توليدو ام سيتى ٢٠١٥

[goyamasta]

انا محتار جداً يا جماعة بين سيات توليدو الفئة الثانية اوتوماتيك ام الهوندا سيتى الفئة الأولى. مع العلم ان السيتى اجدد و التكنولوجيا فيها متطورة نوعاً ما عن التوليدو اللى هى نازلة بموتور mpi 1.6 اللى كان نازل زمان من 5 سنين فى الجولف و الاوكتافيا، و برضه معدل استهلاك الوقود فى السيتى ٦.٧ احسن من التوليدو ٧.٥ ، و كمان موتور السيتى ١١٨ حصان مقابل ١٠٥ للتوليدو. للعلم انا من عشاق السيات من زمان و نفسى فى سيارة سيات و كنت على وشك انى اشترى التوليدو لحد ما شفت السيتى بالصدفة. انا كل تخوفى من التوليدو هو عدم الانتشار و الموتور قديم و معدل استهلاك الوقود عالى نسبياً مقارنةً بالإبيزا و الليون. يا ريت يا جماعة ارجو الإفادة على وجه السرعة. و شكراً مقدماً

[mr_green]

لو ما بين العربيتين دول هاختار سيتى

لكن للأسف ال 2 إنتشارهم و إعادة بيعهم مش قد كده بس السيتى أفضل من التوليدو

فكر فى إختيارات أخرى فى نفس الرينج و بالتوفيق

[JapRuleZ]

المقارنه دى واضحه من الاول و انت مجاوب على نفسك .... بس انت حابب السيات لسبب تانى ... يا ريت تقولنا عليه ... لأن علامه هوندا هى امل الكثيرين من محبى السيارات .... ولا تكونش عاوز الكوبرا ... تحياتى

[goyamasta]

المقارنه دى واضحه من الاول و انت مجاوب على نفسك .... بس انت حابب السيات لسبب تانى ... يا ريت تقولنا عليه ... لأن علامه هوندا هى امل الكثيرين من محبى السيارات .... ولا تكونش عاوز الكوبرا ... تحياتى

أنا حابب السيات لإنه ألمانى و كل عربيات السيات واخدة 5/5 فى اختبارات الأمان الأوروبية, بالإضافة ان كل عربياتهم شيك جداً و بيسطة جداً (فى الشكل طبعاً) مش اوفر زى الإلنترا الجديدة مثلاً. كمان التوليدو المانى تشيكى و السيتى يابانى تايلاندى. يعنى يرضه بصراحة السيتى شكلها حلو طبعاً بس مش ببساطة التوليدو و لا شياكتها. أنا كنت خلاص شبه واخد قرار على التوليدو بس قلقت شوية من موضوع الموتور ال mpi 1.6 علشان معدل استهلاكه للبنزين فقط. فهل حضرتك شايف ان فرق معدل الاستهلاك للتوليدو 7.5 يفرق عن العربيات الجديدة دلوقتى بشكل كبير, و لا الرقم ده فى المعقول و مفيش خوف منه؟

[goyamasta]

لو ما بين العربيتين دول هاختار سيتى

لكن للأسف ال 2 إنتشارهم و إعادة بيعهم مش قد كده بس السيتى أفضل من التوليدو

فكر فى إختيارات أخرى فى نفس الرينج و بالتوفيق

ياريت لو حضرتك جربت حاجة فيهم أو ليك صديق جربهم تقوللى تجربتك. علشان ابقى عارف هى احسن منها فى ايه بالضبط. علشان على حسب معلوماتى أنا اعرف ان الأتنين نفس الكماليات تقريباً باختلاف الموتور فقط

[JapRuleZ]

طيب قولنا 3 حاجات انت بتدور عليهم فى العربية بترتيب الاولوية
معاك حق التوليدو شكلها بسيط و شيك مفيهاش تفاصيل زى الهايونداى

لو القياده بتاعتك اصلا مفيهاش سرعه التوفير مش حيفرق
اما موضوع الالمانى ده خلاص بطل خلاص
الالمانى عندى audI bmw merc
اننما الباقى مشاكل الدنيا فتايس على مواتير الخ....
انما فى السعربتاعنا ده مبتفرقش كتير

[goyamasta]

متشكر جداً لردودكوا يا جماعة...
أنا نزلت امبارح و شفت السيتى و عاوز اقولكوا انى دوخت على ما لاقيتها علشان مفيش طلب عليها كتير خالص فى المعارض كلها و اللى لاقيتها واقفة كانت 2014. المهم طبعاً لما تشوف العريية فى الواقع غير الصور و الفيديوهات على النت فأنا هقولكوا رأيي بصراحة من حيث العيوب اللى شفتها

1- العربية نازلة 2 Air Bag بس
2- مفيش فتحات تكييف ورا غير فى الهاى لاين (فرق 20 الف جنيه!!)
3- مفيش شاشة فى التابلوه غير فى الهاى لاين و دى اكتر حاجة كانت مميزة فى العربية من حيث التابلوه
4- شنطتها واسعة فعلاً بس لتحت يعنى واخدة عمق أكتر على حساب الطول فتديلك احساس ان الشنطة صغيرة و فى نفس الوقت لو هتشيل فيها شنط أو حاجة فتحطهم فوق بعض مش جنب بعض
5- على الرغم من ان حجمها اصغر من التوليدو و لكن بسبب تصميمها تحس انها اكبر و منفوخة كدة شوية (طبعاً دى أزواق)
6- تفتقر للفخامة و الشياكة على الرغم من ان شكلها حلو و احلى بكتير من الموديلات القديمة
7- تانك البنزين 40 لتر فقط
8- الجنط 15 بوصة
9- وزن العربية 1060 كيلو جرام و ده وزن قلقنى شوية علشان شكلها و العربيات اللى فى نفس الفئة وزنهم بيكون زيادة حوالى 100 او 150 كيلو جرام, و بالتالى ده ممكن يأثر فى ثباتها
10- و دى اهم حاجة بقى, العربية دى لو فشلت هيكون بسبب التوكيل بتاعها اللى مش عامل اعلانات و لا اى حاجة خالص, لدرجة انى شفت العربية بالصدفة فى الشارع و دورت مع نفسى لحد ما عرفت تفاصيلها. و اللى عرفته من المعارض اللى شفتها امبارح ان اصلاً محدش بيطلبها خاااالص و المبيعات بتاعتها مش اد كدة. و ديه طبعاً حاجة تقلق علشان اعادة البيع و الصيانة و قطع الغيار

فطبعاً لما العربية تكون بالسعر ده و فيها الكلام اللى فوق تبقى عربية فقيرة جداً, و انا صرفت نظر عنها

[JapRuleZ]

حلو .... متزود شويه و تشوف كورولا

[goyamasta]

حلو .... متزود شويه و تشوف كورولا

للأسف مش هينفع, هى التوليدو اصلاً غالية و نفسى تنزل 5 الاف مثلاً بس انا شايف انها احسن حاجة فى الفئة ديه

[memo_p910]

بصراحه التوليدوا رائعه وفخمه جدا وفتيس عادي 6 سرعات بدون مشاكل

[mr_green]

أستاذى الفاضل صدقنى العربيتين إنتشارهم وحش جدا و طالما إنت صرفت نظر عن السيتى فأنصحك تفكر فى السيراتو أو حتى الشارك إعادة البيع و الإنتشار فى ال 2 أفضل بمراحل

[ahmed.Elashy]

انت محير نفسك
هتفرق ايه معاك ان التوليدو محرك قديم او جديد ؟؟ اهم حاجه يكون بدون مشاكل
كمان فرق البنزيين انا مش مقتنع بيه عشان الاوروبي هوا ديما رقم واحد ف توفير البنزين
وهتلاقي بتدفع فرق فلوس بسيط ف البنزين
لو عجباك الهوندا هاتها بس التوليدو بحس انها اكبر
توكيلها احسن بمراحل
قطع الغيار متوفره ع فكره لانها مشتركه مع مجموعه سكودا وف لوكس ع نفس المنصه الخاصه بالسياره
بالتوفيق

[goyamasta]

شكراً لردودكم جميعاً. انا عرفت هوية موتور التوليدو و الرابيد فى مصر و هو موتور الابيزا 2008 و اسمه: Inline-4 DOHC و كوده BTS و ممكن تقارنوا الأرقام بنفسكوا

SEAT Ibiza - Wikipedia, the free encyclopedia

Seat - Ibiza IV SC - 1.6 (105 Hp) - Technical specifications, Fuel economy (consumption)

[eraser]

لا كود الموتور cfna