سؤال الى اهل الخبرة فى ابيزا 99

[mahmoudkiko]

السلام عليكم
يا جماعة انا الحمد لله اشتريت ابيزا 99 ب 35 الف جنيه و حالتها ممتازة
بس التكييف فيها محتاج تصليح
السؤال بقى هل السعر ده كويس؟
و هل الموتور 1000 ده يستحمل التكييف ولا ماشغلزش احسن ؟

[Ahmad]

سلام عليكم,

أولا ألف مبروك العربية و ربنا يباركلك فيها.

بالنسبة للسعر, لو هي جميع الكماليات و مش ماشية كتير فهو يعتبر قليل عليها لو حالتها ممتازة. انما يمكن علشان ظروف البلد دلوقتي الأسعار قلت شوية.

بالنسبة للتكييف, لو هو التكييف الأصلي هيشتغل معاك كويس ان شاء الله و تأثيره مش هيظهر غير في الزحمة و المطالع انما في المشي العادى و السرعة بيشتغل بكفاءة بدون ظهور حمل زائد علي الموتور. المهم يكون الأصلي علشان قوته تكون مناسبة للموتور بتاعك. و لو منفعش تصلحه يستحسن تشتري واحد جديد أو مستعمل (استيراد) بس يكون مخصص للموتور ال 1000 سي سي.

مبروك مرة تانية.
.

[mahmoudkiko]

لقد خالفتم القاعد ( 6 ) بند ب
يرجى مراجعة قوانين المنتدى
ــــــــــــــــــــــــــــــــــــــــــــــــــ ـــــــــــــ
مشرف فرعي ( 1 )

[umoussa]

مفيش حاجة اسمها تكييف للموتور الـ 1000 سي سي وتكييف للمواتير الأكبر..

على الجانب الفني الموتور الـ 1000 سي سي عملي جداً بس طبعاً مع التكييف العربية حتبقى عجلة ومتحاولش تقرص عليها علشان متجبش أجل الموتور بدري..

حتلاحظ إن العربية ممكن تبطل منك وانت في الملفات لو مشغل التكييف ودا لأن التكييف ومكنة البور بيحملوا على الموتور في نفس الوقت..فخلي رجليك حساسة على البنزين وحس بالعربية..

زي ماقولتلك متحولش تقرص على العربية علشان طقم الدبرياج ميفوتش وكدا كدا مش حتاخد قدرة أكبر من المحرك..

لما تزهق من الموتور، سقط فيه موتور 1400 وحتحس أكيد بفرق تاني خالص ولو 1600 حيبقى فرق مذهل!

حافظ على الصيانات:

بوجيهات بلاتنيوم كل 50 ألف
فلتر زيت كل 10.000 كم
فلتر بنزين وهواء كل 20.000
فلتر التكييف: كل داخلة صيف وشتاء
زيت فتيس كل 20.000 كم
أسلاك بوجيهات كل 80.000 إلى 100.000 كم حسب سحب العربية
كاتينة وسيور كل 50.000 كم
طقم دبرياج كل 80.000 كم (الأصلي Value)
مياه تبريد حمراء "Hepu" كل 20.000 كم - أوعى تستعمل سائل تبريد تاني
زيت باور أمريكاني أبيض "علبته لونها أصفر" أو الزيت الأصلي بتاع فولكس ودا لونه أخضر. إوعى تشتري زيت باور من محطة البنزين "لونه أحمر" وتزود لو الزيت ناقص، كدا انت حدمر طرمبة الباور وعلبة الدركسيون.
تيل أمامي كل 20.000 كم على الأكثر وحسب استخدامك
تيل خلفي كل 100.000 كم
حساس الشكمان مفروض يتغير كل 100.000 كم بس هو غالي

إوعى تغسل موتور العربية بالماء أو الجاز أو أي شيء، ممكن تنضفه بالفوم الي بيتباع في محطة البنزين..

ممكن تنضف السربنتينة الخارجية بتاعة البنزين بالماء كويس أوي وبعدين تنشفها بالهواء في المحطة وحتحس بفرق جامد في التكييف.

متغسلش الجنوط والعربية ساخنة، يعني التيل والطنابير سخنيين لأنك حدمر تيل الفرامل وحتبوظ الطنابير - مش علشان تخلي شكل العربية حلو تبوظ حاجة تانية.

استعمل زيت الفتيس بتاع إسو (80SAE - 90) أو نفس الزيت ده بتاع إمارات مصر ومتخليش محطة البنزين تعمل الحكاية دي، إعملها عند الميكانيكي بتاعك وتأكد من إنزال الزيت بالكامل.

ربنا يباركلك فيها ويكفيك شرها

[Ahmad]

مفيش حاجة اسمها تكييف للموتور الـ 1000 سي سي وتكييف للمواتير الأكبر..

أعتقد انا محتاج أفهم النقطة دي أكتر لأني مختلف معاك فيها.
أنا أعرف أن كومبريسور التكييف له قدرة حصانية معينة, و تلك القدرة الحصانية علي علاقة طردية بالقوة أو الطاقة المطلوبة لاخراج تلك القدرة الحصانية من الكمبريسور.
و بالتالي لابد من وضع كمبريسور يتناسب مع قوة الموتور الذي يمد الكمبريسور بالطاقة.

لو كلام حضرتك مضبوط يبقي أنا أقدر أركب علي الموتور ال 1000 سي سي كمبريسور كان راكب علي موتور 4000 سي سي مثلا وسوف يستخدم نفس الطاقة التي كان كمبريسور ال 1000 يستخدمها و يخرج قدرته الحصانية بالكامل!!
هل الكلام دة صحيح؟

حاجة كمان, أنا ركبت ابيزا 1000 بتكييف أصلي, و أخري بتكييف متركب, و لاحظت فرق كبير في السحب عند تشغيل التكييف. و حصل ايضا مع بولو 95 1300 سي سي بتكييف مش أصلي و لاحظت أن التسارع في الابيزا ال 1000 كان أفضل من تسارع البولو علي الرغم من فرق ال سي سي .

في انتظار توضيحك.
شكرا.

[umoussa]

شوف يافندم:

الإبيزا والبولو 1000 و1400 و1600 8 صباب و16 صباب الكمبريسور بتاعهم واحد

مش معنى كدا بتاع البولو يركب على الإبيزا

أنا قصدي إن الكمبريسور بالنسبة للموتور من 1000 إلى 1600 سواء 8 صباب أو 16 واحد ومبيتغيرش.
وبعدين أنا بتكلم على عربية 4 سلندر مجبتش سيرة عربية أكبر من 4 سلندر. وطبعاً بتكلم على البنزين مش الديزل

حكاية السحيب بقى بين البولو والإبيزا دي حاجة طبيعية

العربية المجهزة أصلا بتكييف بيبقى ليها تجهيزات في كنترول العربية وضفيرة الكهرباء بتاعة العربية من الداخل وضفيرة الموتور.

أما العربية الي متركبلها تكييف بتكون من غير تجهيزات في الضفيرة الداخلية وضفيرة الموتور وعلشان كدا العربية بتخرف وحتلاقي أصلا التكييف المتركب شغال على كتاوت بدون أي حساسات ولا كنترول مراوح ولا طقم تبريد صحيح...ضرب من الآخر

العربيات الحديثة كلها حساسة جداً للمستويات الكهرباء والإلكترونيات وكل جزء في العربية ليه كنترول (وحدة تحكم) وطبعاً في حاجات كتير بتكون متصلة ببعض وليها تأثير على بعض من ضمنها التكييف والباور

[Ahmad]

شوف يافندم:

الإبيزا والبولو 1000 و1400 و1600 8 صباب و16 صباب الكمبريسور بتاعهم واحد

مش معنى كدا بتاع البولو يركب على الإبيزا

أنا قصدي إن الكمبريسور بالنسبة للموتور من 1000 إلى 1600 سواء 8 صباب أو 16 واحد ومبيتغيرش.
وبعدين أنا بتكلم على عربية 4 سلندر مجبتش سيرة عربية أكبر من 4 سلندر. وطبعاً بتكلم على البنزين مش الديزل

حكاية السحيب بقى بين البولو والإبيزا دي حاجة طبيعية

العربية المجهزة أصلا بتكييف بيبقى ليها تجهيزات في كنترول العربية وضفيرة الكهرباء بتاعة العربية من الداخل وضفيرة الموتور.

أما العربية الي متركبلها تكييف بتكون من غير تجهيزات في الضفيرة الداخلية وضفيرة الموتور وعلشان كدا العربية بتخرف وحتلاقي أصلا التكييف المتركب شغال على كتاوت بدون أي حساسات ولا كنترول مراوح ولا طقم تبريد صحيح...ضرب من الآخر

العربيات الحديثة كلها حساسة جداً للمستويات الكهرباء والإلكترونيات وكل جزء في العربية ليه كنترول (وحدة تحكم) وطبعاً في حاجات كتير بتكون متصلة ببعض وليها تأثير على بعض من ضمنها التكييف والباور

سلام عليكم,
الحقيقة كلام حضرتك صحح لي مفاهيم كتير كانت غلط, لأني كنت فاهم أن كل موتور له الكمبريسور المناسب لقوته. بس توضيح حضرتك عن وحدة الكونترول و الضفيرة و منظومة الكهرباء يفسر الي حد كبير الفرق في السحب بين السيارات المزودة بتكييف أصلي و الأخري التي تحتوي علي تكييف غير أصلي.

شكرا لك.

[umoussa]

بص يافندم العربيات الحديثة كلها مشكلتها كهرباء وضفائر والكترونيات مش ميكانيكا

علشان كدا غلط الكهرباء متعرفش ممكن تعمل أيه، لأنها ممكن تعمل مشاكل فظيعة

تحت أمرك في أي وقت

[M.Mostafa80]

دائما الى الأمام ياهندسه وربنا يوفقك وتكمل مشروعك عشان نلاقى مكان يكون فى حد بيفهم هو المسئول عنه

[SaNisSro]

ان شاء الله الف مبروك يا باشا والسعر حلو