قربت اوصل للمشكله اللى مطلعه عينى فين بالظبط !!!

[mohamedibeza]

كان عندى مشكله فى كهربا العربيه ...البطاريه كانت بتعد يومين ونص وتنام ولما بروح للكهربائى يقولى الدينامو بيشحن كويس والبطاريه مشحونه .....دلوقتى انا كل يوم لما بركن بشيل كبل البطاريه وبقالى دلوقتى اربع ايام البطاريه مبتنمش ...!!!!!!! يبقى المشكله فين بالظبط مع العلم ان السنتر الداخلى بتاع العربيه عطلان بقاله 3 ايام !!!!!!

[hugan]

كابل ارضي بيهرب

[م أحمد]

شوف فيوز السنتر ممكن تلاقيه سايح و السلك الموجب ملامس للارضى
او السلك الموجب ملامس للارضى فقط

[mohamedibeza]

اكيد ياهندسه !!! مش البطاريه .........معلش عندى سؤال ايه الاسباب اللى تخلى الكبل الارضى يهرب

[mohamedibeza]

شوف فيوز السنتر ممكن تلاقيه سايح و السلك الموجب ملامس للارضى
او السلك الموجب ملامس للارضى فقط

ده سبب من الاسباب ...لان سحب العربيه على الاول بقى حلو من ساعه ما السنتر عطل والعربيه مبقتش تنتش وبالزات فى الاول !!

[Mamoud salah H]

كابل لبلرضي فيه مشكلة
كانت عندي نفس القصة دي وعملت اعادة تأهيل للارضي وظبطط الحمد لله

[Abo_Mazen]

إمممم ..كده في تهريب كهربا عندك ...ممكن يكون كاسيت ما بيفصلش ..ممكن يكون لمبه مسريه ومش مطفيه ..هي عموما حاجه عبيطه قوي مش بتفصل وهي اللي بتاكل البطاريه ..مع إحترامي لرأي الساده الأعضاء ..متهيألي الموضوع أتفه من إنه تكون حاجه عامله قافله أو ملمسه

[Ahmed_Gallant]

اول حاجه تتاكد من المشكله ودى المرحله الاولى
هات لمبه صغيره اسمها لمبه تجربه امبير واطى وطلع منها سلكين و بعدين اقفل عربيك كويس زجاج وبيبان وبالمفتاح وانت فاتح الكبوت هتشيل كابل الارضى وتخلى لمبه التجربه بين كابل الارضى وقطب السالب بتاع البطاريه المفروض اللمبه متنورشى او تدى سريه خفيفه وتطفى ده فى حاله انها تمام طب لو نورت يبقى انت حطيت ايدك على المشكله تروح ناقل على المرحله التانيه وهى الحل
لو عربيتك فيها فيوزات عند المكنه يبقى هتشيل فيوز فيوز وتركبه تانى لحد ما اللمبه تطفى لو اللمبه وانت بتشيل فيوز نورها قل للنص خلى الفيوز بره واحفظ مكانه وكمل تست لان من ممكن وده نادرا ان التهريب يكون من فيوزين
نطول بقى سلك اللمبه وندخل جوه العربيه لازم تكون قافل الباب عليك وتبدا تعيد العمليه تانى فى الفيوزات الداخليه واول ما توصل للفيوز اللى بيخلى اللمبه تطفى تشوف وظيفته على علبه الفيوزات وتخلى كهربائى محترم يراجع عليه وعقبال ما تروح لكهربائى تشيل الفيوز ارحم ما تشيل الكابل كله
ملاحظات
1- متشغلشى اى حاجه امبيرها عالى وانت موصل لمبه التجربه لحسن السلك يتحرق
2- يفضل يكون معاك حد وانت بتجرب من جوه العربيه عشان لو فتحت الباب وانت موصل اللمبه ونور الصالون نور هتبوظ السلك
3- يفضل القياس عن طريق الافوميتر لتحديد مقدار الفولت المستهلك للوصل لكميه الفاقد بدقه فى حاله الافوميترهتوصل طرف على سلك الارضى وطرف على قطب البطاريه السالب
4- خد بالك من الاسلاك العريانه وامن اسلاك اللمبه كويس
5- خلى شغلك كله على سلك الارضى بس امن مكانه بالله عليك تجنبا لحدوث قفله
دمتم بود