عملت الباب الحمدلله و لكن!!!!

[inspiron]

بعد عناء دام 4 أيام ودوخة مع الصنايعية.تم بحمد الله تصليح الباب والحمدلله اللون جبناه تمام.ولكن..هناك ملحوظتين مزعليني..

1- إن الباب بعد الرش حسيت إنه مش زي ما كان 100%..يعني في حتت مكشكشة بسيييييط أوي.
2- البوية خشنة شوية عن باقي العربية و طبعا في فرق في اللمعة,,والراجل بيقول يوم الخميس إن شاء الله هيلمع العربية كلها و هتبقي تمام..والبوية تنعم واللمعة تبقي في العربية كلها...هل الكلام ده سليم..ولا بيشتغلني و أروح أنط في كرشه.

[crazylambada]

المفروض اه بس ده بعد استلام العربيه
بيمسلك بوليش على العربيه كلها بالكامل
اسمها بيسيحلك البويه

[mrsailor]

بعد عناء دام 4 أيام ودوخة مع الصنايعية.تم بحمد الله تصليح الباب والحمدلله اللون جبناه تمام.ولكن..هناك ملحوظتين مزعليني..

1- إن الباب بعد الرش حسيت إنه مش زي ما كان 100%..يعني في حتت مكشكشة بسيييييط أوي.
2- البوية خشنة شوية عن باقي العربية و طبعا في فرق في اللمعة,,والراجل بيقول يوم الخميس إن شاء الله هيلمع العربية كلها و هتبقي تمام..والبوية تنعم واللمعة تبقي في العربية كلها...هل الكلام ده سليم..ولا بيشتغلني و أروح أنط في كرشه.

الخشانة اللى فى البوية محتاجة تتصفى او تطفى بصنفرة ناعمة و مية و بعدين يلمع

[Fadi Ezzat]

الكلام صح ياباشا مية بالمية والف مبرووك على التصليح
ورد علينا بقى انتا مطنشنا بقالك كتير

[inspiron]

الله يبارك فيكم يا جماعة ..حبيبي والله يا فادي..أنا غصب عني..بمر بظروف صعبة جدا تكاد تكون قاتلة..إدعولي إنتوا بس..وأنا تحت أمركم في أي حاجة.

[spider6666]

اللي اعرفه انه بيعمل البولش بعد الرش علطول عشان تلمع
ومساله انها مكشكشة دي اول مرة اسمعها
مفيش حاجة اسمها مكشكشة
لازم تاخدها زي الفل وما تبانش انها مخبوطة والا الراجل ده يكون اي كلام في البتنجان ومش صنايعي

الا يا جماعة قولولي لو لون العربية بتاعي طفا من الرمل والمية والشمس وعاوز المعه وفيها شوية خربشة بسيطة اعمل ايه؟

[Fadi Ezzat]

اللي اعرفه انه بيعمل البولش بعد الرش علطول عشان تلمع
ومساله انها مكشكشة دي اول مرة اسمعها
مفيش حاجة اسمها مكشكشة
لازم تاخدها زي الفل وما تبانش انها مخبوطة والا الراجل ده يكون اي كلام في البتنجان ومش صنايعي

الا يا جماعة قولولي لو لون العربية بتاعي طفا من الرمل والمية والشمس وعاوز المعه وفيها شوية خربشة بسيطة اعمل ايه؟

هتعالج الخربشة ببوليش بلون العربية
وبعدين هتجيب شمع او واكس
وتحطة وتدعك جامد بقى وربنا يوفقك هههههه
هتتعب او وديها لواحد بتاع دوكو وهو هيشغل وهاتلة الشنع
والبولش عينفع بردة يخلى العربية ترجع تلمع من جديد بس لو العربية جة عليها جاز او تنر او حاجة من دى مفعول البولش كلة بيروح

[Fadi Ezzat]

الله يبارك فيكم يا جماعة ..حبيبي والله يا فادي..أنا غصب عني..بمر بظروف صعبة جدا تكاد تكون قاتلة..إدعولي إنتوا بس..وأنا تحت أمركم في أي حاجة.

ربنا يوفقك ياباشا

[Col. Eng. Khaled]

بعد عناء دام 4 أيام ودوخة مع الصنايعية.تم بحمد الله تصليح الباب والحمدلله اللون جبناه تمام.ولكن..هناك ملحوظتين مزعليني..

1- إن الباب بعد الرش حسيت إنه مش زي ما كان 100%..يعني في حتت مكشكشة بسيييييط أوي.
2- البوية خشنة شوية عن باقي العربية و طبعا في فرق في اللمعة,,والراجل بيقول يوم الخميس إن شاء الله هيلمع العربية كلها و هتبقي تمام..والبوية تنعم واللمعة تبقي في العربية كلها...هل الكلام ده سليم..ولا بيشتغلني و أروح أنط في كرشه.

حتت مكشكشة

بلغة السوق و الصنايعية (البوية مكشكرة) ، و من غير هزار و بجد شكلها يبيقى شبه التعريج إللي في "الكرشة" .

بسبب إن المعجون وحش .

[inspiron]

طيب يا جماعة قولولي أعمل إيه؟؟؟؟

[Col. Eng. Khaled]

طيب يا جماعة قولولي أعمل إيه؟؟؟؟

تتعمل من أول و جديد ، يتشال الدهان و المعجون و الباب يتعمل بالأصول

المعجون (البطانة الأول) يتعمل و يتساب لما ياخد حقه و يشد كويس (حوالي 4 ساعات) بعدين يتصفى كويس بعدين معجون الوش التاني ........ تاني يوم يتصفى كويس .

تاني يوم الباب يترش وش البطانة (خفييييييييييف) بعدين الوش النهائي مع مراعاة تخفيف "الثنر" عشان الدهان يعيش أكبر فترة ممكنة .

خللي إللي بيرش يتقّل بوية الوش النهائي عشان تدّي شكل الفابريقة "بونطة الدوكو" .

أتمنى أكون قدرت أفيد حضرتك .

بالتوفيق إن شاء الله .

[szaalouk]

مهندس خالد جاب لك الخلاصة بس تعقيب صغير من عندي بما انك احتمال تسحق الباب و تجيبه علي الصاج علشان تعيدة حاول لو فيه حاجه في السمكره تخلليها ناعمه اجدد من الجديد و تخللي بتاع الدوكو يرش معجون ( موجود معجون اسبراي للمناطق اللي ما فيهاش اي عيوب تماما ) وده بيبقي طبقه رقيقه زيه زي الدوكو النهائي وده نظام الفابريكه و مش بيكتم صوت الباب زي المعجون الستوك (اللي بييستعمل لمداراه عيوب السمكره النهائيه علشان ما يبانش لو فيه عالي و واطي ) فالمعجون هو اللي يغطي كل ده .
و بعدين زي ما الأخ خالد شرح لك و بعدين يدي طبقه ورنيش تقيله و حلوه .
حاتلاقي الباب نور زي المرايه اكتر من العربيه كلها .
بعد كده بيسحق الطبقه دي بصنفره ناعمه لسببين اول سبب انه يطفي اللمعه الجامده و تان سبب و ده الأهم لو فيه اي شوائب في الرش ( ساعات تلاقي العربيه فيها تسييله خفيفه في الدهان او حبوب في الدهان زي ما تكون رمله خفيفه ) " ده عيب فلتر الفرن اللي الصنايعيه بيستخسروا يجددوه كل فتره" المهم السحقه الأخيره بتاكل كل ده و كده يرجع الباب تمام و بعدين ياخد العربيه كلها تلميعه بذمه فتبقي ميه واحده و الف مبروك .

[Col. Eng. Khaled]

تخللي بتاع الدوكو يرش معجون ( موجود معجون اسبراي للمناطق اللي ما فيهاش اي عيوب تماما ) وده بيبقي طبقه رقيقه زيه زي الدوكو النهائي وده نظام الفابريكه و مش بيكتم صوت الباب .

الله ينوّر على حضرتك

هو حضرتك تقصد "الفيلر" ؟