التقرير النهائي للسيات ابيزا 2014 بعد 15000 كيلو + اسعار قطع الغيار والصيانه

[ahmed.Elashy]

بسم الله الرحمن الرحيم

تكمله لسلسله مواضيع سيات ابيزا الجديده

http://www.nilemotors.net/Nile/418944-2014.html

http://www.nilemotors.net/Nile/427021-2014-3000-a.html

حبيت انقلكم تجربتي و وجهه نظري المتواضعه للسياره بعد استخدام سنه 15000 كيلو

العربيه بوجه عام جميله وهتريح اللي يركبها


الموتور

للاسف التوكيل عشان سياسات خاصه مش بيستخدم زيت كاسترول اللي سيات بتنصح بيه
ومحستش بقيمه زيت كاسترول الا بعد م حطولي زيت توتال
الموتور بقي صوته اعلي من الاول
RPM بقي اعلي وكذلك استهلاك البنزين
بس زياده حوالي 20 %
اتمني انهم يغيروا الزيت او حتي احنا نجيبه وهما يحطوه
ــــــــــــــــــــــــــــــــــــــ
الفتيس

من الاخر انا لا بجيب S ولا ستيب ترونيك معظم الوقت علي ال D
مش بجيب السبورت غير لما بكون محتاجه مش عشان اريح الفتيس
انا جايب العربيه تخدمني مش اخدمها انا
وقت ميحصل للفتيس حاجه لا قدر الله يبقي موضوع تاني
المهم
الفتيس الحمد لله مفيش اي ملاحظات وزي الفل بفضل الله
ـــــــــــــــــــــــــــــــــــــــ

الفرامل
ممتازه الحمد لله زي مهيا مفيش شكوي منها

ـــــــــــــــــــــــــــــــــــــــ
القياده والثبات والتحكم

تمام الحمد لله وجبت بيها سرعه 205 ك \س مع اتزان وثبات تمام بالنسبه لعربيه ف الكتالوج بتاعها السرعه القصوي 185
ــــــــــــــــــــــــــــــــــــــــ

البنزين

علطول 92 و مش بتعامل غير مع بنزينه واحده جمب البيت .. موبيل
مره حطيت من بنزينه وطنيه ف محور المشير طنطاوي لاقيت ف رجه ف العربيه وصوت الموتور متغير
مجربتش لسه 95
ـــــــــــــــــــــــــــــــــــــــ
التخزين

العربيه بتشيل وحماله اسيه
حطيت فيها ترابيزه كومبيوتر وكرسي مكتب وياما عبتها شنط
محستش انها صغيره خصوصا لما تقفل الكنبيه اللي ورا
ـــــــــــــــــــــــــــــــــــــــــــــــ
العفشه
تمام بس كانت محتاجه تبقي انعم من كده
ــــــــــــــــــــ

نيجي بقي لموضوع الصيانه

حجزت عن طريق التليفون ولما روحت ع البوابه لاقيت الامن عند كشف بالناس اللي تخش النهارده للصيانه
اتاكد من اسمي بالكشف ودخلت
جالي مهندس الاستقبال وخلص شويه ورق واداني ايصال بانهم استلموا العربيه ( مهم جدا الايصال دا عشان لاقدر الله لو عملوا حاجه غلط ف العربيه )
وبيدني ايصال بنوعيه الكشف
و المهندس بيكتب ف الكشف لو ف اي خبطه او خدش ف العربيه او اي حاجه عشان يثبت حقك وحقه
العامل اللي اخد العربيه برده قعد يبص ف العربيه وقاللي اتاكد ان مش حاطط حاجه مهمه ف العربيه
وقفلي شنطه العربيه ب استيكر عشان محدش يفتحها او ياخد حاجه فيها

التغيير كان صيانه 15000 وتغيير زيت وفلتر وكشف ع السياره بالكومبيوتر والكشف ع تيل الفرامل

روحت الكافتيريا شربت الشاي وقمت اتفرج ع الباسات وركبتها هيا والجولف وبصيت ع الليون وفتحتهم
لاقيتهم قالولي عربيه حضرتك خلصت
خلصت شويه اجراءات ونضفوا العربيه داخليا وخارجيا وحطوا كفر للكرسي و ورق للدواسات

التكلفه 550 جنيه

المده : كل دا حصل ف ساعه واحده فقط لاغير

المعامله : قمه ف الذوق والاحترام ومعامله ممتازه ومهذبين جدا وفاهمين ف الشغل
مش هديهم الدرجه النهائيه لاني لحد دلوقتي مروحتش بمشكله
ف طالما ان رايح بتعمل صيانه تبقي عادي
انما بتبان الحقيقه عند حدوث المشكله لاقدر الله
بس عامه هما ممتازين

اسعار قطع الغيار زي م اخدتها من التوكيل .... اسعار حلوه جدا

فلتر زيت 100
فلتر هواء 150
فلتر تكييف 130
بوجيه 65
فلتر بنزين 200
تيل امامي 500
تيل خلفي 450
زجاج امامي 1500
زجاج خلفي 1200
ريشه مساحه 160
فانوس امامي 1200
فانوس خلفي ب الليد 1360

وجهه نظري انها اسعار ممتازه وخصوصا انها المفروض الماني .. بكده هيشجعني اني مروحش بره واخلص كل صيانتي عندهم

نيجي بقي لجزء الاكسسوارات بلاش تقروها

جراب ريموت ( حته بلاستكه قد صابعك ) 400 جنيه
مسند يد 2200
سنسور بارك صوت فقط 2500
مردتش اساله ع الباقي

العربيه بعد تجربه كبيره لو حد بيفكر فيها .. دوس باذن الله وانت مطمن

[egyptiandiver]

thank you :))

[Yoyo.yasso]

ما شاء الله تقرير رائع
جزاك الله خيرا حضرتك طمنتنا جدا خصوصا انى كنت لسه بسألك على موضوع المانيوال والسبورت مود ده فى موضوع تانى ولاقيت الاجابه هنا
بس عندى سؤال معلش واعذرنى على جهلى
هو مش المفروض الصيانات اللى حضرتك عملتها من اول ما جبت العربيه دى مجانيه لاول ١٠٠.٠٠٠ كم ؟ يعنى بتبقى تبع الضمان ؟

[ahmed.Elashy]

ما شاء الله تقرير رائع
جزاك الله خيرا حضرتك طمنتنا جدا خصوصا انى كنت لسه بسألك على موضوع المانيوال والسبورت مود ده فى موضوع تانى ولاقيت الاجابه هنا
بس عندى سؤال معلش واعذرنى على جهلى
هو مش المفروض الصيانات اللى حضرتك عملتها من اول ما جبت العربيه دى مجانيه لاول ١٠٠.٠٠٠ كم ؟ يعنى بتبقى تبع الضمان ؟

هوا اولا سيات الضمان بتاعها سنتين بغض النظر عن عدد الكيلومترات
ثانيا لو ف عيب صناعه ف جزء من السياره او حاجه باظت او اي مشكله التوكيل بيغيرها مجاني
انما دي صيانه دوريه بيغير زيت وبيكشف علي العربيه
اول صيانه لحضرتك بعد 5000
ياريت ضروري تلتزمي بمواعيد الصيانه حفاظا ع السياره
وعشان متخرجيش بره الضمان
وعشان لاقدر الله حصل حاجه وخصوصا الفتيس يغيرهولك ع طول
هما عندهم سياسه انك ملتزمه معاهم بالمواعيد وهما ملتزمون معاكي ف كل حاجه تانيه

[kofta]

تقرير ممتاز يا MR ahmed.Elashy و ربنا يباركلك فيها و يبعدك عن شر طريقها

[SYD]

ربنا يباركلك فيها ويكفيك شرها ويديك خيرها وان شاء الله تكتب لنا عنها تقرير ال100 ألف

تحياتي

[ehab_mansour]

الف مبروك ... ربنا يباركلك فيها

[---]

متابع

[midors]

الله ينور ياباشا ....انا دلوقتى جايب 10000 كيلو والعربية تمام

[ahmed.Elashy]

الف مبروك ... ربنا يباركلك فيها

الله يبارك فيك وشكرا لمرورك الكريم

[ahmed.Elashy]

الله ينور ياباشا ....انا دلوقتى جايب 10000 كيلو والعربية تمام

ان شاء الله توصل ل 1000000

[ahmed.Elashy]

الف مبروك ... ربنا يباركلك فيها

شكرا لمرورك الكريم

[ahmed.Elashy]

ربنا يباركلك فيها ويكفيك شرها ويديك خيرها وان شاء الله تكتب لنا عنها تقرير ال100 ألف

تحياتي

ان شاء الله وشكرا لمرورك الكريم

[memo_p910]

شكرا على التقارير المفيده والرائعه في نفس الوقت
انا عاجباني الابيزا بس خايف من الفتيس اوي ولاني هاقسط تمنها فمش هبقى حمل اي مصاريف اضافيه
عايز اعرف الفتيس حصل فيه تعديل فعلا عن الموديلات السابقه ولا لأ والضمان على الفتيس شكله ايه يعني مدى الحياه زي ماكانوا عملوا قبل كده ولا محدد بكيلومترات
وشكرا على تعبك معانا

[ahmed.Elashy]

انا مشفتش حد اشتكي من الفتيس تماما الحمد لله
واتعدل الفتيس من اخر تلات سنين
التوكيل لاقدر الله لو حصل ف الفتيس اي مشكله بيغيرهولك و فوقها بوسه
شرط محدش يلعب ف العربيه
وصيانتك كلها معاهم