المساعد الايمن الخلفى .... اجيبه من مين

[maxbaadn]

المساعد الخلفى جايب زيت .... عاوز اغيره ولو غيرته لازم اغير اخوه اللى فى الشمال ولا ايه ؟ وياريت حد يقولى مين بيبيعه وبكام جديد او استيراد ؟ انا ساكن فى العبور فلو فى حد قريب فى الحرفيين او جسر السويس يبقى افضل ؟ مستنى ردودكم يا اهل الخبره ؟ وياريت كمان اعرف مين ممكن يركبهولى ؟ شكرااااااا

السياره ابيزا 94

[maxbaadn]

ارجو الافاده يا جماعه انا قلقان , احنا اربعه بنركب العربيه كل يوم .

[maxbaadn]

ارجو سرعة الرد يا اخوه

[Karim Ibiza]

طبعا هو الأصح انك تغير الـ 2 مع بعض عشان يكونوا نفس العمر
لو هتجيب استيراد هيبقى صعب انك تجيب 2 نفس العمر لأنك متعرفش مين تبع مين
لو هتجيب جديد يبقى هات اتنين مع بعض

المساعد الاستيراد بيجى بالياى بتاعه لكن المساعد الجديد بيجى لوحده

انا كنت جايب جوز المساعدين استيراد من سنة ونص بـ 200 جنيه

http://www.nilemotors.net/Nile/344552-a.html

[maxbaadn]

طب ممكن اعرف مدى الخطورة اللى مكن يحصل على العربيه لو فضلت ماشى بالعربيه كده والمساعد مطلع زيت وبايظ؟

[ensan_71]

فيه فى الحرفيين عفشجى اسمه رضا انا مغير من عنده 2 مساعدين خلفى بــ 350 جنيه بتركبهم هو عنده مساعدين استيراد وهو اللى بيركبهم وعفشجى ممتاز بس حراق شوية لكن هتاخد شغل .... ونصيحه طالما هتاخد شغل يبقى ما تبصش لمصنعيه
ودى نمرته 01003189676 .... اسال على رضا وخللى بالك له اخ اسمه حمادة هو تنك شوية سيبك منه النمرة نمرة رضا لو هتروح اعرف منه امتى هيكون موجود فى الورشة وروح له .... ونصيحه من لوجه الله ما تجبش جديد روح له وهو يكشف ع المساعدين وهيقولك اذا كان الاتنين عايزين يتغيروا ولا واحد .... ما تخافش هو عنده ضمير

[maxbaadn]

اشكرك جداااااااااااااااااا

[maxbaadn]

طب ممكن اعرف مدى الخطورة اللى مكن يحصل على العربيه لو حملت عليها والمساعد مطلع زيت كده , لان امبارح اخدت والدتى واخويا ومراتى وكنانت العربيه بتحك فى المطبات

[ensan_71]

خللى بالك انا مش فنى ولا مهندس لكن هقول راى على حسب كا اتعلمت من خبرة وفهم
طبعا خطر اولا :-
هتبوظ بلية العجل وهتبتدى تسمع طنين وانته ماشى وخصوصا على السرعات العالية وبردوا ده خطر جدا لان البليه لو فرتط الله اكبر بعد الشر ربنا يستر بقا .
ثانيا :-
لما المساعد يكون بايظ يبقى كل مطب هتخده هيسمع فى الحته اللى بيتربط منها المساعد فى الشنطه من ورا بصاموله بصراحة انا مش عارف اسمها ... لكن ممكن نقول انها كمان ممكن يعملك شروخ فى الفخده الخلفيه كلها وطبعا كدا تبقى العربية معيوبة لما تيجى تبعها .
ثالثا بقا وده المهم ...... يعنى كل الناس يا اخى بتقولك كدا غلط وغير الاتنين مع بعض وانا قولت لك هاتهم استيراد لانى لبست فى الجديد وسعرهم معقول جدا 350 ج وفوق كل ده السيد المحترم منسق القسم : وليد ابيزا قالك غيرهم ... مش فاهم بقا انته عايز ايه ومستنى ايه ؟ .... مستنى لما تحصل مصيبة عشان تقول يا رتنى ولا ايه ؟؟؟؟؟؟؟؟؟؟؟؟؟؟؟؟؟؟؟؟؟ :(
ربنا يستر طريقك ويسترها معانا

[maxbaadn]

والله ظروف الشغل هى اللى مخليانى ما بصدق اروح , ده غير انى ساكن فى العبور والنزول من المدينة بالليل صعب من حيث الطريق , قبل ده كله بقا انا خلاص جبت المساعدين :)

[maxbaadn]

احب اشارك تجربتى مع المساعدين الخلفى عشان لو حد بيفكر يغيرهم , انا جبتهم من بسام اسحاق فى الحرفيين (شارع على سلامه ) , المساعدين استيراد محترمين اوى الحمد لله عاملين 250 جنيه , تركيبهم 40 جنيه لان الميكانيكى معرفه.

[Karim Ibiza]

ألف مبروك

ياترى جيتهم باليايات ولا بدون؟

ياريت تشاركنا تجربتك فى الموضوع ده

http://www.nilemotors.net/Nile/341028-a.html

[maxbaadn]

من حق الاخوه عليا هنا انى اقول انا عملت ايه لعل اقدر افيد حد فى الموقف اللى كنت انا فيه :
المساعدين من عند بسام اسحاق فى الحرفيين (شارع على سلامه) متفرع من شارع جمال عبد الناصر , السعر 250جنيه والتركيب كان مجانى عند الميكانيكى الللى فى الشغل عندى :) .
شكرا لمجهودكم يا جماعه