بنت مش فاهمه حاجه بتشترى ابيزا 2002

[safia]

انتوا باين عليكو فاهمين اوى فياريييييييييييييييييييت حد يساعدنى لانى مش فاهمه اى حاجه و باشترى عربيه لاول مره ,معروض عليا ابيزا 2002 ب 37000 الزجاج فى باب السواق بايظ هو كهربا و و الاير باج طالع لان فى قطع كده فى الدركسيون ومفيش كالاكس و راشه من بره بس و محتاجه باور ولما شغلت التكيف على الاخر لقيت صوته عاللى كده فياترى الحاجات دى تتصلح بكام ؟؟؟؟؟؟وسعرها كده حلو ولا ايه النظام؟؟؟؟والحاجات دى لو اتصلحت تباه العربيه كده تمام و لا ايه؟؟؟صاحبها فالى انه مغيرلها ديسك و اسطوانه ياريت حد يرد عليا بسرعه

[A.Saad]

صباح الخير
وايه اللى جابرك على كدة
ممكن تجيبى حاجة تكون افضل بسعر قريب
وبعدين لازم تعرفى اللى بايظ ده هيصلح بكام
وتضيفيه على تمن العربية
وتضيفى كمان تكلفة نقل الملكية فى الشهر العقارى
يبقى تمن العربية الحقيقى

عارفة اكتر عيب فى الابيزا ايه
انها محبوبة من الشباب يعنى الشباب بياخدوها وحرق وقرص وشد وكل ده غلط عليها طبعا
تانى حاجة انصحك تكشفى فى التوكيل بالذات لانه هيطلعك كل العيوب فى العربية
وعلى فكرة ممكن ساعتها تاخدى مقايسة باسعار الحاجات المطلوبة مع ملاحظة ان التوكيل اسعاره اغلى من برة
وطبعا ممكن تضغطى على البياع انه ينزل فى التمن مقابل العيوب دى

[ezzatfox]

الايرباج طالع لبرة مش عشان فى قطع فى الدركسيون .. اكيد عاملة حادثة و متصلحة .. اكشفى عليها كويس اوى .. و يا ريت تبعدى عنها خالص عشان باين مشاكلها كتير .. و انتى بنت و مالكيش فى حوار الصنايعية و قرفهم

[M.Mostafa80]

الايرباج طالع لبرة مش عشان فى قطع فى الدركسيون .. اكيد عاملة حادثة و متصلحة .. اكشفى عليها كويس اوى .. و يا ريت تبعدى عنها خالص عشان باين مشاكلها كتير .. و انتى بنت و مالكيش فى حوار الصنايعية و قرفهم

عين العقل الكلام الى أنتا قايلو ثم أن السعر دا لوحدو يقلق موت

[safia]

ميرسى يا جماعه لكل اللى رد و اللى ماردش لسه
طب هوا الكشف على العربيه فى التوكيل بيكام؟؟؟انا جبت ميكانيكى يشوفها قال الماتور كويس والتكيف عاوز مروحه وانها مرشوشه من بره بس والعفشه محتاجه تزبيط لكن معرفش انها عاوزه طلمبة الباور دى اللى عرفنى هو صاحب العربيه نفسه !!!قالى علشان تعرفى ان الميكانيكى اللى جايباه حمار و بيفهمش :(

اما اللى جابرنى على العربيه دى فلان صاحبها حياخد 25000 والباقى بعد 6 شهور من غير فايده فا مفيش حاجه حلوه بالفلوس اللى معايا دى غير الاخت اللى محيرانى معاها دى يعنى فى ظل الفلوس اللى معايا دى معنديش خيارات كتير انا فى الاول كنت بادور على 128 تخيل يجى واحد يقولى ابيزا و كمان 2002 كنت حاموت من الفرحه وقلت اكيد دى من دعاوى امى بس لما ابتدت العيوب تيهل ابتديت اقلق لتكون الدعاوى دى عليا مش ليا :)
اه هو فلوس التسجيل فى الشهر العقارى بتكلف كام؟؟؟

[PoweRPassioN]

ربنا يوفقك
بس خلي بالك لان سوق المستعمل ف مصر كله الاعيب!!
أنا عندي عربيه اقل حالتها ممتازه احسن ما يطلعلي القطط الفاطسه بعد ما اشتري الابيزا 2002 واتبهدل بيها ...
وخاصه انك بنت ..
خدي وقتك اوي ولو ليكي فيها نصيب وفيها الخير ربنا هيوفق

[kareem_Ashmawy]

نصيحة بلاش العربية دى
غالبا صاحبها عامل تسهيلات فى الدفع عشان يخلص منها
ابعدى تماما عن عربية عاملة حادثة ( عشان الايرباج اللى فتحة دى)..دا غير ان طرمبة الباور دى سعرها كام؟؟
ممكن بال 25000 دول تجيبى فيات اونو حالته حلوة
او كيا برايد مكيفة و الاتنين دول مناسبين جدا لبنت و قطع غيارهم
رخيصة و صيانتهم عند اى ميكانيكى
و ممكن هيونداى اكسنت او اكسيل فى اوائل التلاتينات

[safia]

طيب يعنى طلمبة الباور دى سعرها كام بره التوكيل ؟؟؟والأزاز اللى بايظ ده يتكلف كام؟؟؟يعنى اقصد لو التكلفه مش عاليه مش الواحد بخلص فيها و خلاص اصل بصراحه شكلها حلو اوى:K_crying[1]:مش مهم دلواتى احط فيها اير باج و لا اصلح تكييف

بس انا برضو خايفه لاتدبس و يجو يقولولى شوفتى ما احنا قولناليك بس انتى اللى ما بتسمعيش الكلام

[safia]

هوا فعلا صاحبها عاوز يخلص منها بس ده علشان هوا مش مصرى كان شاريها زبرو فى فترة الجامعه و هوا دلواتى خلص دراسه و راجع بلده فعاوز يبعها و يسافر

[aif]

الابيزا المستعملة ... غالبا بتبقى حالتها مش كويسة .... يمكن عشان عربية شبابي والشباب بيبقو مبهدلين العربية ..
وبعدين قطعها غالية
ما تشوفي غيرها احسن ...بلاها الابيزا .... خدي بيكانتو مثلا ... عربية بناتي ومش غالية
ولو تقدري تدفعي المبلغ ده مقدم لعربية زيرو ... ح تريحي نفسك من الصنايعية والقرف

[Terrible_DaRsH]

موديل 2002 ومتغيرلها ديسك واسطوانة !!

وكمان محتاجة شغل كتير و ب 37000 ...

قولى له شكرا احسن ..

[mahmoudzaied]

ابعد عن الشر وغنيلو
الايرباج مفتوحة (يعنى حادثة جامدة) وكمان رشة برة دا غير التصلحات (يعنى هتتكلف) وطالب فيها 37 الف
اعتقد انو مش حلو وفعلا فيه بدايل تانية كتير واحسن بمراحل
عندك البيكانتو - اكسنت - اكسيل
والحالة كمان هتبقى احلى
نصحتى بلاش العربية دى

[A.Saad]

تقدرى تبعتى صورة الايرباج دى

الكشف فى التوكيل من 200-300 جنيه
هيا العربية فين

تانى حاجة
العربية فيها كام توكيل


ياريت تخشى على المواضيع دى وتقريها

http://www.nilemotors.net/Nile/showthread.php?t=20244

http://www.nilemotors.net/Nile/showthread.php?t=65672

[M.Mostafa80]

يأخت صافى أبعدى بالثلث عن العربيه دى العربيه دى مرزوعه وأحتمال يكون فيها نصبايه وخصوصا أنك بتقولى صاحبها هيسافر بره يعنى أى مشكله فى الورق فى لفظ متداول ما بين الشباب هتلبسى فى الحيط وحقك هيضيع ما تنبهريش بالشكل والنوع وتدبسى نفسك فى كتله مشاكل ومتعرفيش تطلعى منها دا غير أنك بتقولى أنها أول بختك خودى بالك وصلى أستخاره وشوفى ربنا هيوفقك لأيه

[safia]

هوا اول مشترى للعربيه كان شاريها زيرو