تعلية أكتافيا خليجى

[umaabed]

أبطال ألاسكودا عايز فتوة
حسب مراجعتى للفارق بين الاكتافيا الخليجى و الوكيل فى مصر الكل أجمع على أن عربيات الوكيل أعلى من الخليجى 3 سم، السؤال هل ممكن ارفع الاكتافيا الخليجى 2008 ال3 سم و عند مين ؟

[KHALED AYMAN]

قبل ما تعليها ..لازم تعرف انك هتفقد قدر معين من ثبات العربيه ..
تحديدا لما يكون فى هوا شديد على الطريق ...او مطبات هواء ...
الوضع الصحيح بتاع العربيه هو وضع الخليجى ..
العربيات بتاع الوكيل "متعليه" مخصوص عشان مصر ..وانا لا اثق فى اى شىء مصرى ..او صنع خصيصا لمصر
لكن عموما عشان تعلى العربيه مظبوط من غير عك ...هتشترى 4 سوست ..تجار الاستيراد بيقولو عليها السوسته الكبيره ..لكن صعب تلاقيها استيراد ...(لان العربيه فى كل دول العالم واطيه) هتضطر تشتريها من التوكيل ...
انا نفسى اوطى العربيه الى معايا

[umaabed]

شكرا يا باشا على الرد
بس كان نفسى أشوف رد من حد عمل التعلية و اعرف اذا كانت عملت فرق فى المطبات بتاعت مصر و لا لأ و كمان ممكن تتعمل فين و خاصة بالاسكندرية

[osama_ruan]

متابع

[KHALED AYMAN]

العفو يا باشا ...
لو عليتها مش هتحك معاك فى المطبات خالص ...
ممكن تعملها فى مركز نور الدين شريف على الصحراوى فى اسكندريه

[kareemafifi]

انا عليتها من كام شهر عند تي فاج اللي في اول الزراعي و انت جاي من سموحة بحوالي 80 جنيه اللي قدام بس علي فكرة

[umaabed]

تسلم يا معلم كريم، ممكن العنوان بتفصيل أكتر وليه التعليه من الامام بس بالرغم أنا شايف عربيات التوكيل عالية من الامام و الخلف و كمان ايه رايك فى ثبات العربية بعد التعديل

[kareemafifi]

العربية زي ماهي ثابتة و مفيش مشكلة خالص معايا انا معليها بقالي 6 شهور و بطلع علي طرق سريعة و بجيب بيها سرعات عالية و مفيش منها خوف خالص اطمن ، انت هتطلع من سموحة توصل لمرور ابيس تعدي القطر و تدخل شمال علي الزراعي ، تفضل ماشي لحد ما تعدي بنزينة شل و المدرسة الانجليزي كل دول علي ايدك اليمين هتلاقيه بعديهم علي طول

[umaabed]

الف شكر يا باشا

[KHALED AYMAN]

انا عليتها من كام شهر عند تي فاج اللي في اول الزراعي و انت جاي من سموحة بحوالي 80 جنيه اللي قدام بس علي فكرة

بس كده غلط جداااااا
ان العربيه تتعلى من ادام وورا لا هتبقى زبادى خلاط على الطريق ...خصوصا فى الهواء الشديد لان الهوا هيدخل تحت العربيه بكميه كبيره جدا هتمرجحها ...ممكن تكون حضرتك مش حاسس بكده بس ده واقعى
سؤال معلش ..هو الى عليتها عنده علاها ازاى ؟

[kareemafifi]

اولا استاذ خالد السلام عليكم ،
هلي العربية علت بمقدار 3 سم تقريبا فقط حطيلها زي رقائق كده الومنيوم من عند البطاحات من فوق حتة زيادة يعني زي اللي بتنزل في المواصفات المصري و هو نفس الارتفاع المصري من قدام و ورا و بقالي في 6 شهور و العربية ثابتة جدا الحمد لله و جبت بيها 195 من كام يوم علي طريق القطامية السخنة و مفيش اي مشكلة الحمد لله

[yoko]

اولا استاذ خالد السلام عليكم ،
هلي العربية علت بمقدار 3 سم تقريبا فقط حطيلها زي رقائق كده الومنيوم من عند البطاحات من فوق حتة زيادة يعني زي اللي بتنزل في المواصفات المصري و هو نفس الارتفاع المصري من قدام و ورا و بقالي في 6 شهور و العربية ثابتة جدا الحمد لله و جبت بيها 195 من كام يوم علي طريق القطامية السخنة و مفيش اي مشكلة الحمد لله

بتهيقلك هتلاقي العربيه بتعمل under steering بطريقة عجيبه

[kareemafifi]

لا انا عارف بقول لحضرتك ايه يا باشا ديه مش اول مرة اسوق عربية ، العربية ماشية تمام الحمد لله و مش انا لوحدي اللي ركبتها كمان و قال عليها ان هي تمام

[M_Marwan]

هل الخليجى بيحك فى المطبات ؟؟

[sherif67]

للاسف وبكل أسف أنا معايا هذه السيارة الخليجي و السيارة تحك في كل المطبات وخايف اعمل حاجة احسن تكون لعب في اساسيات العربية وتضر اكتر ما تفيد وشكرا