تغيير باور الأبيزا 99 بباور ال2000 موضوع للنقاش

[SYD]

بسم الله الرحمن الرحيم

السلام عليكم ورحمة الله وبركاته

أخواني الأعزاء في قسم سيات نايل موتورز
تحية طيبة وبعد ،

في البداية عايز أقولكم وحشتوني جداً وبعتذر عن تغيبي الفترة اللي فاتت دي لظروف يمكن بعضكم يكون عارفها وشكراً لكل من اتصل بي في الفترة السابقة للإطمئنان والسؤال علي

بردو يمكن كتير منكو مايعرفش اني حالياً بشد عربيتي وبوضبها بعد فترة من الأهمال والحوادث

انا حالياً خلصت السمكرة وبدأت رحلة الميكانيكا واللي ظهرلي فيها كذا مشكلة ابرزها حالياً مشكلة الباور

للأسف الشديد ان من ساعة اول حادثة عملتها وانا عارف ان المواسير بتاعة الباور مفعصة ومعضعضة ولكن الكسل والأهمال والأنشغال خلوني مكبر دماغي طالما الدريكسيون شغال ومش مهم الصوت المزعج اللي عربيتي كانت مشهورة بيه علي مستوي الجروب بتاعنا واللي كلكم عارفينه واساساً انا اتعودت علي السؤال المعتاد بتاع اي حد يشوف عربيتي "دة صوت ايه دة ؟؟!!" والجملة المعروفة اللي كتير بيفتكر انها ماجتش علي بالي "طب ما تشوف فيه ايه واعمله !!!"

المهم

خلال الصيانات الموسعة اللي كنت بعملها في الميكانيكا والتي اسفرت عن تغيير طرمبة الباور الملعونة وتجربتي بعدها لأكثر من 3 او 4 طرمبات غيرها
ماسورة الضغط انفجرت بمجرد اني حرقت علي الغيار لحد 3 rpm
رجعت الورشة عند الأسطي عصام وطارق الله يباركله قعد يحاول فيها وشغلهالي تاني - بس للأسف الشديد الطرمبة زنت والدريكسيون تقل اوي بعدها

سيبت العربية عند عصام اسبوع وخدتها امبارح وبعتني عند جماعة زمايله في امبابة عشان اولا اعدل عصاية الفتيس اللي كانت تايهة خالص ومابتجيبش خامس وثانياً عشان اجرب تاني في قصة الباور ونشوف حل ليها

بعد الفحص والمحص كان التقرير التالي
اولا العربية عندي بتحرق طرمبات ودة لأن المواسير مخنوقة وبتمنع مرور الزيت فبالتالي كل ما طرمبة تركب تتحرق لعدم انسياب الزيت
ثانيا علبة الدريكسيون (الأسكاترا) سافرت

وعليه فالعربية حالياً عايزة طرمبة باور بمواسيرها وخراطيمها وعلبة دريكسيون باور يعني منظومة كاملة

السؤال هنا
انا بصراحة كنت عايز اعدلها للموديل اللي بعدي (موديل 2000)
هل ينفع اركب علبة دريكسيون 2000 وطرمبة بمواسيرها 2000
هل هي هي نفس الطرمبة وهل ينفع تركب علي المكنة اللي عندي (محرك 1.4 mpi بكود APQ)
هل هتركب علي نفس القاعدة مع الكباس اللي عندي ولا هتضطر اغير كباس التكييف ؟؟؟
هل العلبة هتركب علي القنطرة اللي عندي ؟؟؟؟
هل المواسير والخراطيم هتمشي ولا هعدلها ؟؟؟

انا سبب التعديل اني ملاحظ ان الله اكبر طرمبة ومنظومة ال2000 افضل شوية واعطالها اقل من بتاعة ال99 وكمان دريكسيون ال2000 بيبقي اخف من دريكسيون ال99

منتظر ردودكم وأرائكم في التعديل دة

تحياتي للجميع

والله المستعان
،
،

[nesr6060]

متابع للاهميه وياريت حد يقولنا ايه الخطوات المطلوبه

[ViLMoS]

رائيي المتواضع انه ينفع لانني وانا بجيب الموتور جبته بالباور وجبت الاسكاترا والاربة والخراطيم بتاعت موديل 2000 بناءا علي راي الميكانيكي بس للاسف ماركبتش غير الموتور لاني كنت مستعجل واجلت تركيب باقي منظومة الباور لاني كنت مستعجل فمش هقدر اقولك فرقت ولا لا
بس من حيث انه ينفع كل حاجة تنفع ان شاء الله
انا جبت الطارة بالقطمة بالتابلوه بكويل التكييف والاسكاترا ومنظومة الباور بتاعة موديل 2000 بس ماجل التركيب شوية لضيق الوقت وطبعا لاسباب مادية اول ما هركبهم ان شاء الله هعمل تقرير مفصل بكل جزء

وحمد الله بالسلامة علي رجوعك يا هندسة

[ViLMoS]

نسيت اقولك اني مركب موتور 1400 هاف انجيكشن يعني اكيد مش موتور الابيزا ال 2000 والكهربائي قاللي اني مش محتاج اغير الطرمبة ولا حاجة

[mohammad isdf]

حمد الله على السلامه يا بشمهندس منور والله وأسعدنى جدا خبر شدك للعربية

ربنا يعينك بصراحه على التكاليف والوقت والجهد المطلوب

وأخيراً .. أنا فى انتظار الآراء عشان الموضوع ده يهمنى شخصياً لأنى بفكر جدياً إنى اقلب ال 94 اخليها باور وخايف ..

[ehab_mansour]

اعتقد ينفع
و عشان نأكد عايزين نتقابل و كل حاجه هتبان علي الطبيعة

[hossamalsadik]

ينفع تركب عشان قواعد تثبيت الاسكترا واحد
الخراطيم ومنهم خرطوم اسكترا طرمبة الباور بياخد او بيلف مع سلاح شاسيه الحوض يسار فى الموديلين عادى
خلى بالك لما تجيب خراطيم الباور او المنظومه تكون خاصه ب أبيزا 2000-02 لان البولو شبهها بس خرطوم الاسكترا طرمبة بالباور اقصر وممكن متخدش بالك وممكن باقى الخراطيم وهيا غير ملاحظه بالعين لازم تجيب ده وده وتقيس هتلاحظ وقتها الفرق وكمان فرق قطر بسيط مع العلم انها بتركب عادى بس بتكون مشدوده ومش قدره تمشى مع سلاح الشاسيه فى مجرها بسبب قصرها بس اكيد لها تاثير سلبى

طرمبة الباور الخاصه ب 2000-02 أنا جبت واحده اخر مره من شهر مارس ولسى زنا معايا برضو اليومين دول
ممكن تكون صدفه وممكن تكون نوعية الزيت بالرغم انه جنك الاصفر كنت جبته من الحرافيين لانى بعد ماغيرت الخرطوم زوت زيت كتيير بدل الى فقد وكان زيت عالى الجوده واصلى وكنت حطيت صورته قبل كده

وأنا برضو بفكر اشد واوضب اى حاجه ناقصه أو محتاجه صيانه شده واحده و نيو لوك ربنا ييسر الاحوال فى القريب باذن الله

ربنا يعينك ياهندسه أن شاء الله

[SYD]

شكراً لكل من قام بالرد
ان شاء الله لما اوصل لحاجة هبلغكم جميعاً

تحياتي للجميع