Tweet
مفاهيم يجب تصحيحها حول زيوت المحرك
بسم الله الرحمن الرحيم
السلام عليكم ورحمة الله وبركاته
أخواني الأعزاء في قسم سيات نايل موتورز
تحية طيبة ،،
في شوية مفاهيم عن الزيت لازم نتفق عليها ونغير مفاهيمنا القديمة اللي توارثناها عبر الأجيال
- اول مفهوم خاطئ لازم نغيره - هو الأختلاف بين الزيوت بيكون بالكيلومتر
يعني مفيش حاجة اسمها زيت 3000 - زيت 5000 - زيت 10,000
مفيش الكلام دة
الزيت انت تقدر تمشي عليه 15,000 و20,000 بشرط سلامته
وتقدر تغيره بعد 2000 كيلو لو تغيرت خواصه وفقد شروط سلامته
وطب ايه هي شروط سلامة الزيت وخواصه؟
1- الريحة - لو الزيت ريحته قلبت علي ريحة شياط يبقي الزيت بيتم أجهاده ودخل في مرحلة الحرق - يعني الزيت محروق - وبالتالي يجب تغييره في اقرب وقت
2- اللزوجة - الحيل - لو الزيت بقي عامل زي الماية يبقي يجب تغييره علي الفور - مش معني انه خفيف معني انه وحش
في فرق بين اللزوجة وبين انه فقد لزوجته
حتي لو الزيت خفيف - هتحس فيه باللزوجه بتاعته وهي عن طريق تمريره بين اصابع يدك
3- المعدل - لو الزيت بينقص معاك بأستمرار رغم عدم وجود تسريب او ترشيح وعادم الشكمان مافيهوش زيت (لونه طبيعي وريحته طبيعية)
يبقي كدة معدل بخر الزيت دة كبير ويجب تغييره علي الفور
اللون
مش معني ان الزيت لونه اسود انه كدة خلاص اتحرق ولازم يتغير
بالعكس - اللون الأسود يعني ان الزيت بينظف أثار الحريق داخل المحرك
وبالتالي فاللون ليس من مؤشرات تغيير الزيت
لكن لون الزيت وهو لسة جديد دليل علي كفاءته كأن يكون لونه ذهبي او أخضر
امال معيار الزيت ايه ؟؟؟؟
حاجة اسمها مستوي الخدمة او معامل الخدمة
ودة هتلاقيه معيار تابع لمعهد API
مستوي الخدمة للديزل
دة هتلاقيه بيبدأ بحرف C
وبيكون CH - CJ - CF
مستوي الخدمة للبنزين
دة هتلاقيه بيبدأ بحرف S
SM- SN - SL
بوجه عام
كل ما كان ترتيب الحرف متأخر كل ما كان الزيت مستوي خدمته اعلي
يعني SN اعلي من SM
وهكذا
واساسا N حالياً هو اعلي مستوي خدمة علي الأطلاق لزيوت محركات البنزين
مستوي الخدمة بنسميه احنا بالبلدي "حيل الزيت" يعني الزيت لسه فيه حيل
يعني فيه لزوجة يعني لسة فيه النفس ويشتغل
وكل ما كان مستوي الخدمة عالي كل ما كان الزيت عنده القدرة علي الصمود في المحرك لمسافات أطول وتحت ظروف خدمة شاقة
وبالتالي ماتخليش حد يضحك عليك ويقولك الزيت دة 10,000 وتبص تلاقي مستوي خدمته SJ مثلاً
بردو لما تيجي انت تشتري دور علي زيوت SN او SM بالكتير اوي
- ثاني مفهوم خاطئ
هو معيار اللزوجة
وبيكون رقم / W رقم
مثال 10W/50
في ناس بتقول ان W اختصار لكلمة Weather يعني الطقس
بس عموماً مش يهمنا دلوقتي هي اختصار لأيه قد ما يهمنا نعرف الأرقام دي تخص ايه
الدرجات دي هي فعلا انعكاس لدرجات الحرارة بس مش معناها انها درجة الحرارة نفسها - يعني ماهياش درجة الحرارة العظمي والصغري :-)
مثال 10W/40 مش معناها ان الزيت يشتغل بكفاءة عند درجة حرارة 10 ومعاك لحد 40
لا طبعاً
مبدئياً W تعني Winter الشتاء ودة رقم بيرمز لأن الزيت دة عنده الكفاءة انه يحتفظ بلزوجته وتدفقه في درجات الحرارة المنخفضة
وكل ما كان الرقم دة صغير كل ماكان الزيت أكفء في درجات الحرارة المنخفضة
طب ورقم 40 ؟؟؟!!!
الرقم الكبير زي 40 او 50 دي بيعني درجة لزوجة الزيت عند درجة حرارة 100 مئوية وبيسموها درجة انهيار الزيت
وكل ما كان الرقم الكبير صغير كل ماكان أخف
يعني 30 أخف من 40 و 40 أخف من 50
وكل الدرجات عموماً بتتقاس اللزوجة بتاعتها عند درجة الأنهيار 100 درجة مئوية
كدة مالكش حجة وانت رايح تشتري الزيت
انا قولتلك تعرف هو بيقعد قد ايه عن طريق مستوي الخدمة
وقولتلك درجات الحرارة المناسبة
وقولتلك اللزوجة
تحياتي للجميع
Comment