ده ويكون المرجح او توقعات خاصة للسوق المصرى الجميل ومعظم الفكر السائد فيه والمليء بالأشاعات عن عيوب لبعض السيارات وهى فى الاصل غير موجوده ولاتمت بالواقع بصله وعكسها احياناً هوا الصحيح
نقدر نقول أن اعادة البيع لعربيات سيات ضعيف نسبيا مقارنه بالكورى مثلا
والبتالى توقع خساره ده شيىء طبيعى وتزيد كلما كان المراد اتمام البيع فى اقرب وقت لان الطلب قليل

أتمنى تكون فكرتى وصلت

[m_mostafa4]

الفكرة وصلت يا باشا و متشكرين على مجهودك .. و انا مقتنع بكل كلمة انت كتبتها

[shockoprinz]

السلام عليكم اخي العزيز
أنا من ملاك التوليدو منذ ثلاثة اشهر العربية بوجة عام ممتازة وبردوا ليه ملاحظات عليها أولها صوت الماتور عالي وده السائد في الألماني مش ناعم زي الياباني أو حتي الكوري ثانيا جلد الأبواب بيزيق وانا ماشي سلانسيه في اي طريق غير ممهد ودي مشكلة قدرت أتغلب عليها والحمدلله برش الجلد بمنظف التابلوه ماركة سونكس ثالثا وده اهم نقطة العزل تعبان جدا بسمع صوت الماتور والكاوتش داخل الصالون . انا مش قادر احكم علي التكييف لأن الجو اليومين دول زي الزفت وعربيتي لونها اسود ومع أني مفيم الأربع أبواب ألترا دارك بلاك بس العربية بتبقي نار والتكييف بيقاسي علي ميغير درجة الحرارة . العربية كماتور وفتيس في الجري والشد أخر حلاوة بحس أني راكب ثور وده يمكن لأنوزن العربية بالنسبة لعزم الماتور مش كبير . بالنسب للصاج بحس انه محمل عن الكوري وده بيبان معايا مثلا في غطا الشنطة . بالنسبة للثبات العربية عالية من ورا مع العلم ان عربيتي فيها جنط 15 بس بحس أن العربية في الملفات لازم تبقي سرعتها مش عالية لأن بحس انها بتميل وده طبعا لعدم وجود خاصية esp وانا لاحظت الفرق ده لما ركبت الأوبل . بالنسبة لأنتشار العربية مش عايز اقولك بحس وانا راكبها من نظرة الناس أن أنا من المشاهير أو كأنهم شيفين عربية من كوكب المريخ وده سببه انهم بيتفاجأوا لما بيشوفوا العربية وبيحاولوا يحلوا اللغز اللي هو ايه دي أنا مقيم في البحر الأحمر وعايز أقولك أن المحافظة كلها مفيهاش غير اتنين واحده بلاك بتاعة العبد الفقير لله وواحدة تانية سيلفر ولما بقابل صاحبها في الشارع ببقي عايز أخده بالحضن واقولة يارافع معنوياتي . أنا نزلت القاهرة ولفيت لف السنين في مدين نصر ، مصر الجديدة ، التجمع ،الخامس، الدائري إني أشوف واحدة في الشارع محصلش وده أن يدل علي شيئ فهو يدل علي ان التوجه العام للسوق هو الكوري وده معناه أن أعادة البيع هتبقي عملية مؤلمة أنا عموما مقتنع بالعربية بالرغم من الملاحظات التي زكرت سلفا ومش هفكر أبيعها طول ماهي مريحاني وانت كمقبل علي الشراء لازم تفكر كويس انت ناوي تبيع بعد وقت قريب ولا علي المدي البعيد وشكرا وبالتوفيق إن شاء الله

[eraser]

السلام عليكم يا احلى منتدى

انا جيت هنا اخد رأيكم فى شراء سيات توليدو 2014 بس خايف من قصة قطع الغيار و عدم أنتشار العربية او بمعنى اصح انا ما بشوفهاش اساسا فى شوارع القاهرة و خصوصا بقى انى راكب دلوقتى فيرنا اللى بتلاقيها فى الشارع اكتر من عمدان النور و قطع غيارها موجودة فى كل حتة حتى عند البقالين ... يا ريت لو حد فيكم يقدر ينصحنى و يا سلام لو كان حد من الأساتذة سبعاوى او كريم منير

قطع الغيار موجودة فى التوكيل
التوكيل محترم بس غالى
اعتقد هيكون معظم قطع الغيار الاستهلاكية موجودة بره التوكيل عشان العربية مش تكنولوجى جديدة دى متشابهة مع عربيات تانية بقالها فترة

العربية تستاهل تمنها وزيادة وهتنبسط لو بتدور عالامان والثبات وعايز عربية تعيش معاك فترة

[Karim Ibiza]

السلام عليكم اخي العزيز
أنا من ملاك التوليدو منذ ثلاثة اشهر العربية بوجة عام ممتازة وبردوا ليه ملاحظات عليها أولها صوت الماتور عالي وده السائد في الألماني مش ناعم زي الياباني أو حتي الكوري ثانيا جلد الأبواب بيزيق وانا ماشي سلانسيه في اي طريق غير ممهد ودي مشكلة قدرت أتغلب عليها والحمدلله برش الجلد بمنظف التابلوه ماركة سونكس ثالثا وده اهم نقطة العزل تعبان جدا بسمع صوت الماتور والكاوتش داخل الصالون . انا مش قادر احكم علي التكييف لأن الجو اليومين دول زي الزفت وعربيتي لونها اسود ومع أني مفيم الأربع أبواب ألترا دارك بلاك بس العربية بتبقي نار والتكييف بيقاسي علي ميغير درجة الحرارة . العربية كماتور وفتيس في الجري والشد أخر حلاوة بحس أني راكب ثور وده يمكن لأنوزن العربية بالنسبة لعزم الماتور مش كبير . بالنسب للصاج بحس انه محمل عن الكوري وده بيبان معايا مثلا في غطا الشنطة . بالنسبة للثبات العربية عالية من ورا مع العلم ان عربيتي فيها جنط 15 بس بحس أن العربية في الملفات لازم تبقي سرعتها مش عالية لأن بحس انها بتميل وده طبعا لعدم وجود خاصية esp وانا لاحظت الفرق ده لما ركبت الأوبل . بالنسبة لأنتشار العربية مش عايز اقولك بحس وانا راكبها من نظرة الناس أن أنا من المشاهير أو كأنهم شيفين عربية من كوكب المريخ وده سببه انهم بيتفاجأوا لما بيشوفوا العربية وبيحاولوا يحلوا اللغز اللي هو ايه دي أنا مقيم في البحر الأحمر وعايز أقولك أن المحافظة كلها مفيهاش غير اتنين واحده بلاك بتاعة العبد الفقير لله وواحدة تانية سيلفر ولما بقابل صاحبها في الشارع ببقي عايز أخده بالحضن واقولة يارافع معنوياتي . أنا نزلت القاهرة ولفيت لف السنين في مدين نصر ، مصر الجديدة ، التجمع ،الخامس، الدائري إني أشوف واحدة في الشارع محصلش وده أن يدل علي شيئ فهو يدل علي ان التوجه العام للسوق هو الكوري وده معناه أن أعادة البيع هتبقي عملية مؤلمة أنا عموما مقتنع بالعربية بالرغم من الملاحظات التي زكرت سلفا ومش هفكر أبيعها طول ماهي مريحاني وانت كمقبل علي الشراء لازم تفكر كويس انت ناوي تبيع بعد وقت قريب ولا علي المدي البعيد وشكرا وبالتوفيق إن شاء الله

مبروك عليك العربية

بس ليا تعليق على كام حاجة

الفاميه اللى مركبه هو اللى بيخلى التكييف يعانى لغاية ما يوصل لدرجة الحرارة اللى انت عايزها وده لأنه بيحجب الضوء لكن بيحبس الحرارة جوة العربية

الميل فى الملفات ملهوش علاقة بالـ esp لكن ليه علاقة بطريقة دخلتك الملف
الـ esp بيمنع ان العربية تعوم لكن مش بيمنعها انها تميل

صوت الكاوتش دى حاجة مقصودة فى الألمانى عشان يحسسك بالطريق والسرعة اللى ماشى بيها وبتبقى 5%

صوت الموتور ده طبيعى لغاية ما تخلص تليين ولغاية ما تغير اول غيار زيت هتلاقى الموتور صوته بقى هادى