اي حد يديني رأيو عن التوكيل...

[mr_shims_49]

لأ هي نازلة بجنط حديد 15 بس

[Mystique]

السلام عليكم

أنا عارفة طبعا إن الموضوع قديم جدا بس مكنش عندي اللي أضيفه ساعة ما اتعمل الموضوع ده لإني كنت لسة شارية العربية جديد وممريتش بتجارب تعامل مع التوكيل..
لكن دلوقتي العربية الحمدلله معايا من شهر 5 وحبيت أتكلم شوية عن توكيل سيات من خلال تعاملاتي معاهم..

أنا معايا ليون 2009..كنت كتبت عنها بعض التعليقات ف موضوع عن تجربة قيادة ليون

أما بالنسبة لخدمة ما بعد البيع..أنا اتعاملت تقريبا 4 مرات مع التوكيل وطلعوا ناس قمة في الإحترام..أنا كان ليا تعاملات قبل كدة مع توكيل بيجو أيام ال 206 اللي كانت قبل الليون..بجد الفرق شاااااااااااااسع بين التوكيلين

نبدأ التفاصيل

أول زيارة للتوكيل كانت في شهر أغسطس الماضي..رحت عشان أعمل صيانة ال 5000 بتاعت العربية وكان عندي فانوس شمال أمامي مكسور كنت عايزة أغيره
دخلت العربية الساعة 9 ونص واستقبلنا هناك المهندس مينا..كان شخص محترم..سألني عن أي تعليقات ليا تانية على العربية..قلتله إنها قريبة جدا من الأرض وبتاخد معظم المطبات لما بتكون محملة (ساعات الأسرة بتكون راكبة معايا ومسافرين بيها)..كان رده إن هي عربية رياضية يعني مش لإستخدام عائلة كبيرة وإنها قصاد كدة بتدي ثبات عالي وهو مكدبش فده..العربية فعلا ثباتها ممتاز..ولما رفع العربية وروني إنها مصفحة من تحت كويس ومفيش حاجة بتتأثر..مجرد خدوش بسيطة بس في التصفيح اللي تحت من غير عفصة حتى..مع إن كان في مطبات مميتة بتتاخد لو حد عارف طريق الصعيد الزراعي..

التعليق التاني اللي قلتهوله إن البلوتوث كان من ساعة ما اشتريت العربية باجي أدي الأوردر بالصوت وترد عليا السكرتيرة إياها بس مفيش حاجة بتتنفذ..ولو اتصلت بحد أسمعه وميسمعنيش..
وكان في حاجة تالتة..إن كان عندي سويتش الإزاز الكهربا اللي ف الباب اللي ورا يمين مش شغال عشان كان في خبطة جامدة ف الباب ده ورجعته ع البارد عندنا ف أسيوط (مع إني كنت ضد إنها تتفتح بره التوكيل بس أوامر سيادة الوالد كان هو اللي سايقها ع الطريق السريع..حب ياخدها لفة عشان عاجباه أكتر من اللانسر بتاعته وهو اللي خبطها فحس إنه مسؤول إنه يصلحها)..أنا مقلتلهمش قصة خبطة والكلام ده..الصراحة تخيلت إنهم زي توكيل بيجو..هقول اللي عايزاه ف العربية وأطلع أستلمها وأدفع كاشات أد كدة ف الآخر..قلت مش فارقة..متخيلتش إنهم ممكن هيصلحوه ببلاش..حسيت بتأنيب ضمير شوية
المهم..الباشمهندس مينا قاللي أوكى يافندم وسجل كله ف الورقة عنده وخدت نسخة منها وكان مكتوب فيها كل اللي المفروض هيتعمل ومعاد تسليم العربية الساعة 2..ودخلت الاستراحة وكنت من فترة للتانية بطلع أبص عليها.
اتعملتلها الصيانة وفكوا الاكصدام عشان الفانوس وبعد ما فكوه قالولي إن فانوس الليون بعتوا للمخزن لقيوه خلصان فهضطر أرجع مرة تانية بعد أسبوع يكون اتوفر عندهم..وده أحد العيوب اللي كنت خايفة منها..عدم توفر قطع الغيار..خصوصا إني كنت كلمتهم اليوم اللي قبله أتأكد إن الفانوس موجود بدل ما آخد مشوار ع الفاضي وقالولي إنه موجود..معرفش هل معقول يكون طلع ف يوم؟..طب ليه معندهومش ستوك منه؟
اتضايقت جدا وقلت دي بداية مبشرة
بس الصراحة أنا رحتلهم بعدها بأسبوع ولقيت الفانوس فعلا بس كنت رايحة متأخر وقالولنا العربية هتاخد وقت وكنا مسافرين يومها..قالولي ممكن نبعتهولك على أسيوط..كلمت فرعهم ف أسيوط بعد ما رجعت..قالولي حضرتك الوحيدة اللي معاكي ليون واللي معاهم سيات أصلا يتعدوا ع الصوابع هنا مش هنطلب مخصوص هنستنى لما تيجي عربية فيها حاجات لينا ونبعته معاها..أتأخروا عليا ومتابعتش معاهم وقررت إني كل تعاملاتي تبقى مع مركز الصيانة ف القاهرة.
المهم على الساعة 12 ونص كدة أو 1 إلا..رحت أشوفهم وصلوا لإيه عشان كنت رتبت على معاد على 2 ونص..قالولي خلصنا الصيانة يافندم وغيرنا السويتش بتاع الإزاز الكهربا..طب والبلوتوث؟..قاللي معلش يا فندم ده هيحتاج وقت شوية..أنا عشان كنت مستعجلة..قاللي خلاص حضرتك تشرفينا بكرة بنفس الورقة اللي معاكي وحد هيشتغل فيها على طول..قلت ماشي
خدت الفاتورة..لقيتها 550 ج شاملة صيانة وفك وتركيب اكصدام أمامي..50 جنيه..ناديت المهندس تاني وقلتله حضرتك دلوقتي إنتوا فكيتوا الاكصدام قبل ما تسألوا إذا كان الفانوس موجود ولا لأ..وطلع مش موجود..أنا أدفعهم ليه؟ (كان معايا والدي وكنا داخلين حاميين فاكرين التوكيلات بقى فيها شغل نصب من ده وادفع يا سيد وحاجات من دي بحكم اللي أعرفه)
لقيناه مستغرب جدا..ومتناقش أصلا..خد الفاتورة بنفسه وقالنا لا يافندم دي فيها غلطة مش هتدفعوا الكلام ده..ثانية واحد..وخد الفاتورة وراح يطلع واحدة تانية من غير السطر ده..وجابهالنا تاني..
الصراحة ابتديت أستريح نفسيا ناحية التوكيل عشان مبيستهبلوش ومبيقاوحوش..

تاني يوم..قمت طالعة ع التوكيل تاني لوحدي عشان موضوع البلوتوث وواخدة معايا نسخة الورقة إياها
وريتهالهم والمهندس مينا دخلها على طول يشتغلوا فيها..مفيش ساعتين لقيتهم بينادولي ويقولي تعالي يا فندم جربي البلوتوث..كان في فيوز تقريبا مش شغال غيروه..جربته كويس وكله تمام..وطلعت..ودي كانت أول مرة ف حياتي أدخل توكيل وأطلع ومدفعش حاجة..قلت الحمدلله اتعاملوا مع الموضوع إنه عيب صناعة من غير ما يتناقشوا أصلا ف الحكاية ولا يسألوا أي سؤال..(مع إنهم كان ممكن يقرفوني إني جايالهم بالعيب ده بعد ما اشتريت العربية ب 4 شهور..إيش ضمنهم إنه من ساعة ما اشتريتها)..
بس هي فعلا كانت كدة..بس عشان أنا استلمتها ف أسيوط ظروفي مسمحتش إني أسافر بيها التوكيل غير ف التوقيت ده..

المهم..
غبت بعدها ونزلت القاهرة من اسبوعين تقريبا..
وبعتت العربية مع السواق عشان يركبلها الفانوس من غير ما اتصل قبلها..
خدت تقريبا 3 ساعات وجاتلي الفانوس متغير وكله تمام والفانوس القديم معاها..ببص ع الفاتورة لقيتها 1100 شاملة فك وتركيب اكصدام 50ج..فانوس أمامي شمال 880ج..مصنعية 30ج..وضرايب مختلفة..

كان عندي خبطة ف الباب اليمين (فاكرينها؟) كنت عايزة أصلحها مظبوط عشان باينة مع الإضاءة إن الصاج مش ماشي عدل..وعندي خبطة بخدوش جامدة ف الباب و الرفرف اللي ورا شمال برضه كنت عايزة أصلحهم ويترشوا (العين وحشة هنعمل إيه)..وشوية خدوش صغيرة ونقر متفرقة..قلت للسواق يقللهم يظبطوها..قالولوه العربية تقعد 4 أيام متواصل وياخدوا فيهم 500 جنيه..خسيت إنه معقول..(أنا صلحت خبطة الرفرف اللي حوالين الفانوس المكسور بنفس ال 500 ج دول بس ف أسيوط)..لكن كنت محتاجة العربية ف مشوايري فقلت أبقى أجيبها مرة تانية أكون مش محتاجاها..

آخر تعامل معاهم كان موقف اتغظت فيه جدا وكان ابتدى يشككني ف صناعة العربية..
كنا بنقضي مشوار عادي جدا ومن حظي إني كنت لسة ف القاهرة..المهم..نزلت أشوف محل مفيش دقيقتين ورجعت أركب تاني وأدور..العربية مبتدورش..حاولت كذا مرة..مفيش فايدة..صوت تكتكة كدة وأنا بحاول أشغلها..السي دي جايبلي error..الإزاز الكهربا شغال بس الوان تاتش أوبشن والسينسور بتاع العوائق مش شغالين..السواق طبعا قاللي مارش وقال حاجات غريبة..وخللى حد يزقها واشتغلت..أنا كنت هولع..قلتله فورا ع التوكيل..وصلنا هناك الساعة 4 إلا..قابلنا مهندس محترم إسمه عادل..قلتله العربية حصل كذا وكذا..طفيناها وجه يشغلها مدارتش برضه..قالنا دي بطارية..السواق قاله بص ع البطارية هتلاقيها كويسة..قاله دلوقتي هنعرف فيها إيه ودخلوها على طول يشتغلوا فيها..ومعايا نسخة من الورقة اللي بيكتبوها ف دخول أي عربية مكتوب فيها فحص البطارية..ومكتوب ضمان..طبعا أنا رحت قعدت ف غرفة الانتظار بقول يارب ولد..قصدي يارب تقوم بالسلامة..
ساعة بالظبط والمهندس قاللنا خلاص يافندم كله تمام..دي كان فيها بطارية وغيرناها..طبعا أنا قلتله في بطارية تفضى بعد 8 شهور بس؟..وفجأة كدة؟..قالي عادي..أنا كنت شاكة برضه ف كلامه (أصلي معرفش كتير ف المواضيع دي) سألت السواق ساعتها وسألت خطيبي بعدها أتأكد قاللي وارد البطاريات الجافة تخلص فجأة ف خلال سنة أو سنة ونص من الاستخدام..
المهم..المهندس قالنا هندخل العربية تتغسل دلوقتي..قلتله والفاتورة..قاللي مفيش حاجة يافندم..دي بطارية وعلينا..
ودي تاني مرة ف حياتي أدخل توكيل وأطلع وأنا مدفعتش حتى تمن غسيل العربية..

خلاصة الحكاية الطويلة..
أنا مجربتش توكيلات غير بيجو..وكان زبالة..قلة إحترام و قلة زوق ف التعامل..ومفيش حاجة بتعملها غير لما تكيش عليها أد كدة..أنا رحتلهم بعد ما اشتريت البيجو ب 7 شهور وعداد الآر بي إم واقع قالولي حضرتك هتغيري لوحة العدادات بألف ونص..قلتلهم ازاي وعربية جديدة وضمان وبتاع..مفيش فايدة..ومصلحتوش..

توكيل سيات كانت الناس مخوفاني إنه نايم وإنهم متكبرين وأكيد تعاملاتهم مش ظريفة..وقطع الغيار مش متوفرة..يمكن الحتة الأخرانية صحيحة بس مش بنسبة كبيرة..هي مرة واحدة بس اللي رحتها وملقتش اللي كنت عايزاه عندهم وبيوفروا الحاجة بسرعة..
الناس هناك محترمين جدا من ناحية التعاملات 5 من 5 لو هقيمهم
توافر قطع الغيار 4 من 5
أسعار الصيانة وقطع الغيار معقولة جدا بالنسبالي 4.5 من 5
الوقت..بيحترموا مواعيدهم..العربية مبتاخدش وقت وبتدخل غالبا على طول 5 من 5 (أكيد مساعدهم إن التوكيل معليهوش ضغط طبعا زي ميتسوبيشي أو بيجو أو كيا)
إيه تاني..مش عارفة..بس حسيت إني الحمدلله مطمنة ع العربية..أي حاجة بتحصل فيها هم بيشيلوها..صحيح كنت زعلانة من موضوع البلوتوث والبطارية..بس وارد أي عربية تظهر فيها مشكلة..وهنا يظهر أهمية الضمان وخدمة ما بعد البيع وده هم بيوفروه كويس بيخلوني مزعلش لو ظهرت فيها حاجة
يارب يستمروا كدة
وبحمد ربنا دايما على قرار شراء العربية دي بعد حيرة وخوف كتير طلعوا مش ف محلهم
العيب الوحيد ف نظري حاليا..مفيش فروع تانية لمركز الخدمة

بس
بتأسف إني طولت عليكم بس حبيت أسرد تجربتي معاهم بالتفصيل عشان لو حد يهمه الأمر يقراها ويارب أكون قدرت أفيد

شكرا لوقتكم.
السلام عليكم.

[dr_hassan82]

متفق معاكى فى كل حاجه قلتيها وعلى التقييمات

التعامل ممتاز والاسعار مش زى مالناس فاكره .. شايف انها مناسبه اوى ....بالنسبه لالمانى معمر

الصراحه توكيل اكثر من رائع .... وبيطبق سياسية اللى يجينى يعرفنى ويكدب الشائعات اللى بتتقال
عنى ...
بالذات المهندس مينا .... شخص رائع بكل معنى الكلمه
ودعونا نعمل فى صمت
عيبه الوحيد انه مقصر جدا جدا فى الدعايه ومكبر دماغه زى توكيل اوماترا فيات
...
على فكره الليون بتاعتى من مايو 2008
وقريبا هروح اعمل صيانة 40.000 كم

[esp]

والله حاجه تفرح القلب ان في توكيل في مصر غير بطاريه كامله ببلاش! ده عند عمو غبور لمسة المسمار بفلوس!

مجهود رائع و شكرا على التجربه

[Mohamed.Ramah]

شكرا لحضرتك على التقييم وباذن الله فى خطوة ايجابية لتوكيل سيات حتتعمل وباذن الله ناخد تخفيضات على الصيانة وقطع الغيار

[marwan_147]

متهيالى ان السيات من السيارات المظلومة فى مصر يعنى بالعقل كدة عربية زى الابيزا ولا لانوس .. المشكلة عند الوكيل مدمرها