تجربتي مع ورشه عباد الرحمن (أيمن جولف) الحــرامي والنصــــــاب

[Superbadr]

تجربتي مع ورشه عباد الرحمن (أيمن جولف) الحــرامي والنصــــــاب

الموضوع ده يخص كل الي عندهم عربيات الماني خاصه السيات والجولف والأسكودا

في البدايه احب أقول لكل الموجودين كل سنه وانتو طيبين بمناسبة عيد الأضحى المبارك ويعودوا عليكم الأيام بالخير واليمن والبركات

وأعرفكم بنفسي انا محمد بدر وعندي عربية سيات ابيزا 2001

من شهرين تقريباً وبالتحديد بعد عيد الفطر المبارك قررت اني أشد عربيتي ...فنزلت عشان اسال عن قطع الغيار وأسعارها سواء جديد او قديم مع العلم ان المطلوب شراؤا كالتالي

2 رفرف و 2 فانوس و أكصدام امامي بالكامل بشبكته بالعلامه بالفوجات والكسحات و أكصدام خلفي

متستغربش بقالي سنه محطتش ايدي فيها ولسه التقيل جاي ورا

المهم بعد اللف والبحث في الجديد والأستيراد وفي نفس الوقت بالمرة البحث عن سمكري ودوكو كويس

لاقيت أيمن جولف الي فاتح ورشه عباد الرحمن الموجوده الشيشيني في ش اللبيني المريوطية فيصل وهو معروف جداً على فكرة

وكان اساساً سمكري وعندوا ورشه سمكره ودوكو

ولأسباب كتير أهمها انوا جنب البيت قررت أشتغل معاه

المهم لاقيتوا قالي الحاجات دي هتخشلها في 2200 جنيه قولت بيني وبين نفسي "مش معقول " السعر انا شايفوا كويس بالنسبة لأسعار الحرفيين

وكمان قالي انا عندي ورشه السمكرة بتاعتي والدوكو وكل حاجه من الأبرة للصاروخ وانا الي هسلمك العربية عالمفتاح

وأتفقت مع الصنايعيه بتوعوا على سعر السمكرة والدوكو 1300 سمكرة و1700 دوكو قولت توكلنا على الله

اول ما ابتدى شغل قالي الكابوت بتاعك مش نافع _مع اني متأكد انو نافع _بس قولت ماشي قالي وكمان الصدر عايز يتغير قولت مش مشكله عشان نظبط الشغل

كام كده يا عم أيمن قالي 3000 جنيه قولت ماشي لحد دلوقتي الكلام معقول

ندخل عالسمكره أولاً السمكري بتاعوا اسموا رضا _مقولوكوش شخصيه متقلعهاش من جزمتك_

بخلاف المواعيد الي زي الزفت وأنوا خلص العربية في اسبوعين مع العلم انوا في البدايه قالي 4 أيام انوا كمان شغلوا زي الزفت وقليل الذوق جداً

أول يوم روحت عشان أبص عالعربية لاقيتوا ركب الرفرفين والكابوت والصدر قولت تمام

ببص عالصدر لاقيتوا مضروب خمسين بنطه لحام والكابوت متني ومتنيل قولت لرضا ايه الكلام ده قالي هما سلمهولي كده روحت لأيمن قوتلوا غيرلي الصدر والكابوت ده وبعد شد وجذب اصريت اني انقي الحاجه بنفسي وأخدتهم للسمكري يركبهم

وده ان كان يدل على شيء يدل ان مفيش ضمير نهائي يعني لو سلمتلهم رقبتك هيدبحوك ويتسلو عليك _لازم تكون مفتح يا برنس_ طبعاَ رضا طلع ميتين اهلي على بال مخلص شغل السمكرة البسيط الي في العربية بس خلصنا

تاني خازوق بقه وانا بستلم الفوانيس والفوجات عشان اسلمهم للسمكري رضا لاقيت فانوس فيهم الضوافر بتاعتوا متكسرة ومتركب ضوافر عموله والفوجات مفيهاش ضوافر من اساسوا _الضوافر هي الجزء الي بتربط فيها المسامير _ رجعتلوا قولتلوا ايه ده ياعم الحج قالي متقلقكش الواد رضا هيظبطهملك ومفيش حاجه هتبان نهائي وهيبانوا جدااااد ولو منفعوش هجيبلك غيرهم

قولت ماشي ايه الكلام يا عم رضا : ياباشا متقلقش نهائي كلوا في السليم .......ماااااااااااااشي

استلمت العربية كالتالي الرفارف فارقه واحد نازل على واسع والتاني نازل على ضيق و الفوانيس واحد صاحي والتاني نايم و الفوجات مركبتش اساسا و الكارتيرات ضايعه وخبطه في القائم الخارجي للباب متعدلتش٫٫٫ طبعاً ده غير الحاجات الي المفروض هتتظبط بعد الرش زي الكوالين وفرش الأبواب والمرايات وخلافه وقالي كل ده هيتظبط في الفنش بعد الدوكو يا باشا

قولت ماااااااااااااااااشي

نخش عالدوكو بصراحه بتاع الدوكو اسموا سيد افضلهم الي حد ما اي نعم هو طلع ميتيني برضوا في المواعيد هو كمان والحساب زود 300 جنيه عالأتفاق لكن شغلوا نضيف الى حد ما

استلمت العربية من الدوكو روحت لرضا انجزلي بقه الحاجات الناقصه في العربية بقه قالي حاضر بكره وبكره يجيب بعدوا ويسافر البلد ويرجع ويوم يجر التاني

رجعت لأيمن قالي سيبك منوا ده واد ابن كذا وكذا هو فاضلوا اد في حسابوا قولتلوا 300 جنيه قالي هاتهم وانا هقفلك العربيه واجيبلك كارتيرات بدل الي ضاعت قولتلوا امين يا معلم...راح نده اخوه احمد _الي ميفرقش عن رضا ميتقلعش من جزمتك_ وقالوا قفل العربية والأستاذ هيديك الشاي بتاعك قالوا ماشي وفعلاً اديتوا 100 فوق المبلغ

يجي احمد بقه يقفل العربية الاقيه يقولي مليش دعوه بالفوانيس والفوجات والكارتيرات مش موجوده عندنا اساسا ده غير انوا كسرلي زرار كهربا المرايات ومركبش المرايات من اساساً

طب ازاي يا عم الحاج امال انت واخد 400 جنيه ليه قالي ارجع لرضا يظبطهملك

طبعاَ انا مش هرجع لرضا روحت لأيمن قالي تعالى بكره وبعدوا وهكذا

المهم عدى اسبوع ورا التاني والراجل بقه بيتهرب مني وميردش عليا ولما يرد يقولي انا مش في الورشه

زهقت وطبيت عليه وقولتلوا ركبلي الحاجات حالاً قالي بكره قولتلوا مش فاضي قالي خلاص يبقه بعد العيد قولتلوا لأ فوجاتك عندك و الكارتيرات ماخدتهاش والمرايات ركبتها بره وأشتريت الزرار بتاعها ب150 جنيه من بره و الفانوس ميلزمنيش يأما تديني حقهم اجيبهم جديد يأما تديني حاجه مكانهم قالي ولا اعرفك و أعلى ما فخيلك اركبوا

طب ازاي كده دانت كده ناصب عليا في اكتر من 1000 جنيه تمن 1 فانوس جديد و 2 فوج و 2 كارتيره ده غير مصنعيه تركبهم

قالي هو ده الي عندي اخدت بعضي ومشيت بعد خناقه وشتيمه وشبه اتطردت من المكان

حالياَ الموقف واقف لحد كده بس انا اوعدكم اني ان شاء الله هاخد حقي بطريقه او اخرى

وهقولكم انا عملت معاه ايه بالظبط

ملخص الحوار الناس دي نصابيين ولازم تبقه حذر جداً معاهم

بغض النظر عن الي حصل فأني على المستوى الشخصي حاولت اني أكون متعاون ومحترم معاه لدرجه ان أيمن بيه ده الي مبيعرفش يقرا ولا يكتب قالي في مره تعالى معايا هشتري عربية جديده وعايزك تكتبلي العقد فضيت نفسي مخصوص والله عشان خاطروا وكتبت العقد بخط أيديا لكن عشان قله الأصل عالكيف فالناس دي بتاكل وتنكر مع أن المعفن ده مليونير ويملك شارع تقريباً بأسموا

بعتذر عن الأطاله وبعتذر للناس الي حذرتني من التعامل معاه لكن مسمعتش كلامها

[amr011111]

احسن حاجه تعملها فى حياتك انك تدى للصنايعى اجرة ايده فقط سواء شغل فى العربيه او تشطيب شقه او اى حاجه
انزل اشترى حاجتك بنفسك واتفق مع سمكرى لوحده
وبوهيجى لوحده والاتنين ميعرفوش بعض
حتى لما يجى البوهيجى يستلم العربيه من السمكرى هيقوله على كل الملاحظات اللى عنده علشان ميتقرفش فى شغله

[the_master848]

حسبنا الله ونعم الوكيل وان شاء الله حقك هيرجعلك

[exelence]

ربنا يعوضك خير ما تزعلش نفسك ربنا يحلها من عنده

[Superbadr]

الحمد لله قدر الله ما شاء فعل
ان شاء الله هاخد حقي
جاري تصعيد الموضوع
دعاكم معايا

[khalil mohamed]

دى مشكلة مصر عموما مش العربيات فقط محدش عنده ضمير حاجة تقرف ربنا يمتقم من كل نصاب

[J A G U A R]

ربنا يعوضك خير

بعد كده روح لحد سمعته كويسه
ايه ايمن جولف ده

[hossamalsadik]

لاتحزن بنا يعوض عليك خير ان شاء الله
فى جميع التعاملات الواحد مابيتعلمش ببلاش الله المستعان
هوا كويس لما تاخد منه حاجه وتكون فاهم الى أنتا عاوز ايه
يعنى كنت خدت الحاجه الى انتا عاوزها بالموصفات الى انتا عاوزها بعد الاتفاق والتراضى على السعر وركبتهم بره
وعندك وشة نيل موتورز كمثال ممكن يكون السعر للوهله الاولى عالى بس لما بتكون مجرب وفاهم هتعرف ان الخامات والشغل ده بالاضافه للامانه والمواعيد المضبوطه جدا وراحة البال ان المبلغ قليل كمان وفى راحه تانيه ان الحرافيين أنتا فيها اصلا فهتجيب اى حاجه نقصه محتجها لعربيتك دون تعب فى النقل مع كثرة المعروض فى محلات قطع الغيار بأسعاره المختلفه فهتجيب افضل سعر

الله المستعان

وكل عام والجميع بخير بمناسبة عيد الاضحى المبارك

[Superbadr]

فعلا محدش بيتعلم ببلاش بس الحمد لله على كل حال
الواحد ميقدرش يقول غير كده

[tiko_ibiza]

علي فكره. ياجدعان ايمن دا اللي في شارع اللبيني كان مسقط مكنه للعربيه اللي معايا من غير ورق وانا مش عارف ارخص العربيه لغايت دلوقتي ومش عارف اعمل ورقها ازاي

[mohammad isdf]

للأسف ده معروف انه كده

[khalil mohamed]

انا شايف ان الحج ايمن فيه ناس كتير اتقرصت منه
هو مفيش غيره وﻻ ايه ؟

[ehab_mansour]

يا جماعه ايمن حاله من حال معظم الفئة اللي بنتعامل معاها فمن رأيي عجبك حاجه عنده + سعرها و حالتها كويسه بالنسبالك و بالنسبة للسوق = تاخدها و تركبها مكان ما تحب ... بس

للاسف بقينا مضطرين نفهم في كل و اي حاجه عشان احنا عايشين زمن الفهلوه و النصب إلا من رحم ربي مش العربيات بس

ربنا يعوض عليك و الحاجات اللي بتتكلم فيها دي انا سمكرت عربيتي و تقريبا مقفل معظم شغلها بنفسي و لو حد تاني قفلها برجعها افككها و اقفلها تاني لأنك اكيد هتلاقي كلبسات ضايعه و كابلات سايبه و تلاقي الباب بيخربط و يزن و هكذا فمضظر تعمل بنفسك عشان تقفل شغل نضيف

انا ماكينة زجاج عربيتي باظت رحت صلحتها و قلت للراجل بس سبهالي و انا هقفل الباب ..عشان هيقرفنيش و ارجع افكه تاني و اقفله تاني

[hossamalsadik]

الصنايعيه والتجار بقوا حاجه صعبه اوى ياحج إيهاب طب والناس الى مابتعرف فى نوعية الحاجه ومابيعرف او ضعيف فى عمليات الصيانه تعمل ايه ! ربنا معاهم

[Superbadr]

يا جماعه ايمن حاله من حال معظم الفئة اللي بنتعامل معاها فمن رأيي عجبك حاجه عنده + سعرها و حالتها كويسه بالنسبالك و بالنسبة للسوق = تاخدها و تركبها مكان ما تحب ... بس

للاسف بقينا مضطرين نفهم في كل و اي حاجه عشان احنا عايشين زمن الفهلوه و النصب إلا من رحم ربي مش العربيات بس

ربنا يعوض عليك و الحاجات اللي بتتكلم فيها دي انا سمكرت عربيتي و تقريبا مقفل معظم شغلها بنفسي و لو حد تاني قفلها برجعها افككها و اقفلها تاني لأنك اكيد هتلاقي كلبسات ضايعه و كابلات سايبه و تلاقي الباب بيخربط و يزن و هكذا فمضظر تعمل بنفسك عشان تقفل شغل نضيف

انا ماكينة زجاج عربيتي باظت رحت صلحتها و قلت للراجل بس سبهالي و انا هقفل الباب ..عشان هيقرفنيش و ارجع افكه تاني و اقفله تاني

هو كلامك مظبوط بس هو يعني لازم ابقه فاهم في كل حاجه عشان اشتري عربية
دي بقت حاجه تقرف
هو الناس ليه مبقاش عندها ضمير خالص كده
يعني لو الواحد مش فاهم في الحاجه هياخد على عنيه مستريح
طب ده بيدي لكل واحد فينا التصريح انوا يبقه نصاب في مجالوا
وكلوا بأسم الشطارة و الفهلوه