عملت حادث والحمد لله علي كل شيء

[ShekoT]

السلام عليكم .. انهاردة للاسف عملت حادثه بسيطة بجوار المنزل "الحمد لله علي كل شيء " نتيجه سوء تقدير مني في تقاطع ... الغريبة اني كنت الي حد ما سعيد .. متستغربوش :) ... الحادث ده اثبتلي اني اخترت العربية الصح الي ابتدي تعلم بيها في عالم السيارات لان علي الرغم من ان كل الي حصل لعربيتي انها اتكسر الفانوس الامامي يمين فقط لقيت العربية الي خبطها "نيسان صني 2014 " الباب اتخبط جامد لجو بجزء من العتب لدرجة اني حسيت ان عربيه تانية الي خبطتها مش انا .. الي جانب اني جوا العربية محصلش اي اهتزازات من وقع الخبطة ولا اي حاجة الحمد لله لكن في الصني لقيت الي جواها زي ما يكونو اتخبطو خبطة شديدة الي حد ما ... من غير ما اطول عليكو انا الحمد لله فخور اني من ملاك الابيزا وربنا يكفيكو شر الطريق ويرزقكو بناس محترمة زي السيدة الي تقبلت اعتذاري انهاردة عن خطاء غير مقصود "بارك الله فيها وفي رزقها " وتجربه تستحق اني اتعلم منها ... كنت عايز استفسر بردو اقدر اجيب منين الزجاج بتاع الفانوس الامامي وسعره في حدود كام ... خالص الشكر مقدما ورمضان كريم علي الجميع

[skayroad]

الحمد لله قدر و لطف ممكن عشان الصيام خلاك مش مركز :) عموما وش الفانوس في شارع دمشق او التوفيقية رمسيس في حدود 40 جنيه ...

[graffittiii]

سيدة وتقبلت إعتذارك !!
يعني ماقالتلكش ماليش دعوة هاتلي عربية جديدة ؟
ويكون عليها نفس علبة المناديل اللي مرسوم عليها سمايل .

[unl0veable]

الحمد لله قدر و لطف

[tasaka]

لى عتاب بسيط .. ان كنت انت بتتعلم سواقه .. يبقى تأخذالفتره المناسبه فى القياده ليلا قبل ان تقود صباحا و تؤذى الناس .. حتى لو استمر ذلك شهور

يعنى فيه ناس كتير بتحط تحويشه العمر فى السياره .. انت خبطها فى اضعف نطقه فى اى سياره و تنزل كتير من قيمتها

[ShekoT]

لى عتاب بسيط .. ان كنت انت بتتعلم سواقه .. يبقى تأخذالفتره المناسبه فى القياده ليلا قبل ان تقود صباحا و تؤذى الناس .. حتى لو استمر ذلك شهور

يعنى فيه ناس كتير بتحط تحويشه العمر فى السياره .. انت خبطها فى اضعف نطقه فى اى سياره و تنزل كتير من قيمتها

مش موضوع تعلم انا الحمد لله بسوق من 7 سنين الموضوع كله ان لسه العربية جديدة معايا ومتعودتش علي الابعاد الجديدة بتاعتها .. عتابك علي راسي اكيد وكلامك صح بس هو كان سوء تقدير للمسافات ومشكور علي النصيحه


مشكورين علي الردود الطيبه يا جماعة وعلي المساعدة

[SYD]

الحمدلله علي كل حال
ورمضان كريم
الصيام فعلا بيضعف التركيز والأنتباه

وش الفانوس - كنت أشتريته في ال99 ب75 جنيه مش عارف ال94 نفس السعر ولا اقل
كان ماجيف مصري

تحياتي