تركيب سنتر لوك

[Ayman Fathalla]

السلام عليكم و رحمة الله و بركاته ..

عايز اركب سنتر لوك للعربية (ابيزا) 98 .. هي اصلاً نازله من غير .. و سألت كهربائي قاللي هاتلها بتاعها الاستيراد الهوائي .. فعايز اعرف هحتاج ايه بالظبط و ايه هي الاجزاء اللي بيتكون منها السنتر لوك .. و اجيبه منين من الحرفيين و اركبه عند مين ؟؟

يا ريت لو حد مجرب يقوللي .. شكراً

[SYD]

لو فعلا عربيتك نازلة من غير سنتر (وان كنت أشك في ذلك) فأنت هتحتاج حاجات كتير عشان تعملها بسنتر هوا زي الفبريكة

اولاً محتاج كالون باب سواق (الكالون الداخلي واعتقد هينفع تركب عليه الطبلة بتاعتك وبالتالي مش هتغير مفتاح)
ثانياً محتاج خراطيم للهوا (ودي اصعب جزئية في الموضوع كله لأنك لو شوفت الخراطيم الأصلية فايتة ازاي ومعدية منين مش هتصدق عينيك)
ثالثاً محتاج طرمبة الهوا
رابعاً محتاج صباع السنتر بتاع التانك
خامساً اعتقد هتحتاج تعمل صباع بردو لشنطة العربية

اللي انا متأكد منه ان عربيتك اكيد كان فيها سنتر واتلغي - لأنه لما بيعطل صعب في صيانته ومش اي حد بيفهم فيه فبالتالي الكهربائي معدوم الضمير بيقولك غيره بسنتر كهربا وبيلغي كل ما سبق
اللي هيقطع معاك الشك باليقين - انك تفك فرش الباب وتشوف كالون باب السواق كالون عادي ولا سنتر هوا
طبعا اللي هيعرف الكلام دة بتاع ابواب محترم وامين

لو ما تعرفش حد تروحله - ارشحلك عادل بتاع الأبواب والمفاتيح في شارع المطبعة الهرم
هو اللي شغلي السنتر بتاعي

تحياتي

[Ayman Fathalla]

تمام يا باشا ألف شكر