ممكن مساعدة منكم انا جديدة في المنتدي وعايزة اجوبة علي اسألتي

[Sue Muahmed]

السلام عليكم أنا لسه جديدة في موضوع العربيات
أنا عايزة ان شاء الله اشتري عربية وبعد لف حوالي ٦شهور على النت أمسك عربية عربية واقرأ تقرير عنها لحد ما سحرتني السيات ابيزا من 94 لحد 99 هي كويسة جدا وأطول عربية وقفت عندها وقرأت فيها تقارير كتير اوووي من غير مبالغة يوميا الصبح وانا رايحة الشغل وانا راجعة منه وقبل ما انام وفي البريك اللي اقرأه أعيده تاني بحيث الاقي عيب يخليني اغير رأيي ابدا..
بس بما انى لسه جديدة فا في حاجات مخوفاني وياريت بقى تطمنوني
أولا أنا العربية بالنسبةلي وسيلة اتنقل بيها من البيت للشغل عشان أنا ساكنة بعيد عن الشغل .. مش عايزة منها أكثر من نعومة في السحب تكييف في الحر .. سنتر لوك وزجاج كهرباء أمامي ....
خايفة من مواضيع التسقيط وتركيب تكييف وكل ده ... أنا عايزة عربية حالتها ممتازة باللي قولته ده في حدود من 30 ل 35
وبصراحة مش هفكر ابيع تاني
عارفة السؤال ده وتسأل كتير ... بس انا تسأله من وجهة نظر ثانية
يا تري ابيزا 94 ولا 99 ? أقصد هنا باللي أنا عايزاه المواصفات اللي قلتها ايه الأفضل بالنسبالي ?
أنا عايزة ابقي سيتاوية ابيزيوية معاكو وأول مرة اعمل عضوية في منتدى

[eng_amg]

مفيش كلام علي الابيزا. هي عربية محترمة جدا وكانت مع صديق لي وكنا بنمشي بيها 160 بدون قلق.
المشكلة الوحيدة انها قديمة شوية وايضا قطع غيار الجولف تركب عليها موتور وعفشة وفتيس.
طبعا كل الشباب بيصقط موتور جولف وعفشة ويركب شدادات ويشد بيها.
فمعظم الي حتلاقيه حيكون معلوب فيها وصعب تلاقي عربية سليمة.
عموما حاولي متستعجليش ودوري كويس.

[skayroad]

الافضل ليكي من وجهة نظري ابيزا من موديل 98 حاله نضيفه من صاج و عفشه و دواخل في حدود 35 الف بها تكيفها والاحسن يكون الاصلي مش متركب وتكون باور عشان لو مش باور هتبقى صعبه عليكي اكيد طبعا هيكون فيها سنتر و زجاج امامي كهرباء ..

[kaza]

ابعدي عن السيات مادام مشوارك بعيد للشغل خصوصا وانت بنت مش حمل عربية تعطل بيكي علي الطريق ..الافضل هو الاكثر انتشارا واعني اللانوس وممكن جولييت لو مفضلة هاتشباك او فيرنا وهيبقوا في حدود المبلغ دة

[A.Saad]

كلام kaza @ eng amg زى الفل

[hugan]

ﻻنوس او فيرنا اﻻفضل لسيده

[mif]

ابعدي عن السيات مادام مشوارك بعيد للشغل خصوصا وانت بنت مش حمل عربية تعطل بيكي علي الطريق ..الافضل هو الاكثر انتشارا واعني اللانوس وممكن جولييت لو مفضلة هاتشباك او فيرنا وهيبقوا في حدود المبلغ دة

متق معاك
و ممكن اكسنت من 98-2006 ابعدها سهلة جدا و ناعمة

[ENG.MaRk]

ممكن بولو لو تقدري توصلي المبلغ ل 40 و ممكن دايو جولييت

[Sue Muahmed]

طبعا شكرا على ردك واهتمامك ... بس هفهم حضرتك معلومة يمكن هتستغربها شوية ... بس انا مش معترفة بالاكسنت أو الفيرنا .. اللي ممكن أفكر فيها دايو جوليت .. بس لما قارنت ما بينهم الابيزا تكسب ... وده من كلام المنتدى ...
احنا ممكن نفكر في موديل 99 بلاش 94 بس بصراحة سيات عاجبني قلبا وقالبا ... وشدني فيها أن كل اللي ركبوها مش اشتكوا منها لو بيعملها صيانة دورية ... صح ولا لا ??
لو في حاجة غلط أنا فهمتها غلط ارجوك توضحلي وجهة نظرك ... نستفيد بردو أنا معنديش خبرة ... لكن قريت كتير اووووي

[Sue Muahmed]

مفيش كلام علي الابيزا. هي عربية محترمة جدا وكانت مع صديق لي وكنا بنمشي بيها 160 بدون قلق.
المشكلة الوحيدة انها قديمة شوية وايضا قطع غيار الجولف تركب عليها موتور وعفشة وفتيس.
طبعا كل الشباب بيصقط موتور جولف وعفشة ويركب شدادات ويشد بيها.
فمعظم الي حتلاقيه حيكون معلوب فيها وصعب تلاقي عربية سليمة.
عموما حاولي متستعجليش ودوري كويس.

############################
أنا مش عارفة أتعامل مع الجروب اوى أقصد ال site نفسه عشان أول مرة اعمل عضوية في منتدى وكده .. و بحاول اقلدكو واتعلم منكو ......
طبعا شكرا على ردك العربية اكيد تحفة وعاجبني فيها كل حاجة لكن أنا بميل للي مش اتلعب فيها خالص زي ما جابها من التوكيل ... فا بما أن الشباب لاعبين فيها نشوف موديل 99
..... المشكلة موتور 99 ده 1000 سي سي التكييف هيموت الموتور فا أنا بدور على 99 موتور 1400 انجكشن وباور .... أنا عايزة اعرف لو موديل 99 بالمواصفات دي آخرها كام مثلا ???
طبعا شكرا تاني لاهتمامكوا ومساعدتكم ....
ومعلش تستحملوا اختو الجديدة تبقى غبية شوية في الأسئلة بس عشان افهم

[graffittiii]

نصيحه : إيه يخليكي تركبي عربية عدي عليها 17 سنه أو أكتر ؟!!!

الأكثر واقعية بالنسبالك : سبيرانزا a113

[Sue Muahmed]

بس انا ايه يخليني اركب صييني بمشاكله الكثير ....
طبعا شكرا على نصيحتك بس انا مستبعدة الصيني خالص من اختيارتي ....
كمان مالهاش علاقة عدى عليها كام سنة ليها علاقة بحالة العربية ...
أنت ممكن تركب عربية حديثة مشاكلها كثيرة وحالتها وحشة وعربية قديمة حالتها كويسة ... وانا من وجهة نظري من الخبرة اللي اكتسبتها من القراية بيتهيألي كل ما الموديل أقدم كل ما كان ابسط ومشاكله كلها معروفة ... ولو كلامي غلط قولولي عشان أنا يستفيد منكم بردو

[Sue Muahmed]

ابعدي عن السيات مادام مشوارك بعيد للشغل خصوصا وانت بنت مش حمل عربية تعطل بيكي علي الطريق ..الافضل هو الاكثر انتشارا واعني اللانوس وممكن جولييت لو مفضلة هاتشباك او فيرنا وهيبقوا في حدود المبلغ دة

**************************************
جوليت أغلى طبعا وكبيرة وشكلها مش حلو اوى زى الابيزا صح ولا لا ????
طيب يعني افهم من كلامك بلاش ابيزا للبنات خالص ???
طيب ولو أنا سوقت قبل كده بس اتوماتيك وبحب الجري لأن طريقي على الزراعي ....
وعموما أنا بعرف اركن

[A.Saad]

المشكلة يا Sue مش مشكلة ان الاعطال معروفة
المشكلة هنا بتكون ان العمر الافتراضى لاغلب المكونات بيكون انتهى وبالتالى يجب استبداله او بيكون قابل للعطل
فبالتالى كل شوية بتلاقى مطلوب تغيير قطعة
ضيفى على كدة ان الموديلات القديمة مش هتلاقى قطع غيار اصلية بسهولة فجودة القطع المتاحة مش مضمونة

وبصفة خاصة الابيزا عربية لعب وجرى وامريكانى وخمسات وغيره
فده بيأثر بشدة على عمر قطع غيار العربية
لانه بيكون اجهاد للعفشة ونظام نقل الحركة من الفتيس والدبرياج والكبالن

[AymanEF]

انتى لسه جديده فى السواقه و لا دا سؤال مهم لانه على الاساس دا هتقدرى تحددى العربيه الى عايزاها

و بعدين هل هتقدرى تروحى تكشفى على عربيتك و لو عطلت لقدر الله هتعرفى تتعاملى و تخلى الميكانيكى يجى و تودى و تروحى و تجيبى ؟؟

السنتر و الازاز الكهربا مش مشكله اوى ممكن يتركبو من برا
و بتقولى مشاويرك كبيره و عايزه تكييف كمان قطع غيارها هتكون عامله ازاى

لو فى امكانيه انك تجيبى عربيه قسط انا برشحلك سوزوكى التو الجديده 800 سى سى و تكييف او سايبا برايد 1300 سى سى و تكييف و ازاز كهربا و الناس بتشكر فيها اوى

انما بقا لو عايزه عربيه كبيره و تكييف محترم و كويسه بالمبلغ دا حاولى تجيبى بيجو 405 الايرانى مش الفرنساوى هتلاقى موديلاتها 2006-2007 عربيه ناشفه و تقيله فى صاجها و محترمه الصراحه و تكييفها و عفشتها فوق الممتاز عن تجربه شخصيه