بفكر فى اسكودا a4

[ainshouka]

انا بفكر دلوقتى اشترى عربية مستعملة

واللى بفكر فيه دلوقتى فى حدود المبلغ اللى معايا يجيب سكودا موديل 2004

فايه نظام العربية من حيث قطع الغيار غاليه ولا رخيصة ومتوافرة ولا بدوخ عشان الاقيها واكسسواراتها الخارجية زى الفانوس وخلافه غالى ولا عادى
واشهر مشاكلها ايه
وهل هى بتسخن ولا لأ ( لانى سمعت ان من عيوب اسكودا زمان انها بتسخن)

ولكم جزيل الشكر

[midoabokhadra]

العربية زي الفل وتمام التمام
قطع الغيار طبعا غالية اغلى من اللانسر والتويوتا
قطع غيار الماني ومعمرة . بالنسبة للسخونة دي في الفليشيا مش الاوكتافيا . مؤشر الحرارة ف الاوكتافيا على طول في النص دي مروحتين تبريد يعني
الاكسسوارات هي مش محتاجة لعب ولا اكسسوار كتير هو بس فامية ونور ابيض ف الفانوس اللي قدام واستيكرين خفاف كدة جنب النمر ورا
العربية مش بتاعت لعب ولا اهانة عاوزة مشي راسي وبعقل
يا رب اكون افادتك وربنا يوفقك لما فيه الخير بس خلي بالك كويس اوي وانت بتشتريها يا ريت لو تعرف تكشف عنها ف التوكيل علشان لو مش مظبوطة هتدفع كتييييييييير

[ainshouka]

متشكر جدا لردك

انا اقصد بالاكسسوارات الفوانيس والاشارات - الشبكة - المرايات الخارجية اسعارهم بتبقى رينجها كام

وكمان اسعار قطع الغيار زى المساعدين (امامى و خلفى) - السوست (امامى و خلفى) - الفرامل (امامى و خلفى)(تيل و طنابير) - فلتر الزيت -فلتر الهواء - فلتر البنزين - اكصدام امامى و خلفى - طلمبة الميه - طقم الكاتينة - سير الدينمو - سير التكيف - البوجيهات

[midoabokhadra]

بالنسبة لاسعار قطع الغيار مش عارف بالظبط
بس زجاج المرايات الجانبية مثلا ب75 الواحدة
تيل الفرامل انواع تقريبا الكويس ب250
فلتر الهواء ب110 . فلتر البنزين ب85 . طلمبة المية ب350
البوجيهات ب185
وفي الترموستات بتاع المروحة ف حدود 130
زجاج خلفي ب450 .كوبلن خارجي ب300 .طقم سلك بوجيهات ب150 .ماسورة مياة ب300 التشيكي . زرار الانتظار المثلث الاحمر ب135
الاسعار دي اسعار الالماني ربنا ميوصلك للدفع دة
اكشف على العربية كويس علشان متكتشفش عيوب وتصلح كاير

[Typerr]

متفكرش اشتري وانت متطمن عربيه جامده ربنا يحفظهالك

[ainshouka]

متشكر جدا على مساعدتكم

انا حاليا مفيش حاجة قدامى

انا بفكر فى كذا واحدة لكن الاوكتافيا داخلة دماغى اوى لان ليا قريبى بيسوقها وبيحملها بالعيلة كلها وساعات بيتغابى فى بعض المطبات وبصراحة العربية مستحملة معاه ومشتكتش

دا غير ان صاجها كويس فيستحمل

طيب تنصحونى بايه واركز على ايه بالظبط اثناء الكشف عليها

يعنى انتوا سوقتوها وعندكم معرفة ان العربية دى متبهدلة او سليمة

هل فيه حاجات ظاهرة مثلا سهل انى اعرف ان كانت العربية كويسة ولا لأ

وشكرا على مساعدتكم

[rompo10]

عربيه فوق الممتازه في كل حاجه تيل الفرامل ب 150 المرايا ب 225 جديده بس لازم تاخد بالك من غيار زيت الفتيس بيتغير كل 60000 وربنا معاك

[ainshouka]

انا اخدت جولة فى القسم هنا لقيت ان من اهم مشاكلها هو الفتيس انه بيبوظ لو متغيرش الزيت بعد ستين الف

بس مين فيهم اللى بيظهر المشكلة دى فيه اكتر الاوتو ولا المانيوال

ومنين اعرف ان صاحب العربية غير الزيت بتاعها


وهل فعلا السبب الوحيد لبوظان الفتيس هو عدم تغيير الزيت بس ولا فيه اسباب تانية

وسعر الفتيس بكام لو اصلى او استيراد

معلش متقل عليكم فى الاسئلة شوية :)

[midoabokhadra]

طبعا هتاخد حد معاك يشوف العربية رشة ولا لا
والاحسن ف انك تعرف العربية كويسة ولا لا شوف حد نضيف يعملك كشف شامل بالكمبيوتر ليها
واسال صاحبها مغير سير الكاتينة امتة
وحاول تخليك من اول موديل 2000

[midoabokhadra]

خد بالك من السخونة شوفها بتسخن ولا لآ لف بيها ف البلد شوية مش ف طريق مفتوح شوف هتسخن ولا لا
دور العربية ولف الدركسيون شمال خالص ولف بيها ويمين برضو ولف بيها شوف هتسمع صوت طقطقة ولا لا

[rompo10]

انا اخدت جولة فى القسم هنا لقيت ان من اهم مشاكلها هو الفتيس انه بيبوظ لو متغيرش الزيت بعد ستين الف

بس مين فيهم اللى بيظهر المشكلة دى فيه اكتر الاوتو ولا المانيوال

ومنين اعرف ان صاحب العربية غير الزيت بتاعها


وهل فعلا السبب الوحيد لبوظان الفتيس هو عدم تغيير الزيت بس ولا فيه اسباب تانية

وسعر الفتيس بكام لو اصلى او استيراد

معلش متقل عليكم فى الاسئلة شوية :)

احسن حاجه تعملها اول ماتشتري تغير الزيت علي طول خليك في المضمون لان صاحبها ممكن يقولك مغيره عشان يريح دماغه وسعر استيراد من 5500 ل 7000 دا عند مكاوي في المنصوره

[koka77]

انا معايا 2003 وكنت راكب لانسر 2008 والله العربية الاوكتافيا برقبتها وقطع غيرها مش غالية زي الالنترا والكيا وممتازة جد في كل حاجة بس اهم حاجة تدور علي عربية نضيفة وتكشف عليها كويس وفعلا اول ما تشتري غير زيت الفتيس والفلتر بتاع الفتيس وبيكلفو تقريبا الاتنين 1100 جنيه وربنا يكرمك ويوقعك في حاجة كويسة

[osama.m]

ربنا يكرمك ان شاء الله بحاجة كويسة
العربية مع صاحبي و ما شاء الله عليها محترمة جدا جدا جدا
لو لقيت عربية كويسة احسن حاجة تكشف عليها فب التوكيل عشان يقولولك لو محتاجة اي حاجة

[Haitham10]

هو الموديل دة مش هو نفسه الي من اول 98
ولو في اختلاف ياريت حد يوضح

وزيت الفتيس والفلتر ب 1100 جنيه ؟ّّ!!!!!!

[ainshouka]

ربنا يكرمكوا يا جماعة
ومتشكر جدا علي مساعدتكم