سخونة شديدة في جنوط الفانتازيا

[ashahin2002]

من أكتر من أسبوع و فجأة شميت ريحة غريبة في العربية الفانتازيا بتاعتي المهم حد قاللي خلي بالك لأن الجنوط الأربعة سخنة و بتلسع المهم رحت التوكيل (الوهدان) و هناك قالولي ان السخونة دي طبيعية :( و ان التيل الخلفي عايز يتغير (العربية عاملة 30000) و قد كان و غيروه. بس برضه انا مش مقتنع لأن من كتر السخونة خلعت الطاسات و لاحظت ان مفيش ريحة لأن الريحة دي كانت بسبب ان السخونة بتلسع الطاسات فتعمل ريحة. تفتكروا في مشكلة في الفرامل و لا السخونة دي طبيعية.

[romieh]

اعتقد كده ان الفرامل فيها مشكلة

لان السخونة دى بتكون بسبب ان التيل قافش على الديسك وهو اللى بيسبب السخونة

علشان تتأكد امشى فى طريق فاضى على سرعة وبعدين مور العربية من غير ماتدوس فرامل

لو السرعة نزلت بسرعة يبقى فعلا الفرامل فيها مشكلة ولازم تخلى التوكيل يكشف عليها

[Ashraf_Ibrahim]

تيل فرامل خلفي يتغير على 30000 كم قليل جدااااااااااااااااااااااا !

[KHALED AYMAN]

ممكن تكون حضرتك بتحط رجلك على الفرامل ..سنه بسيطه اوى..مش هتحس بفرمله ..لكن بيكون التيل ماسك على الطنبوره..(انا كان فيا العاده السيئه دى و بطلتها)
ودى بتسبب تآكل التيل "الخلفى" بسرعه ..
الاحتمال التانى يكون فى مشكله فى الفرامل ورا ..وهى ان التيل قريب من الطنبوره بزياده ..لكن الاحتمال ده ضعيف ..لانها ملهاش رجلاش ..دى فى بستم على التيل ..كل ما التيل يتاكل البستم يقرب التيل من الطنبوره مسافه تعادل ما تم تآكله ..
لكن عموما
العجل و الجنوط لازم يكونو سخنين و يلسعو شويه ..لكن الغريب انه يطلع ريحه ..
ما تجرب تروح ارتوك احسن

[KHALED AYMAN]

تيل فرامل خلفي يتغير على 30000 كم قليل جدااااااااااااااااااااااا !

مش قليل جدا ..هو اصلا فى الطبيعى مش هيكمل 45 الف ..
لان العربيه دى فرامل سكينه ورا ..

[ashahin2002]

شكرا يا شباب علي الردود السريعة بس أنا عايز أقول ان العربية اوتوماتيك فمش هينفع أجرب موضوع اني امورها و امشي و اشوف هتقف و لا لأ.
ثانيا زي ما قلت ان الريحة تقريبا كانت بسبب السخونة الي كانت بتلسع الطاسات و دي كانت ريحة خفيفة و مش قوية و الأغرب انك لو قربت و حاولت تشهم العجل مش هتلاقي ريحة. (الظاهر العربية ملبوسة و لا ايه :) ).
علي العموم أنا هجرب امشي كده كام يوم من غير طاسات و اشوف هيبان ليها ريحة و لا لأ بس أنا فعلا مستغرب من 30000 حاسس انهم استعجلوا و استسهلوا و قالك ريح الزبون و اعملوا اي حاجة تسكته.
أنا بفكر الصيانة الجاية أروح الأقصي بيقولوا عليه كويس يا ريت لو حد جربوا يقولنا أخباره ايه و انا لو في جديد هقول علي طول بس أنا ليها طلب ياريت لو حد معاه العربية الفانتازيا يجرب بعد ما يمشي بيها في أخر المشوار يلمس الجنوط و يشوفها سخنة و لا لأ و يقولنا.

[KHALED AYMAN]

شكرا يا شباب علي الردود السريعة بس أنا عايز أقول ان العربية اوتوماتيك فمش هينفع أجرب موضوع اني امورها و امشي و اشوف هتقف و لا لأ.
ثانيا زي ما قلت ان الريحة تقريبا كانت بسبب السخونة الي كانت بتلسع الطاسات و دي كانت ريحة خفيفة و مش قوية و الأغرب انك لو قربت و حاولت تشهم العجل مش هتلاقي ريحة. (الظاهر العربية ملبوسة و لا ايه :) ).
علي العموم أنا هجرب امشي كده كام يوم من غير طاسات و اشوف هيبان ليها ريحة و لا لأ بس أنا فعلا مستغرب من 30000 حاسس انهم استعجلوا و استسهلوا و قالك ريح الزبون و اعملوا اي حاجة تسكته.
أنا بفكر الصيانة الجاية أروح الأقصي بيقولوا عليه كويس يا ريت لو حد جربوا يقولنا أخباره ايه و انا لو في جديد هقول علي طول بس أنا ليها طلب ياريت لو حد معاه العربية الفانتازيا يجرب بعد ما يمشي بيها في أخر المشوار يلمس الجنوط و يشوفها سخنة و لا لأ و يقولنا.

مفيش داعى للشكر يا باشا ..
مفيش مشكله ان عربيتك اوتوماتيك ...
تمورها فى الاوتوماتيك يعنى تجيب الفتيس على n عادى جدا مفيش مشكله
بالنسبه بقى للريحه ..كده انا بدات احس ان الموضوع طبيعى لانك بتقول ان الريحه مش قويه...طبيعى العربيه بعد مشوار "طويل"يبقى فى ريحه بسيطه اووووى من العربيه عموما ..نتيجه احتكاك التيل بالطنابير و حراره الموتور و تسرب حراره الموتور عن طريق الفجاوى الاماميه للعجل ...
وفعلا ممكن يكونو قررو يريحوك بتغيير التيل و اهو يستفيدو بالمره
مركز الاقصى سمعت انه كويس ..هناك مهندس يوسف السياجى (معرفش لسه معاهم ولا لا) بس ده راجل محترم جداااااااا وكان بيشارك معانا فى المنتدى هنا من فتره
بالنسبه لسخونيه الجنوط ..زى ما قلت لحضرتك طبيعى و خصوصا الجنوط الاماميه لسببين:
1-حراره الطنابير و التيل بتاثر على الجنوط وطبعا احتكاك الكاوتش بالارض بيسبب حراره و بتتنقل للجنوط
2-حراره الموتور بتتسرب للفجاوى حوالين العجل ..عشان كده لو وقفت جنب العجل الامامى و هى العربيه سخنه تحس بصهد :)
اتأكد بس انك متسندش رجلك على الفرامل و هى العربيه ماشيه ..دايما خليك ..يا اما دايس بنزين...او مش دايس حاجه خالص ...او دايس فرامل مش ساند رجلك عليها
ربنا يباركلك فى عربيتك يا باشا ..

[ashahin2002]

حقيقي انا مش عارف اشكرك ازاي يا خالد بس أنا عايز أقولك حاجة السخونة في الأربع عجلات مش الأمامي بس لكن علي العموم واضح ان الموضوع طبيعي. علي العموم انا هراقبها كام يوم و أشوف و لما ألاقي جواب نهائي هقولكوا علي اللي وصلتلوا.

[KHALED AYMAN]

مفيش داعى للشكر يا باشا ...
مهو طبعا لازم كله يكون سخن انا كان قصدى العجل الامامى هيكون سخن اكتر من الى ورا ..عشان حراره الموتور قريبه منه

[ashahin2002]

بعد الفحص و التدقيق و الضغط علي مهندس الصيانة حلفلي ان دي طبيعة الجنط و السخونة دي طبيعية. و اللذيذ يقي في الموضوع النهادرة بصيت كده في النور تحت العربية لقيت حاجة جامدة جدا .... بقية كيس بلاستيك فضل يسيح يسيح يسيح لحد ما فضل منه خط بلاستيك رفيع مدلدل تحت العربية (سي لا في يا رجالة)