عايزحد بتاع قطع غيار فى بورسعيد

[moustafa2500]

السلام عليكم انا كنت عملت موضوع علشان اعدل ابيزا 98 ل 2001 وشكرا للإخوة الأفاضل اللى ردوا المهم لفين فى الحرفيين لقيت الأسعار غالية شوية ففى ناس نصحتنى اروح برسعيد ارخص فمعلش هو فرق السعر يستاهل السفر وكمان لما اجيب النص حجيبة خلصان جمرك ولا حجمركة واية الورق اللى يكون معايا وكمان ياريت حد من الإخوة الأفاضل يرشحلى حد بتاع قطع غيار هناك يكون موثوق منة علشان انا معرفش حاجة هناك وشكرا مقدما

[the magice]

نصيحة ودي عن تجربة خليك في الحرفيين احسن .
اولا تقريباً مفيش فرق في السعر
ثانيا لو في فرق سعر يستاهل ممكن تلاقي نفسك دفعت اكتر منه نقل ولسه هتشوف حوار الجمرك ده كمان (بصراحة معرفش عنه حاجة)
ثالثاً خلينا نفترض انك حسبتها ولقيت في فرق مجزي يخليك تجيب من هناك واشتريت فعلا وارد جدا ان يكون في حاجة ناقصة حاجة عايزة تتغير شوف المشوار بقي والعطلة ده غير الورق بتاع الموتور
رابعا عشان ماتقولش اني بعقدك او اقفلها في وشك لو عاوز تجيب من بورسعيد يبقى تعمل الشغل هناك اوفر واريح
وبالتوفيق ان شاءالله

[the magice]

بالمناسبة الاسعار في الحرفيين اخبارها ايه يعني اقل سعر واعلي سعر سمعته عشان احتمال انزل بكرة الف لفة كده (عشان يعني ماتخضش من اللي هسمعه)

[moustafa2500]

بص هو انا تقريبا لفيت الحرفيين كلها مرتين بص نص 98 من بق الراجل عامل 10 اما نص 2001 عامل 11
اما المواتير فالرينج تقريبا 3500 موتور كامل بالفتيس بترمبة البارور ....الخ وفى ناس قالتلى 5000 دة علشان انا سألت على ال1600 سى سى ودة مش موجود تقريبا المنتشر 1400 التابلوة كامل 98 من 700 الى 1000 الفوانيس الأمامية عاملة 250-300

[moustafa2500]

ومعظم الشغل دلوقتى مش قوى اصبر على الإسبوع الجاى او اخر الإسبوع دة معظمهم نازلهم شغل جديد

[the magice]

الانصاص غالية اوي ليه كده ده اعلي سعر الواحد كان بيسمعه في نص ٢٠٠١ مثلا كان ١٠٠٠٠ والمكن اسعاره معقولة
بس ماعندكش فكرة الانصاص كان في حاجة منها عليها مكنة كبيرة ١٨٠٠ او ٢٠٠٠

[moustafa2500]

انا اللى خالانى اسأل على بورسعيد ان ميكانيكى هناك قالى النص هنا حيعمل 9 بس فى بورسعيد حيعمل فى حدود 7 ونقل من 300 الى 500 ففرق حوالى 1500 جنية يعنى حتى ايد الميكانيكى بس كدة

[the magice]

مش عارف انت كده هتخليني افكر في بورسعيد بس عشان اللي اعرفه من خلال تجربتي الشخصية ان الاسعار تقريباً واحد فقولت اخدها من قصيرها وانزل الحرفيين علي طول لكن انا بالنسبة ليا مفيش فرق بين بورسعيد والحرفيين لان انا من السويس يمكن الفرق الوحيد اني اعرف كام تاجر في الحرفيين بعكس بورسعيد مانزلتهاش غير مرة واحدة

[moustafa2500]

معظم المحلات بتقول ان فى شغل حينزل الإسبوع دة او بالكتير اللى جاى فبسألة على المكن اللى موجود بيقولى معرفش حسب اللى نازل لكن كل الإنصاص عليها مكن 1400 ماعدا الشيخ بس لقيت عندة نص شكلة مش ولابد وعلية مكنة 1600 وطلب 11 فعلشان كدة بورسعيد حلاقى خيارات اكتر فياريت لو نزلت اليومين دول قولى علشان اعرف الدنيا عاملة اية بدل لما اضرب مشوار لبورسعيد على الفاضى

[lancer06]

الفكرة فى بورسعيد انك لو محتاج لبن العصفور هتلاقية
لما توصل بورسعيد بالسلامة أسأل على بنك الإسكان
هناك هتلاقى اللى انتا عاوزة
دور ولف وشوف دة ودة واعرف الأسعار وفاصل
أنا كنت بشترى اسكاترا للبوما ولفيت عندنا فى دمياط وكانت وقتها فعلا مش موجودة سعرها كان عندنا ( 2500 ) جبتها من بورسعيد ب2000 ولقيتها متوفره
واتاأكد من ورق الأفراج الجمركى للموتور على حد علمى دا المطلوب علشان الترخيص
واعتبرها فسحة وقضى بقيت اليوم هناك بورسعيد جميلة

[moustafa2500]

خلاص ربنا يسهل ممكن انزل على يوم الأربع

[the magice]

لا يبقى كده بورسعيد ان شاءالله احتمال اروح بكره او بعده بالكتير

[moustafa2500]

معلش لو فيها رخامة ممكن تقولى الدنيا اخبارها اية والأسعار نظامها اية قبل لما انزل

[the magice]

اكيد طبعاً انا اصلا كنت هعمل كده وبعدين مفيش رخامة ولا حاجة احنا اخوات

[moustafa2500]

ربنا يخليك يارب