Tweet
لجميع ملاك الأوكتافيا A5..موديلات 2004 ل 2009....أو بالأصح الشكل القديم حالياً
كما تعلمون....لا يوجد زر لإغلاق التكييف مباشرة....بل يجب لف بكره سرعة المروحة للأخر حتى يتم إغلاق التكييف....و هو أمر غير مريح خصوصاً ان البكره كثير بتعلق و بتزود السرعة بدل ما تقللها...
وجدت على أحد المواقع المشهورة في إنجلترا تعديل بسيط و جميل لحل هذه المشكلة و هو كالأتي:
كثير منكم يعلم ان السيارة عبارة عن copy and paste من الجولف 5....و ده واضح في العديد من المكونات المشتركة ما بينهم...
و لو بصينا للتكييف هنلاقي انه نسخة طبق الأصل من اللي موجود عندنا:
لكن الفارق في جزء صغير جداً جداً....ركزوا في البكره الوسطى...هتلاقوا زرار OFF...و ده ببساطة بيقفل التكييف علطول من غير ما تضطر تلف البكرة...و في نفس الوقت بيفتح التكييف تاني و يرجعه لأخر وضع كان عليه!
إحنا عندنا المنظر كده:
مافيش طبعاً الزرار ده....
طب نعمل إيه؟؟؟؟؟؟؟؟؟؟؟؟؟؟؟.....ركز معايا و الحل بسيط جداً جداً
1- هاتجيب أي كريديت كارد قديم أو كارت انت مش بتستخدمه في ماكينات البنوك (علشان ممكن يتلوح و مايخشش)
2- هاتدخل حرف الكارت بين خط النيكل و الزرار العيرة كما بالصورة:
3- حاول معاه لحد ما الزرار يتفك....ماتخفش مافيش أي تجريح أو خدوش هاتحصل مهما إتعافيت بسبب إستخدام الكارت
4- في الزرار من الخلف هتلاقي حتة بلاستيكة صغيره جدأ جداً...طالعه لوحدها كده....حجمها لا يتعدى ال 2 مللي كما بالصورة:
5- هاتجيب قصافة و تقطع حتة البلاستيكة دي بحيث ان المنطقة تكون كلها بسوى واحد بدون بروز البلاستيكة كما بالصورة:
6- أعد تركيب الزرار...و ألف مبروك...لديك الان زرار AC OFF...مع الفارق انه مش مكتوب عليه OFF و مش هايبقى منور...بس يؤدي وظيفته تمام التمام...و محدش أحسن من حد
7- جربت أعمل نفس الكلام في الزرار اللي تحتيه....بس ملهوش أي وظيفة...
طبعاً انا مش عارف ليه سكودا لغيت الزرار ده مع انه كان هايوفرلهم الحتة ال 2 مللي دي...بس يالا مش مهم...
أتمنى الموضوع يكون مفيد...و انكم تنزلوا تعملوه حالاً في عربياتكم :)
الموضوع بكتابتي و تصويري الخاص بالإضافة لبعض الصور من موقع أخر
Comment